NTSUJ PLIG tsis zoo li NEEG NTIAJ TEB

Subject: NTSUJ PLIG tsis zoo li NEEG NTIAJ TEB Sun Aug 01, 2010 3:08 pm

First topic message reminder :

"Thov caw koj los nyeem zaj dab neeg no, yog koj nyeem tag xav tias
yuav pab tau koj txoj kev sib hlub mus ib ncuas ntxiv"

Zaj dab neeg no muaj npe tias

NTSUJ PLIG tsis yog NEEG NTIAJ TEB

Nuj Toog thiab NTxawm nkawd yog ib khub niam txiv uas sib hlub heev thiab Nuj Toog los kuj txawj qeej heev li. Muaj ib hmos nkawd pw Nuj Toog txawm npau suav tias cas muaj 2 tug hluas tuaj thov Nuj Toog mus tshuab qeej, thaum kaj ntug sawv los txog Nuj Toog thiab muab tham rau Ntxawm. Qhov tiag thaum Ntxawm hnov li no Ntxawm tub poob siab lawm tab sis Ntxawm txawm hais rau Nuj Toog tias "Nuj Toog.... noj tsau npau suav ntau xwb tsis muaj dab tsi os" Nuj Toog los txawm cia li lawm thiab.

Ib pliag tav caij noj tshais ua cas txawm hnov ib lub suab hu nrau qhov rooj tuaj tias "Ntawm no puas yog Nuj Toog tsev ne" ua rau Ntxawm poob siab nthav Ntxawm teb ntua tias " tsis yog os" tab sis Nuj Toog hais Ntxawm tias "Ab.... Ntxawm, txhob hais li koj mas qhib qhov rooj seb yog leej twg." Ntxawm ua tsis tau li cas Ntxawm thiaj mus qhib tau qhov rooj yog 2 tug tub hluas xwb, Ntxawm thiaj hu tias "neb tuaj muaj hauj lwm dab tsi los tsev ma" nkawd txawm nkag los tsev thiab teb tias "Wb tuaj no yog txiv huab tais qaum ntuj niam tuag nws kom wb tuaj thov Nuj Toog mus pab tsghuab qeej."

Thaum ntawd ua rau Ntxawm haj yam poob siab loj Ntxawm teb ntua tias "tsis tau pob rau qhov Nuj Toog tsis khoom," tab sis Nuj Toog teb tias "Ntxawm txhob hais li koj ma nkawd twb tuaj txog lawm cia kuv mus pab" thaum kawg Ntxawm ua tsis tau li cas thiaj tau tso Nuj Toog kev raws li nws hais. Nuj Toog txawm hais rau ob tug hluas ntawd tias "Cia neb ua ntej mus ib pliag kuv mam tuaj" ces nkawd txawm mus lawm. Nuj Toog thiaj hais rau Ntxawm tias "Ntxawm...., koj saib kuv zoo zoo txhob mub dab tsi los hla kuv, kuv mus 3 hnub xwb kuv rov los lawm mog." Ntxawm.... ua kua muag teev yees thiab teb tias "Nuj Toog... Mus tsuag los nawb mog" ces Nuj Toog txawm hnav khaub ncaws zoj zeeg tau muab rab qeej los tso ntawm hauv siab thiab pw kiag ntawm tus ncej tas. Ntxawm txawm hnov Nuj Toog lub suab qeej nrov li tawg 2-3 ncig qeej ntawd tag ces nrov nce tus ncej tas dua saum ru tsev mus lawm.

