Seev Kev Kho Siab
Hmo no pw---ib leeg ntawm no
ib tag hmo---------cua tuaj txias zias
nag tshau tshias----qab vag tsib taug
suab nag txaug---nrog suab xob nthe
Kuv ib ce---pw nyob txias to
ib tag hmo----------tsis tuaj dab ntub
nco kev hlub--------uas dhau los lawm
tseem tshem tawm---tsis tau hauv siab
Vim tus ntxhiab---tseem tsis tau ploj
ntshe yog koj----tau pleev tshuaj ntxhw
nws thiaj tsw---------thoob ib ce lawm
thiaj khiav tawm-----tsis tau ntawm koj
Lub siab ntoj----hnov mob ploj loog
koj tus ntxoog---tseem nyob nrog kuv
pheej tseem thuv---tsim kuv lub siab
kua muag iab------thiaj los ntws nto
Vim yog tso------tsis tau koj tseg
daim teb npleg--------wb tau mus nthua
wb tau ua----------kev hlub thawj zaug
haj tseem paug-----zwm hauv nruab siab
Tim koj thiab------los tim kuv vwm
thiaj tseem zwm---tseem khaws koj cia
ua mob ntxhia------tuaj rau nruab siab
yam tshuaj iab---noj paug nruab ntsws
Txoj kev tws---zoo li dig muag
ncav tsis cuag---------mus los tsis tau
koj twb dhau---------mus ciaj luag sev
mus lawm ntev-----------txog tav li no
Kuv tseem nco---koj ib leeg xwb
kuv lub hlwb---tseem npwb tseem tos
hnub dhau hmos---tseem nyob tos koj
yam tej nroj--------nyob tos dej nag
Xyoo dhau tag---tseem nyob li qub
vim vwm hlub-----------rau koj ib leeg
zoov nuj txeeg-----kuv nrhiav koj txhua
neeg yas ncua---------nug kuv hais tias
Leej twg ntxias---kuv nyob vwm nco
kuv tsuas co---------taub hau tsis paub
tsis to taub-------------nej nug dab tsi
Lam luag ntxhi-------kua muag teev yees
Tsis kam lees------txog txoj kev nco
ntshe hmo no------------laj pw kaj ntug
tsis muaj tug------------lub cev tsis sov
kev hlub txov---------nyob nyuaj ua luaj
Lub suab quaj--kua muag ntxaum ncoo
Lub suab nroo---------txoj kev lwj siab
leej twg thiab------------zoo li kuv no
thov nws ho---------pab nkag los qhub
Seb txiv tub----lub siab puas nqig
tshav ntuj nrig---------zoo li nej thiab
lub ntuj tshiab------mus rau ntuj tsaug
hmoob hluas nraug--puas yuav nyab xeeb
Qhia qhov tseeb---kuv kho siab heev
thiaj tuaj seev---------thaj chaw qub no
dej ntws nto--------lub ntuj tsaus nciab
hnov lub siab------tseem mob khoob lug
Tsis muaj tug--------zoo li yav tas
vim li cas------------yuav mob ua luaj
tsis muaj tshuaj-------yuav los kho tau
nco neeg dhau-----tsis paub nyob lawm
Muam nkauj ntxawm--yog koj tau hnov
thov xa xov--------qhia rau hmoob tub
koj tsis hlub--------kuv tus nyob deb
los thov teb---------thov tu kuv moo
Lo lus zoo---muab hloov ua phem
tig los cem-----------kom ua ib siab
hloov siab tshiab---nrhiav lwm tus dua
kuv thiaj ua---------tau ib siab mog
Yog tias yog---koj pheej hais zoo
pheej tseem nroo-----txog kev nco kuv
haj yam tshuv-------mob kuv lub ntsws
kuv kev tws--------kawg txov txoj sia
Thiaj hais qhia---kom koj paub tseeb
tub loj leeb----------li kuv tseem nco
ntshe tiam no------tso koj nyuaj heev
ncauj lam seev-------tias tso koj mus
Plawv tsis tus-----xav tsis zoo siab
vim koj ntxhiab------thiaj tsw xis kuv
thiaj tsw huv-----hnia tsis paub dhuav
thiaj xav yuav--------mus ua kuv tug
Tsis xav nrug------koj tag tiam no
yuav nco nco--------mus tas tiam neej
nyob twm zeej------ntshe yuav zoo dua
qhov mus ua-------luag lwm tus vauv...
os nkauj hmoob!!!
Lam sau xwb tsis zoo txhob xav li cas lawd!!!