NTSUJ PLIG tsis zoo li NEEG NTIAJ TEB

Subject: NTSUJ PLIG tsis zoo li NEEG NTIAJ TEB Sun Aug 01, 2010 3:08 pm

"Thov caw koj los nyeem zaj dab neeg no, yog koj nyeem tag xav tias
yuav pab tau koj txoj kev sib hlub mus ib ncuas ntxiv"

Zaj dab neeg no muaj npe tias

NTSUJ PLIG tsis yog NEEG NTIAJ TEB

Nuj Toog thiab NTxawm nkawd yog ib khub niam txiv uas sib hlub heev thiab Nuj Toog los kuj txawj qeej heev li. Muaj ib hmos nkawd pw Nuj Toog txawm npau suav tias cas muaj 2 tug hluas tuaj thov Nuj Toog mus tshuab qeej, thaum kaj ntug sawv los txog Nuj Toog thiab muab tham rau Ntxawm. Qhov tiag thaum Ntxawm hnov li no Ntxawm tub poob siab lawm tab sis Ntxawm txawm hais rau Nuj Toog tias "Nuj Toog.... noj tsau npau suav ntau xwb tsis muaj dab tsi os" Nuj Toog los txawm cia li lawm thiab.

Ib pliag tav caij noj tshais ua cas txawm hnov ib lub suab hu nrau qhov rooj tuaj tias "Ntawm no puas yog Nuj Toog tsev ne" ua rau Ntxawm poob siab nthav Ntxawm teb ntua tias " tsis yog os" tab sis Nuj Toog hais Ntxawm tias "Ab.... Ntxawm, txhob hais li koj mas qhib qhov rooj seb yog leej twg." Ntxawm ua tsis tau li cas Ntxawm thiaj mus qhib tau qhov rooj yog 2 tug tub hluas xwb, Ntxawm thiaj hu tias "neb tuaj muaj hauj lwm dab tsi los tsev ma" nkawd txawm nkag los tsev thiab teb tias "Wb tuaj no yog txiv huab tais qaum ntuj niam tuag nws kom wb tuaj thov Nuj Toog mus pab tsghuab qeej."

Thaum ntawd ua rau Ntxawm haj yam poob siab loj Ntxawm teb ntua tias "tsis tau pob rau qhov Nuj Toog tsis khoom," tab sis Nuj Toog teb tias "Ntxawm txhob hais li koj ma nkawd twb tuaj txog lawm cia kuv mus pab" thaum kawg Ntxawm ua tsis tau li cas thiaj tau tso Nuj Toog kev raws li nws hais. Nuj Toog txawm hais rau ob tug hluas ntawd tias "Cia neb ua ntej mus ib pliag kuv mam tuaj" ces nkawd txawm mus lawm. Nuj Toog thiaj hais rau Ntxawm tias "Ntxawm...., koj saib kuv zoo zoo txhob mub dab tsi los hla kuv, kuv mus 3 hnub xwb kuv rov los lawm mog." Ntxawm.... ua kua muag teev yees thiab teb tias "Nuj Toog... Mus tsuag los nawb mog" ces Nuj Toog txawm hnav khaub ncaws zoj zeeg tau muab rab qeej los tso ntawm hauv siab thiab pw kiag ntawm tus ncej tas. Ntxawm txawm hnov Nuj Toog lub suab qeej nrov li tawg 2-3 ncig qeej ntawd tag ces nrov nce tus ncej tas dua saum ru tsev mus lawm.

