Yog Tseem Muaj Lub Hnub Tuaj

Subject: Yog Tseem Muaj Lub Hnub Tuaj Wed Nov 13, 2013 1:02 pm

First topic message reminder :

Ib tsoom phooj ywg yog leej twg ho muaj lub neej zoo li Pej Sim thiab Npauj Lias nkawv lub no los ho ua lub lub siab ntev seb puas muaj hnub rov tau sib ntsib mog....

Subject: Re: Yog Tseem Muaj Lub Hnub Tuaj Wed Nov 20, 2013 1:49 pm

   Npauj Lias thiaj tau tsa qhov muag mus saib cov hnub qub ib pliag tag ces Npauj Lias thiaj li tau hais rau Pej Sim hais tias:

   Kuv twb saib thiab nrhiav tau kuv lub hnub qub uas ci tshiab tshaj rau kuv lawm tiag, nws yog lub nyob rau ntawv na Pej Sim.

   Yog lub twg tiag ma Npauj Lias? Koj sim taw tes qhia kiag rau kuv seb yom es kuv thiaj li paub tseeb tiag tias yog lub twg no os, thiaj yog lub uas nws ci tau tshiab tshaj rau koj lub zeem muag thiab lub uas koj tau nyiam tshaj plaws no Npauj Lias.

   Pej Sim koj sim saib mus rau sauv es nws twb yog lub uas nyob rau ntawm cov ntau ntau ntawv ib sab uas yog lub ci tshiab tshaj ntawv xwb los mas.

   Pej Sim saib sau ntuj tag ces thiaj hais rau Npauj Lias hais tias:

   Aub! Es yog lub ntawv lov nws twb yog lub kuv pom nws tshiab tshaj rau kuv thiab ne. Yog koj tsis xav li cas thiab no ces cia wb kuj yuav ib lub hnub qub xwb os yom Npauj Lias? Thiab koj puas paub hais tias ntsauv hnub qub ntau ntau uas nyob rau ntawm wb lub ib sab ntawv yog cov hnub qub uas luag tej laus tis npe hu ua hais tias cov hnub qub txhiaj txiv mim no tiag Npauj Lias. Koj sim xav seb cov hnub qub no twb muaj puag thaum ntuj tsim teb raug los lawm, ua li muaj pes tsawg nkawm nkauj nraug twb tau saib cov hnub qub no dhau los lawm ne yom.

Continue.....

Subject: Re: Yog Tseem Muaj Lub Hnub Tuaj Thu Nov 21, 2013 11:38 am

   Pej Sim cov hnub qub no nyob nyiaj txhiab puas xyoo los lawm tsis paub hais tias muaj pes tsawg nkawm nkauj nraug tau saib cov hnub qub no dhau los lawm os. Tab sis kuv zoo siab heev hais tias, peb cov pom koob yawg koob, los rau peb tej pog tej yawg, los rau peb tej niam tej txiv, los rau peb txheej nim no thiab kuv xav hais tias peb cov xeeb leej xeeb ntxwv mus lawv yav tom ntej yuav pom cov hnuj qub no mus tsis muaj hnub kawg li no tiag Pej Sim. Kuv yuav tau rov qab mus xyuas zaub xyuas mov sab hauv tsev lawm thiab ces ib me ntsis wb mam li sib ntsib dua rau tim teb nawb yom Pej Sim.

   Ua li los mas Npauj Lias koj rov qab mus saib zaub mov es ib me ntsis wb mam li rov sib ntsib rau tim teb dua, nyob tsam koj ho ua zaub mov kub nyhiab ces hnub no koj niam ho cem koj thiab os. Tsis tas li ntawv los tsam ib chim kuv ho tau nrog koj noj cov mov tsw kub nyhiab thiab ces cia kuv nrog koj nqa koj lub thoob dej es wb mus os yom Npauj Lias.

   Npaub Lias thiaj li tau rov qab los ua tshais noj lawm hos ntawm Pej Sim ces kuj tau rov qab mus tsev lawm tiam sis Pej Sim lub siab mas ua yoj ua yees xav ntsoov hais tias yuav tuaj mus ntsib Npauj Lias rau tim teb xwb. Npauj Lias lawv tsev neeg xub ua ntej tuaj txog rau tim teb lawm, Pej Sim ho mam li lawv qab tuaj mus txog rau tim teb tib yam nkaus thiab. Thaum Pej Sim thiab Npauj Lias nkawv mus hlais nplej tau ntev loo lawm. Npaus Lias thiaj li phua tau ib txauj dib muab cev rau Pej Sim thiab hais tias:

Continue.....