Ntxawm zov tau ib hnub tsaus ntuj cov kwv tij mus ua liaj ua teb los txog, cov kwv tij tuaj txog lawv hais tias Nuj Toog twb tuag lawm tseem yuav hais tias yuav rov los tau li cas no? Ntxawm teb tias "Nuj Toog yeej hais tias kom zov nws zoo zoo nws mus 3 hnub xwb nws los" cov kwv tij tsis kam lawv tias tuag tsis tuag twb tuag lawm cia li muab faus xwb. Thaum kawg Ntxawmm ib leeg cam tsis yeej lawv thiaj tau muab Nuj Toog lub cev mus faus lawm, tau 3 hnub tom qab Ntxawm nyob hauv tsev ua cas hnov Nuj Toog lub suab qeej nrov ploj loog rov los ib plig nrov los ze zuj zus txawm hnov lub suab qeej nrov kiag los rau ntawm tag li los tawg 2-3 ncig qeej tas ces cia li nrov ploj zuj zus rov lawm. Thaum ntawd Ntxawm lub siab tsis kaj xav tias Nuj Toog yeej rov los tiag tab sis vim nws lub cev twb muab faus lawm ntshe nws thiaj rov qab lawm xwb.

Kaj ntug hnub tom qab Ntxawmthiaj mus nug saub, saub thiaj hais rau Ntxawm tias "Ntxawm yog koj nco Nuj Toog ces ntim su thiab taug txoj kev nce toj ntawm koj qaum tsev mus yeej ntsib Nuj Toog xwb." Ntxawm nug ntxiv tias "Saub yuav ua cas kuv thiaj paub tias yog Nuj Toog no?" Saub teb tias koj mus nyob ntawm kev tsuam tos lawv yuav tuaj mus nqaum paj nqaum nruas cov ua ntej koj txhob kov nawb koj tos tus uas caij tus txiv nees yuag yuag lo lo quav lawv qab kawg nkaus ces yog Nuj Toog los mas."

(Part I)

Subject: Re: NTSUJ PLIG tsis zoo li NEEG NTIAJ TEB Tue Aug 03, 2010 4:31 pm

Continue (Part II)

NTSUJ PLIG tsis yog NEEG NTIAJ TEB

Tom qab noj tshais tas Ntxawm qaum ntuj thiab Nuj Toog lawv yuav mus ua teb, Nuj Toog thiaj tau hais rau Ntxawm ntiaj teb tias "Ntxawm... koj nyob zov tsev thiab ua su ib tsam tav caij noj sus no koj xa su tuaj rau peb noj, Nuj Toog hais ntxiv tias Ntxawm tab sis koj tuaj no koj coj me nyuam dev liab muag tuaj nawb." Ntxawm txawm teb Nuj Toog tias "Ua li mas Ntuj Toog" ces Nuj Toog thiab Ntxawm qaum ntuj lawv txawm mus ua teb lawm. Ntxawm nyob hauv tsev ua tau su tav caij noj sus lawm Ntxawm thiaj coj me nyuam dev liab muag thiab xa su mus rau Nuj Toog lawv noj, Ntxawm mus txog Nuj Toog thiab Ntxawm qaum ntuj lawv kuj coj zog tuaj ua teb coob kawg. Ntxawm thiaj mus rau tau mov thiab hu Nuj Toog lawv los noj mov tas ces Ntxawm txawm coj me nyuam aub liab muag rov los tsev lawm, ib tsam yuav tsaus ntuj Nuj Toog thiab Ntxawm qaum ntuj lawv kuj tham ntsuag qees tim ncauj ke rov los tsev.

