Koj nyiam tus neeg coj tus cwj pwm zoo li cas

http://www.sfr.fr/

lub chaw koj xav tau nyob nov nias rau ces tawm los

kab hauv qab no thiab
http://www.free.fr/adsl/index.html

neb mam xyuas seb lawv puas ua rau tim nej thiab os
twb yog kuv tsis xav kom neeg hais lus rau tsam mus deb deb lawm kuv thiaj thov kom admin kaw xwb os.
nej tsis tuaj ces kuv kho siab thiaj sau xwb
kuv nco nco nej ne
hu npaum li cas los tsis pom nej li
koj xav teb zaj twg ces koj copy mus tso ib lub topic ces koj teb xwb mas

Koj txhob quaj mas lod? Qhov kuv tsis tuaj ces yog kuv xav zoo rau nej xwb kuv thiaj tsis tuaj os. Vim thaumub muaj neeg cem cem kuv thiab khib khib kuv heev li ces lawv hais lus phem phem rau kuv ces kuv thiaj tsis tuaj lawm xwb os.

Tabsis nim no yog cov neeg ntawd khiav tag lawm no kuv mam rov tuaj hos yog lawv tseem nyob ces xyov kuv puas xav tuaj thiab os.

Cia ntev ntev mam tuaj saib koj ib pliag xwb os mog. Koj yeej paub tias koj tus niamlaus no tsis xav hais lus phem rau leejtwg, tsis xav nrog leejtwg sib cav sib ceg thiab tsi xav kom mob leejtwg li siab li, yog leejtwg xav phem rau koj niamlaus ces nws xum khiav mus deb deb tsis los lawm xwb os.

Vim li kuv thiaj khiav mus lawm xwb tsis yog kuv khiav nws os mog.

Lub neej no ces muaj tej hnub tshav tej hnub tsaus, tej hnub los nag tej hnub tsis los es kuv thiaj nco nco nws os mog.

Zaum no kuv paub tias nws tseem nyob hauv no khovkho, muaj caij kuv mam tuaj nrog nws sau pajhuam dua mog.

Mam ntsib koj ntxiv nawd, txhob khiav kuv od, heehehee

no kuv pom koj twb tsis tau txaus li na ...

Nkaujhnubqub, koj txawj nrhiav tau lub npe zoo ua luaj rau koj kawg li os. Kuv muaj ib zaj dab neeg nws lub npe zoo li koj lub thiab os. Cia kuv muab nws coj tuaj tso rau ntawm nov es koj tau nyeem ua si os nawb.


