KEV HLUB HAUV INTERNET

Subject: KEV HLUB HAUV INTERNET Sun Aug 02, 2020 7:34 am

First topic message reminder :

Brother Davdub, tsis muaj neeg tuaj li lawm ces cia kuv sau ib zaj dab neeg tso tseg rau ntawm no es koj mam tuaj nrog kuv nyeem nawb.

PAGE 1:

Title: KEV HLUB HAUV INTERNET

Sub title: Nkauj Dab Ntub thiab Nraug Npau suav lub neej ib vuag dua.

Muaj ib hnub nyob rau lub caij nplooj ntoos hlav hauv xyoo 2008, me paj hmab paj ntoos sam sim tawg nra paug mus puv toj ua rau tej me kab me noog thiab npauj npaim ya tsheej npoj los ntsauv paj. Tej hluas nkauj hluas nraug tuav tes rawv tuaj mus kav kiab kav khw, hos Nraug Npau Suav tseem nyob zaum ib leeg pem ib tsob qab ntoo lub siab quaj dhi rau ib tug neeg uas ploj mus lawm tau ntau xyoo tsis hnov moo. Lub sij hawm ntawd thiaj hnov tej neeg cav tias nyob hauv hmoob lub qub zog Tojsiab yog tej hluas nkauj hluas nrau qhov chaw tuaj mus xa xov xa moo thiab muaj qee zaus yog muaj hmoo tseem tau ntsib tej qub hluas nkauj hluas nraug uas twb sib ncaim mus lawm tau ntau xyoo thiab.

Hnub ntawd thiaj ua rau Nraug Npau Suav lub siab rov xav txog ib zaj dab neeg uas twb dhau mus tau 20 xyoo lawm. Zaj dab neeg ntawd yog Nkauj Ntxoo thiab Yim Laj lub neej muaj ntsiab lus tias " NYIAJ TXIAG PAUV TSIS TAU KEV HLUB...NYIAJ KUB YOG LUB NEEJ KUA MUAG " Zaj dab neeg no yog sau txog Nkauj Ntxoo thiab Yim Laj lub neej ua nkauj ua nraug tsis sib tau. Nkauj Ntxoo yog Yim Laj ib tug qub hluas nkauj uas twb tau ncaim nws mus lawm tau ntau xyoo tsis tau ntsib, tsuas yog tshuav Nkauju Ntxoo ib daim ntawv uas tseem khuam siab heev nyob nrog Yim Laj saib ua dab muag lawm xwb. Nyob hauv Nkauj Ntxoo tsab ntawv no tau sau tseg muaj ntsiab lus tias " TSAB NTAWV TU MOO".

(Continue page 2)

Subject: Re: KEV HLUB HAUV INTERNET Sun Aug 02, 2020 4:22 pm

Page 5:

