Subject: Re: Tus Ntuj Pub Nrog Tus Qub Hlub Tue Dec 02, 2014 1:39 pm
NkaujNagTshia a......kwv txhiaj los YwjSuab tsis txawj dag ho neeg los YwjSuab haj yam tsis txawj dag li os nkauj hmoob. YwjSuab twb dag tsis tau NkaujNagTshia lub niag siab dai li es yuav ua li cas dag tau dab thiab neeg na los.
NkaujNagTshia nim txhawj nplij es yuav nplij zoj txiv nyuj twm noj zauj kom txawj luag, txiv nyuj twm noj zauj thaum twg ces txiv nyuj twm thiaj nco nco niam NkaujNagTshia yuav ciaj mus yuav tuag. NkaujNagTshia nim txhawj nplij es yuav nplij zoj txiv nyuj twm noj zauj kom txawj qhub, txiv nyuj twm noj zauj thaum twg ces txij nyuj twm thiaj nco nco niam NkaujNagTshia mus lawm tsheej qas hnub.
Subject: Re: Tus Ntuj Pub Nrog Tus Qub Hlub Wed Dec 03, 2014 1:13 pm
Ua ntej hnub uas YwjSuab yuav nce tsheb tuaj mus rau HmongHeaven ces YwjSuab thiaj li tau tuaj mus xyuas nws tus npawg 8tos8nco, thaum YwjSuab tuaj txog rau ntawm 8tos8nco lawv lub qhov roob lawm ces YwjSuab txawm khob lub qhov rooj. 8tos8nco txiv thiaj li tau los qhib plho lub qhov rooj ces pom YwjSuab sawv rau ntawm lub qhov rooj sab nrauv ces nws thiaj li tau hu hais tias: Nyob zoo os me tub YwjSuab! Koj tuaj los me tub es los hauv tsev no os. YwjSuab txawm teb hais tias: Nyob zoo rau koj thiab os dab laug! Npawg 8tos8nco puas nyob hauv tsev lawm ne dab laug? 8tos8nco txiv teb hais tias: Aub koj tuaj nrhiav koj tus npawg 8tos8nco los me tub YwjSuab, zoo nkaus li koj tus npawg 8tos8nco nyob rau pem tsev mov tsis sub os. Koj sim mus saib rau pem tsev mov seb nws puas nyob rau pev os yom. YwjSuab thiaj li mus txog rau pem tsev mov no na has YwjSuab pom nws tus npawg 8tos8nco tab tom hauv dej ces YwjSuab txawm khob kiag ib teg rooj ua rau YwjSuab tus npawg 8tos8nco tau ceeb nkaus thiab ua rau nws tus npawg 8tos8nco txham dej kiag. 8tos8nco thiaj li tsa kiag qhov muag tuaj saib pom YwjSuab ces 8tos8nco thiaj li hais tias: Aub! Yog koj los sav npawg YwjSuab, nyob zoo os npawg! Koj yuav ua kom kuv txham dej tuag los ua li cas na? Koj yuav ua rau kuv tau ceeb loj ua luaj li na los…..npawg YwjSuab! YwjSuab thiaj li tau teb hais tias: Nyob zoo os npawg 8tos8nco! Kuv thov txim ntau ntau uas kuv tau ua rau koj ceeb lawm, kuv yeej tsis xav kom koj tuag kiag li ho npawg 8tos8nco. 8tos8nco thiaj teb hais tias: Aub! Thov txim ua tus dab tsi nab…..npawg YwjSuab. Kuv lam tso dag nrog koj xwb los mas. Npawg YwjSuab…..ua li koj lam tuaj xyuas kuv xwb los sis yog koj muaj hauj lwm dab tsi es koj thiaj li tau tuaj. YwjSuab thiab hais tias: Npawg 8tos8nco…..twb yog kuv lam xav tuaj xyuas koj thiab koj niam koj txiv nej sawv daws xwb. Tsis tas li ntawv los kuv tuaj hais qhia rau koj tus ua npawg paub hais tias, nyob rau tag kis xwb ces kuv twb yuav tau ncaim nej sawd daws mus txawv teb chaws lawm nawb.
Subject: Re: Tus Ntuj Pub Nrog Tus Qub Hlub Thu Dec 04, 2014 9:43 am
8tos8nco thiaj li teb hais tias: Aub! Npawg YwjSuab…..yog li ces koj sawm siv yuav ncaim peb sawv daws mus tiag tiag li lawm ntag los, nyob rau hauv kuv nruab siab mas yeej tsis xav kheev kom koj ncaim peb mus li tiag. Tab sis, nyob rau hauv lub yeej thoj nam tawg rog Vib Nais no los ua lub neej nyob tsaus ntuj nti xwb es yog koj ho muaj npe tawm mus txawv teb chaws lawm no los cia koj ho mus thiab los mas. Yog thaum twg uas peb cov nyob tuaj rau tom qab no ho muaj txoj kev txom nyem dab tsi no los peb thiaj li pom qab hais tias, tseem tshuav nej cov uas nyob rau lub ntuj sab tim ub thiab es nej ho los pab peb. Muaj nej tau mus lawm no los peb kuj ho muaj ib txoj kev cia siab rau peb cov uas nyob tom qab tau txoj kev vam lawm thiab. YwjSuab teb hais tias: Npawg 8tos8nco…..kuv los yeej tsis xav ncaim nej sawv daws mus li thiab tiag, nej cov nyob yog cov coob, nej yuav tsis nco kuv npaum li qhov uas kuv nco nej vim hais tias, kuv ib leeg yog tus uas ncaim nej sawv daws mus xwb. Txoj kev uas kuv tau ncaim nej sawv dawm mus zaum no mas tsuas yog kuv xav li qhov koj tau hais los ntawv xwb tiag. Txawm hais tias, peb yuav nyob rau hauv lub yeej thoj nam tawg rog Vib Nais no mus ntev npaum li cas los peb sawv daws lub neej rau yav tom ntej no kuj tsis paub hais tias, yuav nyob zoo li cas mus ntxiv ces kuv thiaj li lam txiav txim siab cia li mus lawm xwb tiag…..npawg 8tos8nco. Kuv xav thov kom koj pab kuv ib yam dab tsi thiab puas yuav tau os npawg? 8tos8nco thiaj li teb rau YwjSuab hais tias: Tau kawg los mas npawg YwjSuab, yog koj xav kom kuv ho pab koj dab tsi ces hais los xwb tiag. Yog hais tias kuv pab tau ces kuv yeej yuav pab koj xwb los mas, wb twb tshwm sim los ua ib sim kwv tij kwv npawg ces twb yog yuav sib vam nyob rau tej ntwb ntus zoo li no xwb os.