Ua tsaug os YwjSuab Koj mas hais dab neeg ua rau nagtshia dai siab heev lawm nav"NagTshia tsis xav tsis xav tsis xav ?????Quaj yog tus tsis tau ywjsuab na :
NkaujNagTshia a.....YwjSuab ces....hahaha.....txawj hais tau rau nws dai siab xwb es twb tsis txawj hais kom tau rau nws dai taw. Koj mas cas yuav hais tau ntxim hlub ua luaj li na los, yog li ntawv ces YwjSuab mam li piav mus raws kiag li nws hais seb Ywjsuab puas yuav pom nws lub me kuam muag ntxim hlub poob os yom.
Subject: Re: Tus Ntuj Pub Nrog Tus Qub Hlub Mon Dec 08, 2014 5:53 am
NkaujNagTshia rov hais rau YwjSuab hais tias: Kuv thov txim os YwjSuab! Twb yog vim koj yuav ncaim kuv mus lawm tiag tiag es twb yog kuv nco nco koj heev, kuv tseg tsis taus koj, kuv tsis pom qab yuav hais li cas rau koj ces kuv thiaj cia li lam hais tau li ntawd rau koj lawm xwb os nawb. YwjSuab…..koj mus lawm no los koj yeej meem ua lub siab loj nteev tso siab tau rau kuv, kuv nyob rau tom qab los kuv yuav tuav wb txoj kev sib hlub kom khov khov thiab kom ruaj ruaj tseg rau wb nawb thiab kuv yuav nco ntsoov txhua txhia yam uas koj thiab kuv wb tau hais cia thiab tau muaj tseg txog ntua rau thaum hnub uas wb rov qab tau los sib ntsib thiab tau los nyob ua ke mus tas ib txhis. YwjSuab…..txawm koj mus es ho ua tsis tau ntaub ntawv yooj yim los koj tsis txhob maj maj, tsis txhob ua lub siab kub kub, koj yeej meem ua lub siab loj thiab rub lub siab ntev es tsis txhob ntxov siab txog rau kuv mog. Txawm lub sib hawm yuav ntev npaum li cas los koj yuav tsum xav ntsoov hais tias, kuv nyob rau tom qab kuv tseem tuav rawv koj thiab kuv wb txoj kev hlub zoo heev thiab khov heev tseg tos koj no mog YwjSuab. Kuv yuav ua koj lub me chaw sov siab thiab lub me chaw txhawb zog pub rau koj mus kom tag rau sim neej no nawb mog YwjSuab. Kuv thov lub ntuj lub teb nrog pov hwm koj kom koj ua dab tsi los kom tau dab tsi raws li koj lub siab xav thiab kom lub ntuj lub teb nrog saib xyuas koj kom mus los tsis ntsib kev mob kev nkeeg, nyob kaj siab lug txog rau hnub uas koj thiab kuv wb tau rov los nyob ua ke mus tag ib sim nawb YwjSuab tus me neeg uas kuv hlub thaib tshua……es mus zoo koj mog YwjSuab.
Subject: Re: Tus Ntuj Pub Nrog Tus Qub Hlub Tue Dec 09, 2014 10:52 am
Txog lub caij sawv daws nce tsheb lawm ces YwjSuab txawm nce nkag mus hauv lub tsheb thiab mus zaum tig rov qab tuaj saib NkaujNagTshia rau sab tsheb sab nrauv thiab nrog NkaujNagTshia tham. NkaujNagTshia txawm los tuav YwjSuab tes ces nkawd ib leeg yeej hais tsis tau lus rau ib leeg li lawm ces nkawd tsuas muab nkawd plaub lub qhov muag coj los sib saib lawm xwb. YwjSuab thiab NkaujNagTshia nkawd txoj kev sib ncaim nyob rau zaum no ua rau nkawd mob siab thiab sib nco npaum nkaus li ob tug neeg tau mus poob zoo rau thaj chaw nyob rau hav suab puam es tsis muaj dej haus li es nkawd ho nrhiav tau ib lub pas dej txhawv ntshiab heev, haus tau qab zib heev thiab kaj siab kawg nkaus li. Tab sis, yuav nyob tsis tau rau ntawm thaj chaw ntawd mus li es yuav tau ncaim tawm ntawm lub paj dej ntawd mus li xwb, los ob tug neeg ntawd yeej tsis muaj ib yam dab tsi yuav ce tau ib qho dej ntawm lub pas dej ntawd nqa nrog nkawd mus li. Xyov yuav ntev npaum li twg thiaj li yuav rov qab los hauv tau lub pas dej ntawd dua ib zaug ntxiv. Thaum lub suab tsheb nrov loj zuj zus tuaj lawm ces ua rau YwjSuab thiab NkaujNagTshia nkawd ob lub siab mob thiab kub npaum nkaus li lub lauj kaub dej npau dug dam nyob hauv lub qhov cub lawm xwb. Thaum lub tsheb khiav yeev lawm ces ua rau YwjSuab thiab NkaujNagTshia nkawd ob sab tes plam plhuav nkawd hnov zoo nkaus li nkawd txoj sia yuav tu tiag tiag. NkaujNagTshia saib lub tsheb khiav mus dhau dawm lawm, ho YwjSuab los kuj tig rov qab tuaj saib NkaujNagTshia ploj qab ntais lawm thiab. Thaum YwjSuab thiab NkaujNagTshia nkawd ib tug tsis pom ib tug li lawm los YwjSuab tseem saib tej me toj roob hauv hav uas nyob ze rau ntawm lub yeej thoj nam tawg rog Vib Nais kom ploj dhau tag thiab tso YwjSuab mam li ua ib siab tsis tig rov qab mus saib rau tom qab lawm xwb. Hos ntawm NkaujNagTshia ces nyob rau ntawm qhov chaw nce tsheb ntawd mus txog ntua rau thaum uas tsis muaj ib tug neeg nyob li lawm ces NkaujNagTshia mam li ua ib siab taug kev rov qab mus tsev lawm.