Ntxawm zov tau ib hnub tsaus ntuj cov kwv tij mus ua liaj ua teb los txog, cov kwv tij tuaj txog lawv hais tias Nuj Toog twb tuag lawm tseem yuav hais tias yuav rov los tau li cas no? Ntxawm teb tias "Nuj Toog yeej hais tias kom zov nws zoo zoo nws mus 3 hnub xwb nws los" cov kwv tij tsis kam lawv tias tuag tsis tuag twb tuag lawm cia li muab faus xwb. Thaum kawg Ntxawmm ib leeg cam tsis yeej lawv thiaj tau muab Nuj Toog lub cev mus faus lawm, tau 3 hnub tom qab Ntxawm nyob hauv tsev ua cas hnov Nuj Toog lub suab qeej nrov ploj loog rov los ib plig nrov los ze zuj zus txawm hnov lub suab qeej nrov kiag los rau ntawm tag li los tawg 2-3 ncig qeej tas ces cia li nrov ploj zuj zus rov lawm. Thaum ntawd Ntxawm lub siab tsis kaj xav tias Nuj Toog yeej rov los tiag tab sis vim nws lub cev twb muab faus lawm ntshe nws thiaj rov qab lawm xwb.

Kaj ntug hnub tom qab Ntxawmthiaj mus nug saub, saub thiaj hais rau Ntxawm tias "Ntxawm yog koj nco Nuj Toog ces ntim su thiab taug txoj kev nce toj ntawm koj qaum tsev mus yeej ntsib Nuj Toog xwb." Ntxawm nug ntxiv tias "Saub yuav ua cas kuv thiaj paub tias yog Nuj Toog no?" Saub teb tias koj mus nyob ntawm kev tsuam tos lawv yuav tuaj mus nqaum paj nqaum nruas cov ua ntej koj txhob kov nawb koj tos tus uas caij tus txiv nees yuag yuag lo lo quav lawv qab kawg nkaus ces yog Nuj Toog los mas."

(Part I)

Subject: Re: NTSUJ PLIG tsis zoo li NEEG NTIAJ TEB Mon Aug 02, 2010 6:28 pm

Coninue from Part I:

NTSUJ PLIG tsis yog NEEG NTIAJ TEB

Kaj ntug hnub tom qab Ntxawm thiaj tua qaib ntim su nce plas tom ntawm qaum tsev mus txog puag saum lub laj roob (Tab sis qhov tseeb tiag yawm saub twb tuam ntaiv rau Ntxawm nce mus rau qaum ntuj lawm) thaum Ntxawm mus txog saum 4 txoj kev khaub lig Ntxawm tsis paub mus qhov twg lawm nws thiaj mus sawv ntawm qaum kev tos. Ua cas ib pliag ntshi txawm hnov tswb nees nrov leev tuaj mus. Ntxawm saib no ua cas ua zam sees tuaj lawm xwb Ntxawm kuj tsis hais dab tsi. Ntxawm rov nyob zoj ib pliag ntxiv hnov tswb nees nrov ziag tuaj dua ib pab, Ntxawm thiaj nug tias " Leej yawm dab nej tuaj mus dab tsi na" lawv txawm teb tias "Peb tuaj mus nqaum paj nqaum nruas xwb os" ces cia li dhau lawm. Ib pliag ntxiv tuaj loo ib pab Ntxawm thiaj nug tias "Leej yawm dab nej tuaj es nej puas paub Nuj Toog puas tuaj" lawv teb tias Nuj Toog tseem nyuam qhuav sawv xwb os.

Ntxawm rov nyob tos dua ib ntsis ntxiv txawm tuaj loo ib pab Ntxawm thiaj rov nug tias "Leej yawm dab nej tuaj es Nuj Toog puas tau tuaj na" lawv teb tias "Nuj Toog tseem tab tom noj tshai xwb os" Ntxawm kuj cia li lawm thiab. Ntxawm nyob tos tuaj dhau 2-3 pab lawm muaj ib pab tuaj lawv qab Ntxawm thiaj nug tias "Leej yawm dab nej es Nuj Toog puas tau tuaj?" lawv teb tias "Nuj Toog lawv qab tod os" Ntxawm npaj tos ua cas lawv dhau ntsiag tas hnov ib lub niag tswb nees nrov tsis muaj sab li tuaj Ntxawm thiaj saib na cas pom Nuj Toog caij ib tug me nyuam nees me me lo lo quav xwb tiag. Thaum tuaj ncaj zog Ntxawm nws thiaj tib plhaw khawm nkaus Nuj Toog caj dab tsis tso li, Nuj Toog cem tawg ntho tias "Koj yog leej twg ua cas koj lam tav kuv kev no?" Ntxawm quaj las thiab teb ntua tias "Nuj Toog twb yog kuv xwb mas koj tuaj lawm ntev ua luaj kuv nco koj ua luaj kuv thiaj lawv qab tuaj nrhiav koj ntag."

