Subject: Re: YwjSuab thiab NagTshia Tue Mar 18, 2014 10:01 am
YwjSuab thiaj li hais rau NkaujNagTshia hais tias: NkaujNagTshia…..kuv yuav tau mus lawm es koj nyob los koj tsis txhob quaj lawm mas yom. Yog hais tias kuv pom koj quaj ces ua rau kuv hlub koj heev es ua rau kuv tsis kaj siab thiab cia li tsis xav mus li lawm, los yog koj ho muaj dab tsi nyuaj siab, los sis yog koj nco kuv xwb os…..NkaujNagTshia. Koj hais qhia rau kuv tau es koj tsis txhob ntxhov siab dab tsi li nawb. NkaujNagTshia…..koj nyob ces nco ntsoov wb cov lus hais tseg thiab ua lub siab loj nyob tos kuv mog, kuv yeej paub zoo lawm hais tias koj twb tau tos kuv los ntev heev lawm, tab sis vim txoj kev kawm xwb. Yog hais tias kuv ho tsis kawm ces ntshe wb lub neej yav pem suab yuav txom nyem heev, yog li ntawd kuv thiaj li lam ua tiag mus kawg xwb los mas…..NkaujNagTshia. NkaujNagTshia…...wb twb zoo nkaus li ob tug neeg tau koom taug ib txoj kev los lawm deb thiab ntev heev es twb tshuav tsis ntev pes ntsawg lawm xwb ces twb yuav txog wb lub tsev los sis yog wb lub zos lawm los mas. NkaujNagTshia…..koj sim saib kom zoo zoo meb twb pom zim zuag wb zos thiab wb lub tsev lawm tiag, wb tsuas ua siab ntev me ntsis ntxiv lawm xwb ces twb yuav txog lawm tiag tiag li os. Koj thiab kuv wb twb yuav tau los nyob ua ke mus tag ib sim los mas NkaujNagTshia…..tus neeg kuv hlub. Kuv lub cev lam ncaim koj mus lawm xwb, tab sis kuv lub siab yeej nyob nrog nraim koj tas mus li xwb.
NkaujNagTshia thiaj li tau teb hais tias: YwjSuab…..kuv thov txim ntau ntau uas kuv tau quaj es ua rau koj nyuaj siab lawm os. Kuv los kuj tsis paub xyov yog vim li cas es zaum no kuv ho lam zoo li no thiab. YwjSuab…..koj mus es tsis txhob nyuaj siab txog rau kuv mog, kuv yuav tuav wb txoj kev hlub kom ruaj thiab khov kho kom txog rau hnub uas koj tuaj coj kuv mus es wb tau los ua ib lub neej nyob ua ke kom tag rau wb sim neej. ywjSuab…..koj mus es koj xav ntsoov hais tias muaj kuv nyob ua koj lub chaw txhawb zog thiab lub chaw sov siab. YwjSuab…..koj mus ces rau siab ntso mus kawm ntawv kom tiav es wb thiaj li tau los nyob ua ke sai mog, tom qab ntawd wb tej me tub me ntxhais thiaj li tsis tau nrog wb txom nyem mus khwv tuaj rau nruab teb tuav tus ko txuas ko hlau raug tshav ntuj ziab thiab raug nag ntub os mog…..YwjSuab.
