*HMO PEBCAUG*

Hmo Pebcaug ntawm lub hli xaus,
Rau xyoo laus Hmoob lub pebcaug,
Yuav tau txaug ntawv nyiaj ntawv kub,
Npaj txhua lub qe rau txhua tus,
Yuav coj mus nqee ib tsev neeg,
Peb txhua leej cov me ntsuj plig,
Kom los txhij thiab los txhua nrho,
Rau hmo no vim yog hmo pebcaug...,

Lub ntuj tsaus ces yuav teeb txhuv qe,
Rau ib tse tus hlob rau tus yau,
Muab los rau ntawm lub tais txhuv,
Tso qe puv ces mus nqa qaib los,
Muab xyab txhos muab kuam los hu,
Peb txhua tug cov me ntsuj plig,
Kom los txhij yuav los yuav qe,
Kuv ib tse me ntsuj plig los kom tag...,

Leej txiv nqa tais ntim txhua qe,
Nqee ib tse txhua tug ntsuj plig,
Kom los txhij nrog rau tus xyab,
Nyob ib sab muab ncwm khub qaib,
Kuv me naib niam nrog rau cov menyuam,
Los txhij txhua yuav los yuav qe,
Kuv ib tse kom nyob luag ntxhi,
Tej ntsujplig kom los txhua nrho,
Rau hmo no vim yog hmo pebcaug...,

Caij tsaus ntuj sawv daws los txhij,
Tej kwvtij neej tsa tuaj txhua nrho,
Rau hmo no vim yog hmo xaus,
Rau xyoo laus tos txais xyoo tshiab,
Lub siab kiab thaum npaj txhij txhua,
Sawv daws ua zaub mov tshiab noj,
Zaum tsheej npoj tham luag ntxhwbntxhi,
Npaj rau tagkis tos txais lub Xyoo Tshiab….,

Tuaj peb zov hmo os lawv..., vim yog hmo 30 lawm na!!!

Tos txais hnub tshiab yuav tawm tuaj rau tagkis!!!

Xyoo laus tag ces xyoo tshiab yuav tawm tuaj lawm los peb mloog nkauj os lawv...,