KUV COV PAJ HUAM

Subject: KUV COV PAJ HUAM Thu Nov 15, 2012 12:29 pm

First topic message reminder :

KUV COV PAJ HUAM

Ntsuj Plig - Lus Tshaj Tawm

Ntawm no mus yog lus paj huam
hais cuam tshuam rau txoj kev hlub
nkauj hnub qub yog tus niam tsev
ua siab ntev cia tij laug tham
nkauj tshia nag tus uas kuv nco
kuv hais no nws yeej muaj tiag
tshuav nkauj nyiag tus uas nyob deb
tus ncaim peb ces yog npauj npaim
butterfly ya puag pem roob
me nkauj hmoob koj yog leej twg
qub phooj ywg kuv me pajzoo
tau ntau xyoo uas tsis sib ntsib
kuv thov qhib tham lus txuas ntxiv
npawg admin yog kuv hais dhau
los txhob npau 8tos8nco
kuv hais no xav tuaj txhawb nej
yav nram ntej kuv tuaj ua si
nws zoo li muaj neeg coob heev
sib tw seev mas lom zem kawg
tiag leej npawg cas zaum no tuaj
ho tsis muaj lawv mus twg tas
kuv mam ras yog lawv tuaj kawm
thaum lawv txawj mus qhib site tshiab
tshuav tus ntxhiab tso rau heaven
tsuas yog seem peb ob - peb tug
los lam lug nyob li kauv plis
nyaj ib ntsis yuav muaj neeg tuaj ntxiv os.....Mog!!!

Subject: Re: KUV COV PAJ HUAM Sun Jan 04, 2015 8:13 pm

Npauj Npaim

Hnub no kuv zoo siab uas rov pom koj dua ib zaug os.
Kuv ces twb qaug zog sau paj huam tag li lawm vim
tias twb tsis muaj Npauj Npaim tuaj saib li lawm na.....

Npauj Npaim....., Tos tsis pom koj cov paj huam los
ntshe twb yog koj muab nqa nrog koj mus tag tib si
lawm puas yog na???

Subject: Re: KUV COV PAJ HUAM Sun Jan 04, 2015 8:32 pm

Npauj Npaim Ncaim Mus

Ib sij huam Npauj Npaim mus dhau

tus hlob yau los nco tshaj plaws

peb sawv daws noj mov tsis qab

tsis tshaib plab dej los tsis nqhis

tsheej tag kis tsis paub noj tshai

nco dua ntais li tiag Npauj Npaim

koj sawv nraim txhua tus lub siab

tau neej tshiab puas nco phooj ywg

ib hnub twg yog lub ntuj tshav

ces tsis xav txog peb lawm os

yog ntuj pos huab thoob ntiaj teb

mam nco peb hauv nruab dab ntub

tau tus hlub ces nrauj phooj ywg

yam dej lwg nrog mus ntxaum av

txoj kev xav zoo tam dej ntws

ib hnub twg twb yuav dua toj

peb nco koj tsis muaj caij xaus

nco yam nkaus noog nco noob taum

lub caij zaum thiab xav txog koj

siab ua voj ua viag xwb tiag

txawm ib pliag los tseg tsis tau

nco koj dhau tuaj rau nruab siab

tawm ntuj tshiab yog ho muaj caij

lam tuaj laij xauj peb thiab mog......Npauj Npaim..!!!

Subject: Re: KUV COV PAJ HUAM Thu Jan 08, 2015 10:51 am

Sij Hawm Dhau Mus

Lub sij hawm uas dhau mus lawm
xav tsis tawm tias muaj nuj nqis
ib pliag ntshis tam suab cuam kau
nrov mus dhau hav zoov nuj txeeg
ua rau neeg hnov thoob txhua qhov
thiaj muaj xov xa txog tus hlub
tias thaum ub wb tau sib ntsib
puag thaum pib ntuj tsim teb raug
ua nkauj nraug los tsis sib tau
thiaj li dhau mus ua npau suav
kev hlub cuav tsis tshwm sim los
niaj hnub tos ua hnub ua hmo
txoj kev nco uas tsis muaj tseeb
thiaj tau feeb los ua paj huam
hais cuam tshuam txog rau txoj hmoo
tej hmo zoo npau suav pom koj
lub plawv ntoj tsis muaj chaw xaus
zoo yam nkaus tso dab pob tawb
nws mob khawb ti nkaus nruab siab
lwm tiam tshiab puas yuav ntsib koj
zoo tam zoj wb txoj hmoov txog
kuv mam yog koj tus txiv hlub
kuv mam pub mov rau koj noj
cia rau koj yog tus niam zoo
puag kuv loo mus tag ib sim
thiaj tsis dim li tiam tag los
siab ntev tos rau lwm tiam mog...!!!

