XEEBTSHEEJ TIAM LI DAB NEEG

Subject: XEEBTSHEEJ TIAM LI DAB NEEG Sun Jan 27, 2013 2:18 pm

First topic message reminder :

NRAUG NTSUAG THIAB NKAUJ ZUAG PAJ

Puag thaum ub, muaj ob txiv tub mus nuv ntse. Nkawd mus txog nram hav dej, leej txiv txawm hais rau nws tus tub tias : "Me tub, koj nyob twj ywm qhov no, kuv mus nuv ntses nrad !" Ces leej txiv txawm mus nuv ntses. Ib ntsis nws rov los txog, nws los nrhiav tsis pom nws tus tub lawm lauj ! leej txiv ýeej xav tias ntshai nws tus tub poob rau hauv lub niag pas dej ntawd lawm. Leej txiv txawm muabib lub ntais ntsaws rau hauv nws duav, nws thiaj 11 tib plaw mus rauhauv lub niag pas dej. Nws mus txog hau. Cas muaj ik lub zos loj hauj sim nyob hauv. Txawm muaj ob tug niam tub ntsuag nos nyob puag nram qab zos, nyob hauv ib lub nyuag tsev khaub khaub hlab.Nws thiaj li mus nug ob niam tub ntsuag nos nrad tias: "Hnub no, nej puas muajleej twg tua tau nqaij dab tsi los noj ?" Ob niam tub teb tias: "Tag kis no, hnov lawv tham tias lawv tua tau ib tug kauv no tiag !" Nws thiaj nug nkawd tias : "Lawv puas nqa tuaj pub neb noj ?" Ob niam tub teb tias : "Ab ! Lawv noj hlob noj yau, lawv yeej tsis pub rau wb noj li." Nws hais rau nkawd tias : "Yog li, neb sau neb tej cuab yeej cuab tam es neb khiav mog ! Kuv yuav hlawv nej lub zos no." Ces ob niam tub thiaj sau cuab yeej cuab tam khiav lawm. Nws thiaj li muab lub ntais los ntaus zes rau zaj la. Nws thiaj tawm khiav rov los dua yaj ceeb no lawm.

