Ncaim Cev Tsis Ncaim Siab

First topic message reminder :

Ncaim Cev Tsis Ncaim Siab:

Zaj dabneeg no yog ib nkawm nkauj nraug sib sib hlub uas ob tog niam txiv tsis tau pub nkawd sib yuav ces thaum kawg tus ntxhais niam lawv tau muab nws coj tsiv tebchaws mus nyob rau lwm qhov chaw lawm tabsis nws lub cev lam ncaim nws tus hluas nraug mus xwb lub siab yeej tsis ncaim li.

Nkawd txoj kev hlub yim nyob deb yim ua rau nkawd sib hlub thiab sib nco xwb.

Cov phoojywg, thov caw nej txhua tus los peb sau zaj dabneeg no uake nawd.

Zaj dabneeg no yog yuav nthuav txog, "Npauj Npaim & Ntsuj Plig, Txoj Kev Hlub."

Npauj Npaim & Ntsuj Plig, continues...,

Tagkis pom kev dawb vog xwb Maiv Paj twb txog lawm. Maiv Paj txawm hu tias, “Npauj Npaim, koj npaj puas tau tau os?”
“Aud, kuv twb npaj tau lawm thiab os. Tos ib pliag nawd,” Npauj Npaim teb tag ces nws txawm hais rau nws niam tias, “Kuv niad, kuv mus nrog Maiv Paj hlais nplej lawm os.”
“Aws, mus ib tsam los no ces de zaub npuas los nawd,” Npauj Npaim niam hais rau nws.
“Aws, ua li os, kuv niad, kuv mus lawm od,” Npauj Npaim hais tag ces nws txawm tawm mus lawm. Thaum Npauj Npaim tawm tuaj pom Maiv Paj thiab Tub nkawd sawv pem qaum tsev tos nws, ua rau nws nres ib pliag xav tias, “Eb…, cas luag muaj tus hlub es luag yuav nyob tau kaj siab lug xwb ned?”
“Npauj Npaim, koj npaj tau lawm ces peb mus os,” Maiv Paj hais. Npauj Npaim thiaj teb tias, “Aws, uali os.”

Thaum lawv tuaj txog rau tom teb, lawv muab lawv cov kawm dai cia tag ces lawv txawm mus hlais nplej lawm. Tub hais rau Maiv Paj tias, “Maiv Paj, cia kuv mam hlais rau neb khi yom?”
“Aws, uali mas, Tub,” Maiv Paj teb. Npauj Npaim saib Tub thiab Maiv Paj nkawd ib plia tag ces nws txawm hais rau nkawd tias, “Maiv Paj, cia tub mam hlais rau koj pav hos kuv mam hlais rau kuv pav xwb tau lawm mog.”
“Npauj Npaim, yog li ces thov txhob xav licas rau kuv mog,” Maiv Paj hais.
“Aws, kuv yeej tsis xav licas rau koj li os,” Npauj Npaim teb tag ces lawv hlais nplej lawm. Lub sijhawm no ces Tub hlais nplej rau Maiv Paj pav hos Npauj Npaim tsis muaj tus hlub ces nws mam hlais rau nws ib leeg pav xwb. Maiv Paj txawm nug Tub tias, “Tub, koj puas tau nug es yuav thaumtwg Ntsuj Plig mam los tsev os?”
“Aud, raws li kuv hnov mas nws yuavtsum los tsev nag hmo lawm no tabsis tsis pom los thiab ces cia ob peb hnub saum no seb nws puas los,” Tub teb.
“Lod, cas nws yuav mus ntev ua luaj li es mus ua dabtsi koj puas paub thiab ma?” Maiv Paj nug.
“Maiv Paj, koj xav paub ua dabtsi ma?” Tub nug.
“Kuv xav paub vim tias Npauj Npaim twb yog nws ibtug phoojywg thiab vim licas nws thiaj tsis qhia Npauj Npaim tias nws mus rau qhovtwg li lawm no xwb os, Tub,” Maiv Paj hais.
“Aud, kuv los kuj tsis paub zoo thiab vim tias hnub nws mus lawm ces kuv ho nrog kuv txiv mus yos hav zoov lawm thiaj tsis paub xwb. Kuv tsuas hnov tias nws mus saib kwvtij lawm no xwb os, Maiv Paj thiab Npauj Npaim,” Tub hais rau nkawd ob leeg tag ces Npauj Npaim thiaj hais rau Maiv Paj tias, “Maiv Paj, kavliam os. Nws thiab kuv ces nyuam qhuav sib paub xwb, nws tsis tas yuav qhia kuv li os.”
“Npauj Npaim, kuv paub koj zoo. Ib txwm koj yeej tsis tau mluas li no li nad. Vim li kuv thiaj nug Tub vim kuv txhawj koj xwb,” Maiv Paj hais.
“Wsm…, kuv twb tsis ua licas li ned. Tej zaum yog tshav kub kub es koj thiaj pom kuv mluas mluas lawm xwb os, Maiv Paj,” Npauj Npaim hais.
“Maiv Paj thiab Npauj Npaim, neb txhob xav licas vim kuv yeej tsis paub qhov tseeb thiaj tsis qhia neb xwb,” Tub hais.
“Aws, tsis ua licas os,” Maiv Paj teb Tub hos Npauj Npaim tsis hais lus lawm ib me pliag ntxiv.

