Nco Kuv Txiv Ua Luaj

Kuv leej nus, Ibzaugntxiv,

Zoo siab tau ntsib koj hauv no thiab mog.

Kuv leej me nus zoo, koj paub nco koj txiv thiab lod? Yog, vim licas thiaj tsis nco no mas? Kuv xav tias peb txhua tus yeej nco yus txiv thiab yus niam tshaj plaws li, koj hais puas yog?

Ibzaugntxiv aj, vim licas yus niam yus txiv thiaj tsis rovqab los ua yus niam yus txiv ibzaugntxiv lawm na? Koj puas paub thiab na? Yog paub no thov qhia kuv mog. Vim kuv nco nco kuv txiv li na, leej nus aj,

Nyobzoo kuv txiv,

Kuv xav muab lub sijhawm no los sau ib cov lus rau saum huabcua seb koj puas ua npau suav zoo pom kuv mog.

Kuv txiv, sim neej no cas yuav tu siab ua luaj li os. Yog vim tus abtsi os, kuv txiv, kuv thiaj los tau lub neej tu siab, txom nyem siab ntsws tag npaum no nas, kuv txiv?

Kuv txiv aj, koj ib txwm qhia kom kuv ua neeg zoo xwb. Koj qhia kom kuv hais lus zoo, coj kom zoo, hlub tej hlob tej yau, fwm txhua tug thiab mloog lus xwb koj twb tsis tau qhia kom kuv txawj tiv thaiv kuv tus kheej, koj twb tsis tau qhia kuv seb thaum cov neeg phem tsim yus lawm yuav tiv thaiv tau licas li os, kuv txiv.

Kuv txiv aj, yog koj paub qhov kuv hais no lawm, kuv thov koj zam txim rau kuv uas kuv tau muab ib puas tsav yam npo cia tau 20 lub xyoos no yeej tsis qhia rau kuv niam neb li mog. Qhov kuv npog ntawd, koj yeej paub lawm, vim kuv xav txog qhov zoo rau kuv lub neej xwb, kuv tsis xav muab lub neej tso mus. Vim li kuv thiaj nyiaj kuv tej kev mob siab, ntsim siab, iab siab, thiab tu siab tshaj plaws ntawd los txog rau niaj hnub no tsis qhia rau kuv niam neb paub li mog.

Kuv txiv, muaj ntau zaus kuv nug kuv tus kheej tias puas yog tim kuv txoj hmoo, los yog tim kuv tus no yeej zoo tsis txaus no nas, kuv txiv. Kuv thov koj los qhia kuv ib zaub ntxiv os kuv txiv. Kuv xav paub heev li na, tias puas yog tim kuv txoj hmoo yeej los zoo li no es kuv thiaj ua lub neej nyob nrog lub kua muag no nas, kuv txiv.

Sim neej no, tu siab kom tshajplaws li os, kuv txiv. Kuv ib txwm ua koj ib tug me ntxhais zoo, me ntxhais nquag, me ntxhais mloog lus, yog koj paub txog kuv txoj kev lwj siab, kuv txiv, ntshe koj yuav tauv tsis taus koj lub kua muag ib yam li os.

Kuv txiv, txawm tias kuv qhia tsis tau rau koj es hnub no kuv mam muab los sau rau saum huab cua xwb los thov koj zam lub txim pub rau kuv mog.

Kuv txiv, yog muaj dua lwm tiam tiag no, kuv yuav thov los yug ua koj tus me ntxhais dua mog. Vim tias koj yog ib leej txiv uas zoo tshaj plaws li, koj tsis lam yuav cem, yuav ntaus, yuav ntiab kuv lossis tag nrho koj cov menyuam txhua tug li os kuv txiv. Koj yog ib leej txiv zoo tshaj plaws txhua leej txiv uas kuv tau paub thiab pom los ntawm kuv cov phoojywg. Tag nrho cov Hmoob nyob peb lus zos, koj yog tus siab zoo tshaj plaws, koj muaj lub siab dawb, koj hlub txhua tug uas lawv tsis muaj txojkev hlub, koj hlub txhua yim neeg uas lawv tsis muaj noj, thiab koj qhuab ntuas txhua leej nyab uas tau lub neej tsis zoo, kuv txiv, yog vim licas kuv thiaj tsis muaj koj thaum kuv tau lub neej tsis zoo. Kuv txoj kev nyuajsiab, kuv tsis paub yuav mus tham rau leej twg li os, kuv txiv. Qhov kuv tseem cim tau thiab nco tau ces yog tej lus koj ntuas kuv thaum kuv tseem nrog koj nyob xwb. Thiab cim tau tej neeg uas lawv tuaj cuag koj es koj qhuab qhia kom lawv rovqab mus ua lub neej sib sib hlub xwb os, kuv txiv.

Kuv txiv, kuv yuav thov koj ib yam kev pab nawd, kuv thov koj los pab kuv thaum kuv muaj kev nyuajsiab ntxov plawv. Kuv thov koj los pab tswj kuv lub siab lub ntsws kom kuv coj tau kuv tej ncauj lus zoo, kom kuv hais lus zoo, hais lus haum kuv tsev neeg, coj kom kuv txawj xav tshaj yav tag los, coj kom kuv hais lus muaj kuab, muaj nuj nqes rau kuv tsev neeg, coj kom kuv txawj xav, kom kuv paub hlub txhua leej mog kuv txiv.

Kuv ua koj tsaug tag txhua yam li os, kuv txiv tus siab zoo. Kuv thov lub ntuj thiab daim av, tej tswv teb tswv chaw pov fwm koj mog kuv txiv. Thov tswv ntuj pub txiaj ntsim npluamias rau koj mus tsis tag tsis kawg es kom koj los ua npausuav zoo rau kuv thiab mog.

Hlub thiab nco koj tsis muaj hnub kawg...,