Kub tau peb hnub peb hmos, pa taws ncho tuaj nto ntuj lauj ! Txiv Nraug Ntsuag mus ua zog ntuj sua teb tom taug los, nws txawm los ntsib yawg Zaj Laug pas zaj nrab. Yawg Zaj Laug pas zaj nrab hais rau Txiv Nraug Ntsuag tias: "Txiv Nraug Ntsuag, kuv tub Ntxawg tsis paub tab coj hno xaiv, rau xaws rau luag tub tiaj hau. Nws txhuav luag tub ntshav haus tas, muab luag tub nqaij noj tas, thiaj li mob luag siab. Luag thiaj tis taws lawm zaj la, kub lawm zaj zeg, kub tas cuaj txwg tub mab yim txwg tub qhe. Kub txog niam nkauj Zag ib sab ceg. Yog koj mus ntsib kuv yawg Zaj Laug pas zaj ntsuab no koj hais rau nws kom nws tuaj. Lub hlis no tim kaum tsib, kuv yuav tsa vaj tsa tsev. Kom nws tuaj nrog kuv koos cawv ib hnub no !" Txiv Nraug Ntsuag teb tias : "Aw ! Kuv mus, kuv mam hais rau." Txiv Nraug Ntsuag txawm los txog rau yawg Zaj Laug pas zaj ntsuab. Nyob ntawd muaj ib lub zos. Txiv Nraug Ntsuag muaj ib tug muam los yuav txiv nyob ntawd thiab. Txiv Nraug Ntsuag tus muam hais tias : "Ab ! Dab laug, utshai koj mus ua Suav zog ntuj sua teb tom taug los, es ko; nqis nqis nqaij, cia kuv tua ib tug npua rau koj noj tso koj mam ho mus tsev." Txiv Nraug Ntsuag tus muam txawm tua ib tug npua rau nws noj. Nws rau tau, nws txawm mus hu zej zog tuaj nrog noj thiab. Sawv daws noj nqaij haus cawv qaug qaug. Xeev Laus hauv zos thiab Txiv Nraug Ntsuag nkawd txawm sib txhaus cawv. Txiv Nraug Ntsuag txawm hais tias : "Ab ! Wb sib twv mus hu Zaj Laug pas zaj ntsuab saib leej twg hu teb yuam !" Xeev Laus txawm hais tias : "Txiv Nraug Ntsuag, yog koj tseem mus hu tau Zaj Laug pas zaj ntsuab tawm, mas kuv muab peb hub nyiaj peb hub kub rau koj kiag tiag. Yog koj hu tsis tawm, kuv hu tawm mas koj ua kuv qhev mus ib txhis laiv !" Ces tus muam hais rau Txiv Nraug Ntsuag tias:"Dab laug, koj twb mus ua Suav qhev txog tav no, koj tseem pheej yuav nrog luag tej sib twv thiab ! Tsuas zoo yus hu tawm, yog yus hu tsis tawm ces yus ham tsis yuav ua luag qhev mus ib txhis." Ntsuag teb tias : "Yog hu tsis tawm ces ua kuj ua thiab tiag." Nkawd txawm mus txog ntawm lub niag pa zaj. Txiv Nraug Ntsuag hais rau Xeev Laus tias: "Yog koj teb koj chaw, cia koj xub hu tso kuv mam hu." Xeev Laus thiaj hu tias : "Yawg Zaj Laug pas zaj ntsuab, koj tawm tuaj nraum no ! Kuv muaj ib lo lus hais rau koj auj!" Xeev Laus hu peb zaug li ntawd, tsis pom tawm li lauj! Xeev Laus thiaj cia Txiv Nraug Ntsuag hu. Txiv Nraug Ntsuag thiaj hu tias:"Yawg Zaj Laug pas zaj ntsuab, hwj txwv dawb qas paug ! Nyob qab ca los hnov nyob qab zeb los hnov, koj tawm tuaj, kuv muaj ib lo lus hais koj." Npuas dej txawm tawg plhawv ib lub tuaj, sawv daws luag zom zaws tias : "Yaiv, yuav tawm tiag las." Txiv Nraug Ntsuag hu zaum ob kuj tawm ib lub npuas dej thiab xwb. Nws hu kiag zaum peb. Ua ciav, yawg Zaj Laug pas zaj ntsuab tawm plaws tuaj lauj! Yawg Zaj Laug pas zaj ntsuab hais tias:"Me tub! Koj muaj lus dab tsi los tsev tso mam li hais maj! Cas koj yuav nyob nraum kod hu xwb !" Txiv Nraug Ntsuag thiaj li hais tias : "Ab ! Kuv xav los kawg. Tab sis ntshai kuv los tsis tau xwb, kuv thiaj tsis los." Zaj Laug thiaj muab Txiv Nraug Ntsuag qaim kiag rau hauv qhov tsos, coj nws mus rau hauv pas zaj lawm.

