YwjSuab…..cas es kuv yuav hlub koj ua luaj! Nyob rau ntawm kuv ces nyob rau xyoo 1987, thaum lub 5 hli xiab uas 8tos8nco nqa koj tsab ntawv los txog rau kuv xwb ces kuv niam thiab kuv txiv hais tias, ntshe peb yuav tau mus nyob txawv teb chaws yeeb vim lub yeej thoj nam zos VibNais ua ywj fab ywj feej lawm thiab tsis tas li ntawd los cov neeg tuaj mus txawv teb chaw lawm coob es hauv zos VibNais ces tsuas muaj nphob lawm tau zuj zus tuaj xwb. Ntawm peb cov kwv tij los kuj coob coob li thiab es yog peb yuav tos kom sawv daws xam tau phaj mam li mus ua ke ces ntshe yuav tsis yooj yim li. Kuv txiv thiab kuv niam thiaj li hais kom peb kav tsij npaj mus sau tso npe xam phaj tuaj ua ntej es mam li tuaj mus nyob sib rau tom PhabNab. YwjSuab…..thaum peb tawm npe tuaj lawm es ho tuaj txog rau tom PhabNab lawm ces ua rau kuv mob mob twb yuav luag tuag ob peb zaug. Tab sis, nyob rau hauv kuv pluaj siab mas yog tsis tau rov pom koj ces kuv yuav tsis zoo lub siab tuag ib zaug li no es thiaj li ua rau kuv txoj siav rov qab ciaj tuaj lawm xwb. YwjSuab…..koj tsis paub hais tias, txij li thaum koj tau ncaim kuv mus lawm ces ua rau kuv lub siab nyob tau txias to zoo ib yam li lub ntiaj teb no tsis tau txais tus duab tshav ci li lawm. Tuaj ze zuj zus rau sab PhabNab lawm ces lub siab vam thiab cia siab hais tias, yuav tau rov pom koj dua ces kuj zoo nkaus li saib mus rau saum lub ntuj los kuj pom cov huab dub kaj lawm zuj zus tuaj thiab hnov lub siab rov pib sov zoo nkaus li ib tug heev nyuj uas tsis muaj ib lub zog li lawm los haj tseem cheem txoj sia es muab lub zog kawg siv ua zaum kawg seb puas tau tuaj pom koj dua ib zaug ntxiv xwb os…..YwjSuab.
NkaujNagTshia thiaj li hais ntxiv hais tias: YwjSuab.....thaum tuaj txog rau lub zos PhabNab yog lub 6 hli ntuj xyoo 1988, thaum tuaj txog rau tom PhabNab lawm los kuv kuj nrhiav tsis pom koj li thiab. Kuv thiaj nyob tau zoo nkaus li lub ntiaj teb no tsis muaj paj hmab paj ntoos nyob rau qhov twg li lawm es kuv tsis pom qab yuav ua lub neej nyob mus ntxiv lawm thiab kuv los ua lub neej nyob tau tsaus ntuj ntiv zoo yam nkaus li lub ntiaj teb no tsis muaj lub hnub thiab lub hli li lawm. Peb tuaj nyob rau tom PhabNab tau tsis ntev ces peb ho tshwm npe tawm tuaj txawv teb chaw rau lub 1 hli ntuj xyoo 1989 lawm. YwjSuab…..kuv tau nco koj heev tsis pom qab yuav piav qhia tau rau leej twg paub. Peb tuaj nyob rau California tau li 2 lub xyoos los kuv txoj kev nco koj thiab xav pom koj ua rau kuv dej siab dej ntsws qhuav tag. Kuv lam ciaj txoj sia nyob xwb los tus neeg nyob zoo yam nkaus li tsis muaj ntsuj plig puab cev, kuv lub siab mob thiab yuav tuag lawm tiag tiag zoo nkaus li ib tug neeg mus poob phem rau teb chaws suab puam uas tsis tau dej haus, tsis tau mov noj, tsis muaj tus duab ntxoov ntxoo los roos tus duab hnub, zoo nkaus li kuv txoj siav yuav tu lawm tiag tiag li ho, lub cev ua luj luag nyob rau saum lub roob suab zeb es yuav tsum nrhiav kom tau txoj hauv kev tawm ntawd qhov chaw ntawd mus kom sai li sai tau. Yog hais tias, tseem nyob rau ntawm thaj chaw ntawd ntev me ntsis ntxiv thiab ces yeej kawg tuag lawm xwb ces yog li ntawd kuv thiaj li tau txiav txim siab mus yuav txiv lawm thiab tiag…..YwjSuab.
