Dab neeg Hluas Nkauj Hluas Nraug

Subject: Dab neeg Hluas Nkauj Hluas Nraug Tue May 18, 2010 3:13 am

Thaum ub nyob rau sab moos theeb moos laim tus hluas nraug lub zos nyob deb ntawm tus hluas nkauj lub zos mus li ib tav su kev thiaj txog, tus hluas nraug mus tham tus hluas nkauj yeej swm lawm tos noj tsiab peb caug tas xwb ces nkawv sib qaws ua neej .
Txog lub caij dob nplej tus hluas nraug nrog niam thiab txiv dob nplej lub caij no los kuj los nag heev thiab tsis khoom ces tus hluas nraug tsis tau mus xyuas tus hluas nkauj lawm. Tus hluas nkauj tau mob tsuag tsuag tau 2-3 hnub ces tus hluas nkauj tuag lawm lawv muab pam tas ces lawv muab faus ntawm ntug zos. Lawv tsiv mus nyob rau lwm lub zos lawm.
Tus hluas nraug nrog niam txiv dob nplej tas, tus hluas nraug mam li mus tham tus hluas nkauj , mus txog ntawm tus hluas nkauj lub zos tsaus ntuj kiag lawm , ua cas tsis hnov d.ev tom, tsis hnov neeg ua suab sab ,tsis pom neeg rauv taws li thiab tus hluas nraug seev hauv lub siab tias:
Ab…,cas tsis hnov ua suab sab li tsam tus hluas nkauj lawv khiav mus nyob lwm qhov lawm mas yuav ua li cas ne
twb nco nco hluas nkauj es tsam tsis pom hluas nkauj nas. Ab… khiav khiav mus xyuas hluas nkauj lub tsev tso, mus txog kiag ntawm hluas nkauj lub txaj sab nrauv li txhia zaum xij mus tham hluas nkauj, khoov ntxhi hu hluas nkauj kiag hluas nkauj teb kiag tias koj twb tuaj lawm lov? Koj mus ntev ntev es kuv nco nco koj nas, kuv niam thiab kuv txiv lawv mus pw ua teb tas lawm es koj los tsev wb mam li tham os, tus hluas nraug zoo siab hlo ncaj qha mus ntawm qhov rooj tos tus hluas nkauj tuaj qhib qhov rooj, tus hluas nkauj qhib hlo qhov rooj tus hluas nraug zoo siab heev , lub caij ntawv xuas dub xwb tsis muaj teeb xais thiab teeb ntais, tus hluas nraug cev loo tes mus kov tus hluas nkauj kiag cas ib ce nplaum nplaum tus hluas nraug poob siab ntav ib ce tshee tas li yuav ua npaws, tus hluas nraug hais rau tus hluas nkauj tias ab…, tsaus tsaus ntuj li wb tsis zoo tham ces cia wb mus rau taws kom pom kev tso wb thiaj li zoo tham wb tej kev sib nco, tus hluas nkauj tias wb tsis rauv taws os wb tham li no xwb koj los tsev es wb pw wb mam li tham kev sib nco xwb nas ces tus hluas nraug haj yam ntshai ib ce tshee hna xwb , ces tus hluas nkauj hais tias cas koj yuav tshee ua luaj mas lov, tus hluas nraug teb tias ab… kuv tuaj deb deb tuaj es kuv tiv nag tuaj xwb no no kuv ua ua npaws es koj mus rauv taws wb nte kom sov wb mam li tham mas yuam, ces tus hluas nkauj tias yog no no koj no wb mam li mus rauv taws tab sis koj txhob khiav kuv laiv, tus hluas nraug haj yam poob siab thiab haj yam tshee, tus hluas nkauj tias qhov cub nyob ntawm no koj rauv yuam ces tus hluas nraug rauv taws tshuab tshuab cig me me tus hluas nraug ntsia tus hluas nkauj ib plia cas ntawm ob sab kaum ncauj ntws ob kab ntshav tus hluas nraug haj yam tshee thiab tshuab tshuab taws cig plaws tus hluas nkauj tib tsuag kua lwj taws rov qab tuag kiag lawm , tus hluas nraug tias koj txhob tsuag dej mas twb no no kuv es cia kuv tshuab kom taws cig es wb thiaj li tau nte mas yuam, tus hluas nkauj tias ua li os, tus hluas nraug tshuab tshuab taws cig plaws no has cas ib tug ntsej muag lwj lwj lawm hos hais lus los tsis meej lawm thiab ces tus hluas nraug ntshai heev thiaj hais rau tus hluas nkauj tias : ab…, kuv dim dim zis li es koj nyob kuv mus tso zis tso yuam , ces tus hluas nkauj tias koj dag xwb koj yuav khiav tus hlaus nraug tias kuv tsis khiav nas koj tsis ntseeg no wb sib txuas tw siv, cov thaum ub mas poj niam txiv neej los yeej sia siv , ces tus hluas nkauj tias ua li los mas yog koj dim zis tiag, ces tus hluas nraug thiaj hle hlo nws ib txoj siv ib tog los rau tus hluas nkauj tuav cia hos ib tog ces muab khi tus hluas nraug duav, tus hluas nraug hais rau tus hluas nkauj tias koj nyob twj ywm qhov no