Xeev Laus txawm hnyos tias: "Tsuag sawm ! Khav hu Zaj Laug tawm tuaj, zaum no Zaj Laug muab nws nqos kiag lawm lauv !" Txiv Nraug Ntsuag thiaj li nrog Zaj Laug mus txog hauv Zaj Laug tsev. Zaj Laug lub tsev mas yog tsev nyiaj tsev kub xwb. Zaj Laug thiaj tsab yeeb rau Txiv Nraug Ntsuag haus tas. Zaj Laug thiaj nug tias: "Me tub, koj muaj tus lus dab tsi, koj sim hais rau kuv mloog saib ?" Txiv Nraag Ntsuag thiaj teb tias : "Ab ! Yawg Zaj Laug, tus lus dab tsi kuj tsis muaj thiab! Yog kuv mus ua Suav zog ntuj sua teb tom taug los, kuv los ntsib koj yawg Zaj Laug pas zaj nrab. Nws hais rau kuv tias yog kuv los ntsib koj no, kom kuv hais rau koj. Nws hais tias : 'Nws tub ntxawg tsis paub tab coj hno xaiv, rau xaws rau luag tub tiaj hau, muab luag tub ntshav txhuav haus tas, muab luag tub nqaij noj tas, thiaj li mob luag siab. Luag tis taws lawm zaj la kub lawm zaj zeg, thiaj li kub tas ntswg liaj ncab ntswg iav ntev, kub tas cuaj txwg tub mab yim txwg twb qhe, thiaj li kub tas niam nkauj Zag ib sab ceg. Nws vaj nws tsev kub hnyiab tas, liaj ia kub hnyiab tas. Lub hlis no tim kaum tsib nws yuav ua vaj ua tsev, nws yuav koos ib hnub cawv. Nws kom kuv los hais rau koj, kom koj mus nrog nws koos ib hnub cawv.' Kuv lus hais rau koj li no xwb." Yawg Zaj Laug thiaj teb tias : "Aud ! Ua li los !" Zaj Laug thiaj hais tias : "Yog li no txog hnub kaum tsib tso kuv mam ho mus xyuas ." Nyob nyob txog hnub kaum tsib, yawg ZajLaug txawm yuav mus nrog yawg Zaj Laug pas zaj nrab koos cawv.
Nws hais rau Txiv Nraug Ntsuag tias:"Me tub ! Koj nyob, koj pab zov kuv lub tsev. Kuv los, koj yuav nyiaj yuav kub los kuv muab rau koj." Zaj Laug yuav mus, nws tseem hais ntxiv tias : "Me tub, koj nyob koj tsis txhob seev. Tsam niam dab tsoj tsuam deev. Koj nyob koj tsis txhob saub. Tsam niam dab tsoj tsuam paub." Txiv Nraug Ntsuag teb tias : "Aw ! Kuv nyob, kuv nyaj yuav tsis saub tsis seev thiab." Zaj Laug mus lawm lauj! Txiv Nraug Ntsuag nyob, nws niaj hnub nyob hauv tsev zov tsev. Nws txawm nco nco nws tus muam cov lus uas thaum nws yuav tuaj, nws tus muam hais. Ces Txiv Nraug Ntsuag txawm seev tias : "Ab ! Ua cas yus tsis mloog yus tus muam lus, yuav tuajua luag qhev zov luag tsev li no nev ? Tshav ntuj nrig, yuav kho kuv siab ua luaj!" Ces niam nkauj Zaj nyob hauv txaj, nws txawm hnov lauj! Nws txawm hais rau Txiv Nraug Ntsuag tias : "Txiv Nraug Ntsuag, kho kho koj siab, cia kuv deev koj siab mog !" Ces niam NkaujZag niaj hnub tawm los nrog Txiv Nraug Ntsuag nyob lauj ! Txiv Nraug Ntsuag thiab niam Nkauj Zag nkawd niaj huub sib tham. Muaj ib hnub, Txiv Nraug Ntsuag hais rau niam Nkauj Zag tias: "Yuav ua cas kuv thiaj yuav tau koj ?" Niam Nkauj Zag teb tias:"Thaum kuv txiv yuav mus, kuv txiv kom koj zov tsev. Nws los koj yuav nyiaj yuav kub los nws mam muab rau koj. Tab sis, kuv hais rau koj. Nyiaj kub nyuj nees mas koj tsis txhob yuav. Nyiaj kub mas yog rhawv nyiajrhawvkub. Hos nyuj nees los koj txhob yuav thiab.Nyuj nees yog yaj ceeb kws txaij kws nraug xwb. Koj txhob yuav thiab. Kuv txiv yuav nug koj tias koj yuav dab tsi. Koj yuav teb tias : 'Txiv, kuv xav yuav koj tus tshws kub hnyiab xwb.' Koj hais li ntawd, koj thiaj li yuav tau kuv nawb mog ! "Ces Zaj Laug mus koos cawv los txog, nws txawm Nug Txiv Nraug Ntsuag tias : "Me Tub ! Koj nyob, ntshai koj saub pauj ?" Ntsuag teb tias : "Txiv, kuv nyob kuv tsis tau saub thiab as."Zaj Laug hais Ntsuag tias : "Koj nyob, ntshai koj seev pauj ?" Ntsuag teb tias : "Txiv, kuv tsis tau seev as." Zaj Laug txawm nug Txiv Nraug Ntsuag tias: "Me tub, koj zov kuv lub tsev txog tav no, ua li koj xav yuav dab tsi ? Koj puas xav yuav nyiaj yuav kub ?" Ntsuag teb tias: "Txiv, koj muab nyiajkub los zoo kawg lawm. Tab sis kuv tsis yuav." Zaj Laug nug tias : "Ua li koj puas yuav nyuj yuav nees ?" Ntsuag teb tias : "Nyuj Nees los kuv tsis yuav." Zaj Laug thiaj li nug Ntsuag tias : "Me tub, ua li koj xav yuav dab tsi, koj ho hais rau kuv saib ?" Ntsuag teb tias:"Ab txiv, kuv xav yuav koj tus nyuag tshws kub hnyiab xwb. Lwm yam kuv tsis yuav li." Ces Zaj Laug txawm hais tias : "Aub ! Me tub, koj nyob hauv tsev, ntshai koj saub koj seev lawm lauj! Yog koj xav tau kuv tus tshws kub hnyiab, mas tag kis, cia kuv tus tub hlob los nrog koj sim tes taw. Yog koj yeej mas koj thiaj tau. Yog koj tsis yeej ces koj tsis tau nawb !" Ces Txiv Nraug Ntsuag quaj quaj xwb lauj! Niaj Nkauj Zag thiaj hais rau Ntsuag tias : "Txiv Nraug Ntsuag, koj txhob quaj! Cia kuv qhia koj mas koj yeej xwb ! Tag kis koj sawv ntxov ntxov mus lawm pem hauv dej. Koj mus xyuas daim nplooj uas teev kaum ob lub Iwg. Koj muab daim ntawd, koj haus tas, koj rov los mas koj yeej xwb. Koj tsis txhob quaj kiag li! Koj ua li kuv hais xwb." Tag kis, Ntsuag thiajlisawv ntxov ntxov mus txog pem hauv dej, muaj ib daig nplooj teev kaum ob lub lwg dej. Ntsuag txawm muab haus tas, Ntsuag tuaj kiag kaum ob ceg kub. Zaj Laug tub hlob, ho mus haus daim uas teev rau lub, Zaj Laug tubhlob tuaj rau ceg kub xwb lauj! Ntsuag thiab Zaj Laug tub hlob sib nraus ib hnub tsaus ntuj. Zaj Laug tub hlob tsis yeej Ntsuag, nws tsiv plhawv lawm. Zaj Laug hais tias: "Yaiv ! Tus me tub qhev ntawd ua tau diam tiag ! Tos nws yuav yuav kuv tus tshws kub hnyiab. Tag kis, yog kuv tub nrab sim tsis yeej nws thiab mas thiaj muab rau. Yog kuv tub nrab yeej, mas muab ua kua txob kiag xwb ntag." Ntsuag quaj quaj, niam Nkauj Zag hnov, nws hais tias : "Ntsuag, tsis txhob quaj! Nco ntsoov qhov nag hmo kuv hais rau koj xwb ces koj yeej xwb los mas, Ntsuag." Tag kis Ntsuag mus haus tas, Ntsuag tuaj kaum ob ceg kub. Ho Zaj Laug tub nrab tuaj rau ceg kub xwb. Nkawd sib nraus sib nraus ib hnub tsaus ntuj. Zaj Laug tub nrab tsiv plhawv