*-Xyoo Tshiab-*

Xyoo Tshiab Los Txog Lawm...,

Lub xyoo tshiab twb ncig los txog
Vim li no thiaj rov qab tuaj
Twb vim muaj koj rau kuv nco
Thiaj tuaj txog tuaj nrhiav koj dua
Vim kev tshua thiaj xav tuaj ntsib
Li hnub ib peb tau sib paub
Thiaj tuaj saub tuaj seev tuaj tos
Tus ntxim nco zoo li koj tiag
Vim muaj tiag thiaj li hais tawm
Puag nruab plawv tuaj qhia koj thiab
Xyoo ob txhiab kaumib tuaj lawm os
Los ntawm no los nrog kuv tham
Seb yuav npaj licas rau lub xyoo tshiab

Txawm kuv ncaim nej ntev lawm los
Yeej tseem nco nej txhua tus heev
Thiaj tuaj seev tuaj tos nej dua
Vim kev tshua peb kev phooj ywg
Yam dej ntws tsis txawj tu li
Nyob luag ntxhi rau txhua sij hawm
Cia peb tawm tuaj mus sib fim
Pauv tswv yim tham lus qab zib
Kev sib ntsib peb tej chaw nyob
Thiaj tsis nphob kom tshiab li khiv
Nyob luag ntxhi rau txhua lub caij
Kuv npaj nqaij koj npaj mov nplaum
Los peb zaum noj nqaij ntxuag cawv
Los peb sawv haus dej ua ke
Noj mov ntse ntxuag me nqaij ci
Tham luag ntxhi kom zoo peb siab
Tawm ntuj tshiab kom peb kaj siab mog.

Me vivncaus, NkaujNyiag

Ua tsaug ntau rau koj cov lus
Ua ntu zus uas koj tau hais
Kuv lees txais thiab yuav tuaj dua
Kev sib tshua tseem yuav tham mus
Mam sib pus sib tham ua ke
Zaum tsheej tse los peb sib tham
Nyob ib tsam mam li mus tsev
Thov siab ntev vim kuv tsis txawj
Ntshe yuav txhawj tab sis thov qhia
Mam kawm kiag seb puas txawj tham li nej mog.