Hmo ntawd lawv los txog kuj los npaj hmo noj tsuag tsuag tas ces rhaub dej los ntxuav taw lawv txawm cia li rov mus pw ib yam qub. Thaum tsis tau tsaug zog saib mas vaj tse kuj zoo txaj chaw los zoo ci ntsa iab tab sis thaum Ntxawm ntiaj teb tsaug ib tsig zog hnov los rov saib no cas pw hauv lub qhov ntxa tib rab ti ruav xwb. Ntsia Nuj Toog thiaj Ntxawm qaum ntuj ces pob txha tsaus tsiav ci dawb vog xwb ua rau Ntxawm ntiaj teb tu tu siab quaj ib hmos kaj ntug, thaum qaib qua zom zaws Ntxawm ntiaj teb saib cas Ntxawm qaum ntuj pob txha sib dho nrij nrawj ces txawm cia li sawv ncho cev tho mus ua tsha lawm. Chim Ntxawm ntiaj teb siab heev thiaj khaws nkaus tau Nuj Toog ib tug ntiv taw zais kiag hauv duav, Ntxawm nkawd mus ua tshai siav cas Nuj Toog sawv tsis taus txiv huab tais thiaj cem Ntxawm qaum ntuj tias "Ntxawm... tav no cas vauv tsis sawv na mus tsav vauv sawv los noj tshais es yuav mus ua teb los mas." Ntxawm ntiaj teb saib zoj tsis tau thiaj nqa kiag Nuj Toog yav pob txha ntiv taw mus pov rhees rau, Nuj Toog pob txha sib dho nrij rawj ces Nuj Toog sawv tsees los ntxuav muag thiab noj tshai yuav npaj mus ua teb dua. Thaum Nuj Toog yuav mus ua teb Nuj Toog rov qab hais ib yam li qub rau Ntxawm tias "Koj nyob ib ntsis koj xa su tuaj peb noj no coj me nyuam dev liab muag nrog koj tuaj nawb" Ntxawm teb tias "Ua li mas Nuj Toog" ces Nuj Toog lawv txawm mus ua teb lawm.

Ib tsam tav caij noj sus Ntxawm kuj rov npaj su xa mus rau lawv noj, Ntxawm xav tias "Ab.... cas Nuj Toog phee yuav kom cov me nyuam dev liab muag xwb ne cia hnub no kuv sim txhob coj seb" hnub ntawd Ntxawm txawm cia li tsis cov txiv dev liab muag mus. Tham Ntxawm rov mus txog qhov chaw qub uas thawj hnub Ntxawm xa su mus rau lawv noj ua cas tsis pom dab tsi li, pom hav nroj quav dev mam paj daj vog xwb hos npauj npaim mas ya tsheej tsaug rau ub rau no. Ntxawm ua kua nqaij txeej kiag rau qhov twg mas npauj npaim ya ib tsaug rau qhov ntawd xwb, Ntxawm hu npaum cas los tsis hnov Nuj Toog lawv teb li. Ntxawm thiaj dam tau ib rev nplooj pom npauj npaim tsaws ntua qhov twg Ntxawm rho nplooj npawm ua ti tw tu kaj niab ya tej tus me tog vias dua nram tej lawm, Ntxawm ntau ntau npauj npaim ntev loo tsis pom Nuj Toog qhov twg Ntxawm thiaj cia li rov los tsev lawm.

