Kuv Zaj Dab Neeg

Subject: Kuv Zaj Dab Neeg Sun Jan 27, 2013 1:25 pm

Nkaujmim Txoj Kev Ntshaw
Nkaujmim yog ib leej me ntshais ntsuag. Nyob tsaus ntuj nti tsis muaj tus qhua tus qhia. Nws ntshaw niam thiab txiv lo lus qhua qhia heev. Nws thiaj xyaum qhib pob tseg mloog luag ob cag qhuab qhia luag tej tub tej ntxhais kom ua neeg zoo thiab kom xyaum nquag thiaj muaj tus nyiam. Nkaujmim khaws luag cov lus zoo los kawm ua nws lub neej. Nws xyaum nyuag, haujlwm txhua yam txawm nws tsis txawj luag cem los nws kawm ua li luag nyiam thiab luag txib, nws tsis muaj xam khib. Txawm luag yuav cem nws cuag pajkaws tawg plij ploj los nws rub lub siab ntev. Luag txib ncaj Nkaujmim ua ncaj luag txib nkaus Nkaujmim mus nkaus vim nws tsis paub ncaj thiab nkaus thiab yuam yog txhais li cas. Txawm luag yuam nws ua qhev los nws tsis chim tsis npau vim nws xav tias qhov ntawv yog kev luag qhia nws ua txoj haujlwm xwb.

Txoj kev tu siab Nkaujmim muaj ntau ntau heev li. Tsis hais los txhua tus yeej paub vim txoj kev ua ntsuag txhua tus yeej pom lub neej ntsuag no mus zoo li cas. Cia Nkaujmim qhia Nkaujmim txoj kev ntshaw ntawm Nkaujmim lub neej. Nkaujmim ma khwv ua hnub ua hmo. Nkaujmim ntshaw kom tau ib txiv kom hlub hlub Nkaujmim es saib Nkaujmim puas tau so ib chim los ib tsam. Thaum tsau ntuj Nkaujmim mus pw tsaug zog ma nws yeej xav ntsoov tias yuav nrhiav li cas es thiaj tau tus neeg yus nyiam thiab hlub yus. Ntxhais ntsuag li yus no es puas muaj tus ntshaw ne? Txhua txhua hmo Nkaujmim mus pw nws yeej xav li ntawv xwb. Nkaujmim yeej tsis pauv nws txoj kev xav li.

Muaj ib hnub Nkaujmim thiab nws tus phoojywg Maiv Dawb ua pajntaub nraim qab tseb taug. Nujtee thiab nws tus phoojywg nkawv thiaj tuaj ncig saib hluas nkauj txog Nkaujmim lawv tsev. Nkaujmim ces yog tus me ntxhais ntsuag tsis muaj tsoos tsho hnav eb nws lub cev nws lam hnav khaub ncaws ntsws ntsoj ntsws ntsee. Ho Nkaujmim tus phoojywg Maiv Dawb muaj niam muaj txiv ces nws hnav khaub ncaws tshiab khib. Muaj lub ntsej muag tham luag ntxhi. Maiv Dawb thiaj hu tias, nej tuaj los Nujtee. Ntujtee teb tias, aw wb tuaj ma. Maivdawb nej ua dab tsi xwb nab hnub no?
Maivdawb teb tias, hnub no peb nyob hauv tsev xwb.
Nujtee tias...Lov. Maivdawb tus me nyuam ntxhais caib caib muag ntawm koj ib sab hu li cas nab? Cas yuav caib muag tau ntxim hlub ua luaj li.
Maivdawb luag luag ces nws teb tias....Ntujtee nws lub npe hu li Nkaujmim os.

Thaum no Nkaujmim thiaj tsa muag mus ntsia Nujtee. Nujtee ma zoo nraug tshaj plaws li. Nujtee tham lus luag ntxhaw ntxhi nrog Maivdawb ua rau Nkaujmim xav nyiag ntsia Nujtee tas li tab sis tsis xav kom Nujtee pom. Nkaujmim xav twj ywm rau hauv siab tias, nws zoo ntxim nyiam heev tab sis yus yog ntshais ntsuag ces lawv tsis nyiam yus li laub. Cia ob peb xyoo kuv loj zog yog nws rov tuaj tso kuv mam nrog nws tham kiag.

