zaum no ces koj tsis txhob tos lawm

Subject: zaum no ces koj tsis txhob tos lawm Thu Apr 12, 2012 9:15 am

First topic message reminder :

Txoj me kev deb ncua ntev
Yog luag ib leeg zoo sev
Ntshe nyob nrog koj los tsis zoo
Thiaj ua ib siab mus kom ntsiag moo

Zaum no ces kuv yuav ua hlo ib siab
Zaum no ces kuv mus nrog kua muag iab
Kuv txoj kev hlub tsis muaj nuj nqis
Cia mus mus kom tseg tau koj txhua hlis

Tseg cia kuv txoj kev hlub nrog koj nyob
Mam cia txoj kev kaj siab nrog koj sib txob
Kuv yuav mus tsis rov tuaj lawm mog
Kuv mam mus ua zoo ib leej niam tsev thiaj li yog

Kuv lub siab ua si mam sau zais cia
Yog ib hnub kuv rov mob mam khawb rov los cawm sia
Kuv lub siab tau tso tuaj ua si ntawm no
Kuv tso tseg yog ib hnub kuv nyob tsis muaj khub mam tig rov los nco

Mus lawm mog txoj kev kaj siab
Mus lawm tiam seb puas yuav rov pom koj dua thiab
Mus mam nqa koj nrog kuv lub siab zais
Thaum chim siab sev puas hnov koj rua ncauj nrog kuv sib hais

Subject: Re: zaum no ces koj tsis txhob tos lawm Mon Sep 01, 2014 4:22 am

sau ntau ntau-----------------------------los tsis muaj ntsiab

thov koj thiab---------------------------txhob ntaus nqi phem

cia meej pem----------------------------------li tuaj sau dua

nyob hmov tshua-------------txog kuv thiab mog,,,,NkaujHnubQub

Subject: Re: zaum no ces koj tsis txhob tos lawm Tue Sep 02, 2014 1:48 am

hlub tsis zais siab

Dabpobtawb kuv tuaj tsis pom koj
Tig xam zoj tsis pom nyob twg
Me phooj ywg koj chim lawm lov
Txhua hnub ntxov koj twb tuaj sav

Cas ntuj tshav sawv ziab toj roob
Kuv me hmoob ho tsis tshwm tuaj
Yog nws muaj hauj lwm ntau lawm
Los yog kawm ntawv tsis txawj tiav

Kuv twb khiav tuaj sau paj huam
Tuaj zaum tshuam koj txoj xub ke
Cas koj npe tsis txawj tshwm li
Mus dab tsi lawm tiag leej nus

Los yog mus nrog npau ntub nyob
Tseem nrog xob sib tawm tsam os
Kuv tseem tos koj txhua txhua hnub
Tseem yuav qhub koj lub siab dawb

Dabpobtawb neeg ntxim nyiam zoo
Tos kuv nroo tsis tawm lus hlub
Vim tsis pub koj muaj siab mob
Tsam kuv chob koj siab ntsws lwj

Yuav ua rwj muab tshuaj tsis zoo
Thiaj tau nroo tsis muaj lo tob
Vim ntshai txhob koj rau kev puas
Tsam ho muas koj nplooj ntsws tu

Thiaj tsuas hu tias me phooj ywg
Koj nyob twg kuv tuaj lawm xwb
Yog koj npwb rau kuv tej lus muag
Kev sib cuag yuav tsis muaj tau

Cia paub rau kev sib txheeb
Thiaj muaj tseeb txoj kev hlub no
Thiaj tsis nco tsis puas siab ntsws
Thiab tsis vwm ua mob tau

Koj yuav npau tias kuv txawj dag
Hais tsis tag rau txoj kev phem
Tsis xav lem tus neeg zoo siab
Tsis xav ntiab tus neeg dawb huv

Tseem xav thuv nrog koj nyob ntev
Lub vaj tsev tseem xav muaj koj
Koj txawj coj tseem yuav raws thiab
Koj nplooj siab twb tsis phem ne

Kuv tsis ntse los kuv tsis iab
Kuv lub siab nyiam tham pem heev
Kuv nyiam seev li txoj kev hlub
Kuv thiaj qhub nqee txhawb koj mog

Nws tsis yog yuav dag yuav ntxias
Tsuas qhia tias kuv hlub koj tiag
Tiam sis npliag raws kev sib paub
Tsis sib haub tiag tsis puas plawv