Subject: Re: KUV COV PAJ HUAM Sat Jan 10, 2015 10:21 am

(Paj Huam Collection)
Nkauj Hmoob Tej Lus Nco

Me Nkauj Hmoob koj tej lus nco
kuv tus no mam muab khaws cia
yog txoj sia tseem tsis tau tu
yuav ev xyu mus kom nto roob
mam qhia thoob rau ntiaj teb no
tias koj nco wb tej chaw ntsib
puag thaum pib thawj hnub sib pom
kuv xav txhom koj mus ua nyab
ntshai tsam ab tsis tau mis noj
ho tso koj los nco ua luaj
xav tsis tuaj lub siab quaj dhi
pheej tham ntxhi ntuj teb tag hmo
kuv niag pog tseem tau txhawj xeeb
mus hu neeb tuaj ua kho tas
los ua cas hu plig tsis rov
plig mus zov lub me paj zoo
lawm ntau xyoo muab nyuj los hu
yawg Xaiv Tsu saib nyuj tus tw
cas txoj lw sib hlub to tog
kuv aib pog thiaj poob plig tas
yuav ua cas thiaj hu tau rov
lawv tias xyov cia ua neeb ntxiv
thiaj mus fiv aib yawg Nom Phaj
pib nce thaj ces pib khav ntsuj
mus dhau ntuj ceeb tsheej tsis tau
kawg niam yau xwb thiaj yuav pab
Nom Phaj tshab ua lus hais meej
tus cawm seej ces yuav Paj Zoo
nws txoj hmoo thiaj yuav nyob laus
thov muab xaus li no tso mog......hahaaa

Subject: Re: KUV COV PAJ HUAM Wed Jan 14, 2015 10:55 am

Niam tij thiab tij laug siab zoo

Muaj ib xyoo thaum ua nyab laj
mus zeem ncaj niam tij - tij laug
mus zeem raugtij laug siab zoo
kuv muaj hmoo txawm muaj ib hmos
thiaj mus yos pom rauv taws ntsa
mus xauj na yog nkawd niam hluas
ho tuaj xyuas niam laus txiv laus
lub ntuj tsaus tsis muaj duab hli
kuv mus ntxhi tias neb tuaj sav
hais luag nyav tias los tsev ma
kuv thiaj nkag mus nrog nws tham
nyob ib tsam txog lub caij pw
tij laug qw rau niam tij tias
cia tais Yias pw nrog Yim Laj
mus kho txaj tim lub txaj qhuas
ces niam hluas txawm tuav kuv npab
wb mus la lig lawm mus pw
xav tsis khws npau suav los tiag
txawm sawv kiag mus rau tim txaj
mas hais ncaj zoo siab tshaj plaws
hmoob sawv daws laj mus zeem tau
tej tij laug muaj lub siab zoo
yog muaj hmoo tsuas yog ib zaug
zaum no lau kuv yuav ua cas
lus hais tas ib hmos kaj ntug
sawv ob tug plaub hauv ntxov txoog
yam poj ntxoog tuaj mus ev dej
kuv ua ntej nws ho lawv qab
sab caj npab tsho tsis nco khawm
mis tseem tawm lub me dawb paug
muaj ib zaug nyob hauv lub neej
nej qee leej puas tau ntsib dua
muab nco txhua tij laug niam tij
tus txiaj ntsim mus tsis paub kawg
thov pog yawg foom koob hmoov rau
kom nkawd tau txais txiaj ntsim zoo
kom muaj hmoo mus tag ib sim
tsis muaj chim luag ntxhi sib hlub
li thaum ub uas kuv tseem yau
uas neb tau muab niam hluas pub
rau kuv hlub ib hmos kaj ntug...nawb mog!!!!

» sau paj huam ua si
» Lus Sij Huam
» paj huam ncaim
» Chaw Sau Paj Huam
» Xyaum Sau Paj Huam