NRAUG NTSUAG THIAB NIAM NKAUJ HNUB QUB

Puag thaum ub, muaj ob tug niam tub ntsuag nos. Nkawd tsis muaj kwv muaj tig li. Leej niam laus laus, nws yuav tuag, nws hais rau nws tus tub tias : "Ab ! Me tub, ntshaikuv yuav tuag. Yog kuv tuag hnub twg no, ces kuv tub mus txais lawv ib puas ob nyiaj los pam kuv mog !" Tus tub teb tias: "Niad! Niag tsis muaj kwv muaj tig es leej twg yuav txais nyiaj rau yus ? Ib puas ob nyiaj no leej twg yuav txais rau yus nab, niad ?"
Tus niam teb tias: "Me tub, cia kuv qhia rau koj mog ! Koj mus txais nyiaj ces koj nkag hauv luag lub zos, koj yuav hu tias:' Lawv es lawv!Kuv niam tuag lawm, kuv yuav tuaj txais nej nyiaj no!' Koj yuav hu peb zaug li no. Yog luag tsis teb koj, ces yog luag tsis txais nyiaj rau koj. Koj ho mus ntxiv lawm tom ntej, koj yuav mus ib lub zos dhau ib lub zos, koj hu li kuv qhia rau koj ntawd xwb mog ! Yog luag kam txais nyiaj rau koj ces luag yeej yuav teb koj xwb os, me tub !" Hais li ntawd tas, niag niam nyob tsis ntev hnub tsis ntau hmo, niag niam txawm tuag lawm tiag lauj ! Tus tub txawm ua li leej niam hais. Nws tso leej niam tseg rau hauv tsev. Nws thiaj mus mus txog thawj lub zos, nws hu tias: "L3wv es lawv ! Kuv niam tuag lawm, kuv yuav tuaj txais nej ib puas ob nyiaj coj mus pam kuv niam no !" Ua cas ntsiag to, tsis hnov leej twg teb li. Nws hu lintawd peb zaug, los tsis muaj neeg teb li lauj! Nws thiajlirov qab mus ntxiv.Nws mus txog ntawm luag tej ntug zos, nws pheej hu li ntawd li lauj! Nws hu hu tsis muaj neeg teb li thiab. Nws thiaj li hais tias : "Ab ! Cas tsis muaj neeg teb li, ntshai luag tsis txais nyiaj rau yus.
Lam mus me ntsis ntxiv thiab saib puas yuav muaj neeg teb yus." Nraug Ntsuag txawm mus mus txog rau Huab Tais lub zos lauj! Nws thiaj li hu tias : "Lawv es lawv t Kuv niam tuag lawm, kuv yuav tuaj txais nej nyiaj ib puas ob mus pam kuv niam no." Huab Tais hnov dheev, Huab Tais hais tias: "Los Tuam, Los Xab thiab Los Lwm, tawm mus xyuas saib yog leej twg es pheej tuaj nraum zoov hu vuj vws tias yuav txais nyiaj no ? Yuav Txais μyiaj kuj los tsev los pauj! Cas pheej yuav tuaj nraum zoov hu xwb ! Sim tawm mus xyuas saib !" Cov tub thiaj li tawm tuaj xyuas. Lawv thiaj coj tau Nraug Ntsuag los hauv tsev. Nws los hais rau Huab Tais hais tias : "Aub ! Txiv Huab Tais, thaum kuv niam yuav tuag, mas nws hais rau kuv tias yog nws tuag hnub twg no ces kom kuv tuaj txais nyiaj. Kuv tsis muaj kwv muaj tig. Kuv nyob raum zoov hu saib yog leej twg yuav txais nyiaj rau kuv, ces nws yeej yuav teb kuv xwb. Nws hais lintawd tas, nyob tsis ntev nws txawm tuag lawm. Kuv thiai li ua raws li nws hais, kuv thiaj hu hu li ntawd tuaj saib puas muaj neeg yuav txais nyiaj rau kuv coj mus pam kuv niam."
Huab Tais thiaj nug tias : "Ua li koj yeej tsis muaj kwv muaj tig, tsis muaj poj niam me nyuam li lov ?" Ntsuag teb tias:"Ab ! Txiv Huab Tais, kuv txiv ces yeej tuag thaum ntxov lawm, tshuav kuv niam wb xwb. Wb txom txom nyem li, wb yeej tsis muaj kwv muaj tig nyob qhov twg. Hos kuv yeej tsis tau muaj poj niam me nyuam li thiab. Kuv txom txom nyem li, thov koj txais ib puas ob nyiaj rau kuv coj mus pam kuv niam lauj, Txiv Huab Tais !"