Npauj Npaim & Ntsuj Plig, continues...,

Hnub no tshav kub heev ua rau lawv nqis dej heev li. Maiv Paj thiab Tub nkawd ces zoo lit sis hnov tshav kub thiab tsis hnov nqhis dej li vim nkawd nyob tau lomzem xauvnpo xwb hos Npauj Npaim ces nyob ibleeg kho siab khuav es tsis muaj leej twg nrog nws hais lus li. Nws ke hlais nplej ke so fws ces nws thiaj hais rau Maiv Paj tias, “Maiv Paj.”
“Abtsi os, Npauj Npaim,” Maiv Paj teb.
“Tsam no tshav kub lawm ces Tub neb kavtsij hlais nplej es kuv mus nqa dej los rau peb haus lawm nawd,” Npauj Npaim hais.
“Tub txawm hais rau Npauj Npaim tias, “Npauj Npaim, neb nyob kuv mam mus los yeej tau os.”
“Npauj Npaim teb tias, “Txhob ua li, cia neb nyob kuv mus xwb vim kuv xav mus ncig ib pliag tso mam los,” Npauj Npaim hais tag ces Maiv Paj thiaj teb tias, “Uali, wb nyob es koj mus tsuag tsuag koj mam los nawd.”
“Aws, kuv mus lawm nawd,” Npauj Npaim hais tag ces nws txawm los rau pem tsev teb thiab nqa ob lub raj ces mus dua nram hav dej lawm. Npauj Npaim tuaj txog ntawm ntug dej, nws txawm muab ob lub raj los ce dej thiab xav txog thaum uas Ntsuj Plig tuaj nrog nws nqa dej ywg zaub tim lawv daim teb zaub. Npauj Npaim txawm seev tias, “Eb…, yog vim licas rau kuv lawm ne? Ua cas kuv hnov kuv lub siab nyob tsis tus li puas yog tias kuv raug Ntsuj Plig dag lawm ne? Ntuj aw…, yuav tau txhob xav txog nws lawm kuv thiaj tsis zoo li ibtug neeg mob tsam ces kuv pab tsis tau Maiv Paj hlais nplej ntshe yuav nkim lub sijhawm uas Maiv Paj tuaj pab kuv ib hnub li os.”
Npauj Npaim tseem tabtom xav ces nws lub raj twb puv dej lawm ces nws muab lub raj eb rau tim ntug ces ho muab lub ob los ntim dej thiab. Nws ntim tau ob lub raj dej ces nws txawm los zaum ntawm ntug dej seev dua tias, “Ab…, yog vim licas kuv lub siab pheej tsis kaj li ned? Ntshe yuav tau ua ib siab txhob xav txog nws lawm thiaj tsis ntxov ntxov siab…,” nws xav li tag ces nws muab ob lub raj nqa dej los rau lawv haus lawm. Thaum Npauj Npaim los txog, nws pom Maiv Paj thiab Tub nkawd tseem sib sib tawb, nws thiaj tsis xav los kom nkawd pom nws ces nws mus dua pem tsev teb, muab ob lub raj cia rau ped ces nws mam nqa nws rab liag tuaj thiab txua tau ib tug lev les los tshuab. Thaum Maiv Paj thiab Tub nkawd hnov Npauj Npaim tshuab lev les ces nkawd mam tig los saib nws. Maiv Paj mam hu Npauj Npaim tias, “Npauj Npaim, koj twb los lawm lod?”
“Aws, kuv nqa dej los tso rau pem tsev lawm es neb mus so thiab haus dej nawd,” Npauj Npaim hais. Maiv Paj thiaj hais rau Tub thiab nkawd thiaj mus so pem tsev teb haus dej lawm hos Npauj Npaim ho tuaj hlais nplej. Npauj Npaim hlais nplej ib pliag, nws kho kho siab ces nws thiaj seev suab hais kwvtxhiaj li no:


