Ncaim Cev Tsis Ncaim Siab

Ncaim Cev Tsis Ncaim Siab:

Zaj dabneeg no yog ib nkawm nkauj nraug sib sib hlub uas ob tog niam txiv tsis tau pub nkawd sib yuav ces thaum kawg tus ntxhais niam lawv tau muab nws coj tsiv tebchaws mus nyob rau lwm qhov chaw lawm tabsis nws lub cev lam ncaim nws tus hluas nraug mus xwb lub siab yeej tsis ncaim li.

Nkawd txoj kev hlub yim nyob deb yim ua rau nkawd sib hlub thiab sib nco xwb.

Cov phoojywg, thov caw nej txhua tus los peb sau zaj dabneeg no uake nawd.

Zaj dabneeg no yog yuav nthuav txog, "Npauj Npaim & Ntsuj Plig, Txoj Kev Hlub."

Ntsuj Plig, caw koj tuaj wb tham txog wb lub neej tag los rau hauv zaj dabneeg no nawd.

Npauj Npaim & Ntsuj Plig, Txoj Kev Hlub...,

Muaj ib hnub Npauj Npaim nrog nws cov vivncaus mus ris dej nram hav dej ces nws mus ntsib ibtug tubhluas hu ua, "Ntsuj Plig" no. Npauj Npaim muab nws lub raj dej los ce dej tag ces nws tseem tabtom yuav muab ntim rau hauv nws lub kawm ev xwb ces Ntsuj Plig tuaj txog ntawd thiab. Npauj Npaim cov vivncaus twb ev lawv cov raj thiab mus zomzaws ua ntej lawm. Npauj Npaim pom dheev Ntsuj Plig, nws lub siab poob nthav tias, "Vuag! Cas tus hluas no yuav zoo nraug ua luaj? Ntuj aw..., nws tuaj qhovtwg tuaj ne?"

Thaum Ntsuj Plig tuaj pom dheev Npauj Npaim, nws ua qhov muag nruj nruj rau Npauj Npaim ces ua rau Npauj Npaim ntshai thiab cev tes los muab tsis tau nws txoj hlua kawm li. Nws muab nws lub kawm ua vau ces cov raj dej ciali vau tag lawm thiab. Npauj Npaim txajmuag heev, nws cia li tsis paub ua licas lawm. Ntsuj Plig saib ua cas Npauj Npaim cov raj dej vau lawm ces nws thiaj khiav loo los pab tsa thiab hais rau Npauj Npaim tias, "Vuag! Tus muam, ua licas rau koj lawm os? Koj cov raj na, nws nchuav tag lawm."

Npauj Npaim thiaj tig mus khaws nws cov raj ces Ntsuj Plig los hais rau Npauj Npaim tias, "Tus muam, cia kuv mam pab koj nawd."
"Wsm..., tau lawm, kuv mam khaws kuv xwb los yeej tau," Npauj Npaim teb rau Ntsuj Plig thiab tig los saib Ntsuj Plig dua. Ntsuj Plig saib Npauj Npaim nruj nruj tsis ntsais muag li thiab. Nkawd sib ntsia ib pliag ces Npauj Npaim tus niamhluas hu nws tias, "Npauj Npaim, ua cas rau koj lawm na? Tsuag tsuag los peb yuav mus ma."

Ntsuj Plig, kuv muab qhov nram hauv paus pib rau nod es koj tuaj nyeem seb koj puas nyiam tso. Yog nyiam ces wb mam sau mus ntxiv nawd.

Kuv lam tso lub title page li no xwb es yog koj tuaj saib, koj xav hloov ces muab hloov los tau mas mog.

Sib ntsib dua...,