Yog Tseem Muaj Lub Hnub Tuaj

Npauj Lias thiaj li teb rau Pej Sim hais tias: Ua li los mas Pej Sim….txawm hais tias koj tsis nug kuv lawm los kuv yeej kam kawg li los mas. Kuv twb tau nyob tos koj tau li 50 lub xyoo no los lawm, xyov yog tus dab tsi hmoov los sis yog kuv hmoov ces kuv thiaj li tau rov los pom koj thiab ntsib koj dua es ua rau kuv zoo siab kawg nkaus li os Pej Sim. Wb twb tau tuaj nyob rau nraum zoov no tau ntev ntev lawm thiab koj los twb tsis tau zoo heev ces cia kuv tuav koj tes es wb rov qab mus lawm hauv tsev os yom Pej Sim.

Ces Npauj Lias thiaj li coj Pej Sim rau qab mus hauv tsev lawm ua rau Pej Sim lub siab kub lug hais tias, yuav hais qhia rau nkawv tus tub Pej Huam hais tais nws yog Pej Huam txiv no. Hnub ntawv Pej Huam lawv ua teb tsis tag ces Pej Huam lawv kuj tau pw rau nram teb lawm tsis tau rov qab los tsev rau hmo ntawv. Pej Sim thiaj li tau tos kom Npauj Lias  thiab Pej Sim nkawv tus tub Pej Huam los txog tsev tso. Pej Sim thiab Npauj Lias nkawv tos tau li ob hnub tom qab ntawv Pej Sim los kuj muaj zog thiab kuj ho zoo lawm ntau tuaj.

Thaum cov me nyuam lawv los tsev txhij tag ces Pej Huam niam thiaj li hais tias: Kuv tus me tub Pej Huam….thiab tag nrho rau cov me nyuam sawv daws, kuv yuav qhia koj txiv Pej Sim rau koj mog….me tub Pej Huam los sis nej yawg Pej Sim rau nej cov me nyuam sawv daws nawb. Tus no ces yog koj txiv los sis yog nej yawg Pej Sim nawb mog cov me nyuam sawv daws.

Pej Huam thiaj li teb rau Pej Huam naim hais tias: Kuv niam….tsis yog koj tsis xis neej lawm lod? Los yog ua li cas rau koj lawm? Koj yuav yuam kev neeg loj ua luaj li na….kuv niam. Koj twb tau hais tias, kuv txiv lub npe hu ua Pej Sim no ne! Hos tus txiv ntxawm no nws twb hu ua Sim Ceeb no xwb es nkawv ob lub npe twb tau sib txawv, twb tsis zoo ib yam, twb zoo tsis sib thooj ne….kuv niam ntshe tus txiv ntxawm Sim Ceeb no yuav tsis yog kuv txiv pob.

Sim Ceeb thiaj teb rau Pej Huam hais tias: Me tub Pej Huam….txhua yam uas koj niam tau hais los ntawv yeej muaj tseeb nawb. Kuv yeej yog koj txiv Pej Sim lawm tiag os….me tub Pej Huam, thaum ub kuv tau hu uas Pej Sim no tiag, tiam sis tam sim no kuv tau hloov npe hu ua Sim Ceeb lawm no thiab nws tseem muaj lo hu ua Sim no nyob rau hauv tsuas yog tau tshem lo hu ua Pej no tawm lawm xwb. Me tub Pej Huam….koj sim saib seb kuv lub npe hu ua Sim Ceeb no tseem muaj lo hu Sim no nyob rau hauv ne. Kuv yeej yog koj txiv lawm tiag tiag ho….me tub Pej Huam. Hnub no kuv zoo siab heev uas lub ntuj tseem pub kuv rov qab los pom koj niam neb ob niam tub. Kuv thov txim ntau ntau uas thaum ub kuv nrhiav tsis tau koj niam neb ob niam tub es kuv thiaj li tau cia neb ob niam tub nyob tau txom nyem ntsuav li no mog. Kuv tus me tub Pej Huam….yog nej cov me nyuam tsis xav li cas no koj niam wb yuav piav wb txoj dab neeg rau nej cov ua me nyuam tau mloog kom nej ho to taub zoo txog ntawm koj niam wb lub neej thiab mog.

