Subject: Huab Tais Nplog Ntxhw Thiab Hauj Sam Fri Jan 18, 2013 2:37 pm
HUAB TAIS NPLOG NTXHW THIAB HAUJ SAM
Puag thaum ub ov, nyob ntuj sua teb torn qab, Huab Tais Nplog muaj ib co Hauj Sam. Nws cov neeg niaj hnub nqa mov mus rau Hauj Sam noj. Muaj ib tag kis, ib tug thawj Hauj Sam noj nws cov mov tsis tas, nws txawm muab cov mov los puab tau ib tug ntxhw peb lub taub hau. Nws txawm nqas niag ntxhw uas muab mov puab ntawd mus hawm Huab Tais Nplog lauj! Ces Huab Tais txawm cem niag thawj Hauj Sam ntawd hais tias: "Yaivl Kuv ua Huab Tais ob tiam peb tiam li no, twb tsis muaj ib tug neeg nqa ib thooj mov peb lub taub hau ntxhw li no tuaj hawm kuv. Nyiam no, koj nyuag Hauj Sam no, koj paub nyob qhov twg muaj ib tug ntxhw peb lub taub hau li no es koj yuav nqa tuaj hawm kuv. Nyiam no mas koj yeej meem mus nrhiav kom tau tus ntxhw zoo li no los rau kuv nawv! Yog koj mus nrhiav tsis tau mas kuv cia li muab koj kaw xwb ntag." Ces thaum ntawd tus thawj Hauj Sam tsis pom qab yuav ua li cas lauj! Nws txhaum lawm, ces nws lam teb hais tias: "Txiv Huab Tais, tus ntxhw peb lub taub hau no yeej muaj. "Huab Tais hais tias: "Yog muaj, koj txawm mus nrhiav kom tau rau kuv laiv! Koj yuav mus nrhiav pes tsawg hnub pes tsawg hmo?" Thawj Hauj Sam txawm teb hais tias: "Aub! Ntshe yuav mus peb xyoos, thiaj yuav nrhiav tau." Huab Tais hais tias: "Aub! Yog koj mus peb xyoos no mas cia kuv muab peb plhom nyiaj no rau koj. Koj yeej meem mus nrhiav kom tau los rau kuv nawd!" Ces tus thawj Hauj Sam ntawd txawm nqa peb plhom nyiaj ntawd muas noj mus nrhiav lauj! Nws mus thoob teb chaws daim av Nplog, tsis pom muaj tus ntxhw peb lub taub hau ntawd li lauj! Ces nws txawm mus pom ib tug nyuag poj Ntsuam nyob hauv lub nyuag qhov tsua. Nyuag poj Ntsuam ntawd txawm nug tias: "Ua li, koj tuaj mus dab tsi os, me tub?" Thawj Hauj Sam teb niag poj Ntsuam tias: "Aub! Kuv yuav tuaj mus nrhiav tus ntxhw peb lub taub hau xwb. Rau qhov Huab Tais Nplog cov neeg nqa mov tuaj rau peb noj, muaj ib hnub peb noj tsis tas cov mov, kuv txawm muab tau ib thooj mov los puab tau ib tug ntxhw peb lub taub hau. Kuv txawm nqa tus ntxhw ntawd mus hawm Huab Tais Nplog. Nyiam no Huab Tais tseev kom kuv mus nrhiav kom tau tus ntxhw ntawd los mas thiaj li tas. Yog kuv mus nrhiav tsis tau ces nws yuav muab kuv Raw xwb no, kuv thiaj tuaj." Niag pog ntawd txawm teb hais tias: "Aub! Teb chaws no mas tsis muaj li lauj! Yog koj yuav mus nrhiav tus ntxhw peb lub taub hau ntawd los hawm Huab Tais mas tsis muaj nawd! Da li mas kuv los hlub koj thiab. Cia kuv muab kuv tus pas nrig no rau koj. Kuv tus pas no, mas koj nqa mus, koj tsis txhob lam muab twb rau neeg laiv! Yog koj twb tog hauv paus, mas neeg tuag. Yog koj twb tog ntsis, mas neeg rov qab ciaj tuaj nawv, me tub." Ces tus thawj Hauj Sam ntawd txawm tau niag poj ntsuam rab pas nrig lauj. Niag poj Ntsuam txawm hais ntxiv tias: "Me tub, yuav kom koj tau tus ntxhw peb lub taub hau, mas koj ncaj qha qhov no lawm puag tim cov niag huab daj daj puag tid. Tej zaum yuav tau los tsis paub, tsis tau kuj tsis paub. Koj mus txog tid, muaj neeg, koj nug lawv, ces koj paub xwb." Ces tus thawj Hauj Sam ntawd txawm tsi ntsees mus rau puag tim qab ntug qhov huab daj daj lauj. Mus txog tid ov! Cas, tsis yog neeg ntiaj teb lawm. Nws yog nws ib