Leej Nyab Zoo

Leej Nyab Zoo

Leej nyab zoo nws tsis siab phem,
Tsis lam cem tus ub tus no,
Hlub niam pog thiab hlub txiv yawm,
Tsis lam tsawm lam yws tej laus,
Lub ntuj tsaus paub los nrhiav noj,
Yeej tsis coj luag tus tub khiav,
Yuav tsis ciav tsis ntxub leej twg,
Tsis lam nuj nws tus me txiv,
Ua hujhiv kom luag txaj muag,
Yeej tsis puag tsis tawb luag tub,
Rau luag ntxub kom tau lus hais,
Yeej tsis ntshai luag tes hauj lwm,
Yuav tsum fwm luag tsev neeg zoo,
Yuav tsis nroo tsis lam sib ceg,
Ua dev leg qhov muag liab tswbtsuas,
Paub txaj muag thiab paub kev cai,
Ua zoo hais rau txhua leej txhua tus,
Yuav los hlub tus txiv tsev neeg,
Kom luag ntseeg thiab fwm nws ua nyab,
Yuav los pab leej niam ua noj,
Yuav los coj kom haum niam siab,
Niam thiaj qhia niam tus me tub,
Tig los hlub niam leej nyab zoo,
Lub koob moo thiaj li nrov ncha,
Tias tus no na yog ib leej nyab zoo.

Me Npauj Npaim, nws txhob tu siab,
Cia li kiab los mloog kuv hais,
Niam me ntxhais tseem muaj niam nyob,
Lub siab txob los tsis txhob quaj,
Tu kua muag los qhia kuv mog,
Lub neej no tsis hais leej twg,
Zoo phooj ywg los yeej txawj chim,
Tej lus ntsim ua luag tau cem,
Thov muab lem mus rau sab nraud,
Yuav tau pauv coj lub siab tus,
Mam hais lus kom phim li luag,
Tsis txhob tuag vim tej lus iab,
Cia lub siab kom ruaj txhawb zog,
Tsis txhob ntog thaum luag thawb yus,
Coj siab tus thiaj yeej luag nawd,
Lus ntsim plawv txhob khaws cia mog,
Vim li no thiaj yuav tau hais,
Ua me ntxhais los yog me nyab,
Lub siab fab thaum raug luag cem,
Tsis txhob lem ntxub koj tus kheej,
Peem kom tsheej tuav lub cuab yig,
Txawm tus txiv tsis hlub los xij,
Tsis xav nplij los ua siab ntev,
Zoo niam tsev ces yog ib leej nyab zoo li nws ntag mog.