Vim tsis hlawv koj li nplooj po
Ntshai kev nco yuav tseg tsis taus
Vim kuv laus tshaj koj lawm ne
Tsam koj npe ho poob hwj chim

Kuv tsis tsim tus neeg li koj
kuv xav coj kom tus li yees
Kuv thiaj lees tias hlub tab sis
Yuav tsis hlub ua nkauj ua nraug

Qhia dawb paug yeej tawm hauv siab
Yeej hlub thiab los hlub tsis tau
Thiaj qhau hau nyoo ntiajteb txoj cai
Yuav tsis hai koj kom puas tsuaj

Qhia li muaj es txhob tu siab mog
Yog ntawv txog ib hnub tiam tshiab
Yuav muaj thiab wb kev sib hlub
Kuv mam pub lo lus tseeb rau koj

Yog tham zoj txog tej no lawm
Ua txij nkawm ces lub neej ntev heev
Maj mam ceev koj tus kheej ruaj
Ib hnub tuaj koj mam ntsib dua

Tus hlub tshua koj ib leeg tiag
Yuav yog kiag tus koj nyob ib sab
Koj txhais npab puag tau nws pw
Neb txoj lw thiaj yog ib txoj tseeb

Luag thiaj txeeb tsis tau nws nawb
Nws siab dawb yuav tsis ncaim koj
Vim tias koj twb kawm txuj tiav tas
Koj yuav ras cov lus muaj meej

Ua lub neej nrog luag muaj npe
Lawv thiaj de tsis tau koj lub meejmom
Luag thiaj nyog tsis tau koj kev hlub
Qhia li pub xwb mog me leej nus a

Cia txhawb nqa koj tam sim no
Kom koj nco tias lub neej tshuav ntev
Ib leej sev yuav tau xaiv ua zoo
Thiaj tsis tau nroo yav tom ntej xwb os

Tsis lam vos lam khaws luag qub
Tsam tsis hlub nws mog kuv me nus
Ntim su zus mus dawj qab roob
Yeej muaj coob tus zoo tshaj kuv

Tus xuv xuv thiaj muaj koj xwb
Kom nws hlwb puas rau koj nkaus
Thiaj nyob laus tsis khiav ntawm koj
Nws thiaj coj ncaj ncees pub koj mog

Lam nthuav txog me lus li no
Kuv lam ho sau kom puv phab
Lus tsis qab los lam nyeem os
Kev ces kos ua doj ua de

Kom puv tse rau nej tuaj cheb
Yog xav teb los yeej kam
Es lam xam txog kuv thiab nawb
Tsis paub xawb lo lus qab mib

Lo lus totsib kuv tsis muaj li
Los luag ntxhi ua qaib raub
Tawm los saub rau nej lom zem xwb mog cov phooj ywg sawv daws

Dab Pob Tawb wrote:

nkaujhnubqub wrote:: Me Dabpobtawb ntshe koj lam hais
Me leej ntxhais tsis txawj li thiab
Los hauv siab muab qhib hlo tawm
Coj los kawm tau nrog koj qhoob

Xav txais noob coj mus cog cia
Kom tuaj sia sawv muaj kuab os
Thiaj sawv tos tus txiv nraug nab
Ua muaj sab lus zoo ntxim hlub

Txawj txawj qhub los twg los zoo
Ntshe muaj hmoo thiaj ntsib koj no
Pom lus nco thiab lus hlub kaj
Hais zoo tshaj muaj peev xwm kawg

Cia li ncawg koj lawm xwb tiag
Thiaj sawv liag los caum koj kev
Ua siab ntev xav cov lus sau
Ces tau ntau yuav luag raws siab

Xaj maim tshiab no ces leej nus
Lam sau lus twb tsis cuag tau
Tsis zoo npau ces sau ua paj huam
Kom sib tshuam daj lub siab kaj

Nws zoo tshaj tsis tau ib lo tseeb
Ua teeb teeb los tseem nchuav tag
Los lus dag hais tsis yog li
Yuav luag ntxhi tias yeej muaj

Los lus ruaj yog lo lus yus ntseeg
Pos huab zeeg los tsuav koj pom kev
Txoj me kev yeej taug tau xwb
Lam mus nrwb lo ub lo no sau