Subject: Re: Yog Tseem Muaj Lub Hnub Tuaj Mon Dec 16, 2013 7:36 am

Noj dib os Pej Sim! Koj puas tau nqhis dej nab yom? Nag hmo koj hais rau kuv tias koj muaj lus xav hais qhia rau kuv tau paub no ua rau kuv tau txhawj txog koj heev li os, tsam no wb twb muaj sib hawm lawm ces koj muaj lus dab tsi xav hais qhia rau kuv ces tsam no kuv mloog koj hais lawm xwb tiag Pej Sim.

Pej Sim thiaj li tig los saib Npauj Lias, nkawv ua ob lub ntsej muag luag ntxhi ces Pej Sim muab tes los txais txauj dib ntawm Npauj Lias tes thiab hais rau Npauj Lias hais tias:

Ua tsaug mog Npauj Lias, koj txauj dib no nws ntxim qab heev li hos! Hais txog ntawm cov lus uas nag hmo kuv tau hais rau koj ntawd ces koj tsis txhob txhawj xeeb txog nawb mog nws tsis yog ib qhov teeb meem dab tsi loj os, nws tsuas yog kuv muaj ib nqi lus xav nug koj xwb os Npauj Lias.

Pej Sim koj muaj dab tsi nyob rau nruab siab ces hais kiag los rau kuv mas.

Npauj Lias wb twb tau ua nkauj ua nraug los tau ntau lub xyoo lawm, kuv xav mas tam sim no txog lub caij lub sib hawm uas wb yuav tau sib sau los ua txij ua nkawm nyob noj ua ke lawm es ua li koj ho xav li cas thiab nab Npauj Lias?

Pej Sem kuv los yeej xav ib yam li koj hais thiab tiag! Yog li ntawv yuav yog thaum twg wb mam li los sib sau ua lub neej nyob ua ke nab Pej Sim?

Pej Sim thiaj li tau rov teb rau Npauj Lias hais tias:

Kuv xav mas yog koj tsis xav li cas thiab koj kam no ces lub hli xiab tom ntej no xwb tiag Npauj Lias!

Continue.....

Subject: Re: Yog Tseem Muaj Lub Hnub Tuaj Tue Dec 17, 2013 6:48 am

Aub! Lub hli xiab rau tom ntej no yog lub 11 hli xiab, ntawm kuv mas thaum twg los kuv yeej kam los mas Pej Sim. Tab sis kuv niam thiab kuv txiv nkawv ua teb ntau ntau heev kuv niam pab tsis tshua tau kuv txiv ua teb lawm, vim hais tias kuv cov nus yau coob coob ntshe nkawv yuav muab tsis tag nkawv tej qoob loo los cia tseg ces yog koj ho tsis xav li cas no ces cia kuv pab kuv niam kuv txiv ua teb kom tag tso yom Pej Sim. Koj thiab kuv wb ho ua tiag rub lub siab ntev kom txog rau lub 1 hli ntuj xiab tso wb mam li los sib sau nyob ua ke nawb.

Npauj Lias...yog koj ho hais li ko no los wb mam li ua siab ntev tos kom txog rau lub 1 hli ntuj xiab li koj tau hais los ntawv, tab sis tsis pub dhau rau tom ntej ntxiv li lawm laiv Npauj Lias.

Ua li kiag los mas Pej Sim, kuv mam ua raws li koj cov lus hais os, ua koj tsaug rau koj txoj kev uas koj tseem to taub kuv mog thiab koj yuav tsum tuaj coj kuv nrog koj mus rau lub 1 hli ntuj xiab nawb.

Ua li los mas Npauj Lias...kuv mas li nco ntsoov li ntawv rau wb cov lus cog cia rau hnub no thiab kuv mam li npaj lub siab tos koj rau lub 1 hli ntuj xiab mog.