yam neeg lawm. Tus Huab Tais uas nws kav thaj av ntawd tus tub tab torn tuag, lawv tseem nyiav zom zaws. Tus Hauj Sam mus txog, nws txawm nug cov neeg ntawd hais tias: "Yog vim li cas, lawv yuav quaj nyiav ntsuag qees li ntawd?" Cov neeg ntawd txawm teb tias: "Aub! Yog Huab Tais tus tub tuag lawm. Nws hlub nws tus tub heev. Ces tas ntiaj teb neeg thiaj li tuaj quaj tuaj nyiav." Hauj Sam txawm hais tias: "Aud! Yog li ntawd no. Mas nej sim lam mus hais saib Huab Tais puas kad! Yog Huab Tais kam no, kuv sim lam mus tsa nws tus tub. Saib puas yuav tau?" Muaj ib tug neeg nyob hauv lub tsev ntawd txawm khlav khiav mus hais rau Huav Tais. Ces Huab Tais thiaj hais tias:"Aub! Yog leej twg tsa tau kuv tus tub, mas nws yuav yuav dab tsi los kuv nrhiav kom tau rau nws tiag. Nej sim mus hu nws los saib. Nej hais rau nws tias yog nws tsa tau kuv tus tub, mas nws yuav dab tsi los kuv muab kom tau rau nws no ov." Lawv thiaj khiav khiav mus hu tau tus Hauj Sam ntawd tuaj txog, Huab Tais hais tias: "Me tub lauj! Yog koj pab tsa tau kuv tus tub sawv rov los, mas koj yuav dab tsi los kuv muab kom tau rau koj. Koj yuav nyiaj yuav kub, yuav nyuj yuav twm los kuv muab rau koj lauj." Hauj Sam txawm teb tias: "Aub! Me txiv Huab Tais, xyov puas yuav tsa tau los tsis tau thiab. Luag mas hais tias yuav tau ntag no. Log li mas kuv lam pab koj tsa saib puas tau xwb lauv." Ces tus Hauj Sam ntawd txawm muab tus ntsis pas los twb rau. Na has, Huab Tais tus tub txawm ciaj lawm tiag lauj. Huab Tais mas zoo slab tas nrho. Huab Tais txawm hais tias: "Aub! Ua li, me tub, koj yuav yuav dab tsi los pauj koj tus txiaj ntsig uas koj tau pab kuv los lawd?" Hauj Sam txawm teb hais tias: "Aub! Kuv tsis yuav dab tsi. Tiam sis kuv tus Huab Tais Nplog, nws cov neeg nqa mov tuaj rau peb noj. Muaj ib zaug kuv noj tsis tas kuv cov mov, kuv txawm muab puab ua ib tug ntxhw peb lub taub hau, kuv txawm coj mus hawm Huab Tais. Nyiam no, Huab Tais tseev kom kuv nrhiav kom tau tus ntxhw peb lub taub hau no. Mas kuv thiaj tuaj nrhiav tus ntxhw ntawd xwb. Ua li, nyob ntawm no, qhov twg muaj tus ntxhw peb lub taub hau ntawd, mas koj ua txiv koj qhia rau kuv, es kuv yuav mus nrhiav tus ntxhw ntawd xwb." Huab Tais txawm hais tias: "Aub! Me tub lauj! Tus ntxhw peb lub taub hau ntawd, mas nyob ntawm no yuav tsis muaj nawd. Tsuas muaj puag Ceeb Tsheej teb xwb. Yog koj mus muab koj xwb, ntshai yuav tsis tau nawd! Koj twb tsa tau kuv tus tub sawv lawm, kuv zoo siab heev. Cia kuv mam tso kuv cov neeg mus muab los rau koj xwb. Tiam sis yuav mus ntev laiv, me tub! Ntshai yuav yog peb hlis thiaj rov los txog. Saib, koj ua tub, koj puas yuav maj kev?" Hauj Sam Tij txawm hais tias: "Aub! Ntev li cas los xij peem os, txiv, tsuav tau xwb. "Ces Hauj Sam txawm nrog Huab Tais nyob ntawd lauj. Nyob nyob, Huab Tais txawm tso nws neeg mus muab. Cov neeg uas Huab Tais tso mus ntes tus ntxhw peb lub taub hau ntawd, twb mus tau peb hlis tseem tsis tau los thiab. Ciav, twb tau rau hli mam li los txog. Ces txawm hnov xov los ua ntej hais tias: "Aub! Tus ntxhw peb lub taub hau ntawd mas ntes tau lawm tiag no lauj." Huab Tais txawm hais rau thawj Hauj Sam ntawd tias: "Aub! Me tub, xov los txog lawm, hais tias tus ntxhw peb lub taub hau mas ntes tau lawm, tseem los tsis tau txog xwb. Ua li mas kuv