KUV XAV MUAB KOJ NYIAV IB ZAUG

Subject: KUV XAV MUAB KOJ NYIAV IB ZAUG Sun Jan 28, 2018 9:04 am

KUV XAV MUAB KOJ NYIAV IB ZAUG SEB PUAS ZOO KUV LUB SIAB

Yog vim dab tsi tiag neeg ntiaj teb thiaj yuav muaj kev hlub loj ua luaj? Kuv tau pom ib tug mi nkauj hmoob sau tias " KUV XAV MUAB KOJ NYIAV IB ZAUG SEB PUAS ZOO KUV LUB SIAB UA NTEJ YUAV NCAIM KOJ MUS". Thaum kuv pom li no kuv tau muab coj mus xav tau 2-3 hnub tias yog vim dab tsi tiag?

Thaum kawg kuv thiaj pom tias txoj kev ua neej nyob hauv lub ntiaj teb no tsuas muaj ib yam nkaus xwb uas ua rau neeg ciaj thiab neeg tuag tau. Yam ntawd tsuas yog " TXOJ KEV HLUB" nkaus xwb. Ib tsoom mi phooj ywg, nco ntsoov tias yog koj tsis hlub ib tug neeg tsis txhob dag nws. Yog thaum koj dag nws zoo tam nkaus li pov tus npev 3 ceg mus khuam rau ntses lub caj pas lawm yuav ua rau nws yuav nqos mus los nqos tsis tau, yuav nti rov qab los nti tsis tawm.

Thaum zoo li no lawm TXOJ KEV HLUB UAS KHUAM SIAB TSHAJ NPEV 3 CEG thiaj yuav ua rau txoj kev ua neej nyob lub ntiaj teb no tag kev cia siab zuj zus. Suav hnub suav ua rau tus neeg ntawd yuav muab koj nco tsis ploj ua npau suav toog mus nrhiav koj rau hauv dab ntub npau suav. Zoo tam zoj tus neeg mob uas raug dab poj ntxoog ib hnub qaug zog zuj zus thiab thaum kawg ntshe yuav qaug txaj mus.

Ib tsoom mi phooj ywg, yog koj ua zoo saib thiab muab ntsia kom tseeb tias yog TXOJ KEV HLUB MUAJ NQIS NPAUM NO TIAG koj yuav hais lus rau ib tug neeg twg los yuav tsum tau txiav txim siab kom zoo, txhob lam dag ua kom nws muaj siab rau koj thaum kawg koj ho muab nws tso. Yog koj ua li no muaj ib hnub twg yog nws uv tsis taus txoj kev hlub thiab nco koj nws txawm tau ncaim lub ntiaj teb mus ua rau ces nqaij daim tawv txawm yuav lwj mus xyaw av lawm los tus ntsuj plig yuav nco ntsoov rov los nrhiav tos koj.

Thaum ntawd ntshe txhua hmo nws yuav ntsib koj nyob rau dab ntub npau suav tas li. Tej hnub sij hawm zoo koj yuav pom nws luag ntxhi ua rau koj rov nco txog nws ib zaug. Yog tej hnub huav cua pauv mus ua caij nyoog phem ntshe nws yuav los muab koj hem kom quaj poob plig tsim dheev nruab dab ntub.

Txoj kev hlub ntawm tus mi nkauj hmoob no yeej zoo tsis txawv li Nkauj Ntxoo txoj kev hlub uas tau hais tseg tias " NYIAJ KUB YOG LUB NEEJ KUA MUAG" Ua ntej thaum Nkauj Ntxoo yuav ncaim mus nws tau hais tseg rau nws niam tias txawm sau tas nrho kuv txiv neb nej nyiaj tej kub los yeej pauv tsis tau tus neeg kuv hlub, txawm yuav muaj saw kub luaj caj npab los yeej tsis pab. Thaum kuv tau nyeem lo lus tias " XAV MUAB KOJ NYIAV IB ZAUG SEB KUV LUB SIAB PUAS ZOO" cas rov xav txog ib tug neeg uas tsis loj tsis siab ntsej muag dawb paug thiab hais lus luag ntxhi uas cia li ploj ntshis lawm tau 25 xyoos tsis pom nyob qhov twg lawm os.

Tom qab kuv tau nyeem sob lus no tas thiab muab xav tau ntau hnub thiaj tau thov kev tso cai ntawm tus tswv coj los sau ua ib zaj dab neeg rau peb ib tsoom phooj ywg tau nyeem thiab coj mus xav.

Kawg no, vam thiab cia siab tias thaum koj tau nyeem kuv zaj dab neeg no tas koj yuav thim xav thiab hlub tus twg thov kom hlub mus ib txhis nawb mog.

Ua tsaug

(C) SKM 2018

Subject: Re: KUV XAV MUAB KOJ NYIAV IB ZAUG Sun Jan 28, 2018 4:36 pm

Nyob zoo os Ntsuj_plig,

Kev hlub yeej loj tiag os. Thaum yus muaj kev hlub thiab ntshaw ib tug neeg lawm ces txawm yuav ua li cas kom tau nws los yus yeej ua li ho.

Subject: Re: KUV XAV MUAB KOJ NYIAV IB ZAUG Sun Jan 28, 2018 6:56 pm

Nyob zoo os Nkauj Dala

Twb xav tias tav ntuj no tsis pom koj ntshe tsiv mus lwm teb chaws lawm no, tseem nyob thiab los. Zoo siab qhov koj rov tuaj os mog. Yog paub tias KEV HLUB loj npaum niam dej dag li no tiag ces sib hlub nawb mog.

Subject: Re: KUV XAV MUAB KOJ NYIAV IB ZAUG Sun Jan 28, 2018 9:10 pm

Peb ua neeg nyob nyias yeej muaj nyias 1 tug hlub hlub nco nco uas nyias xav muab nws nyiav ciaj tas hnub tas hmo hahahaha

Subject: Re: KUV XAV MUAB KOJ NYIAV IB ZAUG Mon Jan 29, 2018 1:57 pm