Subject: Muaj Hmoo Ib Vuag Sat Feb 09, 2013 3:25 pm
Muaj Hmoo Ib Vuag
Thaum ub muaj ib khub hluas nkauj hluas nraug, nkawv sib nyiam heev. Nkawv thiaj sib sau los ua ib yig neej. Nkawv los ua neej sib sib hlub heev li. Sijhawm tsis ntev ib vuag xwb nkawv twb muaj 3 tug menyuam lawm. Nkawv muaj 2 tug tub ib tug ntxhais. Tus tub hlob hu li Tsheej. Tus tub yau hu li Npis ho tus ntxhais hu li Nkaujhuab. Lub sijhawm no Tub Tsheej muaj 8 xyoo. Nkaujhuab muaj 6 xyoo ho tub Npis muaj 4 xyoo. Lawv niam thiab txiv hlub lawv heev. Ib yam dab tsi lawv twb tsis tau ua. Lawv nyob ua si sib caum rau ub rau no xwb. Lawv niaj hnub mus ua teb. Sawv ntxov tsees lawv niam sawv los ua tshai thiab ua mov ntim su. Ho lawv txiv sawv los pub qaib pub npua. Noj tshai tas, lawv txiv ib lub kawm ntim ob rab hlaus ib rab txuas thiab nqa ib rab hneev. Lawv niam eb ib lub kawm ntis lawv cov mov ua su thiab nqa ib rab txuas. lawv txiv ua ntej Tub Tsheej, Tub Npis thiab Nkaujhuab thiab lawv niam lawv lawv txiv qab. Mus txog tom ib tog kev, tub Tsheej txiv hais rau tub Tsheej niam tias, koj niam a! koj coj me Nkaujhuab thiab tub Npis nej mus ua ntej es kuv qhia me tub Tsheej tua nas tua noog ib pliag wb mam khiav khiav tuaj caum nej os. Lawv niam teb tias, ua li os koj txiv.
Tub Tsheej txiv qhia tub Tsheej tua nas tua noog. Nkawv tua tau 2 tug noog ho ib tug nas. Nkawv nqa lawv qab tuaj mus pem teb lawm. Thaum tuaj txog tom teb, tub Tsheej niam twb mus ua ua teb ho Nkaujhuab thiab Tub Npis nawv nyob ntawm tsev teb ua ua si. Tub Tsheej thiaj tias, tub Npis thiab Nkaujhuab, kuv txiv wb tua tau ob tug noog ho ib tug nas tiag. Neb los saib seb. Tus Npis thiab Nkaujhuab nkawv khiav ceev los saib. Tub Npis thiaj hais rau lawv txiv tias, txiv koj puas kam ua rau peb noj. Lawv txiv thiaj teb tias, kam kawg ma. Nej kav tsij saib ib pliag muab tso hauv tsev no kuv khiav khiav mus pab koj niam ua teb es ib pliag yuav tas su kuv mam los tseev ua rau peb noj ntxuag mov nawb. Lawv teb tias, ua li ma txiv. Lawv txiv thiaj mus nrog lawv niam ua teb lawm.
Ib pliag yuav tas su lawv txiv thiaj los hu hu lawv. Me Tub Tsheej, tub Npis thiab Nkaujhuab nej los saib kuv tseev tus nas thiab ob tug noog laub. Kuv yuav muab tseev cia rau peb noj ntxuag mos laiv. Tub Tsheej thiab tub Npis thiab Nkaujhuab lawv thiaj khia khiav los zaum khwj ywb saib lawv txiv tseeb ob tug noog thiab tus nas. Lawv txis qhia lawv tseev tus nas thiab ob tug noog thiab qhia lawv cia li cas thiaj qab. Ci ci tau ib tog noog thiab tus nas ces lawv txiv thiaj tias, mus hu koj niam los peb noj mov laub. Kuv ci siav lawm os. Tub Tsheej thiaj khiav khiav mus hu tub Tsheej niam. Tub Tsheej mus txog ntawm Tub Tsheej niam ces tus Tsheej thiaj tias niam a! Kuv txiv tias, los peb noj mov tag mam rov tuaj ua teb no. Kuv txiv ci tau tus nas thiab ob tug noog ma ntxim qab kawg laiv. Mus las. Tub Tsheej niam teb tias, ua li mas.