nrog koj zoo siab lawm. Thiab nyaj yuav tsis nkim koj lub caij lawm lov! Hais tias tshuav peb hlis saum no thiaj los txog no, es koj ua siab ntev. "Yawg Hauj Sam nyob tos tau cuaj lub hlis, thiaj li los txog. Ua ciav, los yuav txog, mas muaj ib co neeg cab ib co maum ntxhw ua ntej. Hos ib tug neeg caij rawv ib tug txiv ntxhw peb lub taub hau lawv qab. Caij los txog, mas tus txiv ntxhw zoo nkauj heev li lauj. Ob tug cov txwv tuaj ob sab, ib tug tuaj nruab nrab ntag lauj. Ces Huab Tais kav teb chaws ntawd mam li muab los hawm rau Hauj Sam. Tus thawj Hauj Sam ntawd mam li caij tus ntxhw los, thiab cab cov maum nrog. Ces Hauj Sam coj los tau peb xyoos kuj tseem los tsis tau txog. Ua ciav, txawm siv hnov xov rau Huab Tais Nplog hais tias: "Aub! Thawj Hauj Sam nrhiav tau tus ntxhw peb lub taub hau lawm no lauj. "Huab Tais nyob Moos Loob mas nim ua hmoov loj loj los tos tus Hauj Sam. Huab Tais hais tias:"Aub! Zaum no, yog tus Hauj Sam no nws tseem mus nrhiav tau tus ntxhw peb lub taub hau los rau kuv lawm thiab! Nyaj kuv yuav tsis poob teb poob chaw lawm lod!" Ces Hauj Sam caij tus ntxhw los tau peb xyoos thiab peb hlis, thiaj li los txog rau Huab Tais. Huab Tais mam li coj tus ntxhw mus hawm rau Hauj Sam. Nws txawm hais tias: "Ntshai nyiam no yuav yog lub ntuj pab, lub teb pov thiab. Kuv no, niaj hnub nqa mov tuaj rau nej noj. Cas noj tsis tas yuav muab puab ua ib tug ntxhw coj tuaj hawm kuv li no? Zaum no, koj tus thawj Hauj Sam, koj ho mus nrhiav tau tus ntxhw peb lub taub hau no los rau kuv lawm. Nyob rau kuv teb chaws Nplog no, kuv yuav foom lus zoo rau koj Hauj Sam kom muaj mus li tsis pub poob kiag. Kom txus teev Hauj Sam mas txus muaj mus ntxiv xwb. "Ces Huab Tais thiaj tau tus ntxhw ntawd los yug. Nyob nyob, Huab Tais laus laus lawm, nws yuav tuag. Huab Tais txawm hais tseg hais tias: "Nyiam no kuv yuav tuag. Ua li mas kuv tseg tus ntxhw nyob. Yog thaum kawg tus ntxhw yuav tuag, nws yeej yuav ntaus tsis tau ib tug me nyuam cia zoo li nws lawm. Nej yuav tsum muab tus ntxhw no los sau tseg rau hauv ntawv. Nyob rau kuv teb chaws Nplog no, mas tsim txiaj tsuas yog tus ntxhw no xwb. Nyob rau ntiaj teb no yuav tsis muaj. Kawg nyob rau Ceeb Tsheej teb thiaj li muaj xwb."Ces Huab Tais hais li ntawd tas tsis ntev nws txawm tuag lawm. Huab Tais tus tub thiaj sawv los ua Huab Tais. Nws nyob nyob, tus ntxhw laus laus lawm yuav tuag, tsis muaj ib tug me nyuam yuav los hloov tus txiv li. Ces tus tub thiaj li muab thau duab kos rau hauv ntaub ntawv tseg. Ces tus ntxhw tuag lawm. Huab Tais Nplog txawm ua ib lub hmoov loj los hawm Ntuj niam Ntuj txiv tias: "Aub! Nyiam no, tus thawj Hauj Sam no nws mus muab tau tus ntxhw no puag qab ntug daj los. Huab Tais laus tseem mus txais puag sab Ceeb Tsheej los, thiab nws kuj tseem yog tus txiv. Los ntaus cov maum coob ua luaj, ho tsis tshwm ib tug noob kiag. Mas nyiam no tus ntxhw yuav tuag. Kuv txiv yeej hais tias kom thau duab los cia. Ces kuv yuav ua raws li kuv txiv tau hais tseg. "Mas nyiam no los rau ob peb tiam, thiaj li muab daim duab los thau rau hauv ntaub, ua dm cia los kav Nplog teb. Thiaj muaj tus ntxhw peb lub taub hau nyob hauv tus chij. Tus ntxhw ntawd mas thaum ub yog tus thawj Hauj Sam mus muab los. Nyiam no nyob rau Nplog teb thiaj li muaj hauj sam coob coob kawg.