lawm. Zaj Laug tias:"Tag kis, kuv tub ntxawg tsis yeej, mas muab kiag ! Yog kuv tub ntxawg yeej, muab nws ua kua txob kiag." Ntsuag quaj quaj. Niam Nkauj Zaj hnov, nws hais tias: "Ntsuag, txhob quaj, koj nco ntsoov qhov kuv qhia koj xwb." Ces tag kis, Zaj Laug tub ntxawg thiab Ntsuag nkawd sib nraus ib hnub ntsaus ntuj. Zaj Laug tub nrab tsis yeej, nws tsiv pihawv lawm thiab. Zaj Laug hais tias:"Tus me qhev ntawd, nws ua tau diam tiag! Tag kis, nws sim los nrog kuv sib ntsuas zog saih! Yog nws yeej kuv thiab mas nws thiaj li tau. Yog tsis yeejkuv mas kuv muab nws ua kua txob kiag." Ntsuag quaj quaj thiab lauj ! Niam Nkauj Zag hnov, nws hais rau Ntsuag tias : "Ntsuag, koj nco ntsoov qhov kuv qhia koj xwb. Ces koj yeej xwb los mas, Ntsuag." Tag kis, ces Ntsuag thiab ZajLaug nkawd sib nraus ib hnub yuav tsgus ntuj. Zaj Iaug tsis yeej. Zaj Laug txawm hais rau Ntsuag tias : "Koj niam ntshaw kuv tus tshwskub hnyiab diam. Tag kis kuv tso losrankoj twv. Yog koj twv thawj los tau, mas koj thiaj li tau. Yog koj twv tsis tau mas kuv muab koj ua kua txob kiag xwb ntag nawb !" Ces Ntsuag rov qab quaj quaj. Niam Nkauj Zag hnov, nws hais tias : "Tag kis, kuv txiv tso tawm los rau koj twv. Cov ua ntej mas yog kuv cov tis nyab thiab kuv cov niam laus xwb. Hos kuv mas yog tus tom qab ua kwv ib lub kaus khaub khaub hlab thiab hnav ib ce khaub ncaws khaub khaub hlab, thiaj yog kuv nawb !" Tag kis, Zaj Laug thiaj lis tso sawv daws ua ib leeg lub zam los tan Ntsuag twv. Tus nyab hlob, ua ib lub zam los, nws hais rau Nts uag tias : "Txiv Nraug Ntsuag, koj nyab ces yog kuv tiag." Ntsuag teb tias : "Tis dab hlob, koj tsis txhob hais li! Tej tis dab thiab yawm vauv, txhob hais li kod, tsam txaj muag." Tus nyab yau kuj los hais ib yam li ntawd thiab.Ntsuag kuj teb ib yam li ntawd thiab. Tus niam laus ho ib lub zam los, nws kuj hais li ntawd rau Ntsuag. Los Ntsuag hais rau tias: "Niam laus thiab txiv hluas, tsis txhob hais li kod, tsam txaj muag." Niam Nkauj Zag hnav ib lub nyuag zam khaub khaub hlab tawm piaws los. Ntsuag tib plhaw mus khawm nkaus. Ntsuag hais tias : "Kuv nyab yog tus no, kuv yuav tus no xwb." Ces Zaj Laug hais tias : "Yog koj ntshaw hwv no, koj coj mus." Ces niam Nkauj Zag thiaj Txiv Nraug Ntsuag nkawd thiaj li sawv kev los txog tom kev. Tshav ntújkub kub li, niam Nkauj Zag hais rau Txiv Nraug Ntsuag tias : "Txiv Nraug Ntsuag, tshav ntuj kub kub li, wb so me ntsis tso, wb mam mus." Ces niam Nkauj Zag thiaj li mus txiav tau ib lub ntsis tauj los khi rau Ntsuag nkawd nkaum tshav. Niam Nkauj Zaj suav suav Ntsuag taub hau, Ntsuag txawm tsaug zog lawm lauj ! Ib ntsisNtsuag tsimdheev los.Uaciav yog nkawd nyob hauviblub tsev nyiaj tsev kub lawm. Txiv Nraug Ntsuag hais rau niam Nkauj Zag hais tias : "Aub ! Tsis tsum! Cas wb yuav los pw txhaum Suav tsev lawm." Niam Nkauj Zag hais tias: "Tsis yog ho ! Yog kuv niam thiab kuv txiv nkawd tuaj ua rau wb nyob xwb." Ces niam Nkauj Zag hlub hlub Txiv Nraug Ntsuag, nws niaj hnub cia Ntsuag nyob hauv tsev xwb lauj! Niam Nkauj Zag niaj hnub nqa mov nqa zaub mus rau cov tub mab tub qhe noj. Nyob nyob, Ntsuag nkawd txawm yug tau ib tug ntxhais.Nkawd muab tis npe hu ua Zuag. Nyob nyob, tus me nyuam hlob lawm. Txiv Nraug Ntsuag txawm hais rau niam Nkauj Zag tias: "Koj niad ! Koj niaj hnub xa zaub xa mov mus rau tub mab tub qhe noj, ntshaikoj nkees nkees lawm. Hnub no cia kuv ho xa ib zaug." Niam Nkauj Zag tsis kheev. Niam Nkauj Zag hais tias : "Koj txiv, koj tsis txhob mus, cia kuv mus xwb." Txiv Nraug Ntsuag pheej yuav mus xwb xwb li. Niam Nkauj Zag thiaj hais tias : "Koj txiv, yog koj yuav mus no cia tus me nyuam nrog koj mus thiab." Niam Nkauj Zag hais rau tus me nyuam tias : "Me Zuag, koj txiv tsis mloog kuv lus. Yog neb mus no, kom koj txiv kwv lub kaus kom zoo zoo. Tsis txhob ua lub kaus qaij. Nyob tsam tshav ntuj kub koj txiv. Ces Txiv Nraug Ntsuag thiab tus me nyuam txawm xa mov mus rau cov tub mab tub qhe noj. Tshav ntuj mas kub kub li lauj! Txiv Nraug Ntsuag txawm mus pw ua si tom qab ca, nws tsaug zog lawm. Hos tus ntxhais mus ua si lawm thiab. Ces tshav ntuj tuaj ziab Ntsuag, Ntsuag txawm ci ci mus txog puag pem qaum ntuj lauj!Niam Nkauj Kub Kaws txawm pom. Niam Nkauj Kub Kaws hnav cuaj ce kub, yim cev hlaws. Nws tuaj txog, nws hais rau Ntsuag tias : "Txiv Nraug Ntsung, zoo nraug tas npaum li koj, yuav poj niam tsis yuav tej tus zoo li kuv ! Cas koj yuav mus yuav niag niam nkauj zuag paj haus ntshav yaj, niam nkauj zuag ntsis haus ntshav tshis.Niag tsw yaj tsw tshis li ntawd. Koj saib kuv mas hnav cuaj cev kub, yim cev hlaws. Koj yuav kuv los mas Ntsuag !" Ces Txiv Nraug Ntsuag ntsia ntsia. Cas niam Nkauj Kub Kaws yuav zoo nkauj tas npaud tiag ! Ces Txiv Nraug Ntsuag lub siab txawm ntxeev npo rau niam Nkauj Kub Kaws sab lawm lauj! Txiv Nraug Ntsuag thiab nws tus ntxhais nkawd rov los txog tsev, Txiv Nraug Ntsuag txawm hais rau niam Nkauj Zuag Paj tias: "Niam Nkauj Zuag Paj haus ntshav yaj, niam Nkauj Zuag Ntsis haus ntsav tshis, koj kav tsij khiav mus, kuv tus zoo yuav rawm los." Niam Nkauj Zuag Paj hais tias : "Txiv Nraug Ntsuag, yog vim koj tsis mloog kuv lus, koj qaij lub kaus es niam Nkauj Kub Kaws thiaj pom koj lawm.Nyem no niam Nkauj Kub Kaws yuav tuaj hIe koj caus ci."Ntsuag rov cem niam Nkauj Zuag Paj tias: "Phib ! Kav tsij khiav mus tsuag tsuag ! Kuv tus zoo twb yuav rawm los." Niam Nkauj Zag rov hais rau Txiv Nraug Ntsuag tias : "Koj Txiv, ua siab nrog kuv ua neej los mas !" Los txiv Nraug Ntsuag cem cem tsis yuav li lawm lauj ! Thaum uas niam Nkauj Zuag Paj tsaug zog lawm, niam Nkauj Kub Kaws muab ntshav yaj ntshav tshis los pleev niam Nkauj Zuag Paj qhov ncauj, ces nws tsw tsw yaj tsw tsw tshis.