Huab Tais hais tias : "Me tub, yog kuv txais nyiaj rau koj coj mus pam koj niam tas sais koj sau cuab yeej cuab tam los mog peb nyob ua peb qhe txiav zaub nyuj zaub nees laiv ! Yog tias koj tsis los nrog peb nyob, mas ntshai kuv yuav tsis txais nyiaj rau koj thiab !" Ntsuag teb tias: "Ab ! Txiv Huab Tais, yog koj txais rau kuv ces kuv yeej yuav los nrog nej nyob ua nej qhev kom them tas cov nuj nqes ntawd xwb. Txawm yuav nyob tsawg xyoo los nyob." Huab Tais thiaj li txais tau kaum ob daig nyiaj rau Ntsuag. Nws rov los txog tsev, nws muab rau daim mus yuav dej yuav cawv thiab yuav mov noj.
Muab rau daim mus yuav nyuj yuav twm los tua rau nws niam. Nws pam nws niam tas, nws thiaj sau tej me cuab yeej cuab tam yuav mus ua Txiv Huab Tais lawv qhev. Ntsuag txawm sawv kev los txog tom kev. Nws txawm los ntsib ib tug hluas nkauj, cas yuav zoo nkauj tas npaud li lauj! Nws txawm tav Ntsuag kev, hais rau Ntsuag tias :" Txiv Nraug Ntsuag, koj yuav mus dab tsi ?" Ntsuag txawm teb tias : "Leej Muad. Twb yog kuv niam tuag, kuv mus txais tau Huab Tais ib puas ob los pam kuv niam lawm. Koj zam kev es kuv yuav los mus ua Huab Tais laus lawv qhev lawm tom lawv zos." Tus hluas nkauj ntawd txawm hais tias: "Ab t Txiv Nraug Ntsuag,kuv twb yuav los yuav koj no ! Cas koj tseem yuav mus nrog lawv nyob thiab ?" Ntsuag teb tias: "Ab ! Leej Muad, koj tsis txhob hais li kod, kuv txaj txaj muag li. Koj yog nkauj nom nkauj tsw, koj xav yuav txiv los koj ho mus nrhiav nom nrhiav tswv yuav mog! Kuv ces yog niag tub ntsog tub ntsuag qe mub qe tuv ncw hna xwb. Kuv pluag pluag kuv tsis muaj ib yam dab tsi li. Kuv twb mus txais tau Huab Tais ib puas ob nyiaj lawm ces kuv yuav mus ua lawv qhev nrog lawv nyob." Tus hluas nkauj hais tias : "Ais! Koj txawm tsis yuav kuv ntag. Kuv twb yog los yuav koj ntag ! Tsis vim li ntawd kuv yeej tsis los li ho. Vim koj niam kom kuv los yuav koj tiag ! Nws kom kuv los nrog koj ua neej, los nrog koj them lawv cov nuj nqes kom tas no tiag. Koj tseem tsis yuav kuv thiab lov ?" Ntsuag teb tias : "Ua li, yog kuv niam kom koj los yuav kuv ntag los, leej muad !" Tus hluas nkauj hais tias : "Koj niam kom kuv los yuav koj no, kuv thiaj li los tiag." Ntsuag hais tias:"Ab!Niam txawm hais kom koj los yuav kuv los kuv kam tshuav Huab Tais lawv ib puas ob nyiaj diam, ces ntshai kuv yuav mus ua lawv qhev them lawv thiaj tag. Saib koj puas kam nrog kuv mus los tsis kam xwb lauj!" Tus h1uas nkauj hais tias: "Kuv pom xeeb los yuav koj lawm ces koj mus qhov twg los kuv ham tsis mus thiab xwb. Koj ua dab tsi los kuv yeej yuav nrog koj ua, pab koj ua hauj Iwm them cov nuj nqes ntawd tiag." Ntsuag hais tias: "Ab ! Yog niam kom koj los yuav kuv no, ces yuav los yuav thiab. Tsuav koj pom zoo nrog kuv mus ua zog." Ces Ntsuag txawm coj tus hluas nkauj ntawd nrog Ntsuag mus lauj ! Nkawd mus mus txog Huab Tais laus tsev. Ntsuag txawm hu hais tias :
"Txiv Huab Tais aw ! Nej nyob hauv tsev los tsis nyob lawm os! Kuv los lawm laiv !" Huab Tais lawv thiaj li qhib plho qhov rooj xyuas. Ua ciav Txiv Nmug Ntsuag coj tau ib tug poj niam zoo nkauj tas nrho los thiab lauj! Huab Tais thiaj li hais tias : "Me tub, koj twb tias koj tsis muaj poj niam no nev ! Ua cas koj ho coj tau ib tug poj niam los thiab ?" Ntsuag txawm teb tias : "Ab ! Txiv, kuv los txog tom kev, kuv nyuam qhuav los yuav tom kev xwb." Huab Tais hais tias: "Koj yuav tau poj niam lawm los zoo kawg thiab los mas, me tub ! Tsuav neb ob leeg los nrog kuv nyob ua kuv qhev yug nyuj yug twm xwb los mas." Tus ntxhais