Tsis txawj ntau los txhob thuam mog
Twb vim yog koj txawj tiag li
Thiaj sawv ntxhi nyob nrog koj lawm
Me muam ntxawm tsis paub lus txhij

Sau los nplij leej nus siab zoo
Vim koj nroo tau chob siab tsawv
Kuv lub plawv thiaj ntoj ntau zog
Ces kawg nrog koj pib sau lus dhos

Lo lus mos thiaj tau teb koj tiag
Yuav lawv liag koj rau txhua txoj ke
Nrog koj de me paj ntshua nplaim
Yuav tsis ncaim tsis lam nrug koj

Tos koj coj thiab koj qhia pub
Tej lus kub lus muaj tsim ntxaws
Es yuav raws koj mus kawm txuj
vim xav tsuj koj me hneev taw txawj

Thiaj sau dawj lus lawv koj qab
Thiaj li thab koj li no tiag
Ya luj liag lawv koj txoj kab
Saib koj qab ces caum xwb

Los yog npwb rau koj lo lus zoo
Thiaj sam loo me cwj mem dub
Sau kiag qhub los txhawb koj siab
Kom koj kiab tsis txhob nros

Li xwb os tus zoo Dabpobtawb
Me neeg ntxim tawb ua tsaug nawb
Tsis paub xawb lus los hais thiab
Ua ib siab ntsub kom tag ntsws

Los txhob yws kuv thiab mog
Yuav hais txog kev txawj ntse
Eb xyhov ntshe koj paub ntau dua
Lo lus tshua koj thiaj paub tas

Los kuv ras ua kev phooj ywg
Nyob txog twg xav yaum koj thiab
Sau lus ntsiab los sib koom kawm
Seb puas tawm me tswv cuaj

Thiaj li tuaj nrog koj pib lawm
Ces ho tawm tuaj peb sib teb
Lam sib yeb kom lom zem os
Kuv tseem tos koj ntawm nov

Thiaj xa xov qhia li no pub
Thiaj niaj hnub tuaj zov koj sau
Kom ntau ntau pub kuv nyeem
Vim koj yeem tau lus muaj kuab

Thiaj xav npuab koj tws tsho heev
Seb puas seev tau li koj thiab no
Hlwb puas to es thiaj li paub
Nrog koj saub laug caij nyoog xwb os me phooj ywg aw!

Teb Rau NkaujHnubQub

Hnov lub suab--------ploj loog tim toj
puas yog koj----------seev hu kuv ne
nim tuav npe-------tias dab pob tawb
nkauj siab dawb----kuv tuaj txog lawm

Koj dua dawm------los koj tseem nyob
cas twb nphob---------es tsis pom koj
kuv xam zoj---------ib muag ncig lees
pom txaij zees-------li koj tsab ntawv

Kuv thiaj tsawv---nkaus los nyeem kiag
ciav yog tiag----------koj sau rau kuv
koj txawj tshuv----tshoj kuv siab ntsws
koj yog kws---------kho kab mob siab

Yog kws tshiab-----los yeej txawj kawg
kuv siab tawg------ntais zab ntais zuav
vim qaug quav-----------rau koj tej lus
swm koj zus----------li nyiam koj lawm

Koj muaj nkawm-------txiav wb kev hlub
koj tsis pub-----------hais txoj kev nco
txwv tu nrho-----------tej lus hais hlub
tsam leej tub----------leej roog ho pom

Ces yuav txhom------yuav cem ntaus koj
kuv xav zoj------------tu siab twj ywm
cia txhob vwm----------rau koj zoo dua
ntshai yuav ua----------kom tau ib siab

Tos tiam tshiab--------tso mam hlub dua
kuv xav txhua--------xav ntau mob hlwb
ces kuv twb-------------ua ib siab lawm
hmoov tsis sawm-------roj qeeb hneev lig

Ntuj tsis tig------------ko diav rau kuv
thiaj ntsim txhuv----mob puag nruab ntsws
hau kev tws-------------kawg ua ib siab
cia koj thiab-----------kuv ua phooj ywg

Mus txog twg------------hu koj ua muam
koj txhob thuam---------tias kuv no vwm
vim yeej tshwm------------sim muaj li no
cia txhob nco-----------so kiag kua muag

Cia kuv luag------------hais lus luag nyav
kom luag xav------------tias kuv zoo siab
qhov tseem ntsiab-------kuv twb chim chim
tas tswv yim-------------tsis tau ua vauv