NkaujNagTshia…..es koj mus ua koj lub neej nyob zoo li cas lawm xwb. Puas nyob tau kaj siab thiab? Koj mus ua hmoob xeem neej tsi nyab lawm? Koj ho muaj pes tsawg tus me tub thiab pes tsawg tus me ntxhais? Hos nyob li ntawm kuv ces kuv mus ciaj tag hmoob nraj nraum xeem xyooj vauv lawm thiab kuv muaj 2 tug tub 2 tug ntxhais, tam sim no ces lawv twb loj tag lawm thiab. Kuv lub neej nyob tsis muaj koj ces txhais tsis tau hais tias yuav phem phem los sis yuav zoo zoo no. Kuv lub neej kuj nyob tau xws li lub teb lub chaw thiab txog ntua rau plaub tsib lub xyoo dhau los no, kuv tus poj niam rov mus raws cuag rau nws txoj kev npau suav lawm ces nws kuj tau tso kuv cia lawm thiab. NkaujNagTshia…..lam ua txij ua nkawm nyob xwb es nyias muaj nyias ib tug hlub zais tseg rau nruab siab ces lam ua lub neej nyob li puav dai taw. Lub neej zoo li ntawd ces yeej nyob yuav tsis kawg nto ntsis ces ua rau kuv chim siab heev. Tab sis, ntawm kuv los kuj hlub nws heev li thiab yog hais tias nws rov qab raws cuag nws txoj kev npau suav lawm ces cia nws mus. Ob peb xyoos dhau los no kuv thiaj li tau rov qab mus xyuas tej qub chaw nyob rau yav ntuj qub qab li thaum ub lub sib hawm ua kuv tuaj cuag koj es seb puas muaj txoj hmoo zoo ib yam li tej yeeb yaj kiab uas peb sawv daws tau pom, cov hluas nkauj hluas nraug thaum ub rov qab los xyuas nkawv qhov chaw uas nkawv tau muaj nkawv txoj kev hlub faus cia tseg es seb wb puas yuav tau rov qab los sib ntsib dua. Tab sis, kuv mus nyob tau li ob peb hnub los tsis pom koj li, tsuas pom lub yeej thoj nam zos VibNais nyob nphob xuav tseg ciaj tag lawm mab daum tej niag hav teb lawm xwb. Kuv tau tu siab heev uas tsis tau rov ntsib koj ces kuv thiaj li tau rov qab los lawm tus me tu siab nrho, kuv xav hais tias ntshe yuav tag tiam no wb yuav tsis tau rov qab sib ntsib dua ntxiv li lawm no…..NkaujNagTshia.
NkaujNagTshia…..thaum kuv rov qab los txog rau teb chaws amelika no lawv ces ua rau kuv kho siab heev, kuv lub neej thaum hluas los kuv twb muab ua poob, kuv lub neej ib nrab los kuv kuj tau plam tag lawm thiab, kuv lub neej yav laus no xyov yuav xaus mus zoo li cas es thiaj li yuav tag. Kuv lub neej ces nyob tau tsaus ntuj nti lawm xwb es kuv thiaj li xav hais tias, cia kuv tuaj mus ncig rau tej qho chaw kom uas tsis txob muaj ib tug neeg twg paub kuv li ces tom qab ntawd kuv mam rov qab ua tib zoo xav seb kuv lub neej no yuav ua li cas mus ntxiv rau yav tom ntej es kuv lub neej thiaj li yuav paub xaus. Yog li no kuv thiaj li tau tuaj rau ntawm HmongHeaven thab chaw ntawm no xwb tiag….NkaujNagTshia. Tag kis no, kuv thiaj li tau tuaj ncig ua si rau ntawm HmongHeaven ntug dej Hmoob Dab Neeg no ces kuv pom lub ntuj hu si, dej hiav txwv laim txias, kuv ob lub qhov muag saib dej hiav txwv ntas, hos ntawm kuv lub hlwb ces xyov nws nyob rau nws qhov twg li lawm es kuv thiaj li tsis nco qab pom koj, tos kuv hnov xwb ces twb tau phoom koj lawm os….NkaujNagTshia. Thaum uas kuv phoom kiag koj ntawd lawm ces kuv thiaj li tsa qhov muag saib no koj twb yuav ntog es kuv thiaj li vuag khawm nkaus koj lub duav kom koj tsis txhob ntog xwb. Kuv los kuj yeej tsis nco qab pom koj lub ntsej muag tseeb li thiab, tos kuv nco xwb ces koj sawm siv thawb kuv ntog kiag rau hauv hav dej lawm es ua rau kuv nco tau zoo nkaus li thaum ub koj tau thawb kuv ntag. Kuv thiaj li tau xav hais tias, cas yuav txawv ua luaj li es nws puas yuav yog koj no? Ntshe yuav tsis yog koj pob, tsuas yog ntshe tus neeg ntawd nws tau ceeb thiab ntshai kuv heev lawm ces nws thiaj li tau thawb kuv xwb no. Kuv xav zoj hais tias, cia kuv hais thov txim rau nws seb nws puas yuav pab tsa kuv. Tab sis, thaum kuv hais thov txim tag rau nws na has kuv haj tseem hnov nws lub suab cem kuv uas yog lub suab hmoob thiab zoo nkaus li nws tau npau taws heev. Kuv tseem nco tau koj lub suab zoo ces kuv thiaj li paub koj lub suab lus. Kuv thiaj li tau xav hais tias, yeej yuav tsum yog koj li lawm xwb no na....NkaujNagTshia. Ces kuv thiaj li tau hu koj xwb, thaum uas koj tig hlo los ces kuv xav hais tias ntshe koj yuav ua lub ntsej muag luag ntxhi los rub kuv tes no, cas es thaum koj pom kuv tag no ciav koj cia li nres sawv ntsug tsis ntsais muag li lawm. Kuv thiaj li tau xav hais tias tsis yog kuv laus phem heev lawm es koj pom kuv koj thiaj li tau yoob tag li ntawd. Kuv txawm yuav hu koj npe pes tsawg thiab hais lus rau koj npau twg los koj yeej tsis hnov thiab tsis teb kuv ib lo rov qab li. Thaum ntawd koj ua rau kuv tau ntshai heev li ces kuv thiaj li sawv los muab koj diaj thiab hu koj heev, koj thiaj li rov qab teb kuv ntawd no lawm xwb tiag…..NkaujNagTshia.
Home 
Calendar