 
Continue......

Ces Sim Ceeb thiab Pej Huam niam nkawv thiaj li piav nkawv lub neej los yog nkawv zaj dab neeg rau cov me nyuam mloog tag ua rau lawv tu siab heev ces lawv thiaj li sib qawg quaj.

Sim Ceeb thiaj li hais tias: Me tub Pej Huam thiab me nyab nrog rau cov me xeeb ntxwv tas nrho, kuv xav hais tias kuv yuav los nrog nej nyob los ua koj niam nej txiv kom tag kuv lub neej txoj sia, tsis paub hais tias xyov tshuav sib hawv ntev los tshuav luv lawm xwb. Koj ho xav li cas thiab xwb os….me tub Pej Huam?

Pej Huam quaj quaj thiab hais tias: Kuv txiv….kuv txoj kev ntshaw leej txiv los tau 50 lub xyoo no lawm, kuv twb xav hais tias ntshe yuav tsis pom koj lub me ntsej muag li no, ntshe yuav tsis tau hnov koj lub me suab lus seb yuav hais lus mos los sis hais lus ntxhib thiab ntshe yuav tsis tau hnov koj tus me ntxhiab tsw seb yuav tsw qab los sis tsw ntxhiab no. Kuv txiv….yog hias tias yuav muab txhua yam ntawm kuv txoj kev ntshaw leej txiv coj los hais mas ntshe yuav muab ob peb hnub coj los piav thiaj li yuav piav tag os….kuv txiv. Kuv thov ua lub ntuj lub teb tsaug ntau uas lub ntuj lub teb tseem coj koj los txog rau kuv niam wb lawm thiab es ua rau kuv zoo siab heev kawg nkaus li os….kuv txiv. Kuv twb tau tu siab nrho lawm twj ywm hais tias ntshe tiam no yuav tsis nrog luag tej muaj txiv los nrog luag hu li lawm no tiag. Kuv zoo siab tshaj plaws uas tsis muaj ib yam dab tsi coj los pauv tau li es tsis pom qab yuav hais li cas rau koj tus ua txiv tsuas yog muaj txoj kev zoo siab coj los hais rau koj xwb mog….kuv txiv.

Ces Sim Ceeb thiab Pej Huam nawv ob txiv tub sib puag quaj tag ces Sim Ceeb hais rau Pej Huam hais tias: Koj txiv thov txim ntau ntau ntawm kuv tus me tub thiab nws niam neb nawb. Koj txiv ces twb tsis txawj ua txiv thiaj li tau ua rau neb ob niam tub plam mus nyob thawj luag qab zej dai luag qab zos thiab nyob ntshaw luag txiv zoo li no. Txij li hnub no mus lawm yav tom ntej, kuv yuav los hlub koj niam neb kom mus txog rau hnub koj txiv txoj siav tu ib pas nqus tsis tuaj lawm thiaj li yuav tso koj niam neb tseg lawm xwb nawb.

Txij li hnub ntawv los ces Sim Ceeb thiaj li ua tau ib pluag mov loj heev hu teb neeg zej zog teb chaws tuaj nrog noj nrog haus qhia rau sawv daws tau paub hais tias Pej Sim rov qab los lawm. Tom qab ntawv ces Sim Ceeb kuj tau coj nws cov niam tub los nyob rau nram nroog, nrhiav vaj tsev rau lawv nyob, nrhiav liaj nrhiav teb rau lawv ua thiab nrhiav tsev kawm ntawv rau cov xeeb ntxwv mus kawm. Sim Ceeb coj nws tsev neeg los nyob tau lub neej tshav ntuj nrig nrog luag pej kum nyob rau hauv lub teb chaws lawm. Muaj ib hnub ces Sim Ceeb coj Npauj Lias mus noj mov ua si rau tom hav liaj ces thaum nkawv noj mov tag. Npauj Lias xav hais tias ntshe nkawv yuav rov qab los tsev no, tab sis Pej Sim pheej tsis txawj los ces ua rau lub ntuj tau tsaus lawm.

