Lub Me Pajhavzoov

Subject: Lub Me Pajhavzoov Wed Apr 26, 2017 2:37 am

First topic message reminder :

Lub Pajhavzoov Dai Siab

Lub me Paj……….Hav Zoov dai siab

Paj tawg tshiab……….tsw qab zib liaj

Kuv no thiaj……….nco ua luaj tiag

Nco kawg kiag……….lub Pajhavzoov

Kuv tos ntsoov……….hnub rov ntsib nws

Nplooj siab ntsws……….nco nws quaj dhi

Zoo tam li……….siav tu txog nrab

Paj tsw qab……….txhua leej xav hnia

Xav khaws cia……….tau saib dab muag

Xav khawm puag……….rau lub xub ntiag

Xav hnia kiag……….tus ntxhiab tsw qab

Pw ib sab……….ua tus tswv kav

Paj kev dav……….me Ntab kev deb

Leeg rooj teb……….puas yuav sib cuag?

Puas tau puag……….rau lub xub ntiag?

Nco heev tiag……….lub Pajhavzoov

Puas muaj hmoov……….tau ntsib ib pliag?

Tau tsaws kiag……….lub paj ib sab

Paj tsw qab……….txawm tuaj nruab zoo

Lam muaj hmoo……….tau ntsib ib pliag

Yuav zoo siab……….mus tag tiam no

Cas yuav nco……….ntshaw nws ua luaj

Nplooj siab quaj……….dawv dhi txhua hnub

Vim ntshaw hlub……….ntshaw puag lub paj

Tsw qab tshaj……….thoob plaws nruab zoo

Puas muaj hmoo……….ua tus tswv thiab?

Paj tawg tshiab……….kab muv xav ntsauv

Paj tawg dauv……….kab muv xav tsaws

Xav caum raws………tus ntxhiab cua tshuab

Xav mus muab……….nws de los zais

Coj mus rhais………rau saum hauv ncoo

Muab tso loo……….rau hauv tub yees

Sawv ntxov tsees……….tsw qab zib ntxiag

Tsaus ntuj kiag……….kuj tsw ha ntxiaj

Es yus thiaj……….tau hnia ib leeg

Txhob muaj neeg……….nrog yus txeeb hnia

Yuav khaws cia………kom tshiab ib txhis

Hnia ntshawv ntshis………..txhua hnub txhua hmo

Sim neej no……….cas nco heev tshaj

Lub me paj……….zoo nkauj tsw qab

Nplooj siab fab……….tsis nyob puab cev

Vim txoj kev……….nco Pajkevdeb

Nyob rooj teb……….ntxeev ntuj nraum i

Nco kawg li……….lub Pajhavzoov

Koj thiaj toov……….tau kuv kua muag

Yog tau puag……….siab thiaj yuav kaj

Lub me paj………hav zoov dai siab

Paj tawg tshiab……….zoo nkauj ntxim plawv

Koj nyob rawv……….hauv kev npau suav

Hnia tsis dhuav……….lub paj tsw ha

Paj tawg nra……….tsw qab zib liaj

Kuv no thiaj nco ua luaj tiag mas yuam !

Subject: Re: Lub Me Pajhavzoov Thu Apr 27, 2017 9:29 pm

Nkaujnagtshia wrote:: Nyob zoo os NraugNtses zoo siab heev hnub no rov pom nraugntses tuaj sau paj huam ua rau lub ntuj ntawm no rov ntsa tshiab khiv Ntuj ..e"Cas yuav sau paj huam zoo ua luaj os leej nus hmoob tus tshaj lij"NkaujNagTshia thov ua nws tsaug ntau ntaus os lovNraugNtses"Ntshe nkaujnagtshia yuav hais tsis tau 1 zaj mus pauj nws me txiaj ntsim tab sis nkaujnag thov ua nws tsaug rau 2 zaj paj huam lus seev no thiab nyiam heev li mog.Txhob ploj ntsiag moo es kav tsij rov tuaj seev paj huam lus dai siab rau nkaujnag thiab tsoom phooj ywg tau tuaj nyeem laug sij hawm thiab kawm nawb mog NraugNtses"

Hi, nyob zoo os Nkaujnagtshia, aws zoo siab 1 yam mas zoo siab rov tau tuaj pom Nkaujnagtshia hauv zos hmongheaven no dua thiab os.
Kuv twb tsis txawj thiab os tsuas yog lam sau rau peb tau tuaj nyeem kill time kom txhob laj nyob xwb, ua tsaug Nkaujnagtshia tseem pab tuaj nyeem thiab mog, ua tsaug nws zaj nkauj thiab nawb.