Ib tsam yuav luag tsaus ntuj ua cas hnov suab quaj suab qw tim ncauj ke los Ntxawm tawm mus saib n ua cas tus kwv los muaj tus tuav tes los muaj, Nuj Toog los txog tsev Nuj Toog thiaj cem Ntxawm tias "Ntxawm.... Cas hnub no koj xa su tuaj peb noj koj tuaj muab peb cov zog ntaus raug mob loj ceg tas li" Ntxawm teb tias "As... Nuj Toog kuv cav tsis pom nej cov zog as, kuv tuaj hu npaum cas los tsis hnov nej teb kuv ua kua zaub nchuav qhov twg mas npauj npaim ya tsheej npoj los ntsauv xwb kuv thiaj dam nplooj los ntaus npauj npaim tag ces kuv los lawm xwb, kuv pom ib tug npauj npaim dub ya ploj nram kwj ha lawm xwb." Nuj Toog thiaj teb tias "Ntxawm... kuv ces txawm yog tus ntawd ntag los mas" Nuj Toog thiaj hais rau Ntxawm tias "Ntxawm peb lub neej qaum ntuj ces zoo li no xwb mas." Ua rau Ntxawm haj yam tu siab Ntxawm quaj ib pluag tag ces lawv txawm cia li ua hmo noj thiab rov mus pw dua. Hmo ntawd los tsis txawv li 2 hmos dhau los, tag kis tom qab kaj ntug Ntxawm lawv sawv los ua tau tshais noj tag yuav rov mus ua teb dua Nuj Toog txawm hais rau Ntxawm ntiaj teb tias "Ntxawm... hnub no koj nyob zov tsev koj txhob xa su tuaj peb noj lawm mog thiab Nuj Toog hais ntxiv tias koj nyob no koj txhob qhib daim pob zeb pem hauv ncoo nawb." Ntxawm los kuj teb tias "Ua li mas Nuj Toog" Nuj Toog thiab Ntxawm qaum ntuj lawv noj tshais tas txawm cia li rov mus ua teb dua lawm. Ntxawm nyob hauv tsev tav su nrig Ntxawm txawm xav tias "Ab.... Cas Nuj Toog ho kom txhob qhib daim pob zeb pem hauv ncoo ne, cia kuv sim mus qib seb muaj dab tsi?" Ntxawm txawm mus qhib kiag daim pob zeb pem hauv ncoo na ua cas rooj ntug qhib Ntxawm ntsia pm ntiaj teb Ntxawj tej nyab tej nus ua teb txog caij noj sus los noj sus ib leeg dam ncej puab qaib pub ib leeg noj ua rau Ntxawm xav tias lub neej nyob ntiaj teb thiaj yog neeg thiab thiaj muaj kev sib hlub xwb Ntxawm quaj ib pluag ces ua rau los ib kob nag loj loj rau Nuj Toog lawv. Thaum ntawd Ntxawm txawm xav tias cia ua ib siab rov mus nrog yus nyab yus nus nyob xwb ces Ntxawm cia li tib plhaw los lawm, thaum los ib kob nag loj loj rau Nuj Toog lawv ua rau Nuj Toog poob siab nthav Nuj Toog thiaj cia li khiav los tsev. Nuj Toog los txog ua cas rooj ntug qhiv vus cia tsis pom Ntxawm lawm, hos Ntxawm los thaum nyob saum ntuj ntsia mas xav tias dhia los yuav poob ze rau nws me nyab me nus tab sis thaum dhia los txog ntiaj teb hav zoov nuj txeeg kab mos lwj kab dais ntuag thuav xwb Ntxawm mus tog twg los tsis tshwm.

Nuj Toog los txog ntua tsis pom Ntxawm lawm Nuj Toog thiaj dhia kiag lawv Ntxawm qab los rau ntiaj teb, Nuj Toog los nrhiav tau Ntxawm Nuj Toog hais Ntxawm tias "Ntxawm koj cia li nrog kuv rov qab nawb" Ntxawm teb tias kuv tsis mus lawm nej lub neej tsis zoo li peb lub neej" Nuj Toog ntxias npaum cas los Ntxawm tsis kam rov qab lawm. Thaum kawg Nuj Toog thiaj hais Ntxawm tias "Ntxawm... yog koj tsis kam rov qab lawm no thov koj txoj siv liab rau kuv" Ntxawm kuj tsis kam thiab, Nuj Toog thiaj rov hais tias "Ntxawm...ua ib sim niam txiv koj tsis kam mus los cia li thov koj lub dab tshos rau kuv coj mus saib dab muag puas tau" Ntxawm txawm xav tias lub niag dab tsho xwb yog xav yuav los muab rau Ntxawm thiaj teb tias koj xav yuav ces koj tu koj mas" Thaum Nuj Toog tu Ntxawm lub dab tshos ces twb yog Nuj Toog muab Ntxawm txoj sia tu lawm, thaum ntawd Nuj Toog thiaj li coj tau Ntxawm rov qab. Ntxawm thiab Nuj Toog nkawd thiaj ua 2 tug npauj npaim ya sib qawg sib nwg rov mus rau qaum ntuj lawm.

Thaum Nuj Toog coj tau Ntxawm ntiaj teb rov mus txog txiv huab tais thiaj cem Ntxawm qaum ntuj tias "Nev nev...kuv twb tias yeej yog vauv niag sev rog xwb kom muab rau kuv ua ntxuag cawv koj tsis kam tsam no Ntxawm ntiaj teb rov los lawm ces koj cia li ua nkawd qhev xwb lau." Ces txij ntawd los Nuj Toog thiab Ntxawm ntiaj teb nkawd thiaj rov mus ua neej sib hlub nyob kaj siab lug dua qaum ntuj lawm xwb .