Last edited by xeebtsheejtiav on Sat Jan 26, 2013 8:25 pm; edited 1 time in total
Subject: Yawg O Pob Thiab Huab Tais Ntxhais Nkauj Ntxawm Fri Jan 18, 2013 3:12 pm
YAWG O POB THIAB HUAB TAIS NTXHAIS NKAUJ NTXAWM
Puag thaum ub ov, Huab Tais Moos Loob nws muaj xya leeej ntxhais. Nws cov ntxhals mas niaj hnub niaj hmo tuaj mus da dej ntsis plaub hau tom ntug hav dej os. Ces muaj ib zaug Huab Tais cov ntxhais txawm tuaj mus da dej. Txawm muaj ib niag hluas hu ua 0 Pob, nws tuaj mus pw tav kev. Ib ntsis Huab Tais cov ntxhais tuaj mus da dej los txog ntawd. Cov niam laus mas hla niag 0 Pob nraws nruam los lawm. Tshuav tus ntxhais Ntxawd los torn qab. Tus ntxhais Ntxawd, nws los txog, nws yuav hla, nws ho xa tau hais tias: "Ab! Luag yog ib tug txiv neej diam, hos yus yog ib tug poj niam. Ntshai yus tsis txhob hla aub!" Ntxawm txawm lug zoj kev mus nram ko taw. Niag 0 Pob txawm chaub laug tsuag tsuag tuaj nrad lawm thiab. Ntxawm ho lug kev tsuag tsuag tuaj ped. Niag yawg 0 pob kuj txav chaub laug tsuag tsuag tuaj ped lawm thiab. Txawm xij tav kev li ntawd ib hnub tsaus ntuj, Huab Tais ntxhais Ntxawm tsis tau kev los tsev li lauj. Tsaus ntuj noj hmo tas, niag hli tuaj twb yuav ntseg, los kuj tsis pom Huab Tais ntxhais Ntxawm los li thiab lauj. Huab Tais txawm cem hais tias: "Nej xya tus ntxhais no, nej niaj hnub niaj hmo mus da dej ntsis plaub hau torn hav dej. Ua cas nej rau leej hlob, nej twb los lawm tas. Ua li nxthais Ntxawm ne? Nws ho tseem mus tus dab tsi lawd? Ua cas niag tsaus ntuj tav li no, ho tsis pom nws los li thiab?" Cov niam laus txawm teb zom zaws hais tias: "Aub! Txiv, peb niag niam hluas Ntxawm xij tseem pheej nrog niag hluas 0 Pob tham nyob torn kev naj! Peb los txog tod ces niag 0 Pob pw tav kev, ces peb cia li hla nraws nruam los lawm. Hos Ntxawm ces, nws los txog ntawd nws pheej nrog niag 0 pob tham tsis paub tas zaj 11 tiag." Huab Tais txawm cem hais tias: "Aub! Nej cov hlob twb Ics tas lawm. Es Ntxawm xij pheej nyiam niag 0 Pob li ntawd, ces ua rau kuv poob ntsej muag hwv. Kuv tsis yuav nws los ua kuv tus ntxhais lawm. Cia mus hu tsoom Xeeb teb Xeeb chaw, tswv zej tswv- zos sawv daws tuaj tso, es yuav muab niag yawg 0 Pob thiab Ntxawm nkawd rau tshoob ceeb tshoob mus xwb lov."Ces Huab Tais txawm tso neeg mus hu tsoom Xeeb teb Xeeb chaw, tswv zej tswv zos sawv daws tuaj. Huab Tais nws kuj npaj ib rooj mov loj loj noj tas. Huab tais txawm tso nws cov tub mab tub qhe mus txua ib lub nkoj loj loj los. Nws muab mov muab nqai j txaus txaus rau hauv lub nkoj. Ces nws txawm muab Ntxawm thiab yawg 0 pob nkawd ob leeg rau tshoob ceeb tshoob raws dej Vwj Cab tshoob los lawm lauj. Tas tsoom Xeeb teb Xeeb chaw, tswv zej tswv zos sawv daws npuaj teg hais zom zaws tias: "Aub! Huab tais muab nws ntxhais nkauj Ntxawm nrog niag yawg 0 pob rau tshoob ceeb tshoob mus lawm lauj."Ces dej txawm tshoob lub nkoj los lawm. Dej Vwj Cab muab tshoob mus txog qhov twg los lub nkoj tsis khuam li. Tshoob tshoob txawm los txog rau lub pov txwv Duas Cas, ces lub nkoj txawm los khuam rau ntawd lawm. Nkawd nquam li cas los lub nkoj tsis mus li. Nkawd ho nrhiav pas los nyom los kuj tsis tau li thiab. Ces Ntxawm thiab yawg 0 pob nkawd niaj hnub muab nkawd yawm txiv cov mov los noj. Ntxawm txawm hais rau yawg 0 Pob hais tias: "Aub! Txiv 0 Pob, koj kuj txawm mus luaj teb los pov? Yog koj tsis mus luaj teb mas wb yuav tsis tau noj nawd! Wb niaj hnub noj niam tais thiab yawm txiv lawv tej zaub tej mov no tas, es ua li wb ho yuav noj tus dab tsis thiab?" 