*NTSUJ_PLIG*

Ntsuj Plig,

Oiy, koj mas..., kuv tsuas lam sim koj siab xwb nas,
Ua cas koj txawm siv yuav khiav rovqab thiab mas,
Kuv tsuas lam hais sim koj siab seb koj puas cheem,
Cas koj txawm siv yuav khiav rovqab tseg kuv nyob ibleeg,

Koj lub ntuj twb muaj koj tus me nkauj dab ntub rau koj hlub,
Hos kuv li ces kuv lam nyob ib leeg hauv kuv lub ntuj dub,
Koj lub ntuj twb muaj koj tus me nkauj dab ntub hais lus mos,
Hos kuv li ces kuv lam nyob kuv ib leeg ntsuag ntsuag nos,

Yog kuv tsis pub koj mus koj ua li koj puas kam nrog kuv nyob thiab,
Vim yog koj mus lawm ntshe yuav mob qeeg nkaws kuv lub siab,
Yog kuv tsis pub koj mus no koj puas kam nrog kuv nyob ntxiv,
Yog koj mus lawm ces ntshe kuv lub siab yuav tsis luag li,

Ntshe kuv yuav nco nco koj tsis paub mus tham qhia leej twg,
Vim lub ntuj no twb tsis muaj ib tug zoo phoojywg,
Ntshe kuv yuav nco nco koj tsis paub mus nrog leej twg tham,
Vim lub ntuj no twb tsis muaj ib tug zoo phoojywg li nas,

Es yog kuv cheem tiag no koj puas kam nyob ne yom,
Los yog koj lam sim kuv lub siab kom mob xwb no,
Es yog kuv cheem tiag no koj puas yuav kam nyob vim kuv,
Los yog koj twb muaj koj me nkauj dab ntub tus ntxim hlub,

Hwj..., hwj..., hwj..., hwj..., cas yuav mob lub siab ua luaj no...,
Txawm kuv yuav cheem los ntshe yuav cheem tsis tau koj li os,
Vim kuv twb tsis yog koj me nkauj dab ntub tus hais lus zoo,
Txawm kuv yuav cheem los ntshe koj yuav tsis mloog,

Nyobzoo hnub tshiab rau koj os, Ntsuj Plig,

Ab..., koj txawj sau pajhuam es tig rau sab twg los sau tau zoo,
Kuv tsis txawj zoo pajhuam ces kuv mam tuaj nrog koj mloog,
Koj txawj sau pajhuam ces tig rau seem tag los koj txawj tag,
Kuv tsis txawj sau pajhuam ces kuv lam tuaj ua koj luag xwb na,

Kuv ces twb tsis paub xyov sau licas thiaj yog pajhuam,
Kuv lam tau lam sau xwb thiaj tsis muaj neeg tuaj xyuas,
Kuv ces twb tsis paub xyov sau pajhuam sau licas,
Kuv lam tau lam sau xwb thiaj tsis muaj neeg tuaj saib kuv li nas,