Thaum ntawd Nuj Toog mam tig hlo los saib ua cas yog nws me Ntxawm ntiaj teb tiag, Nuj Toog thiab Ntxawm nkawd thiaj quaj sib qawg quaj sib nwg txaus. Nuj Toog hais rau Ntxawm tias "Ntxawm koj yuav tuaj ua tus dab tsi luag txuj ci hlob hlob li os" Ntxawm teb tias "Nuj Toog zaum no koj ciaj kuv nrog koj ciaj koj tuag kuv nrog koj tuag xwb." Nuj Toog thiaj coj Ntxawm nkawd mus nqaum paj nqaum nruas ib hnub tsaus ntuj txog caij rov los tsev, Nuj Toog thiaj hais rau Ntxawm tias "Ntxawm....wb mus yog Ntxawm qaum ntug nug no koj txhob tias koj yog kuv poj niam no nawb koj yuav tsum hais tias koj yog kuv me muam Ntxawm xwb no mog" Ntxawm teb Nuj Toog tias "Ua li mas Nuj Toog" ces Ntxawm thiab Nuj Toog nkawd txawm caij nees ntws los tsev lawm.

Thaum los tshwm plaws Ntxawm qaum ntuj pom dheev, Ntxawm qaum ntuj thiaj hais tias "Aub... hnub no Nuj Toog mus ib hnib es mus coj tau Nuj Toog niag sev rog los lawm os" Nuj Toog tsis tau teb tab sis Ntxawm ntiaj teb thiaj teb ntua tias "Ab....tis nyab mas, cas yuav hais li os kuv yog Nuj Toog me muam Ntxawm xwb hos, twb yog kuv nco nco Nuj Toog neb es kuv thiaj tuaj xyuas neb xwb mas tis nyab." Thaum ntawd Ntxawm qaum ntuj thiaj teb tias "Oh....Muam Ntxawm yog koj xwb los kuv hais li ntshe koj txaj muag lawm pob, txhob xav li cas os los tsev...los tsev" ces Ntxawm thiab Nuj Toog nkawd cia li nkag mus hauv tsev.

Thaum mus txog Ntxawm qaum ntuj kuj ua hmo zoj zeeg rau lawv noj tas rhaub dej rau lawv ntxuav tes ntxuav taws tag ces mus kho chaw rau lawv pw. Thaum Ntxawm qaum ntuj tseem mus kho chaw lawm Nuj Toog thiaj hais rau Ntxawm ntiaj teb tias "Ntxawm.... ib ntsis yog Ntxawm qaum ntuj yuav kom koj mus pw lwm qhov no koj hais tias "Koj twb nco nco koj me tis nyab wb es cia koj nrog wb pw no koj thiaj tau nrog kuv pw nawb" Ntxawm teb tias "Ua li mas Nuj Toog". Ib pliag Ntxawm qaum ntuj mus kho tau chaw los txog txawm los hais rau Ntxawm ntiaj teb tias "Muam Ntxawm lig lawm peb mus pw os" Ntxawm ntiaj teb nug tias "Tis nyab kuv yuav pw qhov twg na?" Ntxawm qaum ntuj teb tias "Muam Ntxawm koj pw chav tod hos Nuj Toog wb pw chav no os." Ntxawm ntiaj teb thiaj teb ntua tias "Ab....tis nyab kuv twb nco nco Nuj Toog neb es cia kuv nrog neb pw xwb mas yuam.? Nuj Toog los kuj hais ntxiv tias "Ntxawm.... muam Ntxawm nyuam qhuavtuaj nws xav nrog wb pw los cia nws pw mas," Ntxawm qaum ntuj xav zoj ib pliag thiaj teb tias "Ua li los tau mas muam Ntxawm" ces lawv txawm cia li mus pw lawm.

