Subject: Re: NYIAJ TXIAG PAUV TSIS TAU KEV HLUB Thu Oct 22, 2015 12:01 pm
Tsis ntev tom qab, vim txoj kev txhawj kev ntshai tias tsam lwm tus ho yuav los cuam tshuam dua wb txoj kev hlub. Kuv thiaj txiav txim siab tuaj yuav koj mus ua kuv tus niam tsev kom wb tau nyob ua ke mus tag ib sim. Tab sis vim kuv yug los rau ib tsev neeg pluag thiaj ua rau koj niam ntshai tsam koj lub neej tsis zoo thiaj tsis kam muab koj rau kuv. Hmo ntawd thaum kuv tuaj txog wb tau tham hnov koj lub suab luag ntxhi txawm yog tias lub ntiaj teb yuav tsaus nti tsis pom qhov twg los nyob hauv kuv lub siab kaj lug npaum li ib ntuj hnub qub qaim hli nrig.
Sij hawm dhau mus zuj zus ua rau lub caij nyoog hloov tas zoo tam ntua ib cim ntuj qhua dhau mus ua ntuj nag thiaj ua plam tag nrho koj thiab kuv txoj kev sib hlub sib nco mus ib sim neej. Tej laus ib txwm hais tias liaj teb tsis zoo ces tsuas yog ib cim tab sis zaum no wb plees nkauj nraum tsis tau cas yuav plam plhuav mus tas ib sim lawm tiag os.
Tom qab lub hli poob mus ua rau lub ntuj ntuj dub nciab npaum yuav los nag, lub ntiaj los txawv tag. Cas lub hnub ho pib yuav tawm tuaj hnov qaib qua lag rhe ntsia tim qab ntug pib ntsa li yuav pom kev. Thaum ntawd kuv thiaj ua siab mus coj kuv leej poj los ua kuv sev, thiaj ua rau qaib qua thoob zej dev tom thoob zos. Ua ke ntawd kuv txawm pom kuv tus zoo phooj ywg los hais rau kuv tias koj tus hluas nkauj quaj heev li. Kuv xav npaum twg los hlub koj npaum ntawd tab sis tsis paub tias vim lub ntuj los vim txoj hmoo thiaj ua rau kuv tau plam koj mus. Txij ntawd los zoo tam li tus dej nyias ntws nyias tsis rov los sib tshuam lawm xwb tiag.
Ib lub hlis tom qab ntxiv, hnov tias koj tau mus yuav txiv lawm. Kuv xav tuaj koom koj rooj tshoob ua zaum kawg los tsis zoo raws li lub siab xav. Zoo yam li tej liab cuam ib ncav tes tsis cuag thiaj ua rau dhau mus ua txoj kev tshua lawm xwb tiag.
Ib sij huam, wb txoj kev sib hlub sib nco zoo tam li lub hnub uas txawm yuav poob mus los tseem yuav tig rov los ziab ib vuag rau tej hauv roob. Ntshe yog wb txoj hmoov tiag tsis ntev tom qab li 2 lub hlis koj thiaj tau thov kom kuv tuav koj tes hla dej. Hnub ntawd tshav los kub tav su nrig nkoj los tsis muaj phuaj los npaj tsis tau, tej neeg twb mus dhau tag lawm coob kuv xav tsis thoob tias yog vim dab tsi tiag. Lub sij hawm peb hla dhau dej mus kuv saib koj lub ntsej muag puas tsus lawm ib hnub ke tsis noj ib dia mov. Kuv tsis xav tias txoj kev pab zaum no yuav ua rau koj muab xav txog lub neej tas los, tom qab no kuv mam paub tias qhov koj tau thov kev pab ntawd twb yog vim koj xav tuav kuv tes ua zaum kawg xwb.
Txawm tias yuav dhau lawm ntau xyoo los kuv twb tsis xav txog dab tsi, tsuas xav tias nag tshauv nws tsuas los ib vuag txoj kev nkauj nraug cia mam muab tig rov los ua txoj kev sib hlub tam li tej nus muag. Tab sis ntawm koj cas ho tsis xav li kuv xav, ib hnub ua rau koj lub siab mob loj zuj zus. Thaum kawg kuv mam hnov koj lo lus hais tseg tias " Nyiaj txiag los yeej pauv tsis tau wb txoj kev hlub....Txawm muab tas nrho koj niam koj txiv tej nyiaj kub los tsuas yog koj lub neej kua muag" xwb. Thaum kuv hnov li no ntshe koj twb ncaim lub ntiaj teb no mus deb heev lawm os. Cas ho tsis yog npau suav, txoj kev tuag nws yuav mus tsis muaj hnub rov qab. Txawm li ntawd los thov kom koj tus ntsuj plig tau txais txoj kev kaj siab rau lub neej tiam tom ntej nawb mog....