0 Pob txawm teb hais tias: "Ab! Ntxawm lauj, mas koj zoo nkauj hwv ces kuv tsis xav mus li las. Kuv xav nyob zov koj xwb." Ntxawm teb hais tias:" 0 Pob, koj tsis txhob hais li ntawd. Nyiam no, zoo thiab phem los wb niam wb txiv lawv twb muab wb rau tshoob ceeb tshoob los txog txij no lawm, ces koj ua ib siab mus luaj teb xwb! Nyiam no, me noob nplej noob kws los niam tais yawm txiv lawm yeej muab los. Muaj nyob ntawm no huv si. Ces koj mus luaj tso. Qhuav lawm no ces ho yuav muab hlawv es ho coj mus cog. Lwm xyoo koj thiab kuv wb thiaj li yuav tau noj." Ces yawg 0 Pob txawm mus luaj teb lauj. Yawg mus luaj ib hnub, ntov tas ib tog zoov. Hmo rov los lawm. Tag kis mus xyuas. Xyoob ntoo rov sawv zoov li qub. Hnub torn qab, ho rov mus luaj ib hnub tsaus ntuj, ntov tas ib tog zoov, rov los tsev. Tag kis mus xyoob ntoo sawv zoov li qub lawm thiab, zoo nkaus li tsis tau luaj tsis tau ntov, Ntxawm xij cem hais tias: "0 Pob lauj, koj mas nkees dhau hwv lawm. Ntshai wb yuav tsis tau noj li lap:j. Koj mus luaj tau ob peb hnub los no, ib tug xyoob tug ntoo tsis tu. Koj nkees dhau hwv lawm! Ces hnub no tso kuv mus luaj ua ntej nawd! Es koj ho ntov lawv kuv qab. Mas ntshai wb thiaj li yuav tau teb ua xwb lauj." Ces hnub ntawd Ntxawm txawm mus luaj ua ntej, hos 0 Pob ntov lawv qab. Ntov ntov ib hnub vau peb nyuag tug ntoo xwb. Muaj ib tug mas yog ib tug ntoo khoob loj loj. Ces tsaus ntuj lauj. Ntxawm hais tias: "0 Pob! Tsaus ntuj lawm ces wb mus tsev tso. Tag kis mam ho rov tuaj luaj dua."Yawg 0 Pob nws chim chim nws txawm hais tias: "Ntxawd, koj mus xwb os. Kuv yuav tsis mus nawd! Kuv mus los xij raug koj cem xwb, ces kuv yuav tsis mus lawm os. Kuv luaj teb, kuv kuj luaj tiag tiag tas tsim nyog kuv ib tug luaj thiab, tag kis rov tuaj xyoob ntoo nws rov sawv nws li qub lawm xwb. Koj txawm xij pheej cem kuv hais tias yog kuv tuaj laug xwb, kuv tsis luaj teb no, ces koj mus xwb, es kuv yuav zov saib yog leej twg xij pheej los tsa tej xyoob ntoo no." Ces Ntxawm thiaj li rov qab los lawm. Hos txiv yawg 0 Pob thiaj li nqa rab ciaj uas yawm txiv muab, nws txawm khiav mus nkaum hauv niag cav ntoo khoob uas nws ntov vau ntawd. Cas ib tsam uas ntxoov ntxoo los dhau hav tas nrho xwb, muaj ib pab niag liab coob coob los. Muaj ib niag txiv thais liab loj nqa ib lub nruas uas muaj cuaj lub qhov muag. Nws los los txog ntawm niag ntoo, niag txiv thais liab txawm muab lub niag nruas los ntaus, teg lub qhov muag teg lub qhov muag. Niag txiv thais liab txawm ntuas hais tias: "Sawv sawv! Nqaij txuas nqaij, tawv txuas tawv." Ua ciav tsob niag ntoo sawv zuj zus lawm. Yawg 0 Pob txawm tuaj hauv niag ntoo khoob ntawd ntsia ntsoov ntag, pom niag txiv thais liab tsa tus tas ho los tsa tus thiab, rov muab lub nruas ntaus teg lub qhov muag teg lub qhov muag hais tias: "Sawv sawv! Nqaij rov txuas nqaij tawv rov txuas tawv au!" Tsob niag ntoo cia li sawv zuj zus sawv zuj zus. Tsis pom ib tug hniav riam hniav txuas li. Du lug li qub xwb. Niag txiv thais liab txawm yws hais tias: "Ned! Leej twg nim tuaj muab tej vaj-tse no ntov vau tas? Kuv kuj sis los tsa tau rov sawv li qub thiab. Kuv kuj tseem heev dua nws lawm thiab sas!" Niag txiv thais liab ho tib plhaw los zaum ntua saum yav niag cav ntoo khoob uas yawg 0 Pob nkaud. Ces niag txiv thais liab txawm los zaum nyob saud. Niag ntoo ntawd txawm muaj ib niag kab tawg pleb. Niag txiv thais liab ob lub noob qes txawm tawm los hauv qab lauj. Yawg 0 Pob txawm muab cov ciaj uas yawg yawm txiv muab rau yawg, tais nkaus niag txiv thais liab ob lub noob qes tuav ruaj ruaj lawm . Niag txiv thais liab nti nti tsis dim li. Niag txiv thais liab txawm hais rau yawg 0 Pob haistias: "Thov koj tso kuv lauj! Koj tuaj luaj tau ob peb hnub