Nujtee los kuj ke tham lus nrog Maivdawb kuj ke nyiag ntsia Nkaujmim thiab. Nujtee kuj xav twjywm rau nruab siab tias tus me nyuam ntxhais caib muag no zoo ntxim hlub kawg. Nws tus yeeb yam ntxim nyiam heev tab sis cas nws tseem me me aiv ua luaj. Lam loj zog no kuv nrog nws txuas lus kiag thiab. Cia ib ob xyoo kom nws loj zog kuv mam rov tuaj saib nws thiab nrog nws tham seb puas ntxias tau nws txoj kev hlub xwb laub.

Nujtees hais rau Nkaujmim tias, menyuam ntxhais caig muag. Koj ntxim hlub heev li tab sis koj tseem khub khub ntswg ob peb xyoo saum no koj txawj so ntswg lawm kuv mam rov tuaj tham koj nawb. Txhob maj mus yuav txiv ov. Maivdawb teb tias, Nujtee tsis nyiam luag txhob dag li ko tsam Nkaujmim muaj muaj tos tias koj yuav rov tuaj no laiv. Nujtee teb tias, Kuv hais tiag ho Maivdawb. Koj pab saib nws rau kuv nawb.

Dua li ntawv Nujtee thiab nws tus phoojywg nkawv rov mus tsev lawm. Nujtee txawj tseem cav tias cas mus tham hluas nkauj txog tav no twb tsis pom ib tug ntxhais ntxim nyiam li Nkaujmim li. Nkaujmim ntxim nyiam thiab ntxim hlub heev tab sis ma nws tseem me heev tsam kuv niam thiab kuv txiv lawv tsis tau pub kuv yuav nws. Ab! nyuaj ua luaj no ces cia kuv mus kawm ntawv qib siab kom tag tso mam rov mus tham es yog nws nyiam kuv ces kuv mam yuav nws los nrog kuv nyob wb thiaj tsis txom nyem. Ces Nujtee txawm mus kawm ntawv qib siab lawm.

Ntawm Nkaujmim los nws kuj nyiag nyiam Nujtee rau hauv siab lawm thiab tab sis Nkaujmim xav tias yus yog neeg ntsuag no xyov Nujtee lawv puas nyiam yus thiab yus los tseem me me txog txij yus loj tuaj ces lawv twb mus nrhiav tau ib tug lawm. Lam nyiag nyiam rau nruab siab raws li yus tau pom ib tug neeg zoo nraug hais lus ntxim ntxim siab xwb. Yog tsis muaj txoj hmoo rov ntsib nws dua los mam nrhiav ib tug coj tus cwjpwm zoo li nws. Tsuav tus ntawv hlub yus xwb.

Ob xyoo dhau mus lawm laub. Nkaujmim tiav tiav menyuam hluas nkauj lwm tiag. Nws yog me ntxhais ntsuag ces nws coj lub siab ntev ntev thiab hais lus tus tus. Tsis nrog luag ob cag sib thab plaub thiab Nkaujmim rau siab ntso ua nws tej haujlwm ua nws niamhlob lawv txib nws. Cov tib neeg nyob ze Nkaujmim yeej pom tau tias Nkaujmim yog ib tug ntxhais coj tus coj tog thiab nyuag heev. Ua dab tsi los ua tiav hlob.