Tub Tsheej thiab nws niam los txog ces lawv txiv twb rau tau mov lawm. Lawv txiv muab tus nas thiab ob tug noog faib tshuag tshuag ib leej noj ib qho ntxuag mov. Lawv sawv daws noj mov tau yam kaj siab hlo thiab zoo siab txhua tus. Lawv sawv daws nyob tau kaj siab hlo thiaj luag ntxwb ntxhi xwb.
Ua ua teb yuav tsaus ntuj lawv los mus tsev. Los txog tom ib tog kev, tub Tsheej thiab nws txiv nkawv rov mus tua nas tua noog ib yam li qub kom nws niam coj ob tug yau ua ntej es nkawv tua me ntsis nas nkawv mam lawv qab los. Tub Tsheej txiv nkawv kuj tua tau ob peb tug nas thiab lawv mam los tsev lawm. Thaum los txog tsev lawm, tub Tsheej txiv yog ib tug neeg nquag heev los muab ob tug nas tseev tsuag tsuag muab hau xyaw txuaj loj ma qab tshaj. lawv sawv daws los noj mov ua ke tag mam mus pw. Txhua hmo txhua tag kis lawv yeej mus teb li qub thiab tub Tsheej thiab nws txiv nkawv yeej mus tua tas tuaj noog li qub. Lawv lub neej nyob tau sib sib hlub heev. Txoj kev hlub muaj puv npo. Lawv txiv ma hlub lawv niam thiab lawv heev. Ib yam nyav twb tsis pub lawv niam thiab lawv cov nus muag ua li. Lub sim hawm zoo li no lawv ua neej yeej tsis nco ntshai thiab ntshaw leej twg hlo.
Nyob nyob muaj ib xyoo ces daim ntawv tuag poob los raug lawv txiv lawm laub. Lawv txiv mob mob heev ua neeb kho npaum li cas los tsis zoo. Nrhiav tshuaj ntau npaum li cas rau lawv txiv noj los lawv tsis tsuas muaj mob loj zuj zus xwb. Tus mob tsis tso Lawv txiv tseg ces lawv txiv tau tag sim neej lawm laub. Muab lawv txiv ua pag ua xaus tag. Tej kwv tij txheeb zes mus tsev tag. Lawv lub tsev nyob khoob lug. Tsis muaj tus ntau thawj lawm. Nruab hnub los zoo li tsaus ntuj ntis. Hmo ntuj los haj tsaus ntuj ho lub hmo ma haj ntev. Tub Tsheej saib nws niam ces noj mov los quaj zaug. Mus ua teb los quaj thiab. Ua teb ib hnub los tsev txog tej kev Tub Tsheej nkawv mus tua nas tua noog los quaj heev. Tub Tsheej tsis paub yuav hais li cas nws niam thiaj zoo siab. Thiab tsis paub yuav pab nws nws li thiab vim nws tsem me. Txij li lawv txiv tuag tas, lawv nyob tau lub neej tsaus ntuj nti, nyias nyob nyias tej tug mluas mluas, thiab nyob tau tej tug ntsoos ntsoos. Ib sib huam tsis ntev ntawv ces Hmoob tuaj yuav Tub Tsheej lawv niam lawm laub. Tub Tsheej thiab Tub Npis nkawv yog tub ces nkawv niam tsis coj nkawv mus. Ho Nkaujhuab yog me ntxhais ces lawv niam coj Nkaujhuab nrog lawv niam mus ua lub neej tshiab lawm. Cia tub Tsheej thiab tub Npis nkawv nrog lawv tus hlob nyob.