teb, tas ob peb kab los no, los yog vim kuv los muab tsa tas thiaj li rov sawv li qub tas lawm. Yog vim kuv nqa kuv lub nruas no tuaj tsa thiaj rov sawv tas tiag. Mas hnub no koj poj niam tuaj luaj ua ntej, koj ho ntov lawv qab los kuv yeej tsa tau huv tib si lawm tiag tiag. Tiam sis yog niag ntoo khoob no kuv thiaj li tsa tsis tau xwb. Ua li ces thov koj. Koj tso kuv tso. Kuv muab kuv lub nruas cuaj lub qhov muag no rau koj lauj." Niag txiv thais liab mas thov zaj tas los thov zaj tuaj thiab lauj. Yawg 0 Pob thiaj li hais tias: "Aub! Tsis lam yuav mus tau li ntag! Yog kuv tso koj thaum twg mas koj yeej yuav torn kuv xwb. Kuv mas yeej yuav tsis lam tso li ntag lauj. Luaj teb ntov ntoo sab, yog zaub xwb ntag?" Niag txiv thais liab hais tias: "Tsis ntshai! Yog tias koj ntshai tsam kuv ho nqa kuv lub nruas no khiav, thiab koj ho ntshai tsam kuv lam torn koj no, ces kuv xub cev kuv lub nruas no los rau koj tso. Koj yuav kuv lub nruas lawm, koj mam li tso kuv. Es koj tawm los wb mam li sib tham. Koj tsis txhob ntshai kiag ntag nawd! Ces mag txiv thais liab txawm cev lub niag nruas uas muaj cuaj lub qhov muag los rau yawg 0 Pob. Thaum yawg 0 Pob txais tau txiv thais liab lub nruas lawm lauj, nws mas li tso niag txiv thais liab ob lub noob qes. Ces yawg thiaj li tawm los, ob tug sib tham. Txiv thais liab thiaj hais tias: "Ua li cas koj yuav mus o pob phem tas npaum li ko ua luaj?" 0 Pob txawm teb hais tias: "Leej npawg! Kuv niam kuv txiv yug kuv puag nruab thiab los ces kuv yeej tus niag o pob los li no tiag." Niag txiv thais liab hais tias: "Aub! Yog li no mas koj muab lub nruas los rau kuv, kuv ntaus kom koj rov zoo nraug rov tuaj saib." 0 Pob hais tias: "Aub! Tsam me ntsis koj tsis rov muab rau kuv lawm, ces kuv yuav tsis kam os." Niag txiv thais liab hais tias: "Leej npawg! Koj txhob ntshai, kuv yeej muab xwb las mas. Yog hais tias koj ntshai tsam kuv tsis rov muab rau koj lawd no, ces koj rov muab ciaj los tais kuv ob lub noob qes zoo li qub tso. Es kuv ntaus kom koj zoo nraug tas, kuv muab lub nruas rov rau koj lawm koj mam li tso kuv." Yawg 0 Pob thiaj rov muab ciaj los tais niag txiv thais liab ob lub noob qes, ces niag txiv thais liab thiaj muab lub nruas los ntaus. Nws hais tias: "Aub! Kuv ntaus lub nruas no mas tseem kom koj zoo nraug rov tuaj. Cov niag pob ntawd, mas tseev kom nti tas mus nawd!" Niag txiv thais liab ntaus lub ruas tas, nws hais tias: "Aub! Zaum no, koj los luaj teb rau lub Vees Cas no, kuv los muab tsa tas lawm, mas nkim koj lub zog los lawm ntau hnub. Mas kuv muab lub nruas no rau koj, mas kuv twb ntaus kom koj rov zoo nraug tuaj lawm. Ces koj nqa lub nruas no, koj rov mus koj tsev. Koj mus txog tsev, yog koj poj niam tsis kam yuav koj lawm no, koj coj koj poj niam neb tuaj cuag kuv nawd!" Ces yawg 0 Pob txawm nqa lub nruas los lawm. Nws mus txog tsev, hu kom Ntxawm tawm tuaj qhib qhov rooj Ntxawm txawm qhib tau qhov rooj. Ua ciav tib tug hluas mas zoo nraug ntxiag xwb lauj. Tsis yog niag yawg 0 Pob lawm. Ntxawm txawm hais tias: "Aub! Koj tsis yog kuv tus txiv lawm. Kuv tsis yuav koj. Kuv tus txiv mas tus niag o o pob tsis zoo li koj." Yawg 0 Pob txawm teb Ntxawm hais tias: "Koj hais yog lawm las mas Ntxawd! Tiam sis, koj los lawm, ces kuv zov. Ib me ntsis, txawm los ib niag pab liab coob coob, txawm los tsa cov ntoo uas kuv ntov. Mas kuv thiaj li muab wb yawm txiv rab ciaj los tais niag txiv thais liab noob qes, ces nws thiaj li muab nws lub nruas cuaj lub qhov muag no los thov kuv tiag! Nws thiaj muab los ntaus kom kuv rov zoo nraug rov tuaj li no lawd." Ntxawm txawm teb yawg hais tias: "Koj lam dag xwb. Kuv