Subject: Lub Neej & Txoj Kev Hlub Tue May 24, 2016 12:35 pm
First topic message reminder :
LUB NEEJ TXOJ SIA ZOO IB YAM LI DEJ NTWS Ua ntej koj yuav to taub txog "TXOJ KEV SIB HLUB" koj yuav tsum to taub txog "LUB NEEJ" yog li ntawd cia wb sib cog mus saib txoj kev ua neej ib vuag ua ke. Nyob rau India teb chaws haiv neeg India ntseeg tias tus NIAM DEJ QHOOS QHAS yog koob hmoov rau haiv neeg India lub neej txoj sia.
Niam dej Qhoos Qhas tshwm sim ntws tawm saum ib lub roob uas siab tshaj plaws nyob hauv teb chaws India los. Lub sij hawm tus niam dej no txhawv tawm los nws ntshiab heev thiab haus tau qab laj siab heev li, vim li ntawd txawm yog yuav deb npaum cas los haiv neeg India thiaj yuav tsum nce mus kom txog saum lub roob uas yog qhov chaw txhawv ntawm tus niam dej Qhoos Qhas thiab ce kom tau coj los haus ua koob hmoov yug lub neej txoj sia.
Sij hawm dhau mus ntau hnub tau ua rau niam dej Qhoos Qhas tau ntws los poob rau nram tiaj nrag, lub sij hawm ntawd thiaj ua rau tus niam dej no loj tshaj qub thiab tau nro daj rhuv tsis muaj hnub ntshiab vim muaj tej dej nag dej sab siv tau ntws los tshuam thiab muaj tog khaub tog tsuag tshoob los sib xyaws ntxaws.
Txawm yog tias niam dej Qhoos Qhas yuav tseem ceeb rau haiv neeg India npaum cas los tej toj roob hauv pes uas siab heev nyob rau India teb yeej tsis muaj peev xwm yuav thaiv tau niam dej Qhoos Qhas kom txhob ntws tau tawm mus rau hiav txwv li. Tsis muaj pes tsawg hnub tus niam dej Qhoos Qhas twb ntws mus yuav tshuam dej hiav txwv lawm tiag. Yog thaum niam dej Qhoos Qhas mus tshuam rau dej hiav txwv lawm , txawm haiv neeg India xav mus ce kom tau ib khob los haus ua koob hmoov yug lub neej txoj sia los yeej yuav nrhiav tsis tau lawm vim tias niam dej Qhoos Qhas yuav ntws ua ploj ua plag mus xyaws dej hiav txwg tag.
Yog thaum koj to taub txog niam Qhoos Qhas lawm koj thiaj yuav to taub txog LUB NEEJ TXOJ SIA. Peb txhua tus yug los thaum me yeej tsis muaj ib tug twg yuav raug thuam tab sis txhua leej txhua tus yeej raug qhuas tias tus me ab no mas ntxim hlub kawg li. Zoo ib yam li tus niam dej Qhoos Qhas thaum nws txhawv los yeej ntshiab si thiab haus qab laj siab heev li.
Tsis ntev pes tsawg peb loj hlob tiav nkauj tiav nraug koj los nco kuv tsis paub tag kuv los hlub koj tsis paub txaus thiaj tau sib sau los ua lub neej, tab sis thaum tau los nyob ua ke lawm yuav muaj tub muaj ki muaj kwv tij-neej tsa thiaj ua rau muaj kev nyuaj siab ntxhov plawv. Lub caij no zoo tsis txawv tus niam dej Qhoos Qhas thaum ntws poob rau tiaj nrag yuav daj thiab ntshiab tsis taus. Tab sis txawm yog tus niam dej Qhoos Qhas yuav muaj ntau yam ntws los sib xyaws thiab muaj toj roob hauv pes thaiv siab npaum cas los nws tseem yuav tsum nrhiav kom tau kev tawm mus kom txog hiav txwv, yog li nyob hauv ib lub neej txawm yuav muaj kev nyuaj siab ntxhov plawv npaum twg los yuav tau ua lub siab ntev thiab nrhiav txoj hau kev ua lub neej mus kom kawg.
Nco ntsoov tias tsis ntev pes tsawg niam dej Qhoos Qhas twb ntws mus yuav tshuam hiav txwv lawm tiag, peb txoj kev ua neej los kuj tsis txawv li niam dej Qhoos Qhas thiab. Ib pliag ntshis koj twb laus tag kuv twb laus dua, kuv plaub haus twb pib dawb koj lub me plhus uas kuv ib txwm hnia twb pib nrwg.
Ib sij huam tsis nco saib niam dej Qhoos Qhas twb ntws mus tshuam rau dej hiav txwv lawm tiag hnub ntawd yuav ua cas haiv neeg India thiaj yuav mus nrhiav tau ib khob los haus ua koob hmoov. Lub neej txoj sia los zoo ib yam nkaus, yog thaum koj lub qhov muag qi kuv lub cev nraug xwb ploj mus lawm. Koj txawm yuav mus nrhiav thoob ntiaj teb los yuav tsis ntsib kuv, kuv txawm yuav mus nrhiav thoob qaum ntuj los yuav tsis pom koj, thaum muab xav li no kuv thiaj tis npe tias “LUB NEEJ TXOJ SIA ZOO IB YAM LI DEJ NTWS – TXOJ KEV PHOOJ YWG TSUAS LOS IB VUAG DUA”. Yog thaum koj paub li no lawm koj thiaj xav ua lub neej kom muaj txoj kev sib hlub thiab nyob kaj siab lug mus ib txhis. The End
Subject: Re: Lub Neej & Txoj Kev Hlub Wed May 25, 2016 1:24 pm
Ntsuj_Plig, zoo siab rau koj av tsij tuaj sau koj zaj lus hais txog lub neej thiab txoj kev hlub rau peb nyeem os.
Lub neej cas zoo li nthwv cua ib vuag ntsawj thiab ib vuag dua xwb vim ib lub xyoo twg tig los thiab twb tig mus lawm zuj zus ces ntsis ntev xyoo xwb yeej yog li koj cov lus sau tag lawm.
Tib neeg yug los ua neej nyob ces tib neeg txawj loj, txawj laus, txawj rais mus ua duab, ces dhau ntawm mus tib neeg neeg nkag tsis zawj lawm ces kawg yuav tau ua siab tso tseg.