Muaj ib hnub tom qab Nraug Npau Suav tau rov tuaj ncig txog rau qub zog Tojsiab, lub sij hawm nws tsis nco qab xav txog dab tsi uas yog Nraug Npau Suav tseem tuaj sawv ntsia tej hluas nkauj hluas nraug sib tham yam lom zem xauv npos. Txawm cia li muaj ib lub suab hu tias "Nraug Npau Suav cas koj thiaj txeeb kuv tus hluas nkauj" Thaum Nraug Npau Suav hnov lub suab hu no nws thiaj tig hlo los thiab xam ncig lees tias " Leej twg hu kuv ne?." Thaum ntawd Nraug Qav thiaj teb tias " Npawg...., kuv hu koj los mas ua cas koj thiaj txeeb kuv tus hluas nkauj lawm no." Nraug Npau Suav thiaj tig hlo teb tias " Oh.....koj tus hluas nkauj yog Nkauj Dab Ntub los?" Nraug Npau Suav hais ntxiv tias " Nws nyiam nrog kuv tham ua si thiab mas tab sis kuv tsis tau txeeb nws ntawm koj mus os, yog koj nyiam nws thiab yuav hlub nws tiag no cia kuv mam pab hais kom nws hlub koj mas npawg. " Thaum Nraug Qav pom tias nws twb hais phem los zoo li Nraug Npau Suav tseem tsis chim thiab tseem teb zoo rau nws xwb. Nraug Qav thiaj teb Nraug Npau Suav tias " Npawg..., kuv twb paub nws los tau ib xyoos no lawm wb twb tau mus noj mov ua ke muaj ib - ob zaug lawm tab sis txij li thaum nws paub koj los ces nws txawm cia li tsis nyiam kuv lawm, kuv xav tias koj yog tus muaj hmoo ces cia nws rau koj os,..npawg." Thaum ntawd Nraug Qav pib tham thiab qhia txog Nkauj Dab Ntub lub neej rau Nraug Npau Suav, Nraug Qav hais rau Nraug Npau Suav tias " Npawg... koj yuav tau hlub nws nawb vim koj yog tus muaj hmoo nws nyiam koj lawm." Nraug Qav tseem hais ntxiv tias " Kuv paub nws zoo nws yeej yog neeg zoo tab sis tsis paub tias yog vim dab tsi nws thiaj tau txais lub neej kua muag poob tsis muaj hnub tu xwb. Kuv los yeej hlub nws kawg tab sis txij thaum nws paub koj lawm nws cia li ntxub kuv lawm os ... npawg". Nraug Qav tseem qhia rau Nraug Npau Suav tias " Npawg... koj puas paub tias Nkauj Dab Ntub mob lawm no? Nws twb mob tau ob hnub los no nws tseem tsis tau zoo li thiab." Nraug Npau Suav thiaj teb tias " Kuv yeej tsis paub li tsuas yog kuv tuaj tsis ntsib nws lawm os, puas yog nws mob lawm tiag ma?" Nraug Qav thiaj teb tias Nkauj Dab Ntub twb mob tau ob hnub no lawm nws twb mus cuag kws tshuaj los tab sis tseem tsis tau zoo li thiab ntshe nws thiaj tsis tuaj ntawm no os ...npawg." Thaum Nraug Npau Suav hnov li no nws kuj tsis paub tias xyov Nraug Qav hais tseeb los yog lam sim nws xwb. Nraug Npau Suav thiaj teb tias " Npawg...kuv los tsuas paub nws li phooj ywg xwb tsis tau xav tias yuav muaj kev hlub os." Tom qab Nraug Qav thiab Nraug Npau Suav nkawd sib tham txaus Nraug Qav kuj cia li ploj rov rau hauv qab pas dej lawm, hos Nraug Npau Suav los kuj cia li rov los tsev lawm xwb.

Hnub ntawd ua rau Nraug Npau Suav xav tsis tas tias yog vim dab tsi Nraug Qav thiaj ho hais tias nws txeeb Nraug Qav tus hluas nkauj, tab sis cas thaum kawg Nraug Qav ho xum muab nws tus hluas nkauj rau Nraug Npau suav yam zoo siab hlo lawm tiag. Thaum muab xav mus xav los li no thiaj ua rau Nraug Npau Suav xav txog Nraug Qav lo lus tias " Nkauj Dab Ntub Mob lawm" uas rau nyob hauv Nraug Npau Suav lub siab tsis kaj zoo tam li ib twv huab tsaus nti tsis tshem ntawm lub hnub mus. Thaum ntawd Nraug Npau Suav thiaj tau sau ib tsab email thiab xa tau ib daim card muab ntsiab lus tias " GET WELL SOON" mus rau Nkauj Dab Ntub. Nyob hauv Nraug Npau Suav tsab ntawv sau tias.

Nyob zoo Nkauj Dab Ntub. Thaum kuv hnov tias koj mob lawm ua rau kuv lub siab tsis kaj li thiab ua rau kuv txhawj heev tab sis tsis muaj ib yam dab tsi yuav hais tau ntau tshaj qhov tias " THOV KOM KOJ TUS MOB ZOO SAI" yog li no thiaj xav daim card no tuaj rau koj thiab thov kom koj tus mob zoo sai xwb nawb mog.