ntawd mas yog niam Nkauj Hnub Qub xwb lauj ! Txiv Nraug Ntsuag thiab niam Nkauj Hnub Qub nkawd niaj hnub nrog Huab Tais laus nyob ua nws qhev tu tsiaj tu txhuv lauj ! Hmo ntuj nkawd los pw ntawm Huab Tais laus lub txaj qhuas. Nruab hnub nkawd rov mus ua hauj lwm lawm. Nkawd nyob nyob tau ntev niaj mus ntau xyoo lauj! Huab Tais laus txawm xav tau ib zag tswv yim phem, nws txawm hais rau Los Xab, Los Xwm thiab Los Lwm lawv tias : "Los Tuam, Los Xab thiab Los Lwm, cas nej yuav ruam tas npaud! Niag Hmoob qhev ntawd tus poj niam zoo nkauj ua luaj ntawd diam, nws tseem tshuav yus ib puas ob nyiaj diam. Nej muab nws tua pov tseg yuav nws niag poj niam tiag." Los Tuam tias:"Txiv, cia ib tsam kuv sim mus sim saib puas seem kuv sob. Seem kuv sob no cia kuv yuav." Ib tsam noj hmo tas, sawv daws mus pw tsaug zog tas, tsev tsaus ntuj uti lawm. Los Tuam txawm sawv los rauv taws saib. Ua ciav pom pw tib tug me zoo nkauj rhib tiag lauj! Los Tuam txawm muab hluav taws faus tsuag tsuag tas. Cev loo tes mus xuas. Ua cia tib lub txaj qhuav qhawv tsis pom dab tsi li. Nws txawm rov los tshum hluav taws tsuag tsuag cig ntsa iab.
Cas ho pw tib tug zoo nkauj rhib, ua pa saws soom ntawd thiab. Nws rov muab taws faus tsuag tsuag rau, ya ntxiag rov mus xuas xuas tsis pom li lawm thiab. Los Tuam kov kov ib hmos kaj ntug tsis ntsib li lauj! Tag kis, Huab Tais nug tias : "Los Tuam, koj mus sim nws puas seem koj sob naj ?" Los Tuam teb tias : "Aub ! Txiv, nag hmo sawv daws tsaug zog tas, kuv maj mam sawv mus rauv taws xyuas,tsuas tias pw tib tug me zoo nkauj rhib ntawd. Muab hluav taws faus tsuag tsuag tas, cev loo tes mus xuas.Ua cas pawv ! Tib lub txaj qhuav qhawv xwb. Kuv kov tib hmos tsis ntsib li." Huab Tais hais tias : "Aub ! Los Tuam koj hmoov tsis sawm. Lwm hmo cia Los Lwm ho mus sim saib. Yog seem Los Lwm sob no, cia rau Los Lwm yuav." Ib tsam noj hmo tas, sawv daws pw tsaug zog tas lawm lauj! Los Lwm txawm sawv los rauv taws xyuas. Ua cas pw ntawm Ntsuag ib sab mas yuav tib tug me zoo nkauj tas npaud li lauj ! Nws muab hluav taws faus tsuag tsuag tas, cev loo tes mus xuas. Ua cas tib lub txaj qhuav qhawv xwb thiab lauj ! Los Lwm kam kam ib hmos kaj ntug plaws tsis ntsib li thiab. Tag kis kaj ntug, Huab Tais nug tias: "Los Lwm, nag hmo koj sim Hmoob qhev niag poj niam puas seem koj sob naj ?"
Los Lwm teb tias: "Txiv es! Yog nkaus lis Los Tuam hais thiab tiag. Rauv tau taws xyuas mas pom tib tug me zoo nkauj rhib, faus hluav taws tsuag tsuag, cev loo tes mus xuas, tib lub txaj qhuav xwb. Kuv kam kam ib hmos tsis ntsib li thiab tiag." Huab Tais hais tias: "Aub ! Yog li ntawd mas koj hmoov tsis sawm thiab. Lwm hmo cia Los Xab sim ho mus sim saib, yog seem Los Xab sob no cia rau Los Xab yuav lauj !" Ib tsam noj hmo tas, sawv daws pw tas, Los Xab sawv tsees los rauv tau taws xyuas, ua ciav pw tib tug me zoo nkauj rhib ntawd thiab lauj ! Nws muab hluav taws faus tsuag tsuag tas. Cev loo tes mus xuas, cas tib lub txaj qhuav thiab xwb. Los Xab kam kam tib hmo kaj ntug tsis ntsib li thiab. Tag kis, Huab Tais nug tias:"Los Xab, nag hmo koj mus sim Hmoob qhev poj niam, puas seem koj sob los tsis seem naj ?" Los Xab teb tias:"Txiv, seem sob qhov twg! Ham tsis tib yam li Los Tuam nkawd thiab xwb las as.Kuv kam kam ib hmos, yeej tsis ntsib Ii thiab tiag." Huab Tais txawm hais tias : "Aub ! Los Tuam, Los Lwm thiab Los Xab, ntshai nej cov hluas hmoov tsis sawm.