Niam Nkauj Zuag Paj hais npaum li cas los Txiv Nraug Ntsuag tsis yuav lis lawm. Ces niam Nkauj Zuag Paj thiaj tu siab nrho, niam Nkauj Zuag Paj thiaj nthos nkaus rab khaub rhuab cheb kiag qhov rooj txuas mus txog ntua qhov rooj tag. Nws tig loo rov hais rau Txiv Nraug Ntsuag tias : "Koj Txiv ! koj ua ib siab nrog kuv ua neej los mas !" Los txiv Nraug Ntsuag cem xwb, Txiv Nraug Ntsuag yeej tsis yuav li lawm. Kom nws kav tsij khiav mus. Niam Nkauj Zuag Paj cheb kiag ntawm qhov rooj tag mus txog nraum zoov. Nws tig rov los hais rau Txiv Nraug Ntsuag tias : "Txiv Nraug Ntsuag, koj ua siab yuav kuv los mas ! Yog koj tsis yuav kuv sais luag yuav tuaj ntxias hle koj caus ci laiv !" Txiv Nraug Ntsuag rov cem nto tej niag saub thiab lauj ! Niam Nkauj Zuag Paj cheb zoj mus txog ntua nram qab tsib taug. Nws tig loo los hais rau Txiv Nraug Ntsuag tias: "Txiv Nraug Ntsuag, koj ua ib siab nrog kuv ua neej los mas !" Los txiv Nraug Ntsuag cem cem thiab. Niam Nkauj Zuag Paj cheb klag mus txog ntua'hauv lub pa dej. Nws hais tias : "Txiv Nraug Ntsuag, koj tsis ua ib siab nrog kuv ua neej, koj ntiab kuv diam. Zaum no kuv mus lawm tiag tiag. Sim neej no, koj xav pom kuv mas koj yuav txiav cwj nrig, cwj nqws ti ntawm koj tes, koj yuav thuv lub pa dej no kom kev qawj txij koj taub hau, mas ntshai koj thiaj li rov pom kuv." Nws hais li ntawd tas, nws ploj ntais rau hauv dej lawm lauj ! Txiv Nraug Ntsuag tig loo los saib. Ua cas du lug tsis pom vaj tse li lawm ! Tsuas tsh uav peb lub ntsis tauj uas thaum ub niam Nkauj Zuag Paj txiav rau Txiv Nraug Ntsuag nkawd nkaum tshav ntuj lawm xwb lauj! Niam Nkauj Kub Kaws thiaj li luag nqhuas los. Txiv Nraug Ntsuag mus tuav nkaus niam Nkauj Kub Kaws. Niam Nkauj Kub Kaws yim cuaj tsuag kua mis rau Txiv Nraug Ntsuag quaj ceg xyab ceg caws. Txiv Nraug Ntsuag ntho nkaus qhov twg los yim cuaj tsuag kua mis rau Txiv Nraug Ntsuag xwb lauj! Ces Txiv Nraug Ntsuag thiaj li quaj hu quaj hu tias : "Kuv niam Nkauj Zuag Paj haus ntshav yaj, kuv niam NkaujZuag Ntsis haus ntshav tshis dua qhov twg lawd ! Cas kuv yuav nco koj ua luaj no, kuv yuav mus nrhiav kuv niam Nkauj Zuag Paj xwb." Niam Nkauj Kub Kaws mas niam luag luag ceg xyab ceg caws. Txiv Nraug Ntsuag thiaj li mus txiav tau ib tug cwj los nrig. Ces Txiv Nraug Ntsuag niaj hnub nrhiav niam Nkauj Zag ncig lub pas zaj. Nws niaj hnub quaj lauj! Txiv Nraug Ntsuag ncig ncig txoj kev qawj qees txij Txiv Nraug Ntsuag taub hau, tseem ploj nws taub hau lawm thiab lauj! Nws tus cwj nqws ti nkaus ntawm nws tes. Muaj ib hnub, Txiv Nraug Ntsuag thiaj pom muaj ob tug poj niam tuaj ntxhua khaub ncaws ntawm ntug pas zaj.