Nyob ntawm Nkauj Dab Ntub lub sij hawm uas nws mob ntawd lawm nws kuj tsis tau ntsib Nraug Npau Suav, nyob hauv nws lub siab tseem pw ua yog toog pom Nraug Npau Suav nrog nws tham tuj taws hausv nruab dab ntub. Lub sij hawm nws qhib email pom Nraug Npau Suav tsab ntawv thiab daim card thiab nws lub cev los kuj pib muaj zog zuj zus hos tus mob los kuj ploj mus lawm. Nkauj Dab Ntaub thiaj tau sau ib tsab email rau Nraug Npau Suav muaj qee lo lus tseem ceeb nyob hauv sau tias " Qhov kuv mob ntawd twb yog vim nco koj xwb os kuv me Nraug Npau Suav, tab sis ua tsaug rau koj daim card nawb kuv twb zoo lawm os mog. Cia siab tias yuav tau ntsib koj sai os nawb." Txawm yog tias Nkauj Dab Ntub tus mob yuav zoo tsis tau heev los vim txoj kev hlub thiab nco Nraug Npau Suav, Nkauj Dab Ntub txawm nkees npaum twg los xav txog Nraug Npau Suav tej lus hais nyob hauv nws tsab ntawv tias " THOV KOM KOJ ZOO SAI " ua rau Nkauj Ntab Ntub lub ncauj tsis hais los nyob hauv nws lub siab twb luag ntxhi tias nyaj tsis ntev xwb twb yuav tau rov qab mus ntsib Nraug Npau Suav rau qub zog Tojsiab dua.

Suav txij tham ntawd los Nkauj Dab Ntub thiaj dhau mus ua Nraug Npau Suav lub paj tsw qab mus thoob ntuj, hos Nraug Npau Suav los thiaj dhau mus ua Nkauj Dab Ntub lub txiv qab zib mus thoob ntiaj teb. Nkauj Dab Ntub nco Nraug Npau Suav tsis muaj hnub ploj hos Nraug Npau Suav los hlub Nkauj Dab Ntub tsis muaj hnub kawg. Nraug Npau Suav xav tias yog muaj txoj hmoo tau Nkauj Dab Ntub noj los cia nws mam pub pw los cia nws mam puas ntshe yuav sau siab zog los hlub Nkauj Dab Ntub mus ib sim neej txog hnub nkawd laus ploj laus tuag. Hos Nkauj Dab Ntub los kuj xav tias kheem lam muaj txoj hmoo tau Nraug Npau Suav ntshe liaj teb yuav tsis cia nws ua qaib npua yuav tsis cia nws pub mam sau siab zog los hlub kom Nraug Npau Suav thiaj tsis nco txog nws txog nws txoj me kev hluas yav ntuj thaum ub.

Thaum nkawd ob leeg xav li no thiaj ua rau nkawd ob lub siab cia li los ua ib lub lawm xwb, Txhua hnub thaum Nkauj dab Ntub thiab Nraug Npau Suav tuaj sib ntsib nkawd thiaj muab lub hnub thiab lub hli los ua qhov chaw sib nco thiab teem caij ua nkawd txoj kev sib ntsib. Ntau zaus Nkauj Dab Ntub tau hais rau Nraug Npau Suav tias " Cas kuv yuav nco koj ua luaj txawm yuav tsheej tag hmo lawm los kuv tseem tsis tau tsaug zog thiab tseem ntsia ntsoov lub hli thiab nrog lub hli tham tham tuj taws tias lub ntuj koj ncig thoob lub ntiaj teb koj muab ncig txhua koj puas pom kuv me Nraug Npau Suav os. Nakuj Dab Ntub tseem tau hais rau Nraug Npau Suav ntxiv tias " NCO NTSOOV THAUM HMO HLI NRA TUAJ NROG KUV SAIB HLI MOG " Nraug Npau Suav los kuj teb tias " Kuv me Nkauj Dab Ntub koj tsis paub xwb os txhua tag kis sawv ntxov thaum kuv pom lub hli kuv nco koj heev kuv niaj hnub hais rau lub hli tias koj puas pom kuv me Nkauj Dab Ntub os". Ua ke lub sij hawm nkawd ob leeg tseem tab tom sib tham yam lom zem xauv npos txog txoj kev sib hlub sib nco li no nkawd tsis nco qab xav txog tias ntshe yuav muaj nab phem tuaj tawm tsam nrog nkawd. Qhov tseeb tiag txoj kev lom zem ntawm Nkauj Dab Ntub thiab Nraug Npau Suav nkawd tau dhau mus ua ib tug kab mob siab rau tej nkauj nab thiab nraug qav uas nyob rau lub pas dej haus zos Tojsiab, thiaj ua rau lub pas dej no cia li dhau mus ua ib lub pas dej uas muab nab heev rau lub caij no.