Txij li hnub ntawv los ces Npauj Lias thiab Pej Sim nkawv ob leeg niaj hnub sib ua luag mus ua teb ua ke. Lub sib hawm kuj tau dhau mus lawm zoo yam li ib vuag cua dhau mus. Lub 12 hli ntuj nkawv nrog luag ib zej tsoom sau qoob los cia tuaj rau nruab txhab. Luag ib zej tsoom ces npaj tsiab peb caug los noj, hos ntawm nkawv ob leeg ces nkawv ob lub siab tsuas npaj ntsoov txog rau txoj hauv kev yuav los sib sau ua txij ua nkawm lawm xwb. Tshuav tsis muaj pes tsawg hnub lawm xwb ces twb yuav txog rau lub caij nyoog uas nkawv tau teem tseg cia lawm tiag. Lub sib hawm twb tau los ze lawm zuj zus tsis tshuav pes tsawg hnub lawm xwb ces twb yog hnub uas Pej Sim thiab Npauj Lias nkawv tau tos tos los lawm ntev.

Continue.....

Subject: Re: Yog Tseem Muaj Lub Hnub Tuaj Wed Dec 18, 2013 6:13 am

Ua ntej rau hnub ntawv tshav ntuj nrig, kab noog quaj sis zim, hav tsawb liab kaj nrig, Npauj Lias thiab Pej Sim nkawv mus de zaub npuas. Ua li cas hnub no yuav kho Pej Sim siab ua luaj li tsis paub hais tias yog vim li cas. Pej Sim thiaj li tau hais rau Npauj Lias hais tias:

Npauj Lias a....koj puas xav mloog kuv hais kwv txhiaj nab, yog hais tias koj xav mloog no ces kuv hais ib zaj kwv txhiaj rau koj mloog yom?

Kuv xav mloog koj hais kwv txhiaj kawg li mas Pej Sim, yog koj txawj hais kwv txhiaj no ces hais los rau kuv mloog xwb tiag.

Pej Sim thiaj li hais rau Npauj Lias hais tias yog li ces koj mloog nawb:

Nyiaj ye....me niam leej ntxhais cas lub dej teev lawm lub lwg yuav teev yuj yees tuaj rau daim me nplooj ntshes, yog txiv leej tub li kuv daj dees tau niam leej ntxhais li ntawm koj los ua kuv txiv leej tub ib leeg sev es ntshe lub niaj lawm lub xyoo hmo los yuav tsis nco ntau hnub tuaj los yuav tsis nco ntev.

Nyiaj ye....me niam leej ntxhais cas lub dej teev lawm lub lwg yuav teev yuj yees tuaj rau daim me nplooj qhaus, yog txiv leej tub li kuv daj dees tau niam leej ntxhais li ntawm koj los ua kuv txiv leej tub ib leeg nyab es ntshe lub niaj lawm lub xyoo hmo los yuav tsis nco ntev hnub tuaj los yuav tsis nco ntau.

Nyiaj ye....me niam leej ntxhais qab tsuas txawm tau nplooj mus tsawb suas qaum tsuas txawm tau nplooj mus tsawb liab, me niam leej ntxhais wb ntaus tau kev khaub plees nkauj nraum zoo lawm luaj no xab nyeej tawm rau lwm xyoo tav li no koj yuav yog lawm txiv leej tub li kuv no sev teej cuab ua txiv leej tub ntej lawm tej sis niab, ntshe yuav zoo tag lawm kuv txiv leej tub 9 5 8 nplooj siab.

Nyiaj ye....me niam leej ntxhais qab tsuas txawm tau nplooj mus tsawb suas qaum tsuas txawm tau nplooj mus tsawb txhawv, me niam leej ntxhais wb ntaus tau kev khaub plees nkauj nraum zoo lawm luaj no xab nyeej tawm rau lwm xyoo tav li no koj yuav yog lawm txiv leej tub li kuv no sev teej cuab ua txiv leej tub ntej lawm tej sis zawv, ntshe yuav zoo tag lawm kuv txiv leej tub 9 5 8 nplooj plawv ces yuav zoo nyog lawm lub laj xeeb.

Continue.....

» Nrog Kuv Mloog Nkauj ua Si
» Hnub No Hmongheaven Forum Zoo Nkauj Zog Tuaj Lawm
» Peb Hmoob Tseem Nrog Luag Muaj Ntau Yam Neej Ua Nyob Ntiaj Teb
» Tsis Muaj Sij Hawm Tuaj Cuag
» Nej cov tuaj hauv no muaj pes tsawg xyoo lawm xwb?