Cia ib tsam kuv mus sim. Yog seem kuv sob no cia muab niag qhev ntawd tua tso, kuv yuav." Hais li ntawd tas, ib tsam noj hmo tas, sawv daws mus pw tas lawm. Huab Tais txawm sawv los rauv tau taws xyuas. Aub ! Cas yuav pw tib tug me zoo nkauj tas nrho ntawd tiag lauj! Huab Tais thiaj muab hluav taws faus tsuag tsuag tas nrho, cev loo tes mus xuas zoj. Ua cas pawv thiab lauj! Huab Tais txawm yws yws tias : "Aub ! Yog yus hmoov tsis sawm ces puam chawj lauj! Tsis txhob xuas lawm. Cia nws yuav nws. Yeej tsis yog yus hmoov." Tag kis, cov tub nug zom zaws tias: "Txiv, nag koj mus sim puas seem koj sob naj ?" Huab Tais tias : "Aub ! Peb hmoov yeej tsis sawm li. Kuv cev tes mus kov ib zaug tsis ntsib, ces kuv cia li tsis kov lawm." Niam Nkauj Hnub Qub thiab Txiv Nraug Ntsuag nkawd nrog Huab Tais laus nyob ntev ntev lawm lauj ! Muaj ib hnub txawm muaj ib tug neeg tuaj hu Huab Tais tias:"Txiv Huab Tais, lub hlis no tim kaum tsib, peb yuav tsuj Xeev Laus xeeb, peb yuav haus cawv. Txog hnub ntawd koj tuaj nrog peb nyob ib hnub nawb !" Huab Tais txawm tias: "Aws! Yog nej yuav tsuj Xeev Laus Xeeb no, cia txog hnub ntawd kuv mam tuaj." Huab Tais laus ntawd txawm hais rau nws niag nyab qhev tias : "Nyab qhev, lawv yuav tsujXeev Laus cawv xeeb no. Kuv tsis tau khau rau lawm, koj xaws ib nkawg khau rau kuv. Txog hnub lawv haus cawv xeeb kuv thiaj li tau khau rau mus." Niag nyab qhev teb tias : "Txiv, yog koj xav yuav los cia kuv ho xaws ib nkawg rau koj rau mus los mas, txiv." Nyob nyob tau tsib hnub, Huab Tais hais tias : "Nyab, koj kav tsij xaws. Twb yuav txog caij, tsam kuv tsis tau khau rau." Nyab teb tias : "Txiv, koj xav yuav los cia kuv ho xaws." Huab Tais tos tau tsib hnub ntxiv thiab. Huab Tais rov hais tias : "Nyab, kav tsij xaws tiag laiv ! Tshuav tsib hnub lawm xwb! Saib yog koj tsis tau xaws no, kav tsij xaws ! Tsam txog hnub ntawd koj xaws tsis tau naj !" Nyab teb tias : "Aws txiv ! Yog koj yuav los kuv ho xaws." Tshuav ib huub nkaus lawm xwb lauj ! Huab Tais rov nug tias : "Nyab qhev, koj xaws khau rau kuv no, koj xaws tau lawm los tsis tau ? Tag kis yog hnub lawv haus cawv xeeb laiv !" Tus nyab teb tias:"Txiv, kuv tseem tsis tau xaws. Yog koj xav yuav no kuv mam xaws rau koj." Ces Huab Tais laus txawm cem hiav muag nti hais tias:"Tus me nyab qhev ntawd kod ! Cas koj yuav dag ua luaj li! Puag thaum tseem tshuav kaum hnub, kuv twb kom koj nyob hauv tsev xaws lawm. Koj twb hais tias koj mam xaws. Txog hnub no, koj tseem hais tias koj tseem yuav xaws thiab xwb no. Koj tus neeg ntawm kod mas dag dua luag tej neeg huv tib si li lauj! Tag kis kuv mus haus cawv kuv yuav muab khau qhov twg los rau maj!" Nyab teb tias : "Txiv, koj tsis txhob cem cem. Yog koj yuav yuav los sis cia ib tsam kuv mam taws teeb xaws." Huab Tais mas cem cem hiav muag nti li lauj! Ib tsam sawv daws noj hmo tas, niam Nkauj Hnub Qub tawm plaws nraum zoov, nws muab kiag ib daig tawv xib los npua zoj, xib zoj peb suab rov pem qaum ntuj. Tuaj zoj rau tus niam hluas tuaj txog ntua, nws taws kiag teeb.