tsis yuav koj li. Ntawm kuv tus txiv mas nws yeej o pob."Yawg 0 Pob hais li cas los Ntxawm tsis ntseeg li lauj. Yawg 0 Pob thiaj rov hais tias: "Aub! Ntxawd, niag txiv thais liab hais tias yog kuv los txog hos koj tsis zeem tias kuv yog koj tus txiv li no, kom kuv coj koj nrog kuv wb mus cuag nws no." Ntxawm thiaj li teb hais tias: "Ab! Koj nim hais ua luaj! Yuav mus los puj sis mus las mas. Saib yog koj dag los yog muaj tiag?" Ces nkawd ob niam txiv txawm rov qab mus cuag niag txiv thais liab raws li yawg 0 Pob hais. Niag txiv thais liab txawm hais tias: "Aub! Yog kawg las mas! Twb yog kuv los tsa cov ntoo no. Ces koj tus txiv thiaj muab nws yawm txiv rab ciaj los tais kuv ob lub noob qes, ces kuv thiaj tau muab kuv lub nruas no pub rau nws lawd! Mas thaum koj tus txiv nws tawm hauv qhov ntoo los, nws tus niag phem phem o o pob. Kuv thiaj muab lub nruas no los ntaus, ces nws mam rov zoo nraug tuaj lawm xwb. Yog tias koj ho pheej yuav tsis ntseeg li no, mas cia kuv ho rov muab lub nruas no ntaus kom nws o pob li qhov qub, kom pob su tuaj pub rau koj saib saib maj." Niag txiv thais liab thiaj muab lub nruas rov los ntaus tias: "0 Pob! Koj rov qab o pob li qub tuaj saib!" Niag txiv thais liab ntaus cuaj teg cuaj lub qhov muag, ces yawg 0 Pob thiaj rov o o pob tuaj lawm tiag lauj. Niag txiv thais liab haistias: "Nev! Koj sim saib saib mas. Puas yog koj tus txiv lawd?" Ntxawm thiaj hais tias: "Aub! Tus no thiaj yog kuv tus txiv las mas. Kuv tus txiv mas nws yeej o pob li no tiag." Niag txiv thais liab hais tias: "Koj sim saib saib ov! Kuv yuav rov ntaus kom nws zoo nraug rov tuaj nawd!" Niag txiv thais liab ntaus cuaj teg cuaj lub qhov muag tias: "Aub! Kuv ntaus no, mas kom rov zoo nraug au!" Yawg 0 Pob rov zoo zoo nraug rov tuaj lawm tiag lauj. Txiv thais liab nug hais tias: "Zaum no koj yuav los pov ! Yog koj tus txiv lawd!" Ntxawm teb hais tias: "Aub! Kuv yuav. Zaum no, yog kuv tus txiv lawm tiag." Niag txiv thais liab thiaj hais tias: "Npawg! Kuv mus lawm. Neb nyob. Hnub twg yog neb muab kuv lub nruas no los ntaus, mas ntaus teg ib, tau liaj ia teb chaws. Ntaus teg ob, mas tau laj mej pej xeem huab hwm. Ntaus teg peb, mas tau nyuj tau twm. Ntaus teg plaub, tau qaib npua os. Ntaus teg tsib, tau yaj tau tshis. Mas neb ntaus cuaj teg no, mas neb tau tas ib puas tsav yam tsiaj." Niag txiv thais liab txawm mus lawm lauj. Ces niag yawg 0 Pob txawm muab lub nruas los ntaus raws li niag txiv thais liab tau hais rau nkawd. Nkawd thiaj li tau tsiaj tau txhuv, tau liaj ia teb chaws, tau laj mej pej xeem huab hwm, tau tub mab tub qhe coob coob ua npoj ntws lawm lauj. Ces yawg 0 Pob hais rau Ntxawm hais tias: "Ntxawd, nyiam no wb tau liaj ia teb chaws lawm, muaj tsiaj muaj txhuv tas lawm. Ntshai wb yuav tau ua ntawv mus rau yawm txiv kom yawm txiv tuaj xyuas wb los pov yuad?" Ces yawg 0 Pob thiab Ntxawm nkawd thiaj ua ntawv mus rau Huab Tais hais tias: "Aub! Txiv, nyiam no mas hais rau koj tau paub. Thaud, koj ua txiv, koj tau muab wb rau tshoob ceeb tshoob raws dej Vwj Cab nqes hav lawm. Wb thiaj tau nrog dej ntab los khuam rau Thaj Dua Cas. Mas nyiam no wb tau teb chaws los nyob lawm. Mas liab muab lub teb chaws no rau wb nyob lawm. Lub nroog uas wb nyob no yog hu ua Vees Cas. Txiv, yog koj tuaj mas koj caij ntxhw tuaj, koj muab ntaub liab los npog ntxhw ob lub qhov muag nawd!" Ces tsis ntev nkawd yawm txiv txais tau daim ntawv lawm. Nws txawm hnyos yawg 0 Pob thiab Ntxawm hais tias: "Aub yau! Yog tias tseem ho tau zoo lawm. Es kuv caij ntxhw mus los tseem yuav ntaub liab los npog ntxhw qhov muag thiab. Tsam ib me ntsis ntxhw ho mus pom