Nyob nyob muaj ib hnub ces Tub Tooj txawj ncig tuaj txog Nkaujmim lawv lub zos. Tub Tooj lawv muaj ib tug niam ntxawm thiab txiv ntawm lawv nyob ua ke hauv Nkaujmim lub zos thiab. Tub Tooj tuaj so hauv nws niam ntxawm thiab txiv ntawm lawv lub tsev. Tub Tooj tuaj so thiab mus tham hluas nkauj rau ub rau no tau ob peb hnub ces Tub Tooj txawj hais rau nws niam ntxawm thiab txiv ntawm tias, niam ntxawm thiab txiv ntxawm kuv tuaj ncig ua si hauv nej lub zos zaum no ma yog kuv xav nrhiav ib tug pojniam yuav. Nej nyob lub zo no ne puas muaj ib tug ntxhais zoo ntxim ua nyab thiab. Tus txiv ntxawm tias me Tub Tooj koj tuaj nov yog koj tuaj nrhiav pojniam yuav lov? Ntxhais tab tom zoo ua nyab ma muaj ob peb tug thiab cov peb pom na. Tab sis tus ntxhais peb pom tau tias yuav ua tau ib tug zoo nyab thiab los nyiam taus thiab hlub taus koj niam nej tsev neeg ma ntse kawg Nkaujmim xwb. Nkaujmim siab ntev heev thiab nquag heev li os. Koj mus saib nws seb koj puas nyiam nws ma. Tub Tooj thiab teb nws txiv ntxawm tias, ua li ma ntxiv ntxawm. Tag kis tso kuv mam mus saib nws os. Li cas no kuv mam li rov los qhia niam ntxawm neb.

Muaj ib hmo, Nkaujmim lawv nim qhuav noj hmo tas. Nkaujmim tseem ntxuav ntxhuav tais diav tsis tau tas. Cas txawj siv hnov Khob khob qhov rooj. Nkaujmim tus niamhlob thiaj mus qhib qhov rooj. Hnov niamhlob hu tias, Oh me Tug Tooj yog koj sav. Los tsev os. Niamhlob thiab txiv hlob thiab Tug Tooj lawv tseem sib tham sib tham ntev loos. Nkaujmim ntxhuav tas daiv thiab tus tos chav noj mov tag. Nkaujmim thiaj nkag los thaum chav nyob yuav mus lawm tom nws chav pw. Thaum Nkaujmim los txog ntawm chav nyob, Nkaujmim thiaj tig mus ntsia Tub Tooj ib muag. Nkaujmim hu tias, koj tuaj lov? Tub Tooj Teb tias aw! Tub Tooj thiaj tias, koj yog Nkaujmim puas yog? Nkaujmim teb tias, yog ma. Zoo siab ntsib koj hmo no os tus muam Nkaujmim. Nkaujmim teb tias, kuv los zoo siab ntsib koj thiab os tus nus Tub Tooj. Ces Tub Tooj thiab Nkaujmim tus niamhlob thiab txiv hlob lawv cia rov sib tham sib tham. Lawv tham ntev loos, txiv hlob thiaj tias ntse koj tuaj nov yog koj tuaj nrog Nkaujmim hais lus ua si pob? Tub Tooj teb tias, yog ma hlob. Kuv tuaj ncig xyuas nej sab teb chaw nram no es los Nkaujmim hais lus us ib pliag nyaj niamhlob nej tsis xav li cas pob? Nkaujmim tus txiv hlob thiaj teb tias, tsis ua li cas li os me Tub Tooj. Kav ntsij nrog nws tham ib me ntsis koj mam rov mus pem koj txiv ntxawm lawv ma. Niamhlob thiab txivhlob nkawv thiaj sawv mus pw tom nkawv chaw pw lawm.