Lawv xaws zoj ib tag hmo xwb, tau kiag ib nkawg khau, mas zoo nkauj tsis zoo li lauj! Tsuas tias paj ntsais tsias qhov txhia chaw. Tawg paj rhib laim pes txias xwb lauj ! Tag kis kaj ntug, Huab Tais laus sawv tsees los txog ntua, nws nug tias : "Nyab qhev, nag hmo koj niam khav tias koj yuav xaws khau rau kuv rau no. Koj xaws tau lawm los tsis tau ?" Nyab qhev teb tias : "Txiv, nag hmo kuv taws teeb xaws tau ib nkawg nyuag dog pes dig lawm thiab os, txiv." Huab Tais hais tias : "Aub ! Yog koj xaws tau lawm no zoo lauj ! Kav tsij hais dej rau kuv ntxuav muag, rau mov los rau kuv noj tso, kuv yuav rawm maj mus." Nws hais dej rau Huab Tais ntxuav muag tas, rau mov rau Huab Tais noj tas. Huab Tais hais tias : "Nyab qhev, muab khau los rau kuv rau saib !" Ces niam Nkauj Hnub Qub nkaus hlo nkawm khau los cev kiag rau Huab Tais lauj! Huab Tais ntsia mas cas yuav zoo nkauj tas npaud li lauj! Tawg paj pes rhib, hos laim pes txias ! Huab Tais ntsia tsis tseeb li ntag lauj !
Niam Nkauj Hnub Qub txawm hais tias:"Txiv, nag hmo koj hais tias yog kuv xaws tsis tau khau rau koj rau no, koj yeej yuav tsis yib li no. Yog tias kuv tseem xaws tau thiab mas koj yuav hais li cas rau kuv no ? Zaum no kuv xaws tau khau rau koj rau lawm saib koj yuav hais li cas rau kuv ?" Huab Tais hais tias : "Aub ! Nyab qhev lauj ! Nkawm khau no zoo nkauj hwv lawm. Ces cia muab ntaus ua rau daim kiag rau neb ntag lauj! Tso tshuav rau daim ntawd, thaum twg neb khwv tau, neb mam ho muab rau kuv kuj tau." Niam Nkauj Hnub Qub tias : "Txiv, yog nuj yog nqe lawm ces koj ntaus rau daim los kuj zoo kawg thiab. Tab sis tsis yog nuj yog nqe mas koj txawm muab rau daim los kuv tseem tsis kam muag rau koj thiab hos !" Huab Tais hais tias : "Aub ! Txhob xav li ntawd, cia ntaus ua rau daim es kuv yuav xwb." Hnub ntawd Huab Tais txawm tau khau rau mus nrog Xeev Laus lawv haus cawv lawm. Huab Tais mus txog tom Xeev Laus tsev, Xcev Laus pom Xeev Laus ntshaw ntshaw ib nkawg thiab lauj ! Niam Nkauj Hnub Qub thiab Txiv Nraug Ntsuag nkawd nrog Huab Tais nyob tau ntev xyoo lawm. Niam Nkauj Hnub Qub txawm nug Huab Tais tias : "Txiv, wb tshuav koj ib niag tswv nqe es koj yuav xav tias cia wb ua koj qhev, los koj yuav cia wb mus nyob wb tso, wb khwv tuaj them koj ?" Huab Tais teb tias : "Aub ! Kuv twb xav yuav nyem no lawm ntag. Vim ntsia ntsoov neb yeej tsis muaj dab tsi li es thiaj li tsis hais tsis taij xwb. Yog muaj ces yeej xav yuav tiag." Niag nyab txawm hais tias : "Txiv, yog koj xav yuav no los wb ho mus nrhiav qiv nrhiav txais los rau koj. Tsam koj yuav siv." Huab Tais hais tias : "Yog neb nrhiav tau mas yuav xwb tiag." Ib tsam noj hmo tas nrho, Niam Nkauj Hnub Qub rov qab tawm plaws rau nraum zoov,muab kiag daim tawv xib los npua zoj, xib zoj peb zag rau pem qaum ntuj, tuaj kiag rau tus niam hluas tuaj nrog nws xaws txog ib tag hmo xwb tau kiag ib nkawm khau. Tsuas tias zoo nkauj rhib thiab lauj ! Zoo tshaj Huab Tais nkawm thiab. Ntsuag txawm coj mus muag kiag rau Xeev Laus ua kaum ob daig nyiaj. Coj nyiaj los txog tsev, muab kiag rau daim them kiag Huab Tais. Tshuav rau daim rau nkawd chiv peev ua neej." Niam Nkauj Hnub Qub hais rau Huab Tais tias : "Txiv, wb them koj cov nuj nqe tas lawm. Koj yuav cia wb nrog koj nyob xyoo puav ntxiv, los koj tias wb them koj nuj nqes tas lawm ces cia wb mus nyob wb ? Yog koj tias tab txawm them tas lawm los, koj yuav ciav wb nrog koj nyob xyoo puav pab koj no los wb ho nyob ntxiv thiab." Huab Tais teb tias: "Nyab qhev lauj! Neb twb them kuv cov nuj nqes tas lawm, ces nyob ntawm neb. Neb yuav mus lawm qhov twg los