Muaj ib zaug uas Nkauj Dab Ntub thiab Nraug Npau Suav nkawd tseem tab tom tham muaj zog zis thiab xav txog nkawd lub neej tias tas los, tiam no, thiab tiam tom ntej. Nkawd tau tham ntau yam txog txoj kev sib hlub thiab sib nco tias yuav ua cas nkawd thiaj yuav tau los nyob ua ke ib zaug kom tau los koom ua ib lub neej sib hlub rau yam ceeb no. Thiaj yuav yog ib lub neej uas muaj tseeb thiab thiaj yuav tsis ua rau mob nkawd ob lub siab zoo tam li niaj hnub no uas nkawd tsuas ua lub neej sib hlub sib nco nyob hauv tus dab ntub npau suav xwb. Ua ke lub sij hawm ntawd thiaj ua rau mob nkauj nab siab yuav tawg nyob tsis taus hauv lub pas dej zoo tam li lub pas dej ntawd cia li dhau mus ua ib co dej kub los hlab nkauj nab lub siab lawm. Lub sij hawm ntawd txawm cia li muaj ib tug Nkauj Nab txia ua Nkauj Dab Ntub los tham nrog Nraug Npau Suav. Thaum Nraug Npau Suav pom tias ua cas ho muaj ob tug Nkauj Dab Ntub lawm, ua rau Nraug Npau Suav los kuj xav tsis tas vim tus twg los hais lus zoo ib yam. Ua rau Nraug Npau Suav tsis muaj peev xwm yuav paub tias leej twg thiaj yog tus tseeb thiab leej twg ho yog tus cuav. Thaum ntawd Nraug Npau Suav thiaj hais rau Nkauj Dab Ntub tias " Zoo li muaj neeg phem tuaj thab plaub lawm ces kuv yuav tau mus lawm koj mam nyob lom zem nawb mog." Tham hais li no tas Nraug Npau Suav txawm cia li tawm twj ywm mus lawm, tsis paub tias Nkauj Dab Ntub yuav nyob ntev npaum li cas thiab puas muaj xwm txheej dab tsi tom qab ntxiv.

Dhau los tau ob hnub tom qab Nraug Npau Suav kuj tau rov tuaj mus ncig rau qub zog Tojsiab dua seb puas ntsib Nkauj Dab Ntub. Lub sij hawm Nkauj Dab Ntub thiab Nraug Npau Suav nkawd tau rov tuaj sib ntsib zaum no, Nkauj Dab Ntub thiaj hais rau Nraug Npau Suav tias tim koj ib leeg xwb thiaj ua rau lub pas dej nyob rau zos Tojsiab muaj nab, hnub ntawd Nkawd Nab wb tau ua ib npluav rog quav dev loj kawg li hos.

(Continue page 6)

» ~TUS HLUB HAUV TUS NPAUSUAV~
» Tus hlub hauv nruabsiab
» KEV HLUB HAUV NPAU SUAV
» chaw sau paj huam hlub "Txoj kev hlub yog wb"
» NWS PHEEJ UA LI NWS XAV LOS NROG KUV PW HAUV TXAJ