Ntshe yog thauv-------kuv muaj kev npam
kuv thiaj plam------------koj tus zoo sev
zoo niam tsev----------txawj hais lus mos
thiab txawj ntos-------------lo mi lus zoo

Ntxhais muaj hmoo--------ces yog koj xwb
koj lub hlwb------------nrog txoj kev xav
luag yeej cav----------thiab qhuas koj moo
tias koj zoo------------tag siab tag ntsws

Kuv tsis yws--------------koj tej lus nroo
kuv muaj hmoo------------thiaj li tau hnov
kuv mam thov------------ua koj phooj ywg
mus txog twg-----------kuv nrog koj nraim

Yuav tsis ncaim--------thaum koj nyuaj siab
qhia kuv thiab------------txhob ua siab me
kuv nyob ze--------------yuav pab lub zog
txawm hws nrog-----------los tsis khuv xim

Tsuav koj dim------------txoj kev kho siab
koj ntuj tshiab-----------hmo ntuj qaim hli
koj luag ntxhi------------xwb ces zoo lawm
tsis tau khawm------------koj rau xub ntiag

Los twb nyiag-------------tau koj tus ntsuj
ces tsim nuj---------------rau kuv no lawm
mi nkauj ntxaw--------hmoob tus me ntxhais
kav tsij hais------------nthuav koj tej txuj

Rau lub ntuj--------------tib neeg tau pom
lub meej mom-----------yeej yuav tsis poob
tus zoo hmoob----------luag yeej txawj xav
yeej tsis xyav------------txog lub koob npe

Kev txawj ntse----------yog txawj hais lus
txawj coj tus--------------zoo li koj ntag
yeej tsis dag-----------hais lus luag nyav
koj tus tav---------muaj hmoo tshaj plaws

Hmoov thiaj saws--------tau koj mus lawm
kuv thov hawm--------kom neb muaj hmoo
lub neej zoo--------muaj tub muaj ntxhais
koj txawj hais----------los nws txawj teb

Es kom neb------------lub neej thiaj zoo
yuav tsum nyoo-----------yus tus me txiv
tsis txhob siv----------txoj cai mab dawb
sib zog tawb------------hais lo lus nchav

Koj yeej xav----------thiab paub koj lawm
kuv lam tsawm------------hais lus yau yau
los txhob npau----------nawb mog neeg zoo
yog muaj hmoo------------wb tau sib ntsib

Txawm ib pib-----------cawv pob kws laus
los yeej haus-------------tsuav yog koj ua
yeej yuav tshua---------koj tej txiaj ntsig
yeej tsis yig------------txoj kev phooj ywg

Nyob qhov twg---------qab ntug hauv ntuj
muaj zoo txuj-----------kav tsij tuaj qhia
peb ib txhia-------------thiaj li tau kawm
nrhiav sij hawm----------tuaj mus sib cuag

Ua kuv luag-----------sib txhawb dej siab
li koj thiab---------------kuv tau hais los
koj txhob nros---------thov nyob luag ntxhi
yam lub hli----------------uas nyob ci iab

Ntawm kuv thiab-----------los yeej ib yam
yeej xav tham--------------nrog koj tas li
xav nyob ti-------------nyob ze ntawm koj
mloog plawv ntoj---------thiab lub siab dhia

Xav hais qhia-----------tias koj thiaj txawj
koj thiaj dawj------------tau kuv tus saus
uas nyob faus-------------rau kuv cev nqaij
thiaj xav taij-------------koj hais paj huam

Txhua kauj ruam-------------nrog koj ua ke
pom koj npe------------koj cev khaub ncaws
ces twb daws--------------tau kev kaj siab
li koj thiab----------------lawm os neeg zoo

Tsis txhob nroo---------txawm kuv tsis txawj
hlwb pob thawj-----------thiaj xav tsis tawm
hmoob ntxhais ntxawm-----koj lam nyeem mog
kuv yeej nrog----------------koj nyob ua ke

Koj lub npe--------------kuv yeej nco ntsoov
tsis txhob hloov---------siab nrhiav kev khiav
tsam kuv nrhiav-------------tsis tau koj lawm
ces yuav tsawm---------nrhiav koj txhua qhov

Kom luag hnov--------------ntiaj teb tau paub
tias koj saub--------------ntxias dag kuv nco
hais li no-----------------koj txhob poob plig
tsis txhob tig------------nrhiav txoj kev khiav