tau. Neb hais tias neb yuav nrog kuv nyob los kuj tau.Nyob ntawm neb siab xwb." Txiv Nraug Ntsuag nkawd thiaj mus nyob nkawd lawm. Nyob tsis tau ntev. Niam Nkauj Hnub Qub thiaj hais rau Txiv Nraug Ntsuag tias : "Txiv Nraug Ntsuag, ua li cas los kuv tsis yog ntiaj teb no neeg. Kuv yuav nrog koj nyob tsis tau ntiaj teb no mog ! Ntshai kuv yuav rov qab lawm qaum ntuj. Kuv los tsa koj ua neej xwb.Kuv twb los pab them koj tej nuj nqes tas lawm. Tshuav rau daim nyiaj no tseg rau koj chiv peev ua neej. Tshai kuv yuav rov lawm qaum ntuj." Nws hais li ntawd, ces Ntsuag quaj pos muag nti lauj! Niam Nkauj Hnub Qub thiaj ntuas ntuas Txiv Nraug Ntsuag tias : "Txiv Nraug Ntsuag, koj tsis txhob quaj mog ! Koj sim neejkoj yeej yuav tau zoo xwb. Kuv twb tsa koj tsheej neeg lawm. Kuv yeej paub tseeb tias koj yeej yuav tau zoo tas koj sim neej. Kuv yuav qhia ib qho chaw rau koj. Huab Tais tus ntxhais Nkauj Ntxawm niaj hnub nrog kuv ua ke, kuv qhia qhia nws xaws khau, nws txawj txawj xaws khau li kuv lawm thiab. Muaj ib hnub koj yeej yuav tau Huab Tais tus ntxhais Nkauj Ntxawm ua koj poj niam xwb. Tus ntawd thiaj yog neeg nyob ntiaj teb no, nws thiaj yuav nrog koj ua taus neej. Hos kuv ces kuv nyob tsis taus ntiaj teb, kuv yuav rov lawm qaum ntuj mog ! Lub hlis no tim kaum tsib, Los Tuam, Los Lwm thiab Ios Xab lawv yuav tuaj mus tua tauv txwv lawm pem Ceeb Tsheej teb. Koj mus nyob timþauv kev tos mog ! Yog koj pom lawv tuaj mus no ces koj nrog lawv mus tua tauv txwv. Thaum lawv tuaj, koj yuav nrog lawv mus. Lawv yuav hais rau koj tias : 'Ua cas koj lam tuaj nyob ntawm kod.' Ces koj teb lawv tias : Thaud wb nrog nej nyob nyob, wb ho mus nyob wb. Ces kuv poj niam muab kuv nrauj pov tseg lawm. Zaum no, kuv yuav rov qab los nrog nej nyob ua nej qhev zov nej tej tsiaj dua !' Koj hais li no, ces koj ris lawv cov nra, koj ua lawv qhev koj nrog lawv mus. Nej mus txog pem Ceeb Tsheej mas nej yuav mus pw tom ncauj ke no. Lawv yuav mus tua tauv txwv. Los Tuam yuav xwb mus tua. Tag kis sawv ntxov tsees koj pub Los Tuam tus nees kom tsau tsau li. Koj hais kiag dej rau Los Tuam ntxuav muag. Kaj ntug txoog xwb Los Tuam caij kiag nees, nws sam kiag nws rab hneev ya ntxiag mus tua tib hnee rau tauv txwv. Paub ntsoov yeej yuav tsis raug. Tua tas Los Tuam lem hlo nees rov qab los.
Luag tos ib hnub, luag paub tias LosTuam tua tsis raug, luag yeej tsis muab ntawv rau Los Tuam. Tag kis ob, yog Los Lwm yuav mus, koj yuav nco ntsoov ua li ntawd rau Los Lwm thiab.
Tag kis peb, yog Los Xab koj yuav ua li ntawd thiab nawb mog ! Los Xab mus tua los. Lawv yuav tos ib hnub, tsis pom muaj ntawv tuaj. Lawv yuav sab laj tias: 'Ib hnub lawm, tsis pom ntawv tuaj, ces ntshai yog peb tua tsis raug, tsis tau nom ua. Hnub uas nej yuav los tsev,ces koj sawv ntxov ntxov los ua tshais rau hauv qhov cub, koj yuav hais rau lawv tias: 'Thov nej saib cov mov no ib pliag.
Kuv cab nej cov nees mus noj zaub tso. Tsam nees tshaib tshaib plab. Nees mus tsis taus. Thaum ntawd Los Tuam tsis nco nqa nws rab hneev. Koj cab kiag mus kom lawv tsis pom lawm ces koj caij kiag Los Tuam tus txiv nees thiab koj sam kiag nws rab hneev, koj ya ntxiag mus tua. Paub ntsoov tias yeej yuav raug xwb xwb li. Thaum ntawd koj tau nom ua xwb." Tham tham ib pliag ntxiv, txiv Nraug Ntsuag tsaug zog lawm lauj !
