Leej Tub Zoo

Subject: Leej Tub Zoo Tue Aug 24, 2010 9:20 am

Leej Tub Zoo

Leej tub zoo nws yeej mloog lus,
Coj siab tus hais lus tshaj lij,
Haum kwv tij nkauj muam txhua leej,
Zoo txiv neej nws yeej fwm luag,
Hais lus qhuas tsis cem tsis thuam,
Tej nkauj muam nws hlub txhua tug,
Tsis lam ntxub ib leej tus twg,
Kev phoojywg nws muaj coob heev,
Yeej tsis seev tej lus kho siab,
Lub siab kiab hais lus luag ntxhi,
Yeej tsis chis rau tus hlob tus yau,
Nws yeej paub hauj lwm hauv tsev,
Coj siab ntev los pab ua noj,
Niam tsis txhob txiv los tsis txhawj,
Nws yeej txawj los pab tej muam,
Nws tsis thuam nws hais lus zoo,
Yeej tsis nroo thaum nyob ib leeg,
Nws tus kheej yeej tsis sawv lig,
Lub hnub ci nws paub ntuj kaj,
Sawv los npaj nrhiav hauj lwm ua,
Nws yeej nquag ib txwm thaum yau,
Yeej coj tau haum niam haum txiv,
Yeej tsis khib kawm tau txhua yam,
Yog muab tham ces tham tsis tag,
Vim nws ntag yog ib leej tub zoo…,

Subject: Re: Leej Tub Zoo Fri Aug 27, 2010 12:00 pm

Leej tub zoo yog neej paub tab
txawj nrhiav nyab los pab niam pog
tsis lam yog cov neeg quav txiaj
nws nqa nyiaj mus ua khib khub
nws paub hlub niam tais yawm txiv
nws txawj siv tus cwj pwm zoo
nyob nto moo rau zej zog hwm
pom nws tshwm luag zoo siab hlo
tias aib no yog neeg paub tab
txawj txhua fab thiab hwm tej laus
nws zoo nraug thiab muaj hwj chim
tsis yooj yim txhob lam mus thab
neeg tsheej pab tsuas nyob tos hawm
thaum nws tawm luag npaj txais tos
caij nws los luag hawm nws zoo
leej tub zoo ces li no tiag.....

Subject: Re: Leej Tub Zoo Thu Sep 02, 2010 5:24 pm

Wow! Ntsuj Plig,

Thov qhuas koj zaj pajhuam hais txog leej tub zoo thiab os.
Koj mas tshajlij kawg li os leej nus.

Subject: Re: Leej Tub Zoo Thu Sep 02, 2010 5:35 pm

hahaaaa.........Lubpajzoo

Ua koj tsaug qhov tseem lam qhuas kuv thiab os tab sis
tsis txawj sau lam sau nrog koj ua si xwb nawb.

Ua koj tsaug mog

Subject: Re: Leej Tub Zoo Fri Sep 03, 2010 3:17 pm

Ntsuj Plig aw..., kuv los twb tsis paub yuav hais licas thiaj phim rau lub leej tub zoo li thiab mas. Lam sau xwb es yog qhov twg sau tsis raug los twb vam nej tuaj pab qhia thiab es peb thiaj muaj yam tshiab kawm os nawv.

Leej tub zoo ces yeej pab niam pab txiv pab txhua tug li es nws yeej tsis khuv xim nws lub dag zog thiab nws tsis xam khib li nas.

Txawm nws muaj hluasnkauj los nws yeej paub cai thiab nws muaj pojniam los nws yeej paub coj kom haum nws pojniam thiab nws tsev neeg li es ua tsaug rau koj lub sijhawm los nrog kuv pauv tswv yim, kuv xav tias koj los yeej yog ib leej tub zoo heev rau koj niam koj txiv thiab os mog.