Subject: Re: Tus Ntuj Pub Nrog Tus Qub Hlub Wed Dec 10, 2014 11:08 am
Lub sib hawm kuj tau dhau mus lawm tau li peb lub hli, txij li thaum YwjSuab tau ncaim NkaujNagTshia mus rau txawv teb chaws lawm ces YwjSuab thiab NkaujNagTshia nkawd sib nco heev li. Thaum YwjSuab mus txog rau teb chaws HmongHeave lawm ces YwjSuab txawm mus nrhiav hauj lwm ua yam tsis nco qab nkees kiag li. YwjSuab lub siab ces tsuas xav ntsoov hais tias, tshuav NkaujNagTshia nyob rau tom qab tos ntsoov YwjSuab yuav ua ntaub ntawv rov qab mus tos NkaujNagTshia. YwjSuab kuj kub siab fab fos mus ua ntaub ntawv rov qab mus tos NkaujNagTshia lawm thiab tiag thiab YwjSuab kuj tau xav nyiaj mus rau YwjSuab niam thiab txiv nkawd kom nkawd mus hais NkaujNagTshia tuaj rau YwjSuab. Txoj kev cia siab nyob rau ntawm YwjSuab ces tsuas yog ua hnub ua hmo loj lawm zuj zus tuaj lawm xwb tiag, YwjSuab xav hais tias, tsuas tshuav tsis ntev lawm xwb ces YwjSuab tus me hlub NkaujNagTshia twb tuaj nrog YwjSuab nyob ua ke lawm. YwjSuab ua hnub ua hmo tos saib puas pom YwjSuab niam thiab txiv nkawd sau ntaub ntawv tuaj hais qhia rau YwjSuab hais tias, nkawd twb mus coj tau NkaujNagTshia los ua YwjSuab nyab lawm no. Muaj ib hnub YwjSuab mus ua hauj lwm rov qab los txog ntawm tsev, YwjSuab txawm mus qhib lub thawv rau ntawv (mail box) no ua li cas YwjSuab ho pom dheev li lub hnab ntawv nyob rau hauv muaj ib daig roj hmab kaw lus. Lub hnab ntawv ntawd txawm sau YwjSuab txiv lub npe ces ua rau YwjSuab zoo siab heev li tsis nco qab hle YwjSuab lub tsho loj coj mus khuam cia. YwjSuab txawm muab YwjSuab txiv cov lus coj los mloog ces YwjSuab hnov YwjSuab lub plawv dhia ceev ceev nrov pig poog cuag li YwjSuab lub plawv yuav tawm los lawm tiag. YwjSuab txawm xav zoj hais tias, zaum no ces NkaujNagTshia yog YwjSuab poj niam lawm tiag tiag no.
Subject: Re: Tus Ntuj Pub Nrog Tus Qub Hlub Thu Dec 11, 2014 10:43 am
YwjSuab tau hnov YwjSuab txiv hais tias, me tub YwjSuab…..peb twb tau mus hais me ntxhais NkaujNagTshia rau koj raws li koj tau hais los lawm nawb. Tab sis, thaum peb mus hais me ntxhais NkaujNagTshia niam thiab txiv ces nkawd tsis kam muab me ntxhais NkaujNagTshia rau koj nawb mog. Kuv yog koj txiv hais tuaj qhia rau koj paub hais tias, me ntxhais NkaujNagTshia niam thiab txiv nkawd hais tias, tos nkawd tsis kam muab nkawd me ntxhais NkaujNagTshia rau koj los yeeb vim yog vim koj mus nyob rau teb chaws HmongHeaven lawm. Nkawd yuav xav coj nkawd tus me ntxhais NkaujNagTshia tuaj mus nyob rau lawm teb chaws Hmongza no es nkawd thiaj li tsis kam nkawd tus me ntxhais NkaujNagTshia rau koj nawb xwb no os me tub YwjSuab. NkaujNagTshia niam thiab txiv nkawd kuj tau hais ib lo lus ntxiv hais tias, yog koj ho nrhiav tau txoj hauv kev mus nyob rau teb chaws Hmongza no ces thaum koj mus txog rau Hmongza teb lawm no ces nkawd mam li kam muab nkawd tus me ntxhais NkaujNagTshia rau koj no mog, hos yog hais tias koj nyob rau teb chaws HmongHeaven ntawm ko xwb no ces nkawd txiav tu nrho lawm hais tias, nkawd tsis kam muaj nkawd tus me ntxhais NkaujNagTshia rau koj li no nawb mog me tub YwjSuab thiab kom koj los tsis txhob tos li lawm no vim nkawd yug me nyuam tau tsawg tsawg xwb es nkawd xav coj tuaj mus nyob ua ke rau teb chaws Hmongza thiaj li tau kev sib txib sib pab no. Txawm kuv ua koj txiv thov nkawd npaum li cas los nkawd yeej tsis tseev li, yog li ntawd kuv ua koj txiv los thiaj li mus hais tsis tau me ntxhais NkaujNagTshia los rau koj raws li koj lub siab xav mog me tub YwjSuab.