Subject: Re: YwjSuab thiab NagTshia Wed Mar 19, 2014 6:15 am
YwjSuab thiab NkaujNagTshia cia li tsis tham lus lawm, nkawv tsuas muab nkawv plaub lub qhov muag tig los sib ntsia lawm xwb thiab sib qhia txog ntawm nkawv ob lub siab thaum uas YwjSuab yuav ncaim mus lawm tiag tiag ces ua rau YwjSuab thiab NkaujNagTshia mob siab npaum li siav yuav rho. NkaujNagTshia saib ntsoov YwjSuab taug kev mus deb lawm zuj zus rov qab mus lawm tiag, NkaujNagTshia nyob saib YwjSuab mus ploj rau puag tim txoj kev nkhaus lawm, NkaujNagTshia kuj tau nyob ib me ntsi ces NkaujNagTshia thiaj mam li rov qab mus tsev lawm. Ntawm YwjSuab ces ke taug kev mus ke tig rov qab tuaj saib NkaujNagTshia txog ntua thaum uas YwjSuab ntsia tsis pom NkaujNagTshia thiab NkaujNagTshia lub zos 04 lawm ces YwjSuab mam li tso tseg es tsis tig saib rov tom qab lawm. Zaum no tau sib ncaim ua rau YwjSuab thiab NkaujNagTshia ob lub siab dai dhuav yam tsis paub xyov yog vim li cas. Lub sib hawm kuj tau dhau mus lawm ntau hnub twb txog rau lub 5 hli ntuj lawm tiag nyob rau xyoo 1987 twb yuav txog rau hnub uas YwjSuab thiab NkaujNagTshia teem tseg lawm. Lub thoj nam zos VibNai nyob tau ywj fab ywj fwj uas yog yuav raug rau ib tsoom nom tswv muab kaw tseg tsis pub cov pej xeem hmoob tawm rog nyob mus ntxiv lawm. Ib tsoom niam txiv thiaj li hais rau lawv cov tub ntxhais kom npaj es yuav mus lawm txawv teb chaws. YwjSuab thiaj li tau sau ib tsab ntawv muab rau YwjSuab tus phooj ywg 8tos8nco coj los rau NkaujNagTshia.
8tos8nco coj los txog ces muab cev rau NkaujNagTshia thiab hais tias: NkaujNagTshia…..YwjSuab tau muab tsab ntawv no rau kuv nqa los rau koj no, YwjSuab twb yuav nrog kuv los ntsib koj no tab sis YwjSuab txiv ho tso YwjSuab ib tug kwv tuaj caum YwjSuab kom YwjSuab cia li rov qab mus ntsib YwjSuab niam thiab txiv no ces YwjSuab ua tsis tau tes es YwjSuab thiaj li tsis tau nrog kuv los saib koj lawm.
Subject: Re: YwjSuab thiab NagTshia Thu Mar 20, 2014 6:09 am
YwjSuab tsab ntawv sau hais tias: Nyob zoo os NkaujNagTshia…..tus neeg uas kuv hlub thiab nco nyob nraim rau hauv kuv nruab siab tsis muaj hnub ploj. Kuv sau tsab ntawv no rau npawg 8tos8nco nqa los rau koj, kuv yeej paub zoo lawm hais tias koj yuav tos tos kuv heev, tab sis kuv thov txim ntau nawb mog NkaujNagTshia….tus me neeg uas kuv hlub. Kuv tuaj tsis tau ntsib koj yeeb vim kuv txiv yuav ntsib kom tau kuv xwb xwb li no ces kuv mus saib kuv niam thiab kuv txiv lawv rau pem Vaj Loog Tsua lawm. Thaum kuv mus ntsib kuv niam kuv txiv tag lawm no kuv yuav rov qab los nrhiav koj nawb. NkaujNagTshia…..tus neeg uas kuv hlub, kuv twb tau nrog npawg 8tos8nco tham me ntsis lawm, zoo nkaus li npawg 8tos8nco tsis xav khiav mus txawv teb chaws li vim xyoo no twb yog xyoo kawg ntawm kev kawm ntawv lawm. Yog li no koj nyob rau ntawm lub zos VibNais tos kuv nawb…..NkaujNagTshia, koj ua siab ntev tos kom tau kuv nawb es kuv yuav rov los nrhiav kom tau koj xwb thiaj li tag. Nyob rau hauv kuv lub neej tiag no yog hais tias tsis muaj NkaujNagTshia ces yeej zoo yam nkaus li tsis muaj YwjSuab thiab. Kuv thov poj koob yawm ntxwv thiab huab tais ntuj nrog pov hwm koj thiab kuv txoj kuv hlub kom nyob ruaj khov thiab wb tau rov qab los sib ntsib sai sai tom ntej no nawb mog. NkaujNagTshia…...tus me neeg uas kuv hlub, kuv ncaim koj mus li no lawm nawb mog es mam li ntsib koj dua tsis ntev tom ntej no mog.
Sau npe…..YwjSuab tus neeg uas hlub thiab nco NkaujNagTshia txhua lub sib hawm.
Home 
Calendar
