Vajtse Puamtsuaj

Subject: Vajtse Puamtsuaj Wed Oct 20, 2010 12:07 pm

First topic message reminder :

Sib ncaim thaum lub caij ntuj pib
qab ntug tawg paj ci ntsa iab
txhua txoj kab khaub lig puj ntuj
Lub siab yuj tsi xav ncaim kiag li
siab quaj dhawv dhi vim yog yuav tau sibncaim

Ncaim lawm tau ib lub caij nyoog
Vaj tse puas ntsoog tsi muaj tus saib
fuab cua faib rhuav plam tas lub neej
Ntawm kuv kheej ntshiav tas txhua txoj lw
Tsi pom tw zeem ntawm kaum muag

Hiav txwv quas ploj pliag lawm qab thu
mam tuaj hu nrog suab quaj qw
Kuv me Nkaujnyiag Haj tseem pw
Tsaug zog tsi tau hnov luag thiaj pov
Lub neej rau qab pas dej ntsuab
plam lub cuab los tseem tsi tau lig
tuaj nrog kuv ncig mam pib dua tshiab

nyob hauv lub siab tseem nco koj heev
yuav niaj hnub tuaj seev kom pom koj ntxiv
seb puas kiv mus cuag lub neej thaum i
muaj koj thiab kuv tuaj hais lus ntxhi
niaj hnub thawm hmo kuv thiaj nnco los mas.........!

Nyob zoo os kuv me phoojywg Puagkojcia,

Wow! koj na cas mus ntev ua luaj no...nim cia kuv zuam tsaug zog nris no es koj tuaj txog los kuv twb tsis pom koj li thiab. Koj txawm siv rov qab lawm es tseg koj zaj me nkauj no rau kuv mloog nco koj xwb na lov?

Kuv zoo siab ua koj tseem rov tuaj saib kuv ib plig li cuag plawv ib vuag dua ua rau kuv lub siab kaj lawm me me os.

Li cas los tsuav kuv me phoojywg Puagkojcia noj qab nyob zoo xwb ces Nkaujnyiag zoo siab lawm ma nawb.

Yog koj rov tuaj es kuv tseem tsaug tsaug zog no ces mloog zaj nkauj no tag koj mam rov mus os...heehee

Subject: Re: Vajtse Puamtsuaj Fri Dec 28, 2012 6:55 am

NYOB ZOO NKAUJHNUBQUB

ib xyoos ntuj zeeg twb rov txog dua tshiab
puas kho siab los tseem zoo li qub
ntuj thaum ub kev tso daj tso luag
raws puas cuag lub neej npau suav
khiav khawv khuav rau txhua lub zos
puas ntsib txog hmoob txiv leej tub
zoo ntxim hlub ntshe yog tshuaj iab
kev mob siab haj tseem vwm tshaj
Ntaus siab kaj ces kawg ntawm nov
nrog kuv zov pajmab txivntoo thiaj txi
nra npaum hli ci cuag hnub qub
xav khawm rub ziag rau ntawm ntiag
nyob ib pliag seb siab puas zoo
lub hauv xyoo kom tau txais kev kaj
kev mob ntsaj kom nrog xyoo laus
kev nkauj nraug tsuas muaj kom ntsib
nyob sib ib sib puag tsi dhuav
txhob yog cuav thiaj raws siab xav
ua siab dav nrog rau lub xyoo tshiab no os nkauj muam aw.. !

Subject: Re: Vajtse Puamtsuaj Fri Dec 28, 2012 7:22 am

Nyob zoo Puagkojcia, ua tsaug koj lo lus
Tau ntev zus tsis xav tuaj heev
Vim kev seev tsis xav nroo
Kev nyob zoo los kuj muaj
Siab kuj ruaj vim muaj nus
Qhia lus tus rau nkauj muam
Nws hais tshuam ces siab thiaj qhoob
Me nus hmoob xyoo tshiab no
Thov nws nco muam qaib qus thiab
Kho nplooj siab los tsis zoo hais
Vim nws pais ntev li ntev
Nws lub tsev sws tas lawm
Nkaujmuam tsis tawm vim tsis muaj tus nco
Ua siab hlo mloog nws lus xwb
Tseg tsis dwb heev li yav thaum i
Nyob luag ntxhi tseem tos koj dua
Lam ho tshua txog peb phooj ywg thiab mog
Xav los txog kev nkauj nraug
Tsis xav qaug rau leej twg
Tsuas ua phooj ywg sau lus laug caij
Tos hnub qaij ces tus hlub los lawm
Mam li khawm puag nws xwb
Yus lub hlwb thiaj tsis puas os
kawm lus mos los nqa cawm siab
Kom kev kiab nyob nto ntsis
Txoj kev chis thiaj tsis muaj nqis
Neej zoo ib txhis thiaj muaj ntxiv
Txog hnub chiv ces tsis kho siab lawm
Muam ntxawm zoo siab kaj heev
Hnub no koj teev tau los lus nyob zoo
Ntshe muaj hmoo thiaj muaj koj mog tus nus aw.

Subject: Re: Vajtse Puamtsuaj Fri May 10, 2013 6:41 pm

Puagkojcia,

Cas ib ntus no tsis pom koj tuaj ua si lawm
Puas yog koj mus ua si Nplob teb lawm na?

Subject: Re: Vajtse Puamtsuaj Sat May 11, 2013 12:02 pm

Ntshe yog li koj hais lawm es nws thiaj li tsis tuaj saib peb lawm los mam li tos seb nws puas ua tau tej daim video tshiab rau peb saib thaum twg los tau mas.

Subject: Re: Vajtse Puamtsuaj Sun May 12, 2013 5:46 pm

8tos8nco,

Es Puagkojcia ua video hmong movie thiab lov? Yog nws ua movie hmong thiab no ntse yog li nws thiaj tsis tshua khoom tuaj nrog peb tham pem ua si os yom...