Tub Tsheej lawv niam coj nkawv tus me muam Nkaujhuab mus ua lub neej tshiab nrog Hmoob nyob deb deb muag tsis pom taws mus tsis txog lawm lau. Cia Tub Tsheej thiab Tub Npis nkawv nrog hlob thiab niam hlob nkawv nyob. Hlob thiab niam hlob nkawv yug tau ntxhais coob xwb ho yug tau ob tug tub thiab xwb. Hlob thiab niam hlob nkawv yeej hlub hlub tus Tsheej thiab tub Npis Nkawv kawg li thiab. Tab sis lub neej nrog niam hlob thiab txiv hlob nyob txawv lub neej nrog yus niam thiab yus txiv nyob. Tub Tsheej ces loj zog lawm es txhua yam kev hlub ntawm nws txiv nws nco tau zoo. Lawv txiv tuag tag ces lub neej txawv lawm deb. Mus nrog niam hlob thiab txiv nyob ces lub neej txawv lub neej yus nrog yus niam thiab yus txiv nyob lawm. Tus Tsheej tu siab twj ywm rau nruag siab piav tsis tau qhia rau leej twg. Ho tus Npis ces tseem me me tsis paub dab tsi. Muab hlob hu ua txiv ho muab niam hlob ua niam nrog hlob nkawv cov me nyuam. Tub tsheej hnov tub Npis hu hlob thiab niam hlob nkawv hu niam thiab txiv no ma ua los los Tsheej lub kua muag. Tub tsheej xav zoj rau nruab siab tias, zaum no es yuav los muag luag hu ua niam ua txiv no lawm tiag tiag los. Zaum no es yus yuav tsis muaj niam muaj txiv lawm tiag tiag. Xav zaj twg los cas tus Tsheej siab ua luaj. Xav tsav twg los tsis zoo tub Tsheej lub plawv. Tus Tsheej thiaj cab zoj nees mus noj zaub. Mus txog tom hav zaub nees. Tub Tsheej mam quaj qw nrov nrov hu tus Tsheej txiv thiab tub Tsheej niam los cas tub Tsheej niam thiab txiv tsis hnov teb qhov twg tuaj. Chim tub Tsheej siab ua luaj thiaj rov los txog tsev los tsis paub nyob vim lub tsev tsis yog yus lub. Niamhlob lawv rau tau mov noj los cas tub Tsheej saib ib ncig ntsia sawv daws es nim yog niamhlob thiab hlob thiab nkawv cov menyuam nws tus me kwv tub Npis nim noj mov luag ntxhi. Tsis pom nws niam thiab nws txiv es lub kua muag poo ntawv nthav. Tub Tsheej noj tsis tau mov ces ua ib siab sawv tsis nrog lawv noj mov. Tawm txog nraum zoov los tsaus ntuj ntis. Me kab civ liv nim quag ntsuag qees cas tsis hnov nws niam thiab txiv lub suab luag thiab suab tham lus. Chim Tub Tsheej siab lua luaj ho khiav kiag mus pw los cas yuav nco nco nws txiv lub suab qees thiab nco nco nws txiv lub suab hais dab neeg ntxias tub Npis kawv pw. Tu tu tub Tsheej siab ces es tub Tsheej twb pw tsis tsaug zog li. Twb yuav kaj ntuj es tub Tsheej dab ntub mam tuaj ces tau pw ib pliag ces xwb.
Will Continue
Last edited by PajLaim on Sat Feb 09, 2013 4:28 pm; edited 4 times in total
Subject: Re: Muaj Hmoo Ib Vuag Sat Feb 09, 2013 4:01 pm
Pajlaim, cas koj zaj dab neeg yuav ntxim kho siab thiab tu siab ua luaj li os.
Kuv twb nyeem koj zaj dab neeg, "Muaj Hmoo Ib Vuag" tag yav saum koj pib sau nov lawm cas yim neeg ntawm yuav nquag ua luaj es lawv yuav sawv ntxov tsees nej hnub coj lawv 3 tug me nyuam mus ua teb ntshe yuav ceb muag heev vim ua teb ces ntshe yeej kov av tag li thiab cas lawv txiv yuav txawj mus yog nas yog noog ua luaj es yuav mus taug tau nas noog qab es thiaj li tua tau nas noog los ci rau lawv tsev neeg noj thaum lawv mus ua teb tshav kub kub.
Nyob nram qab nov cia kuv coj peb mus saib Hmoob mus yos tua nas noj poj kws seb zoo li cas...
Subject: Re: Muaj Hmoo Ib Vuag Sat Feb 09, 2013 4:24 pm
8tos8nco,
Ua tsaug koj muab koj lub sijhawm tuaj nyeem kuv zaj dag neeg. Zaj dab neeg no nyob rau lub neej ntuj qub qab es lawv thiaj mus tua nas tua noog noj vim nyob rau lub sijhawm ntawv tsis muaj nqaij no ne. Nyob rau ntuj qub qab ces mus ua teb xwb me nyuam ces kawg kov mob sav caib muag zees xwb tiag yom. Wow! koj daim video tu tas tua noog cas yuav ntxim kho siab kawg li yuam.
Subject: Re: Muaj Hmoo Ib Vuag Sat Feb 09, 2013 4:52 pm
Daim video saum nov ces twg yog koj zaj dab neeg piav txog ob txiv tub mus yos tua nas noog es kuv thiaj li xav tias nqa los rau peb saib seb kev mus yos tua nag noog nyob yav ntuj qub qab zoo li cas xwb.