Tsis ua cas li os Nagtshia, tsuav nws ho pab tuaj nyeem xwb ces yeej zoo siab kawg lawm mas.
Aws tsis ploj li os, txawm ntev npaum twg los Nraug Ntses yeej nco ntsoov tias sab ntuj no tseem muaj Nagtshia nyob ces yeej tseem yuav nrhiav time tuaj saib nws mas mog.
Ua li os, khoom mam tuaj sau dua mas.

Subject: Re: Lub Me Pajhavzoov Fri Apr 28, 2017 12:15 am

Lub Paj Raug Pov Ntawm Kev

Lub me paj tseem tsw qab liaj

Cas koj thiaj raug pov ntawm kev?

Pov los ntev los koj tseem tshiab

Tseem raug siab ntxim hnia ntxim hnub

Txiv leej tub twg cas siab phem

Muab koj tshem ntawm nws xub ntiag

Siab phem tiag tsuas hlub thaum tshiab

Paj ntsa iab tsw qab npaum no

Cas tseem ho muab pov ntawm kev

Kuv thov cev tes los pab rub

Thov los hlub ua tus tswv tshiab

Paj haum siab tseem tsw ha ntxiag

Tseem zoo tiag rau kuv tus kheej

Yuav tsis xyeej lub paj raug tso

Tab txawm ho qub rau luag lawm

Paj nkauj ntxawm tseem tshiab rau kuv

Haj tseem xuv rau tus me ntab

Tseem tsw qab cuag thaum tawg tshiab

Tseem ntsa iab cuag thaum pib nra

Tseem tsw ha cuag thaum pib tawg

Thiaj xav khaws xav tau los puag

Tab txawm luag xyeej tias paj zaus

Paj twb laus paj tsis tsw qab

Los me ntab tojsiab li kuv

Tseem xav thuv xav tau lub paj

Coj mus saj mus puag txhua hmo

Paj raug tso los lawm ntau hnub

Txawm tshav kub lub paj pib zuav

Paj pib qhuav vim dej tsis ywg

Paj yuav ntsws vim raug tshav ziab

Paj tsis tshiab vim tsis muaj chiv

Paj nyob tiv ntuj tshav ntuj nag

Paj zaus tag los ntab tseem ntshaw

Tseem xav khaws lub paj los hlub

Yuav tsis pub paj poob kuag muag

Ntab mam puag hlub pauj yav tag

Mam ua nag tshauv tshia los ywg

Lub paj ntsws kom rov tshiab tuaj

Kom rov muaj me kab muv khib

Paj zeeg ib thov hlub yav laus

Kev hlub xaus rau nws xub ntiag

Yeej hais tiag tsis dag lub paj

Hais qhov ncaj yog paj kam lees

Sawv kev tsees pib kiag ziag no

Paj raug tso pov ntawm yas kab

Ua me ntab poj sev puas tau?

Laj tos dhau kev hlub tiam ob

Thov tsis txhob cia rau lwm tiam

Vim yeej nyiam lub paj ntawm kev

Los lawm ntev mas paj dai siab

Thov teb thiab puas yuav tau nab?

Kom me Ntab ho paub lus tseeb

Mas xab yeeb phooj ywg Paj Dai Siab e!!!

Subject: Re: Lub Me Pajhavzoov Thu May 04, 2017 5:49 am

Lam tuaj tso 1 zaj nkauj 6 3 tau mloog laug sij hawm, thanks

Subject: Re: Lub Me Pajhavzoov Wed May 10, 2017 2:56 pm

Nyob zoo os NraugNTses Tus me tshaj lij
cas yuav txawj sau paj huam ua luaj nagtshia cia li qaug vwm
rau nws tej me lus paj huam tag li tiag"NraugNtsesNkaujNagTshia
yeej paub nws kho siab.NkaujNagTshia los yeej xav tau nws me
ntxhiabMe nraug hmoob nplog lub neej no ntshe yuav tsis muaj hnub mus txog .Cas nim sau lus
qab zib lus kho siab ua luaj.Koj nyob sab ntuj deb deb ntshe koj
yuav tsis hnov nkauj hmoob mis kas lub suab quaj .Es nkauj hmoob
mis kas twb tsis paub saupaj huam lus seev ntshe yuav hais tsis tau 1 zaj zoo lus kom
dai koj siab nrheev.Me nraug hmoob ntses tus me tswv yim loj.
Cas nws nim txawj hais txawj seev ua nkauj nagtshia nim kho kho siab
nplooj siab nplooj plawv nim ya plho puag tim 1 sab toj "
Cas rooj teb no luag nim muaj zoo tus hlub tus tshua .
NkaujNagTshia ces lam tuaj ntug muag ua lwm tus luag xwb es koj tsis tuaj ces tsis ntev
nagtshia yuav tsis tuaj zaum ib leeg so kua muag lawm thiab os lov.
Ua tsaug nws tej me zoo paj huam kho siab nawb ...leej nus ntses tus me qab zib..."