Thaum tsis tau tsaug zog Ntxawm ntiaj teb saib kuj yog vaj yog tsev zoo zoo ntsa iab hos tej txaj chaw los kuj zoo zoo xwb yus twb tsis phim yuav pw tej txaj chaw ntawd li, tab sis thaum Ntxawm ntiaj teb tsaug ib tsig zog hnov los cas rua muag saib no yog pw hauv lub qhov ntxa ti rab ti ruav xwb. Ntsia Ntuj Toog thiab Ntxawm qaum ntuj ces pob txha tsaus tsiav ci dawb vog xwb cas tshuav Ntxawm ntiaj teb thiaj tseem yog neeg xwb. Ua rau tu tu Ntxawm siab sawv quaj ib hmos kaj ntug qaib qua lag rhe cas Ntxawm ntiaj teb saib no Ntxawm qaum ntuj cov pob txha sib dho riv rawj ces sawv tsees ncho cev tho kuj yog neeg lawm thiab. Ntxawm qaum ntuj sawv mus ua tshais lawm Ntxawm ntiaj teb chim siab heev thiaj khaws nkaus tau Nuj Toog ib ya ntiv tes zais kiag hauv duav, ua cas Ntxawm qaum ntuj mus ua tshai siav tsis pom Nuj Toog sawv txiv huab tais thiaj cem Ntxawm qaum ntuj tias "Ntxawm mus tsa vauv sawv noj tshais yuav mus ua teb los mas." Ntxawm ntiaj teb saib zoj tsis tau thiaj pov rhees yav pob txha ntiv tes rau Nuj Toog lub cev, cas Nuj Toog pob txha sib dho zom zaws thiab sawv tsees ncho cev tho los ntxuav muag tas ces txawm noj tshais yuav mus ua teb.

(Part II)

Subject: Re: NTSUJ PLIG tsis zoo li NEEG NTIAJ TEB Mon Aug 02, 2010 8:20 pm

Ntsujplig....... tus tshaj lij cas koj yuav txawj sau dab neeg zoo mloog ua luaj na. Nte kuv ces tsua tuaj nyeem koj sau sab neeg lawm xwb pob...hehee. Koj zaj dab neeg tu tu siab li kuv twb quaj quaj lawm os...heeheee

Subject: Re: NTSUJ PLIG tsis zoo li NEEG NTIAJ TEB Tue Aug 03, 2010 1:26 am

Wow.....Ntsuj Plig thiab NkaujNyiag, cas Ntsuj Plig piav tau zaj dab neeg zoo ua luaj li os. Kuv tseem nyeem txog Ntsuj Plig koog ntawv paragraph 3 xwb ces kuv los sau lus nov lawm xwb. Zoo tiag tiag li npawg aw. Koj mas thiaj li yog ib tug neeg sim xeeb heev li os. Kuv khoom tseem yuav tuaj ua zoo nyeem koj zaj dab neeg kom to taub zoo os.

Subject: Re: NTSUJ PLIG tsis zoo li NEEG NTIAJ TEB Tue Aug 03, 2010 3:32 pm

hahaaaa...Nkauj Nyiag thiab Nujqiam

Ua tsaug neb cov lus txhawb zog, zaj dab neeg no nws ntev me ntsis kuv thiaj sau tsis tas. Cia kuv mam muab ua 2-3 zaug sau kom xaus rau peb tau nyeem os.

Muaj ib zaug kuv tau muab piav me me rau hauv Looj Ceeb Radio muaj ntau tus thov kom kuv muab foos lawv yuav hu tuaj kaw no tab sis kuv tsis kam. hahaaa

Zaj dab neeg no yog ua zoo nyeem nws muaj ntsiab lus tseem ceeb thiab mas, muaj caij no rov tuaj nyeem dua nawb.

» Tsis muaj neeg tuaj nrog kuv nyob ces kuv tsis xav nyob li os lawv
» cov phooj ywg ntiaj teb yeej tsis tau kawg
» Rau tus neeg tsis tau paub tiag
» YOG TSIS PAUB NO TSIS NCO
» *Hu Hmoob Plig*