Nijyai…, cas kab kooj rau khau nplooj es kooj kab mus tuaj rau khau khiab…, sim neej no daj dee hais zoo ua luaj no daj dee tsis tau es puas kho lawm koj siab mog.

Nijyai…, cas kab kooj rau khau nplooj es kooj kab mus tuaj rau khau tawv…, sim neej no daj dee hais zoo ua luaj no daj dee tsis tau es puas kho lawm koj plawv mog.

Nijyai…, cas cuaj tuaj los cua tshuab es yuav tshuab tau nplooj xyoob nplooj ntoos mus tuaj khaub zig nplej mog, cas sim neej no daj dee tsis tau es kho siab luaj no es me nplooj siab yuj plaws tuaj rau ntawm nej mog,

Nijyai…, cas cua tuaj los cua tshuab es yuav tshuab tau nplooj xyoob nplooj ntoos mus tuaj khab zig nroj mog, cas sim neej no daj dee tsis tau es kho siab luaj no es me nplooj siab yuj plaws tuaj rau ntawm koj mog od.

Nijyai…, txiv leej tub…e…, cas tawm rooj plaws yuav tsis pom niaj tus dab tsi mog yuav pom tau me noog liaj noog luv mus tuaj ya puv roob, paub tias sim neej no daj dee tsis tau ces tsis txhob daj dee me nkauj xwb mus tuaj kua muag poob mog.

Nijyai…, txiv leej tub…e…, cas tawm rooj plaws yuav tsis pom niaj tus dab tsi mog, yuav pom tau me noog liaj noog luv mus tuaj ya puv toj mog, paub tias sim neej no daj dee tsis tau ces tsis txhob daj dee me nkauj xwb mus tuaj kua muag nrog.

Ces nim chis siab ua luaj no xaus xi tuaj lub ntsis ciab…, txiv leej tub …ee… paub tias niag ncauj dag siab tsis yuav tsis txhob daj dee me nkauj xwb mus tuaj nyob kho siab mog.

Npauj Npaim & Ntsuj Plig, continues...,

Thaum Npauj Npaim hais kwvtxhiaj tag ces Ntsuj Plig tuaj txog ntawm nws nraubqaum. Ntsuj Plig thiaj teb ntua tias, “Nijyai…, cas tus tshav tuaj los tshav ziab es yuav ziab tag me nplooj npleg daj lawm tej niag sis niab, plees nkauj nraum hais zoo ua luaj no puas yog tim kuv es koj thiaj li kho kho lub siab,
Cas tus tshav tuaj los tshav ziab es yuav ziab tag me nplooj npleg daj lawm tej niag sis zawv, plees nkauj nraum hais zoo ua luaj no puas yog tim kuv es koj thiaj li kho kho lub plawv.”