Nws tsaug tsaug zog tsim dheev los. Ua ciav Niam Nkauj Hnub Qub twb dua rab teb twg lawm ! Nws thiaj sawv los zaum tib pob. Nws xav zaj twg los tsis tau lawm.
Nws thiaj li los ua raws li nws poj niam hais. Thaum txog lub hli tim kaum tsib, Txiv Nraug Ntsuag txawm mus nyob tim kev tos. Ua ciav tswb nees nrov nqag ntxhias tuaj tiag lauj ! tuaj tuaj txog, Los Tuam txawm hais Ntsuag tias: "Ua cas koj lam nyob ntawm kod nab ?" Ntsuag txawm teb tias: "Aub! Thaud wb nrog nej nyob nyob, wb ho mus nyob wb, ces kuv poj niam muab kuv nrauj lawm las. Nyem no kuv yuav rov qab los ua nej qhev dua. Ua li nej puas yuav los tsis yuav ?" Los Tuam txawm teb tias: "Ab ! Sawv daws nyob kam ua ke, sib haum sib hlub. Koj poj niam txawm tso koj tseg lawm los koj rov los nrog pcb nyob.
Ua no koj puas nrog peb mus? Yog koj nrog peb mus no koj mus txiav zaub nees rau peb cov nees noj. Vim peb yuav tuaj mus tua tauv txwv lawm pem Ceeb Tsheej." Ntsuag txawm teb tias:"Tiag,cia kuv nrog nej mus tso, kuv mus txiav zaub nees rau nej cov nees noj, saib nej cov nees thiab ua mov rau nej noj." Lawv thiaj li mus txog Ceeb Tsheej teb lauj! Lawv txawm mus pw hauv lub tsev tom ncauj ke no. Ces tag kis kaj ntug txoog, Ntsuag sawv hais dej rau Los Tuam ntxuav muag tas nrho, Los Tuam sam kiag hneev, paj paws rau saum nees,rag nees ntws mus txog ntua txiag tib hnee rau, lem loo rov los lawm. Lawv tos zoj ib hnub, tsis pom ntawv tuaj li, ntshai tsis raug.
Tag kis Ntsuag kuj sawv los muab dej rau Los Lwm ntxuav muag thiab. Los Lwm mus tua tas, los tos ib hnub kuj tsis pom ntawv tuaj li thiab. Hnub peb Los Xab ho mus tua. Tua tas los nyob ib hnub kuj tsis pom ntawv tuaj li thiaj lauj ! Lawv pw ib hmo ntawd. Tag kis Ntsuag sayev ntxov ntxov los ua tau ib lauj kaub mov rau hauv qhov cub, nws hais rau lawv tias : "Nej pab sab mov thiab, vim peb tuaj tau ob peb hnub lawm, ntshai tshaib tshaib nees plab, nees ho mus tsis taus tsev. Kuv cab nees mus noj zaub, kuv los peb mam mus tsev." Ntsuag thiaj li cab loo pab nees mus, Ntsuag muab kiag Los Tuam rab hnecv los sam kiag, caij loo Los Tuam tus txiv nees, rag ntws mus txog ntua. Ntsuag tib hnee rau nruab nrab tauv txwv tshab plaws. Nws rag nees ntws rov los txog ntua. Nyuam qhuav los zaum qhov quav tsis tau tus, Huab Tais Ceeb Tsheej xa loo ib tsab ntawv ceev ceev tuaj hais tias : "Tsuag tsuag, kav tsij tuaj lees nom ua. Vim nej tua raug tauv txwv lawm. Lawv mus txog ntua, Huab Tais hais tias yog Ntsuag tua raug no. Ntsuag thiaj li mus lees ntawv ua nom ua tswv lauj! Los Tuam , Los Lwm thiab Los Xab lawv hais zom zaws tias: "Ab ! Ua cas zaum no, niag qhev ntawd nyiag peb tus nees caij mus es nws yuav tua raug lawm lauj! Niag qhev ntawd yuav tau nom tau Huab Tais ua lawm tiag. Peb ces poob nom txij hnub no mus li lauj ! Yuav kom peb tsim txiaj me ntsis ces kawg peb muab peb niag muam Ntxawm rau nws, kom nws ho hlub peb me ntsis, mas peb thiaj li yuav tsim txiaj me ntsis xwb lauj!" Lawv los txog tsev, lawv thiaj xa lawv tus muam Ntxawm tuajrau Ntsuag yuav. Vim nws ua Huab Tais, nws zaum Huab Tais qhov chaw lawm.
Zaum no peb Hmoob tuag, thiajli muab rab nyuag hneevrau. Thaum muab tus tuag ntawd faus tas, thiaj muab rab hneev tua ib nyuag hnee rau puag tim qab ntuj. Thiaj hais tias : 'Tua tauv txwv saib puas raug.' Yog raug ces thiaj tau nom ua, tsis raug ces tsis tau nom ua. Vim Ntsuag tau ua Huab Tais lawm.