Nkaujmim los tseem yog me nyuam ntxhais nim qhuav hlob xwb tsis paub nrog Tub Tooj tham li thiab. Tub Tooj tham li cas Nkaujmim teb li ntawv rov qab thiab xwb. Tub Tooj tias, Nkaujmim es koj kawm ntawv hoob dab tsi xyoo no? Nkaujmim teb tias, kuv kawm hoob 8 tas xwb. Lub caij no phav lawm ces kuv nyob hauv tsev thiab tej hnub mus ua zog kom tau nyiaj siv xwb. Tub Tooj teb, zoo heev li os. Koj ua zog es ua dab tsi xwb nab Nkaujmim? Nrog kuv ib tug phoojywg mus de nws txiv cov taum thiab txiv lws xwb os. TubTooj tias, Nkaujmim a! mus de taum thiab txiv lws ntse sab heev pob? Thiab ntse tshaj ntuj kub heev pob? Nkaujmim teb, TubTooj sab thiab ma. Sab me me thiab tshav kub me me xwb. Tugtooj teb tias, Nkaujmim cas kuv tsis yog cov huab ne yom. Kheev lam kuv yog tauv huab ma thaum koj mus nrog koj tus phoojywg de taum thiab txiv lws es kuv mam ua tauv huab los nres hnub tsis pub tshav ntuj kuv koj kiag li xwb os. Nkaujmim teb tias, Tubtooj yog koj xav yog tauv huab ma ntse koj yuav ua tsis tau tab sis yog koj kam ua tus ntoo nris hnub no nyaj tau xwb yom. Koj puas kam ua tsob ntoo nres tshav thiab nres nag rau kuv nkaum ma. Tubtooj tias, Nkaujmim yog kuv kam ua tsob ntoo rau koj nkaum ntxoo koj kam lov? Nkaujmim teb tias, kam kawg ntse kom lam hais xwb. Ntiaj teb no xyov puas yuav muaj ib leej twg kam ua tsob ntoo rau kuv nkaum ntxoo li e. Tub Tooj teb tias, Nkaujmim txhob txhawj ma tsis ntev no koj yeej yuav pom thiab ntsib koj tsob ntoo sai sai no xwb ma. NKaujmim teb tias,
Tubtooj xav kom muaj tseeb li koj hais xwb yom. Lig lig lawm ces wb tham li no xwb yom. Tsam niamhlob lawv cem kuv os. Tubtooj teb tias, tau kawg os Nkaujmim. Kuv los tsis xav kom koj raug cem thiab es tagkis wb mam rov tuaj sib ntsib dua ma.

Tub Tooj mus txog tom nws niam ntxawm thiab txiv ntxawm tsev. Nws mus pw ib hmo tsis tsaug zog. Vim nws nyiam Nkaujmim lawm tiag. Nkaujmim yog tus nws xav tau nyob rau hauv nws lub neej. Tub Tooj ma laj tos kaj ntuj es yuav rawm hu mus qhia nws niam thiab txiv tias nws nrhiav tau nkawv tus nyab lawm. Nws yuav yuav pojniam thiab coj los nrog lawv nyob.

Ntawm Nkaujmim los nws kuj xav tias Tub Tooj kuj zoo nraug tau ntxim nyiam thiab. Tub Tooj lub ntse muag los kuj zoo muaj ntsis yuav sib thooj Ntujtee lub thiab. Nkawv ob leeg los kuj zoo nraug ntxim nyiam ib yam. Tab sis Nkaujmim tsis paub tias xyov tus twg yog tus nyiam Nkaujmim es yuav kaj coj Nkaujmim mus nrog nws nyob. Vim Nkaujmim yog ib leeg me ntxhais thiab tseem yog me ntxhais ntuag thiab tsis muaj txoj cai yuav xaiv tus nws nyiam. Nkaujmim tsuas nyob tos seb leej twg yog tus muaj lub siab dawb xav hlub Nkaujmim tiag xwb.

Kaj ntug tagkis, Tub Tooj niam ntxawm ua tau tshais siav. Rau tau mov rau lawv sawv daws noj ua ke. Tub Tooj thiaj hais rau niam nkawv hais tias, niam ntxawm thiab txiv ntxawm. Nag hmo kuv mus saib Nkaujmim tag lawm. Kuv nyiam nws heev li. Kuv xav li neb hais lawm thiab. Kuv xav tias nws yuav yog ib tug neeg zoo thiab los hlub tau kuv niam kuv txiv peb. Kuv yuav mus coj nws los nyob hauv neb tsev no kom pub 3 tagkis thiab ua tshoob tag mam coj nws mus tsev. Neb xav li cas thiab neb puas kam pab nta nws rau kuv. Nyiaj ces kuv yeej npaj txaus tuaj tag nrog kuv tsuas thov neb pab ua thiab npaj rooj tshoob rau wb xwb. Txiv ntxawm teb tias, oh me Tub Tooj koj nim qhuav mus pom ib hmo xwb koj txawv siv nyiam thiab npaj yuav lawm ntag. Rov mus saib thiab tham nws ob peb hmo ntxiv tso yog koj yeej nyiam tiag lawm ces koj niam ntxawm wb yeej kam npaj neb rooj tshoob rau neb li ma. Txawm koj niam thiab txiv nkawv nyob deb lawm los txhob ntxhawj os. Wb los yeej tiv tam li koj niam thiab txiv thiab ma.