THE END

Zaj dab neeg no hais los xaus li no lawm xwb, ua tsaug ntau rau koj tus uas pab nyeem. Ib qho ntxiv qhia rau koj paub tias yog pom npauj npaim txhob lam ntaus vim lawv yog ntsuj plig thiab lawv yeej muaj lawv ib lub neej ib yam li neeg ntiaj teb thiab.

Subject: Re: NTSUJ PLIG tsis zoo li NEEG NTIAJ TEB Tue Aug 03, 2010 9:00 pm

Ntsujplig,

Zoo siab koj tuaj sau tau ib zag dab neeg zoo rau peb tau kawm coj mus kho ua lub neej os. Koj ma muaj lub siab zoo thiab tswm yim zoo kawg li......muaj caij no kav tsij tuaj sau rau peb tau nyeem thiab.

Ntsujplig koj tuaj piav dab neeg hauv Looj Ceeb radio thiab lov? hummmmm.......kuv puas tau hnov koj zaj dab neeg no ne.......cia kuv rov mus nyeem koj zoo zoo ib zaug ntxiv tso mam rov tuaj teb koj tias kuv hnov lawm los tsis tau...heeheheew

Subject: Re: NTSUJ PLIG tsis zoo li NEEG NTIAJ TEB Wed Aug 04, 2010 2:56 pm

Nkauj Nyiag....

Kuv xav tias yog koj muaj caij tuaj nyeem kuv zaj dab neeg no tas koj yuav
hlub nws tshaj qhov qub ntxiv. Vim tias nyob ntiaj teb thiaj yog ib lub neej
sib hlub tiag, hos Ntsuj Plig ces tsis muaj lub cev tsuas lam
nyob ua sab ua sua xwb na.

Nkauj Nyiag...... Kuv hais ib zaug me me rau Looj Ceeb thiab mas
tab sis ntseeg tias koj yuav tsis hnov os

Subject: Re: NTSUJ PLIG tsis zoo li NEEG NTIAJ TEB Fri Aug 20, 2010 2:48 pm

Ntujplig,

Cia kuv mam li nrhiav sijhawm tuaj nyeem kom tag seb ua li cas Ntsujplig yuav mus hais tau tu siab ua luaj. Es seb Nkaujnyiag puas yuav pab tau nws nws thiaj kom nws tus ntsujplig muaj zog tuaj es nws thiaj tsis nyob ib tug ntsoos ntsoos ma yom. Ntse koj ho tuaj hais lig lig es kuv ho tsis hnov xwb...kuv yeej mloog txhua hmo thaum pib tab sis kuv tsis nyob lig lig xwb os....kuv me Ntsujplig.

Ntsuj_Plig wrote:: Nkauj Nyiag....

Kuv xav tias yog koj muaj caij tuaj nyeem kuv zaj dab neeg no tas koj yuav
hlub nws tshaj qhov qub ntxiv. Vim tias nyob ntiaj teb thiaj yog ib lub neej
sib hlub tiag, hos Ntsuj Plig ces tsis muaj lub cev tsuas lam
nyob ua sab ua sua xwb na.

Nkauj Nyiag...... Kuv hais ib zaug me me rau Looj Ceeb thiab mas
tab sis ntseeg tias koj yuav tsis hnov os

Subject: Re: NTSUJ PLIG tsis zoo li NEEG NTIAJ TEB Fri Aug 20, 2010 3:48 pm

Nkauj Nyiag

Ua tsaug koj rov tuaj txog hauv kuv chav no os
cia siab tias yuav ntsib koj dua nawb

Zoo siab ntsib koj os

» Tsis muaj neeg tuaj nrog kuv nyob ces kuv tsis xav nyob li os lawv
» cov phooj ywg ntiaj teb yeej tsis tau kawg
» Rau tus neeg tsis tau paub tiag
» YOG TSIS PAUB NO TSIS NCO
» *Hu Hmoob Plig*