Txiv Nraug Ntsuag thiaj nug ob tug poj niam ntawd tias : "Ab ! Ob tug niam ntxawd ! Neb puas pom kuv niam Nkauj Zag los tsis pom ?" Ob tug pojniam ntawd teb tias:"Tsawg sawm, zoo siab tsis zoo! Zaum no luag hle koj caus ci kiag ! Koj niam Nkauj Zag mas wb pom kawg los mas !" Txiv Nraug Ntsuag thiaj li hais tias : "Kuv thov neb ua rau kuv pom ib pliag puas tau ?" Ob tug poj niam teb tias : "Yog koj tsis luag wb, wb thiaj yuav ua rau koj pom ib pliag." Ntsuag tias : "Thov neb ua rau kuv pom, kuv tsis luag kiag li." Ces ob tug poj niam ntawd txawm txia ntshis ua ob tug gav nqus lub pas dej ntawd lauj! Ntsuag ntsia ntsia ob tug qav ntawd ob lub plab yuav tawg. Ntsuag txawm luag ib nyuag suab, ob tug qav plab tawg rhe, dej rov qab puv nkaus li qub tuaj lauj! Ces nkawd cem Ntsuag tias : "Txiv Nraug Ntsuag, yog vim koj siab phem li kod, koj thiaj li tsis mloog koj niam Nkauj Zaj lus, koj thiaj txom nyem li kod ! Wb twb ua kom koj pom no, koj tseem luag thiab. Zaum no wb tsis ua ntxiv lawm." Ntsuag quaj thov quaj thov lauj ! Ob tug poj niam hais tias : "Yog koj tsis luag wb tiag tiag, wb thiaj ua koj pom ib pliag." Txiv Nraug Ntsuag teb tias : "Kuv yuav tsis luag li lawm, thov neb ua kom kuv pom niam Nkauj Zag ib pliag xwb." Ces ob thiaj li txia ntshis ua ob tug qav nqus lub pas dej. Nkawd nqus nqus ob lub plab yuav tawg yuav tawg, lub pas dej thiaj li qhuav kiag lauj! Txiv Nraug Ntsuag ntsias, ua cas niam Nkauj Zag ua ntos nthawv nthav ntawd.