Tub Tooj thiaj rov qab mus saib thiab nrog Nkaujmim sib tham tau ob peb hmo sib lawv liag. Tub Tooj saib zoo li Nkaujmim los kuj nyiam Tub Tooj lawm thiab. Tub Tooj thiaj tias Nkaujmim kuv xav yuav koj ua kuv tus pojniam es koj puas kam os? Nkaujmim teb tias, Wow! Tubtooj wb twb tsis tau ua nkauj ua nraug li koj twb saib kuv tseeb lawm tias kuv yog tus koj nyiam thiab xav hlub lawm lov? Tub Tooj teb tias, kuv yeej nyiag nyiam koj thawj thawj zaug kuv tuaj pom koj hauv nej lub tsev no lawm. Kuv thiaj tuaj saib koj tau ob peb hmo no kom pom koj tseeb thiab seb koj puas yuav nyiam kuv tiag tso kuv mam nug koj no tiag. Ua li koj puas nyiam thiab xav los nrog kuv nyob mus ib sim neej os Nkaujmim? Nkaujmim teb tias, Kuv yeej nyiam koj thiab ma Tub Tooj tab sis kuv tsis tau kam yuav txiv xyoo no. Yog koj kam no thov tos noj peb caug tas tso yom. Tub Tooj teb tias, yog koj nyiam kuv tiag cas tseem yuav tos txog noj peb caug tas tso ma. Puas yog koj yeej tsis nyiam kuv koj lam muab qhov noj peb caug ntawv los sem lub caij nyoog xwb. Nkaujmim teb tias, tsis yog li ntawv na Tub Tooj. Hauv Nkaujmim lub siab yog xav tos seb puas rov pom Nujtsee thaum noj peb caug es seb Nujtee puas kam yuav Nkaujmim. Vim Nkaujmim nyiam Nujntee ntau dua. Tub Tooj teb tias, Nkaujmim thov koj teb kuv tiag tiag yom. Kuv nyiam koj tiag tiag li lawm os. Tsis muaj ib tug kuv nyiam tshaj kuv nyiam koj lawm. Tsis yog li ces kuv twb mus tsev lawm. Thov teb tias koj nyiam kuv los tsis nyiam thiab koj kam yuav los tsis kam yuav kuv xwb. Yog koj kam yuav kuv tiag. Kuv xav coj koj mus nrog kuv nyob hmo no. Nkaujmim teb tias, vuag Tug Tooj, wb twb ua nkauj nraug tsis tau ntev. Koj txawj siv yuav yuav kuv hmo no ntag. Kuv qhia rau koj tias kuv nyiam koj kawg. Tab sis kuv xav kom wb sib tham ib nyuag ntev zog tso. Es koj tsis kam tos txog noj peb caug tag li lov? Tub Tooj teb tias, Kuv nyob deb ntawm no heev. Kuv mus lawm kuv tsis tso siab. Yog kuv mus ces kuv xav coj koj nrog kuv mus. Yog wb ob leeg yeej sib nyiam lawm tsis as yuav ua nkauj nraug ntev yeej sib hlub taus mus ib sim neej. Kuv tsis xav yuam kom koj yuav kuv yog koj tsis kam. Kuv xav kom koj nyiam kuv li kuv nyiam koj es wb ob leeg yeem ib yam. Wb thiaj xav sib hlub mus txog hnub laus. Koj puas xav li thiab. Nkaujmim teb tias, Tug Tooj kuv yeej nyiam koj kawg nkaus li os. Yeej tsis muaj ib tug neeg kuv nyiam tshaj kuv nyiam koj lawm thiab. Thov koj tos txog noj peb caug tag tso ma lov? Yog koj xav muab dab tsi cog wb kev hlub los kuv yeej kam li ma lov? Tub Tooj xav zaj twg los Nkaujmim yuav kom tos xwb tsuav li 4 lub nyuag hli lawm xwb ces Tub Tooj thiab tias, hais zaj twg los koj yuav kom tos xwb ces ua li koj hais. Kuv muab kuv txoj saw kub ntawm kuv caij dab no los rau koj coj nawb. Qhia tias kuv hlub koj ho koj los thov txhob hloob siab. Es txog peb caug ces kuv tsis tos li lawm tuaj txog ces yuav koj kiag lawm wb. Tab sis hauv Tub Tooj lub siab twb tias, coj tsis tau Nkaujmim nrog kuv mus hmo no ces kuv muab txoj saw no cai cia. Kuv rov mus hmo no mam nrhiav kwv tij tuaj nqis tsev hais kiag xwb. Tau ces yuav tsis tau ces mam ua ib siab mus tsev. Nkaujmim teb tias, Ua li ma Tub Tooj. Kuv mam lav wb cov lus cog tseg tsis hloov siab li os. Tub Tooj teb tias ua li os nawb. Ces kuv mus lawm lwm hmo wb mam sib ntsib dua.