Tsis txhob txiav-----------txoj kev phooj ywg
koj nyob twg-------------kuv nyob qhov ntawd
caum koj rawv---------------soj taug koj qab
vim tias dab--------------pob tawb vwm lawm

Tsis tau khawm--------------los tsuav tau hnia
caum ncuj ncia--------------li neeg thov khawv
li vwm cawv---------------xav thab neeg ntaus
li neeg laus-----------------tsis paub leem cai

Los txhob ntshai-----------nawb mog tus muam
kuv tsis thuam---------------koj lub peev xwm
kuv ib txwm--------------tsis paub thuam neeg
thov koj ntseeg-----------nco ntsoov ib txhis....

Nawb mog NkaujHnubQub tus ntxim hlub!!!!

Subject: Re: zaum no ces koj tsis txhob tos lawm Tue Sep 02, 2014 3:13 am

Dab Pob Tawb wrote:: sau ntau ntau-----------------------------los tsis muaj ntsiab
thov koj thiab---------------------------txhob ntaus nqi phem
cia meej pem----------------------------------li tuaj sau dua
nyob hmov tshua-------------txog kuv thiab mog,,,,NkaujHnubQub

Koj sau lawm ces yeej muaj ntsiab
Lo zoo siab tsuas muaj li tseeb
Ces los teeb cia rau kuv nyeem
Kuv mam yeem tuaj teb koj mog
Txawm yuav yog ntev mam teb tau
Los txhob npau rau kuv thiab os
Rub siab tos kuv yeej teb tuaj tiag
Thiab yuav npliag kuv leej nus plawv
Koj nws sawv noj mov qab lias
Txawm yuav tias wb sib zeem
Thiab sib yeem li nus muam
Los kuv tshuam tsis tso nws mas
Kuv mam ras nug nws moo tas li
Muaj dab tsi nws siab txawj kaj
Los yeej npaj tuaj qhia pub kuv
Kuv mam thuv hais lo lus txhawb siab
Kom nws nyob kiab mog leej nus zoo aw

Subject: Re: zaum no ces koj tsis txhob tos lawm Tue Sep 02, 2014 3:45 am

paj huam

Pom koj npe------------------------- tsis pom koj tshwm
Nyob tsis tswm------------------------thiaj saub hu seev
Thiaj li teev ---------------------------me paj huam ntua
Qhia tias tshua---------------------------los tsis zoo hais

Thiaj li cais-----------------------------cov lus hlub lawm
Siab tsis nrawm----------------------maj mam rheeb lus
Ua ntu zus-------------------------------nyob tos koj tiag
Cas ib pliag------------------------------twb txog caij rov

Vim tuaj ntxov--------------------------lub caij twb dhau
Mus lawm ntau---------------------------tos tsis pom koj
Thiaj tseg zoj---------------------------------lo me lus cia
Hais tau qhia-----------------------------ias kuv twb tuaj

Tos ua luaj----------------------------------los koj tsis los
Thiaj tsis tos-----------------------------tig rov qab lawm
Kom mam tawm------------------------thiaj tsis sib ntsib
Koj mam pib-------------------------------sau koj zaj lus

Koj ho mus-----------------------------kuv mam rov tuaj
Koj twb dhau luaj---------------------kuv ho xauj dawm
Koj mus lawm--------------------------------ces zoo li no
Muab kev nco----------------------------los sau tseg xwb

Muab kev dwb-------------------------los sau khaws tseg
Peb mam veg---------------------------me hneev tes cim
Mam teb phim------------------------------ tej me zaj lus
Lam sib pus---------------------------nyob nrog huab cua

Peb kev tshua--------------------------txoj kev sib ncawg
Kom tsis tawg-----------------------thiaj muaj mus ntxiv
Peb sib piv-------------------------------tej me tswv cuaj
Peb koom luaj-------------------daim me teb heaven no

Khaws kev nco ------------------------ua lub chaw nyob
Tuaj sib txob--------------------------sib pauv lus ncauj
Tuaj sib xauj--------------------------seev kev kho siab
Kom cawm siab--------------------me me xwb ma yom

» Paub li tsis txhob tuaj
» Mam ua ib siab tsis txhob tuaj
» KUV COV PAJ HUAM
» Cas tsis pom nej tag lawm
» Yog Tsis Pom Kuv Lawm