Thaum Ntsuj Plig hais cov lus ntawd tag, Npauj Npaim tig los saib nws ib muag tag ces Npauj Npaim txawm tig loo khiav lawm. Ntsuj Plig thiaj khiav cawm Npauj Npaim thiab hu tias, “Npauj Npaim, Npauj Npaim, koj khiav kuv lod? Npauj Npaim, tos kuv ma,” Ntsuj Plig hu thiab khiav lawv qab. Npauj Npaim khiav mus dua nram hav dej lawm ces Ntsuj Plig thiaj caum mus txog rau nrad, nws thiaj hais rau Npauj Npaim tias, “Npauj Npaim, ua cas koj ho khiav kuv mas lod?”
Npauj Npaim tsis teb thiab tsis tig los li. Ntsuj Plig thiaj majmam los txog rau ntawm Npauj Npaim nraubqaum, nws cev tes los tuav Npauj Npaim lub duav thiab muab tig los saib nws. Nws pom Npauj Npaim ntws ib teev kua muag ntawm nws sab plhu. Ntsuj Plig thiaj nug Npauj Npaim tias, “Npauj Npaim, qhia kuv seb vim licas koj ho quaj?”
Npauj Npaim tsis hais lus li thiab ces Ntsuj Plig thiaj rovqab hais ntxiv tias, “Npauj Npaim, teb kuv ma? Puas yog tim kuv es koj thiaj li quaj los yog vim leej twg ua rau koj quaj, thov qhia kuv ma?”
Npauj Npaim tsis teb li thiab ces Ntsuj Plig thiaj cev tes los so Npauj Npaim teev kua muag ntws. Npauj Npaim tig mus lawm tsis saib Ntsuj Plig, ua rau Ntsuj Plig xav tsis thoob li ces nws thiaj nug ntxiv tias, “Npauj Npaim, puas yog tim kuv koj thiaj li quaj ma? Txawm koj tsis kam teb kuv los tsis ua licas, vim Tub twb qhia kuv lawm. Kuv thov koj zam txim rau kuv mog vim tsis yog kuv txhob txwm ua.”
Npauj Npaim thiaj teb tias, “Wsm…, kuv twb tsis quaj lawm. Kuv twb xav tias cia ua ib siab txhob xav txog koj lawm no ua cas koj ho tuaj txog ntawm no thiab os, Ntsuj Plig?”
“Npauj Npaim, ces muaj tseeb li Tub hais lawm lod? Puas ta kuv tuaj txog pem tsev teb, Tub hais rau kuv tias hnub no koj lub siab tsis kaj li ua rau nkawd xav tsis thoob kiag es vim licas kuv yuav tsim koj lub siab loj ua luaj li no. Npauj Npaim, thov qhia kuv seb kuv tau tsim koj lub siab mob npaum licas lawm os? Tig los ma,” Ntsuj Plig hais rau Npauj Npaim thiab rub nws sab plhu los saib. Npauj Npaim thiaj teb tias, “Ntsuj Plig, kuv tsis ua licas os. Twb yog hnub no kuv tsis xis neej ua rau kuv tsis xav nrog nkawd hais lus xwb.”
“Puas tiag ma?”
“Tiag mas, Ntsuj Plig. Koj saib ma, kuv twb tseem yog tus qub ne,” Npauj Npaim hais luag ntxhi rau Ntsuj Plig ces Ntsuj Plig thiaj muab tes los tuav Npauj Npaim tes thiab hais ntxiv tias, “Npauj Npaim, kuv paub tias koj zais lus lawm tsis kam qhia kuv xwb. Kuv thov koj txhob chim tos kuv qhia koj tso ma,” Ntsuj Plig hais li tag ces Npauj Npaim thiaj teb tias, “Wsm…, qhia los tau mas.”

Ntsuj Plig thiaj qhia rau Npauj Npaim tias tos tau ib ntus no nws tsis tuaj nrhiav Npauj Npaim lawm los vim nws nrog nws txiv mus saib lawv cov kwvtij lawm. Nws muaj ibtug txiv hlob tau tag sim neej ces lawv mus saib kwvtij thiab mus ntev me ntsis vim nws txiv tseem nrog cov kwvtij tham ces thiaj tsis tau los tsev sai xwb. Tomqab Ntsuj Plig qhia rau Npauj Npaim tag ces Nkauj Npaim lub siab thiaj li kaj thiab nkawd thiaj los mus rau pem tsev teb los noj sus uake.


To be continues...,

koj mas txawj piav dab neeg ua si ua luaj li na niam laus