Lwj hmo Nkaujmim tos tos tsis pom Tub Tooj rov tuaj nrog Nkaujmim tham thiab tuaj saib Nkaujmim lawm. Nkaujmim xav tias ab! ntse hmo no nws tsis khoom pob cas tsis pom nws tuaj ne? Rov lwm hmo dua los tsis pom Tub Tooj li thiab. Hnub 3 yav yav tav su dua ces Tub Tooj thiaj hu xov tooj tuaj. Nkaujmim mus teb, hello. Tub Tooj tias, Nkaujmim lov? Nkaujmim teb tias, aw yog ma. Cas ob hmo tag los koj tsis tuaj saib kuv lawm es koj mus dab tsi lawm xwb? Tub Tooj teb tias, twb yog kuv tsis khoo thiaj tsis tau rov tuaj saib koj lawm. Ntse koj tos kuv heev pob? Nkaujmim teb tias, kuv tos ma. Es hmo no koj puas khoom tuaj saib kuv lawm os. Tub Tooj teb tias, aw hmo hmo no kuv yuav rov tuaj saib koj dua. Nyaj koj niamhlob thiab txiv hlob nkawv nyob hauv tsev thiab pob? Los tsis nyob ob? Nkaujmim teb tias, niamhlob nkawv nyob thiab ma. Tub Tooj teb tias, yog txiv hlob nkawv nyob tsev thiab no ib pliag no kuv coj ob peb tug kwv tij tuaj thiab peb yuav tuaj nrog nkawv tham me ntsis thiab saib koj os. Nkaujmim teb tias, ua li ma. Ib pliag nej tuaj txog kuv mam qhib qhov rooj os.

Ib pliag cas khob khob qhov rooj. Nkaujmim xav zoj tias yog Tub Tooj lawv tuaj lawm laub. Nkaujmim ceev los qhib qhov kiag rooj. Xav tias yuav pom Tub Tooj li txhua zaus tag los. Cas Nkaujmim qhib kiag qhov rooj na cas pom ib tug txiv neej hmoob laus tuaj ib lub kaus sawv ntawv qhob rooj. Nkaujmim ceeb kiag. Nkaujmim hu tias nej tuaj lov? Tus txiv neej Hmoob laus teb tias, aw peb tuaj os! Nov puas yog hlob tsav lawv tsev ne? Nkaujmim teb tias, aw yog ma. Tus txiv neej Hmoob laus tias, nyaj nej tsis caiv pob me ntxhais? Nkaujmim teb tias, Peb tsis caiv os txiv ntxawm. Tus txiv neej Hmoob laus tias, yog nej tsis caiv no peb yuav los tsev laiv. Nkaujmim teb tias, aw peb tsis caiv os los tsev tau ma. Thaum lawv nkag los tsev tag, Nkaujmim pom Tub Tooj lawv qab los thiab. Nkaujmim tsis zoo nrog Tub Tooj tham li. Ho Tub Tooj los kuj tsis nrog Nkaujmim tham li thiab. Ob leeg sib ntsia xwb. Tus txiv neej Hmoob laus thiaj tias, me ntxhais koj hlob Tsav puas nyob lawm. Nkaujmim teb tias nyob kawg ma, kuv mam mus hu los nrog nej tham os. Nkaujmim thiaj mus hu txiv hlob los. Nkaujmim khiav mus nkaum tom nws hoob txaj lawm.