Subject: Re: Lub Me Pajhavzoov Thu May 18, 2017 3:28 am

Nyob zoo leej muam Nkaujnagtshia,

Zoo siab thiab ua tsaug ntau uas Nkaujnagtshia tseem tau tuaj nyeem Nraug Ntses cov lus paj huam & tseem tuaj sau lus seev teb Nraug Ntses yam kho siab khuav mog.

Ab ntuj yuas..........leej muam Nagtshia

Cas kuv ntsia..........kuv nyeem tsis dhuav

Nyeem zaum puav...........xwb tsis paub txaus

Nyeem ntau zaus..........los xav nyeem dua

Xav zaum ntua..........pw ntawm 1 sab

Muab nws npab...........los 6 kuv nco

Pw qhau loo..........ntawm nws xub ntiag

Pw mloog kiag..........nws tej lus seev

Koj hais deev..........kuv no nplooj siab

Kev mob iab..........ya lawm sib zus

Mloog tej lus..........koj seev dai plawv

Ntuj yuas lawv..........me niam leej ntxhais

Cas txawj hais..........txawj seev ua luaj

Kuv xav quaj..........thaum hnov koj seev

Tu siab heev..........nws tej lus nroo

Tsis muaj hmoo..........tsuas tau kev mob

Tsis tau nyob..........pw koj xub ntiag

Mloog tus tiag...........tej lus saub seev

Ntshe yuav deev..........tau kuv nplooj siab

Kev mob iab...........ya lawm sib tsus

Ntshe yuav mus..........txia ua kab noog

Ya tuaj mloog...........Nkaujnag lus ntxhi

Kom thiaj li..........daws tau kev nco

Sim neej no..........cas deb ua luaj

Ntshe tsis muaj..........cuav rais ua tseeb

Koj seev teeb...........tau kho siab khuav

Txoj sia yuav...........yaj ntshis tu nro

Sim neej no..........tej lus qab zib

Tuaj deev dib..........tau kuv nplooj siab

Ya sib niab.......... tuaj sab tim ko

Ntshe koj no..........twb tsis paub txog

Hais tias yog..........tim tus dab tsi

Kuv thiaj li..........nyob tsis kab ntsab

Noj tsis qab..........pw los tsis tsaug

Yeeb vim raug..........koj tus dab seev

Kuv thiaj ntxeev...........ua neeg liam sim

Twb yeeb vim..........tej lus qab zib

Koj seev dib..........kuv nplooj siab mob

Yam pos chob..........kuv no nplooj plawv

Mob lub qawv..........yeej tshem tsis tawm

Cas sij hawm...........nim dhau zuj zus

Me leej nus..............zoo li kuv no

Niaj hnub nco...........niaj hnub tuaj zov

Los cas xyov..........tsis pom koj tawm

Muam nkauj ntxawm.........tus neeg txawj saub

Koj puas paub..........tias muaj neeg nco

Tos hnub no..........tshwm rov tag kis

Zoo li tsis..........pom koj tswm kiag

Nco heev tiag..........nkauj hmoob diab sai

Nraug Ntses ntshai..........tsam muaj 1 hnub

Koj xuas dub..........mus ploj qab ntais

Niam leej ntxhais..........tseg ncua tsis tuaj

Ntshe yuav quaj..........seev nco Nagtshia

Quaj ncuj ncia..........txoj sia tshuav yaj

Ntshe yuav laj..........mloog txoj sia tu

2 sab plhu..........kua muag si laim

Xav nruj nraim..........Nagtshia hauv siab

Kua muag iab..........ntws npaum dej nag

Hais tsis dag..........yeej hais muaj tseeb

Me xyab yeeb..........phooj ywg Nagtshia

Thov txhob cia..........kuv tuaj nyob tos

Hnub dhau mos..........hli dhau ua xyoo

Tuaj xa moo...........kom Nraug Ntses paub

Rov tuaj saub..........thiab rov tuaj seev

Kom ho teev...........Nraug Ntses kua muag

Thov tuaj cuag..........1 hlis 1 zaug

Kev nkauj nraug..........thiaj yuav tsis nphob

Thiaj tsis nyob...........nrog txoj kev nco

Thiaj tsis kho...........Nraug Ntses nplooj siab

Mog Nagtshia nkauj hmoob txawj saub txawj seev e!!!!!!