koj txhob los tom kuv kuv txaj txaj muag li kuv tso zis tas kuv mam li los nawj ces tus hluas nkauj hais tias ua li los mas , ces tab tom tus hluas nraug ntim ib raj dej haus taug kev nws thiaj li muab raj dej ntawv tho qab kom lub qhov dej tawm me me nrov nploov nploov li tso zis ces tus hluas nraug muab txoj siv mus khi ntawm lub pob ntoos, muab lub raj tso ntawv thiab ces tus hluas nraug khiav khiav los tsev lawm , tus hluas nkauj rub txoj siv cas tawv tawv ho tsis hnov nploov nploov lawm thiab tus hluas nkauj mam li hu cas tsis hnov tus hluas nraug teb lawm tus hluas nkauj mam li mus xyuas no has muab txoj siv khi rau lub pob ntoos xwb ces tus hluas nkauj chim yws tias tsov tom no siab phem hwv mus caum tau muab tom noj kiag ces tus hluas nkauj mam li raws , hluas nkauj txog lub hav hluas nraug txog lub roob , hluas nraug txog lub hav hluas nkauj txog lub roob , ces hluas nraug khiav tsis taus li lawm ces hmoov kuj zoo tab tom pom kiag ib tug plis ntawm kev ces tus hluas nraug thiaj nthos nkaus tus plis los muab hluas nraug lub tsho looj kiag tus plis nce tus plis nce hlo saum ntoo lawm tus hluas nraug khiav khiav ua ntej los lawm tus hluas nkauj los txog pom tus plis hnav tus hluas nraug lub tsho thiaj hais tias : ab…koj nim khiav khiav kuv cas koj ho nyob saum ntoo ko xwb nqes los laiv koj tsis nqes los ces kuv nce tuaj ntag hos , ces tus plis tsis teb li tus hluas nkauj mob siab heev thiaj nce hlo mus ntes kiag tus plis saum ntoo no has cas yog plis xwb, hluas nkauj haj yam mob siab thiaj lauj ces hluas nkauj caum hluas nraug ceev ceev caum yuav luag yuav luag tau , tus hluas nraug khiav khiav los txog ntawm hluas nraug tsev los nkag plho hauv tsev kiag muab qhov rooj kaw kiag xwb ces D.ev mas tom nqaj to Qaib mas saub zom zaws hos npua mas ras thiab tshuab cuag tsi.
Tus hluas nraug los pw kiag ntawm nws niam thiab nws txiv kis nrub nrab Ces tag kis pom kev Nws txiv thiaj mus thov ib tug txiv Neeb txwj Neeb laus tuaj ua ib thaj neeb muab D.ev los quas dab hluas nkauj thiab kho ntau yam ho ua khawv koob ntis pov fwm thiab. Tus txiv Neeb ua neeb tas kom tus hluas nraug caiv 3 xyoos tsis pub tawm nraum zoov li, ces txog hnub puv 3 xyoos kiag hnub qaij nroos , nyob pem lawv qaum tsev muaj ib tsob txiv kub ntas ces nws nqhis nqhis txiv kub ntas nws thiaj xav hauv siab tias : ab…twb puv 3 xyoos rau hnub no lawm tej zaum hluas nkauj ntawv yuav khiav
lawm vim yeej tsis hnov dab tsi , cia kuv sim mus de txiv kub ntas los noj seb, ces nws thiaj tawm nraum zoov mus de
txiv kub ntas mus txog hauv paus tsob ntoo txiv kub ntas nws tseem yuav nce mus de txiv no has cas luag nyav ntawm nws pob tw los hais rau nws tias: Haj yaj…kuv nim tos tos koj tau 3 xyoos no , tag kis ces kuv tu tu siab kuv twb yuav
mus lawm , xav tias koj mus qhov twg lawm no cas koj ho nyob ntawm no ces tus hluas nkauj npau taws heev thiaj tib
plhaw mus puag kiag tus hluas nraug ces thiaj tib kaug tus hluas nraug tuag kiag lawm thiaj coj tus hluas nraug mus ua neej rau dab teb lawm .

Zaj dab neeg no qhia tias:
1.Saum neej tsis tau sib yuav los mam li mus sib yuav hauv dab teb.
2.Tsis mloog lus cam thawj tsis caiv kom puv caij nyoog .

nkauj - Dab neeg Hluas Nkauj Hluas Nraug Insiq410

Subject: Re: Dab neeg Hluas Nkauj Hluas Nraug Wed May 19, 2010 1:14 pm

Leej nus Hmoob Ntuj Qub Qab,

Cas nws zaj dab neeg yuav mus txaus ntshai ua luaj na...

Txhua leej txhua tus twb tias ua nkauj nraug zoo luaj no...tuag lawm ces yuav los cab no ces haj tsi zoo li koj zaj dab neeg no ma. Es nws txawm los los yus txhob ntshai thiab.....vim yus twb tias hais li rau nws lawm thiab ne..hehee...

Kuv nyiam mloog dab neeg heev li...ua tsaug koj tuaj sau rau hauv no rau peb tau nyeem os..

nkauj - Dab neeg Hluas Nkauj Hluas Nraug Rvtrip10

Subject: Re: Dab neeg Hluas Nkauj Hluas Nraug Wed May 19, 2010 1:53 pm