Thaum Nkaujmim mus nkaum tom txaj lawm. Nkaujmim chim thiab ho ntshai ua ke nrog thiab. Vim Nkaujmim twb qhia rau Tub Tooj tias Nkaujmim tsis tau npaj siab yuav mus yuav txiv. Tseem xav tos seb puas tau ntsib Nutee ib zaug tso. Tab sis Tub Tooj dag Nkaujmim lawm. Tub Tooj tsis tos txog noj peb caug tas. Nkaujmim yeej paub tias zaum no ces tag Nkaujmim ib sim neej txoj kev ua hluas nkauj xwb nyob lawm. Dhau hmo no ces NKaujmim yuav yog ib tug neeg laus yog luag pojniam mus ib sim ces tawm rooj plaws mus tom tej tsis zoo luag ntxhawv ntxhi lawm. Xyov Nkaujmim yuav mus npaj lub neej nrog Tub Tooj li cas es Tub Tooj thiaj yuav hlub thiab nyiam Nkaujmim. Nkaujmim tsuas muaj lub ntshai thiab txhawj tas zog xwb. Hmo ntawv Tub Tooj lawv tuaj hais tau Nkauj lawm mus ua lawv neeg lawm. Ces kajntug tag kis ces lawv ua Nkaujmim thiab Tub Tooj nkawv rooj tshoob lawm.

Txij no mus ces Nkaujmim sau siab hlo los hlub Tub Tooj lawm. Nkaujmim zoo siab hlo los pab Tub Tooj npaj nkawv lub neej. Nkaujmim ua siab muab Nujtee lub npe tus me neeg zoo nraug tso pob tseg hauv Nkaujmim lub siab. Ua ib siab tsis nco nws ntxiv lawm. Tub Tooj los yeej hlub hlub Nkaujmim kawg siab kawg ntsws li thiab.

10 lub xyoo dhau mus Nkaujmim thiab Tub Tooj nkawv mus saib Nkaujmim ib tug niam laus thiab txiv laus vim nkawv yuav tsiv teb tshaws chaw mus nyob lwm lub zos deb deb ntawm Nkaujmim lawv lub zos. Thaum Nkaujmim thiab Tub Tooj nkawv mus txog tom tus niam laus thiab txiv lub tsev cas ho ntsib Nujtee tuaj saib tus niamlaus thiab txiv laus tov thiab. Nkaujmim tus txiv Tub Tooj thiaj mus ua xais npais tuav tes rau tus txiv laus thiab Nujtee. Nrog nkawv tham zaj tag zaj tuaj. Nkaujmim ces zaum puag tus me ab mos nrog tus niamlaus tham me ntsis thiab nyiag ntsia Nujtee. Ho Nujtee los kuj ke tham lus nrog tus txiv laus thiab Tub Tooj thiab ke nyiag ntsia Nkaujmim. Lawv tham tham ib pliag, Nkaujmim tus txiv thiaj nug Nujtee tias npawg, koj puas tau yuav pojniam thiab? Nujtee teb tias, kuv ma ua nraug laus ntev kawg tsis tau yuav li, vim thaum ub kuv pom ib tug menyuam ntxhais zoo nkauj heev. Kuv nyiam nws kawg, tab sis nws tseem me me kuv yeej paub tias kuv niam lawv tsis tau kam kuv yuav nws. Lub sijhawm kuv tos nws ntawv ces kuv thiaj xav tias cia kuv mus kawm ntawv qib siab tag mam mus yuav nws no tab sis thaum kuv kawm ntawv tag nws mus yuav txiv lawm. Txij li ntawv los kuv phej tseem nrhiav los tsis pom ib tug zoo li nws ces twb yog ntev tom qab no mam nrhiav tau ib tug nyiam dog dig ces nim qhuav yuav nws xwb. Wb tsis tau muaj menyuam. Nws mus ua haujlwm lawm nws thiaj tsis nrog kuv tuaj siab Txiv Ntxawm nkawv hmo no. Nkaujmim yeej paub tias cov lus ntawv Nujtee txhob txwm hais kom Nkaujmim hnov. Nkaujmim zoo siab tau hnov Nujtee cov lus ua nws kuj nrhiav tau ib tug hlub nws nyiam thiab muaj lub neej nrog luag ua lawm.

