Leej Nyab Zoo

Leej Nyab Zoo

Leej nyab zoo nws tsis siab phem,
Tsis lam cem tus ub tus no,
Hlub niam pog thiab hlub txiv yawm,
Tsis lam tsawm lam yws tej laus,
Lub ntuj tsaus paub los nrhiav noj,
Yeej tsis coj luag tus tub khiav,
Yuav tsis ciav tsis ntxub leej twg,
Tsis lam nuj nws tus me txiv,
Ua hujhiv kom luag txaj muag,
Yeej tsis puag tsis tawb luag tub,
Rau luag ntxub kom tau lus hais,
Yeej tsis ntshai luag tes hauj lwm,
Yuav tsum fwm luag tsev neeg zoo,
Yuav tsis nroo tsis lam sib ceg,
Ua dev leg qhov muag liab tswbtsuas,
Paub txaj muag thiab paub kev cai,
Ua zoo hais rau txhua leej txhua tus,
Yuav los hlub tus txiv tsev neeg,
Kom luag ntseeg thiab fwm nws ua nyab,
Yuav los pab leej niam ua noj,
Yuav los coj kom haum niam siab,
Niam thiaj qhia niam tus me tub,
Tig los hlub niam leej nyab zoo,
Lub koob moo thiaj li nrov ncha,
Tias tus no na yog ib leej nyab zoo.

Ab..., yuav ua licas thiaj ua tau ib leej nyab zoo,
Yog ua tsis tau ces ntshe yuav tsis muaj neeg nug yus moo,
Ab..., yuav ua licas thiaj ua tau ib leej zoo nyab,
Yog ua tsis tau ces ntshe yuav tsis muaj neeg pab,

Sim neej no cas yuav tu lub siab ua luaj nas lawv,
Yog ua tsis tau ib leej nyab zoo ntshe yuav mob lub plawv,
Sim neej no cas yuav tu lub siab kom tshaj plaws li,
Yog ua tsis tau ib leej nyab zoo ntshe yuav mob siab mus tag ib txhis,

Nyobzoo os, Lubpajzoo thiab NkaujNyiag,

Eb..., neb cov pajhuam hais txog ib leej nyab zoo kho kho kuv lub siab...,
Kuv nim xav npaum licas los cas yeej cheem tsis taus lub kua muag iab...,

Neb tej lus hais txog ib leej nyab zoo cas yuav hais raug kuv ua luaj li...,
Kuv nim xav npaum licas los cas yeej cheem tsis tau kuv lub kua muag si...,

Sim neej no..., cas yuav ua lub neej kho siab ua luaj li os lawv ...e...,
Vim xav xav kom ua tau ib tug nyab zoo los ua tsis tau tsuas pom mag lawv cem...,

Sim neej no..., cas yuav tu lub siab ua luaj os cov me vivncaus...,
Vim xav xav ua kom tau ib leej nyab zoo los cas pheej ua tsis tau li os lawv aw...,