Txiv Nraug Ntsuag thiaj tib plhaw mus nthos nkaus niam Nkauj Zag.Niam Nkauj Zag hais tias: "Tsawg! Zoo siab tsis zoo! Koj ua siab phem tas npaum li kod rau kuv, koj tseem yuav tuaj nrhiav kuv ua tus dab tsi ?" Txiv Nraug Ntsuag quaj qua jtias:"Kuv niam Nkauj Zag!Vim yog kuv nco koj dhau, kuv thiaj tuaj." Niam Nkauj Zag hais tias : "Ntsuag, niam no mam sawv koj ntxov tuaj, ces luag neeg qaum ntuj twb tuaj yuav kuv lawm. Lawv twb ua noj haus tas, teem lub hlis no kaum tsib, kuv twb yuav los lawm pem qaum ntuj. Yog koj xav pom kuv mas, koj rov mus txua peb lub thoob peb rhawv dej. Ces txog lub hlis no tim kaum tsib, thaum hnub pib tawm, koj mus xyuas hauv cov thoob dej, koj thiaj pom kuv ib pliag mog !" Txiv Nraug Ntsuag rov los txog tsev, nws los txua tau peb thoob peb rhawv dej coj mus txawb rau tom tshav puam. Txog hnub tim kaum tsib, thaum sawv ntxov. Txiv Nraug Ntsuag hnov niam NkaujZag nrog qaum ntuj neeg los mus. Txiv Nraug Ntsuag thiaj li xauj zoj thawj lub thoob, pom niam Nkauj Zag yim pliag los lawm. Xauj zoj lub, pom niam Nkauj Zag yim pliag los lawm. Ho xauj zoj lub, pom niam Nkauj Zag yim pliag los lawm thiab lauj! Txiv Nraug Ntsuag thiaj li tig hlo ntsia saum ntuj no. Ua ciav niam Nkauj Zag nrog qaum ntuj neeg los lawm. Nws thiaj tib plhaw mus nthos nkaus niam Nkauj Zag. Ces niam Nkauj Zag thiab Txiv Nraug Ntsuag nkawd thiaj li ua ke ya rau puag tim qab ntug lawm. Qaum ntuj neeg qw zom zaws tias : "Kav tsij zoj zeeg ! Ntiaj teb neeg tuaj txeeb peb poj niam lawm. Tsuag tsuag hu ntuj tua, hu xob tuaj tua." Ces niam Nkauj Zag ntshai, niam Nkauj Zag thiaj li laug kiag rab nqos ntsaj tuaj thaiv kiag tom qab.Qaum ntuj hu ntuj tua, hu xob tua los tua tsis raug li. Ces Niam Nkauj Zuag Paj thiab Txiv Nraug Ntsuag nkawd thiaj li mus ua neej nyob puag tim qab ntuj kawg lawm.