Nkaujmim zaj dab neeg los xaus li no lawm xwb. Nkaujmim txoj kev ntshaw kom tau ib tug txiv hlub hlub Nkaujmim ces twb tau raws li nws lub siab xav lawm. Tus tsis yuav yus ces txhob muab khaw nco tuaj nruab siab ua neej thiaj sov siab. Tus nws tsis yuav yus txhob muab khaw nco tuaj nruab plawv ua neej thiaj mus txog hnub kawg.

Kuv Zaj Dab Neeg Los Xaus Li No.

Subject: Re: Kuv Zaj Dab Neeg Sun Jan 27, 2013 2:02 pm

Nyob zoo os tus muam PajLaim, zoo siab uas koj tuaj piav koj zaj dab neeg rau peb mloog os. Tab sis kuv saib zoo li tsis yog dab neeg hos nws yog tiag tiag li lawm os.
Dab Neeg mas nws hais txog txheej thaum ub uas "Neej thiab Dab tseem koom nyob ua ib zes" Es sab yaj sab yeeb ntawd mas luag thiaj li hu ua "dab neeg" no nawb. Koj zaj nov tej zaum koj hais txog tam sim no lawm pob ?

Txawm yuav yog li cas los nws yeej puav leej zoo nawb, thov koj tuaj piav hais ntxiv mus kom kawg pub rau peb tau paub thiab tau kawm nawb mog tus muam. Tib neeg txoj kev zoo txheej thaum ub lawv muab ua dab neeg hais los mus khaws tseg rau cov tam sim no kawm, hos cov tam sim no ho hais khaws tseg mus rau lub ntiaj teb kawm os.

"Ntuj txoj kev zoo thiab ntuj li koob hmoov nws yeej yog nyob rau ntawm cov tib neeg uas coj tus cwj pwm zoo li koj piav hais los ntawd es nws tsis muaj kev muab hlob hlo li os nawb"

"Xyaum ua neeg zoo thiab ncaj lub ntuj thiaj li pab kom yus tau lub neej zoo os"

Subject: Re: Kuv Zaj Dab Neeg Sun Jan 27, 2013 2:16 pm

Nyob zoo koj thiab tus nus Xeebtsheejtiav,

Kuv tsis paub dab neeg thiab neej neeg txhais li cas li. Kuv thiaj tso tias DagNeeg no na. Ua tsaug koj tuaj qhia kuv os. Muaj sijhawm ces kuv yeej xav muab sau kom tas ma. Yog koj muaj ib zag no ho tuaj nrog kuv sau thiab kuv thiaj tsis txaj muag sau thiab yom.

Yog qhov twg kuv sau tau tsis zoo no thov tuaj qhia thiab kuv thiaj paub kho kom yog thiab os nawb.

Subject: Re: Kuv Zaj Dab Neeg Sun Jan 27, 2013 2:30 pm

PajLaim, koj zaj nov yog koj hais dab neeg los yog koj hais koj na. Kav tsij tuaj hais es kuv yuav tuaj tos nyeem kom kawg nawb, vim kuv nyiam heev li os.

Subject: Re: Kuv Zaj Dab Neeg Mon Jan 28, 2013 12:21 am

Oh, ua cas koj muab kuv txoj neej neeg sau tawm rau nov ma viv ncaus Pajlaim a?
Sad

tu siab kawg os koj zaj neej neeg nov na, ua neej ntsuag ntshe txhua tus yeej zoo li kok zaj no xwb os me PajLaim a.
Ua tsaug ntau nawb mog.

» KUV ZAJ DAB NEEG
» NkaujnagTshia Lub Chaw Mloog Nkauj
» Koj nyiam tus neeg coj tus cwj pwm zoo li cas
» Me neeg zoo
» neej neeg