 
Continue.......

Npauj Lias thiaj li tsa qhov muag mus saib rau saum ntuj tag ces teb rau Pej Sim hais tias: Aub! Kuv saib mas wb lub hnub qub haj tseem nyob li qub tiag es koj sim saib seb Pej Sim.

Pej Sim teb rau Npauj Lias hais tias: Yog los mas Npauj Lias, wb lub hnub qub tseem nyob li qub. Npauj Lias….koj paub nab, thaum koj nyob deb ntawm kuv lawm, zaum twg kuv nco koj ces kuv tsuas nrog wb lub hnub qub tham seb nws puas pom koj xwb.

Npauj Lias teb rov qab rau Pej Sim hais tias: Pej Sim….kuv los yeej zoo ib yam li koj thiab os. Thaum kuv nco koj ces kuv tsuas saib ntsoov lub ntuj, kuv xav hais tias lub ntuj thiaj li loj es nws thiaj li yuav pom tag nrho cov neeg nyob rau hauv lub ntiaj teb no es nws thiaj li yuav pom koj thiab pom kuv. Kuv saib lub ntuj nrog rau wb lub hnub qub thiaj li ua rau kuv ib nyuag kaj siab me ntsis tuaj lawm xwb thiab thiaj li ua rau kuv paub hais tias koj tseem muaj txoj sia nyob. Pej Sim….thaum ub koj tau hais tias uas kuv puas twv tau hais tias muaj pes tsawg nkawm nkauj nraug tau saib cov hnub qub no, thaum ntawv ces kuv twv tsis tau, tab sis nyob rau hmo no ces kuv twv tau lawm tiag.

Pej Sim rov nug Npauj Lias hais tias: Npauj Lias….koj twb twv tau lawm no es ua li muaj pes tsawg nkawm nkauj nraug nab?

Npauj Lias thiaj li teb rau Pej Sim hais tias: Kuv twv tau hais tias muaj ib nkawm nkauj nraug, nkawv mas yeej siab ntsoov cov hnub qub no tsis paub dhuav li, txawm nkawv nyob ob leeg los sis nkawv nyob ib leeg yeej saib ntsoov cov hnub qub no mus li xwb.

Thaum Npauj Lias hais li no tag ces Pej Sim thiab Npauj Lias….nkawv ob lub ntsiab muag tau tig los sib ntsia ces nkawv ib leeg saib ib leeg tsis hais lus li lawm. Kaj ntug tag kis thaum Npauj Lias tsim los na has twb pom pom kev lawm thiab ua li cas twb tsis pom Pej Sim lawm. Npauj Lias thiaj li tau tawm ntawm lub tsev liaj mus txog rau nraum zoov na has pom Pej Sim sam sim saib hlub hnub tawm tuaj.

Npauj Lias hais tias: Pej Sim….koj sawv ntxov heev li es yog koj pw tsis tsaug zog zoo los?

Pej Sim txawm teb rov rau Npauj Lias hais tias: Kuv lo….kuv pw tsaug zoo heev li hos es tsaug zog zoo li ib tug me nyuam mos liab xwb tiag, tab sis yog kuv xav saib lub hnub tawm tim npoo ntuj xwb os. Npauj Lias….koj sim saib lub hnub tawm tau zoo nkauj heev li tiag.

Npauj Lias thiaj li teb rau Pej Sim tias: Tiag os yom….Pej Sim, nws tawm tau zoo nkauj heev li.

Pej Sim thiaj li hais rau Npauj Lias hais tias: Npauj Lias….tus me neeg uas kuv hlub, kuv hais qhia rau koj paub tias kom koj nco ntsoov hais tias lub neej yav pem suab, txawm kuv yuav nrog koj nyob ntev, nyob luv thiab txawm kuv yuav nyob rau qhov twg lawm los xij. Thov kom koj nco ntsoov hais tias yog hauv lub ntiaj teb no tseem muaj lub hnub ci ntsa iab li no ces kuv yeej tseem nrog nraim koj nyob tag mus ib txhis no nawb….Npauj Lias.

 
Continue.......