Seev Kwv Txhiaj

Subject: Seev Kwv Txhiaj Mon Oct 22, 2012 10:36 am

First topic message reminder :

Kwv txhiaj qhib rooj rau ib tsoom phooj ywg nkauj muam nraug nus s/d tuaj laug sib hawm ua si...........

Niam yais ib tsoom me phooj ywg nkauj muam nraug nus ua cas hmo no yuav zoo niaj mus zoo hmo ntshai yuav yog tau lawm hmoob ceeb tsheej kev phooj kev ywg txog kev nkauj kev nus txawm, Ywjsuab yuav qhib rooj qas lug rau ib zej tsoom nkauj muam nraug nus laus hluas tuaj mus thuav ntawv.
Niam yais ib tsoom me phooj ywg nkauj muam nraug nus ua cas hmo no yuav zoo niaj mus zoo hmo ntshai yuav yog tau lawm hmoob ceeb tsheej kev phooj kev ywg txog kev nkauj kev nus txais, Ywjsuab yuav qhib rooj qas lug rau ib zej tsoom nkauj muam nraug nus laus hluas tuaj mus sib hais.

Peb ib tsoom phooj ywg nkauj muam nraug nus ces yuav zoo tam lis ntua tus niaj coob tom niaj ncuas yuav dhia li rhees tsaws lis ntua tus ntsis nroj, kuv xav nrog koj hais tuj tiag ces kuv cev zoj lawm niaj ib sob lus tuaj rau koj.
Peb ib tsoom phooj ywg nkauj muam nraug nus ces yuav zoo tam lis ntua tus niaj coob tom niaj ncuas yuav dhia li rhees tsaws lis ntua tus ntsis suv, koj xav nrog kuv hais tuj tiag ces koj cev zoj lawm niaj ib sob lus tuaj rau koj.

Peb ib tsoom phooj ywg nkauj muam nraug nus niam nkauj txawg txawj txawg ces yuav txawg lis zoj tuaj rau nruab rwb txiv nraug txawg txawj txawg ces yuav txawg lis zoj tuaj rau nruab paig, tus me paj ntsha lus taum ces tsis yog niam nkauj txawg yuav hais kom txiv nraug txawg tais.
Peb ib tsoom phooj ywg nkauj muam nraug nus niam nkauj txawg txawj txawg ces yuav txawg lis zoj tuaj rau nruab paig txiv nraug txawg txawj txawg ces yuav txawg lis zoj tuaj rau nruab rwb, tus me paj ntsha lus taum ces tsis yog txiv nraug txawg yuav hais kom niam nkauj txawg swb.

Peb ib tsoom phooj ywg nkauj muam nraug nus ces yuav zoo tam lis ntua rev paj tawg lis zees tuaj rau saum nqaj txi txiv lis zoj tuaj mus sib ntsuas, peb tsuas hais tus paj ntsha lus taum tas li peb kev phooj ywg nkauj muam nraug nus nyob tuaj mus sib cuag.
Peb ib tsoom phooj ywg nkauj muam nraug nus ces yuav zoo tam lis ntua rev paj tawg lis zees tuaj rau saum nqaj txi txiv lis zoj tuaj mus sib ib, peb tsuas hais tus paj ntsha lus taum tas li peb kev phooj ywg nkauj muam nraug nus nyob tuaj mus sib ntsib.

Peb ib tsoom phooj ywg nkauj muam nraug nus cas nkauj hnub tuaj ces hnub ziab nraug hli tuaj ces hli ci yuav ci vuj vus tuaj tim hav twm, peb ib tsoom me plees nkauj nraum hais tus paj ntsha lus taus ces yuav hais raws li kev sib swm.
Peb ib tsoom phooj ywg nkauj muam nraug nus cas nkauj hnub tuaj ces hnub ziab nraug hli tuaj ces hli ci yuav ci vuj vus tuaj tim hav zaub, peb ib tsoom me plees nkauj nraum hais tus paj ntsha lus taus ces yuav hais raws li kev sib paub.

Peb ib tsoom phooj ywg nkauj muam nraug nus hmo no yuav tsis yog lawm hmoob ceeb tsheej ib cim mus paj tsiab ntshai peb ib tsoom phooj ywg nkauj muam nraug nus yuav tsis tau hais tus paj ntsha lus taum tuav tes ruj rawv lawm tej mus sib niab, peb yuav hais tus paj ntsha lus taum raws li peb txoj kev mus kaj siab.
Peb ib tsoom phooj ywg nkauj muam nraug nus hmo no yuav tsis yog lawm hmoob ceeb tsheej ib cim mus paj tsiab ntshai peb ib tsoom phooj ywg nkauj muam nraug nus yuav tsis tau hais tus paj ntsha lus taum tuav tes ruj rawv lawm tej mus sib zawv, peb yuav hais tus paj ntsha lus taum raws li peb txoj kev mus kaj plawv.

Yuav zoo lub laj xeeb tis ua xais, ntaus ntiag peb tsoom phooj ywg nkauj muam nraug nus no lub suab hais.

Subject: Re: Seev Kwv Txhiaj Wed Nov 21, 2012 9:08 am

Tag kis mam teb koj mog ywjsuab koj zaj kwv txhiaj zoo kawg li mas ua tsaug nawb

» TXHIAJ TXHAIS
» Mloog Kwv Txhiaj
» Los peb hais, "Kwvtxhiaj"
» Lub chaw mloog kwv txhiaj
» NkaujnagTshia Lub Chaw Seev Lus