Ces nyem no tej hnub ua tshav tshav ntuj, thaum tsaus ntuj, pheej muaj ib twv huab dub nyob puag tim qab ntug, peb pheej pom laim txuj txias mas yog niam Nkauj Zuag Paj ua ntos. Tej thaum xob nroo laws, tej niag laim pom kev dawb vog, mas yog niam Nkauj Zuag Paj laug nqos tuaj thaiv tom qab. Peb pom ci, peb hais tias yog xob laim. Tab sis yog niam Nkauj Zuag Paj laug nqos xwb. Tsuas yog zoo hnub zoo hmo, niam Nkauj Zuag Paj thiaj li sawv ua ntos.

Subject: Re: XEEBTSHEEJ TIAM LI DAB NEEG Fri Mar 24, 2017 6:35 pm

Vuag..., kuv cov duab saum nov yog kuv li tiag, tab sis zoo li kuv twb tsis tau tso rau hauv no li nav.... ua cas nws ho los nyob tau rau ntawm no thiab ne?

Kuv nco tau mas yog kuv tso ib zaug rau tom hmoob Zag xwb na....es ua cas ho los nyob tau rau ntawm no thiab ne?

Subject: Re: XEEBTSHEEJ TIAM LI DAB NEEG Sun Mar 26, 2017 3:58 pm

TubHmoobYajSab,

Es koj nco tsis tau lawm tias cov duab ntawm koj yog koj muab rau kuv thaum nyob tom hmoob zag los kuv tseem khaws cia tav no es nqa tuaj seb koj puas nco tau lawm xwb na. Koj sim nco zoo zoo seb koj puas nco tau tias kuv yog leej twg lawm mas lov...

Subject: Re: XEEBTSHEEJ TIAM LI DAB NEEG Sun Mar 26, 2017 5:16 pm

Nyob zoo os NKaujnagtshia..., zoo siab uas koj tuaj teb qhia rau kuv paub os nawb thiab nyob rau tom hmoob zag raws li kuv nco tau ces tus 1 nws yog Nkaujhnubqub hos tug 2 ces nws yog Pajhli xwb ces kuv xav mas tej zaum koj yuav yog Pajhli lawm os. Tab sis kuv twb nco tsis tau lawm tias kuv tau muab cov duab ntawd rau koj los yog rau leej twg li os.

Subject: Re: XEEBTSHEEJ TIAM LI DAB NEEG Mon Mar 27, 2017 6:15 am

Nyob zoo TubHmoobYajSab,

Yog tias nco tsis tau kuv no ces nco tias kuv yog tus qhia koj mus ua cov niag duab bligee es koj muab rau kuv ma koj muab rau kuv es kuv thiaj li tau ma. Tab sis li cas los xij kuv tau khaws dab tsi lawm ma vim kuv khaws zoo zoo laiv tsis pub xiam li hov.

» hlub lwm tiam
» Mam hlub koj rau lwm tiam
» TIAM TWG LOS YUAV TOS KOJ
» Nco txhua tiam hlub mus li
» Nco nco txhua tiam dhau los