teb chaws zoo hwv lawm ces ntxhw ho ceeb thiab, mas zoo dhau hwv lawm lauj?" Ces yawm txiv tsis ntseeg li. Nws txawm caij ob tug ntxhw mus, tsis muab ntaub liab los npog ntxhw qhov muag. Yawg 0 Pob thiab Ntxawm nkawd yawm txiv caij ntxhw taug tus ntug dej Vwj Cab nqes hav tuaj mus ov. Txiv yawg Huab Tais tuaj, mas nim tuaj nyo hau nywb nyes xwb. Ua ciav tuaj tuaj mus pom dheev niag tiaj nrag dav li dav lauj. Ntxhw ceeb ces ntxhw tso tuam phov ntws dhia, Yawm txiv poob ntxhw lov tav lawm lauj. Yawm txiv ces nti luj luam xwb. Ib ntsis txawm muaj ob tug niam txiv Nplog mus cuab ntses los txog ntawd. Nkawd pom, nkawd txawm los hais rau 0 Pob nkawd ob niam txiv hais tias: "Aub! Npawg, wb mus cuab ntses los txog torn kev tod. Wb pom muaj ib tug yawg laus laus caij ntxhw tuaj txog tod. Ntxhw dhia ces yawg poob, lov ib tug tav lawm, sawv tsis taus li." 0 Pob nkawd ob niam txiv thiaj hais tias: "Aub! Ntshai tsam tej zaud yuav yog wb yawm txiv laiv! Rau qhov wb twb tau ua ntawv mus kom tuaj xyuas wb. Ntshai tsam yog yawm txiv tuaj xyuas wb, nws tsis muab ntaub los npog ntxhw qhov muag. Es ntshai ntxhw pom tiaj nrag dav, ntxhw khiav rov qab, nws poob ntag." Nkawd ob niam txiv thiaj khiav ib tsaug tuaj mus xyuas. Ciav yog nkawd yawm txiv tiag lauj. 0 Pob thiaj hais tias: "Txiv! Wb sau ntawv los rau koj. Wb twb hais tias koj tuaj mas kom koj muab ntaub liab los npog ntxhw qhov muag. Nyob ntsis ntxhw tuaj pom tiaj nrag dav, ces tsam ntxhw dhia es koj poob no nev?" Nkawd yawm txiv Huab Tais hais tias: "Aub, Vauv Kuv nyeem, ntawv yeej hais li thiab las mas. Tiam sis kuv ho xav tias ntshai yog dag no nas." Ces nkawd ob niam txiv thiaj tau coj yawm txiv los kho tau ob peb hnub. Yawm txiv zoo rov los, nws thiaj Jiais tias: "Me vauv nev! Thaud, koj lam ntxov zoo li no mas kuv yeej tsis muab kuv Ntxawm neb rau tshoob ceeb tshoob tiag. Kuv yeej cia koj ua koj nom nyob lawd. Yog vim li cas es nyiam no koj ho tau ib lub zoo neej ua lawd?" Vauv 0 Pob teb yawm txiv tias: "Aub, txiv lauj! Thaud, kuv yeej tus niag o o pob tiag. Tiam sis koj muab wb rau Tshoob Ceeb tshoob raws dej Vwj Cab los khuam rau lub niag Thaj Duas Cas. Ces Ntxawm kom kuv mus luaj teb no. Kuv mus luaj ib hnub, ntov vau ib niag tog zoov. Tag kis, mus cov ntoo uas ntov tas lawd rov sawv zoo li qub. Ces kuv thiaj mus zov. Ciav yog liab los tsa. Kuv mus nkaum hauv niag qhov ntoo. Liab tsa cov ntoo sawv tas, nws ho tsis pom kuv. Liab txawm dhia los nkaum saum kuv taub hau. Niag ntoo tawg ib niag kab pleb. Nws niag noob qes hlauv vias los. Kuv thiaj muab rab ciaj uas koj muab rau wb ntawd tais liab ob lub noob qes. Liab thov thov. Nws thiaj muab nws lub nruas cuaj lub qhov muag los rau kuv. Nws kom kuv tawm nrog nws tham. Nws pom kuv tug niag o o pob. Nws thiaj nug kuv tias ua cas kuv tus niag yuav o o pob li no. Ces kuv thiaj teb nws hais tias yog puag nruab thiab los kuv yeej zoo li no. Ces nws thiaj kom kuv muab lub nruas rau nws ntaus. Kuv cia li zoo tuaj li no xwb. Niag txiv thais liab mus lawm, wb ho muab lub nruas no lo ntaus. Wb thiaj tau liaj ia teb chaws li no tiag." Yawm txiv hais tias: "Aub, me vauv lauj! Thaud, koj yeej tsis tsim txiaj las. Nyiam no Ntxawm neb ho tau zoo lawm los yog lub Ntuj pab thiab. Ua li ces kuv ua txiv, cia kuv nyob Moos Loob ua Huab Tais nyob ped. Hos kuv Ntxawm neb nyob nram no lub nroog Vees Cas ces cia neb ua Thawj Pwm Tsav. Ces Ntxawm nkawd nyob Vees Cas. Yawg 0 Pob tau ua tus Thawj Pwm Tsav. Hos nkawd yawm txiv nyob Moos Loob. Lawv thiaj li los ua neej tsis muaj tag.
Last edited by xeebtsheejtiav on Sat Jan 26, 2013 8:27 pm; edited 1 time in total