LUB NEEJ NYOB TOJ SIAB
Sawv ntxov tsees ntuj pos huab niab
Puas kho siab tej me nkauj hmoob
Nyob pem roob mi rheeb caus yaum
Ya sib caum quaj kho siab zim
Ntxhais nkauj mim nej ua dab tsi
Mus ua si puas kam coj peb
Mus ua teb puag nram ntug dej
Mus cog nplej sib pauv zog ntws
Cog pob kws pem tej roob tsuas
Ho mus xyuas nej tej teb yeeb
Me nas txheeb tshe zoov kaj lug
Thaum kaj ntuj nraj yij hos huam
Coj mi nyuam rheeb nplooj zeeg tshaws
Hmoob sawv daws lub neej toj siab
Tau ntau txhiab xyoo dhau los lawm
Ua kev kawm rau sab qoob loo
Hmoob neej zoo vim kev ua noj
Tub ntxhais los sib xaiv sib tham
Nyob ib tsam lub ntuj tsaus zuag
Tuaj sib cuag nraum tej tog tsev
Tsis pom kev hnub qub dawb vog
Tseem xav txog lub neej thaum hluas
Peb mus xyuas hmoob noj peb caug
Caij ntug tsaug me te dawb vog
Peb mus txog rau roob cuam kau
Hluas nkauj ntau tsis muaj hluas nraug
Mus tham raug hmoob leej ntxhais nquag
Tsaus ntuj zuag pub npua tas nrho
Mus ua hmo rau tej laus noj
Kuv mus soj seb zoo li cas
Noj hmo tas ntxuav taw tas nrho
Txawm nce hlo mus pw saum txaj
Kuv tshuab raj suab nrov nkoov zij
Nkauj hmoob tsim dheev nruab dab ntub
Tham kev hlub seev yees tsis kawg
Kuv cov npawg lawv mus pw tas
Kuv saib cas twb ib tag hmo
Tsis nco no vim muaj hluas nkauj
Zaus no lauj wb tham txaus siab
Qab ntuj liab hnub yuav pib tawm
Txog sij hawm kuv yuav los tsev
Nws thiaj cev loos txhais me tes
Tuav kuv ces tias kuv mus thiab
Cas kho siab tshaj li os hmoob
Neej pem roob ib vuag dau plaws
Peb sawv daws txawm pib sau nra
hlais nplej tag quav nplej daj rhuv
Leeg nras txhuv khiav los thaib teb
Ncua kev deb hav zoov nuj txeeg
Tsis muaj neeg lam taug kab ntxhw
Tsaus ntuj pw tom tej plawv zoov
Mi noog roov sib tog nqhij nqhawj
Tsis nco txhawj tsam muaj poj ntxoog
Kaj ntug txoog hnub tshiab tawm tuaj
Hos huam quaj suab cuam kaus laws
Hmoob sawv daws kho siab tshaj tiag
Los ib pliag txog dej nab qhoom
Muab tej khoom pov tseg kom tas
Tshuab plas yas khi rau ntawm duav
Txawm nqi pluav ua luam dej sis
Ib pliag ntsis saib hli kaj nrig
Mam nco tig saib rov tom qab
Ces nplog sab ploj zuj zus lawm
Peb los tawm plaws rau thaib teb
Ncua kev deb rov muab xav txog
Cas tseem nco lub neej toj siab ua luaj
Zaum tsaws qua los rov tsis tau
Khiav los dhau tso qub phooj ywg
Ib hnub twg yog muaj txoj hmoo
Lawv puas tsoo lawv qab tuaj tshwm
Xav twj ywm tias zaum no lau
Khiav tuaj dhau txoj kev phom sij
Tso niam tij thiab tej tij laug
Quaj ib tsaug nyob rov tom qab
Yam muv ntab nyias yuav mus nyias
Ib me pliag tsheb tuaj cug nkaus
Neeg nce txaus khiav yees los dhau
Thiaj los rau Vib Nais lawm tiag
Los txog kiag hmoob lub ceeb tsheej
Los ua neej nyob kaj siab lug
Thaum kaj ntug tsuas hnov nkauj nrov
Sawv daws phov vaj ntse nroo ntws
Tej laus yws kom tej ntxhais sawv
Mus kawm ntawv thaum noj tshais tas
Nram tshav npas neeg tuaj tsheev kev
Cov mus tsev yuav tau khoom los
Cov tuaj tos cab laub thauj dej
Peb hmoob nej los nyob ib vuag
Tej nroj tsuag tuag ntuas pem roob
Yog peb hmoob txoj kev nkauj nraug
Sib tham rau yuas mus meskas
Lus hais tas suab quaj nrov les
Sib tuav tes tuaj lawm tsheej pab
Mas hais tshab tsis nco txaj muag
Quaj cuag tuag yuav kwv mus faus
Zaum no lau nce hlo tsheb npav
Tus nai tsav kaw nkaus qhov rooj
Tsheb tig loo rau tim ncauj ke
Suab quaj les nco tej qub hluas
Ntsej muag puas ntsoos cuag qaib sam
Nyob ib tsam cov tuaj mus dhau
Zaum tsaws npau thiaj mus xam phaj
Txawm pib npaj ua npe lawv qab
Txog phab nab ces sau ntawv los
Tias nyob tos seb koj puas tuaj
Nyob tsis ruaj kawm ntawv tas nrho
Cas txog hmo yuav sawv kev tiag
Mam pom kiag nws tuaj nqiv npav
Thiaj mus tav kiag nws txoj ncauj ke
Muab nws de ib plaws tas nrho
Thiaj rov hlo los tus nra txhij
Cas thawj fij txawm yog yus ntag
Thiaj tau nkag loo rau lub npav
Saib tom qab pom nws co tes
Mus no ces nco txog kuv thiab
Tsheb tawm kiag rau kev puas yas
Khiav ncaj qha mus Bangkok
Zaum no lauj rov ncaim zaum ob
Lub siab mob npaum li xob tua
Mus txog ntua rau mes kas teb
Sau ntawv tseb rov loo los qhia
Nws quaj ncia ib los tsis hais
Muab ntawv zais tsis pub niam pom
Mus teev nplom thov kom muaj npe
Kawm tas ces npe txawm pib nto
Nce nkoj hlo lawv qab thiab tiag
Tuaj txog kiag teb chaws loj dav
Tsis paub xav xyov nws nyob twg
Kev phooj ywg tus nrho ib ntus
Ces leej nus quaj pos muag nti
Nrog lub hli ua neej sib ntsia xwb tiag….Hmoob….!!!
Home 
Calendar
