Rau Nkauj_Dala
Ntuj nis Hmoob-----------tus me neeg zoo
Hnov koj nroo---tshwm saum qaum huab
Hnov lub suab---------nqees laws teb kuv
Lub siab puv-------------luag ntxhi tos koj
Thiaj zaum zoj-------------sau teb koj kiag
Puas muaj tiag----------qhov koj tias hlub
Tias txhua hnub------------koj yeej tuaj tos
Tias txhua hmos------------koj yeej tos kuv
Neeg dhau dhuv-----------mus los chav no
Tus koj nco---------------puas yog kuv tiag
Los lam npliag---------ntxias kom zoo siab
Thov qhia thiab-------------os tus neeg zoo
Kuv ncaim loo----------------rau ib tog ntuj
Mus kawm txuj----------lawm xwb os mog
Tseem nco txog-------------koj txhua lo lus
Kuv ncaim mus-----------yuav maj rov tuaj
Vim kuv muaj--------------ib nplooj siab nco
Nyob ntawm no------------niaj hnub tos kuv
Kuv mam thuv-----------nrhiav txoj hau kab
Soj koj qab------------------thiab taug koj lw
Yog koj pw-----------------thov tsaug zog zoo
Tsis txhob nroo---------txhob ntshai dab mog
Kuv tsis yog------------------tus dab ua phem
Kuv tsis hem--------------tsis muab ntsuj plig
Vim ntuj tig------------------tau tsis zoo nraug
Thiaj xaiv raug--------------npe dab pob tawb
Vim phem ncawb---------------li tub qav kaws
Ua pob daws----------------rau tej ntsej muag
Ntiaj teb luag----------------thiaj li tsis nyiam
Tej poj niam----------hluas nkauj tsis ntshaw
Tseem nkhaus taw-------li yawg ntxoog thiab
Chim chim siab--------------thiaj tuaj pom koj
Koj sau zoj---------------------tias koj tsis tib
Koj kam dib----------------kuv kawg thiab no
Zoo siab hlo----------nyeem cuaj kaum zaug
Ua koj tsaug--------------------rau lo lus hlub
Kheev ntuj pub----------------koj los rau kuv
Yuav tsis khuv------------ncaim ntawm koj li
Ua lub hli------------------------ci tuaj rau koj
Khwv koj noj-----------mus txog hnub kawg
Lub ntuj tawg--------hiav txwv yuav nqhuab
Kuv yuav npuab-----------tiv thaiv koj nraim
Yuav tsis ncaim---------------koj mus ib pliag
Lub xub ntiag----------------koj yog tswv kav
Sib thiab hnyav-----------------kuv ua tus ris
Mus ib txhis-------------------mus tag ib tiam
Yuav tsis liam-------------mus yuav niam yau
Yog tias tau-------------------------koj na Dala
Ntawm kuv mas---------------koj tsis tha dib
Kuv xub pib--------------dib nyiam koj lawm
Muab sij hawm------------nco kuv thiab mog
Thov nco txog-------------thaum koj mus pw
Muab tus xyw---------------tso tuaj sib ntsib
Wb mam sib--------------cuag hauv dab ntub
Kuv mam hlub----------koj kom txaus nkaus
Txawm koj laus--------------los kuv yeej hlub
Kom txog hnub----------------wb yaj li ntshis
Es wb plhis-----------------ua npauj npaim ya
Taug kwj ha-------------------ya mus haus paj
Rau puag zaj-----------------kev mus kav kiab
Ib qhov thiab---------------hais txog paj huam
Me leej muam--------------koj txawj sau kawg
Hmoob tub ntxawg--------nyeem zoo siab hlo
Thov koj tso----------------siab lug thiab nawj
Tsis txhob txhawj---------------kuv los ib yam
Kuv tsuas lam-----------------sau twb tsis zoo
Tsis txhob nroo-------------cem kuv thiab mog
Vim tias yog-------------------qav kaws tes taw
Ces yeej nkaw-----------meej kawg txuj lawm
Mam mus kawm----------xyaum sau mus ntxiv
Yog muab piv------------------rau luag lwm tus
Koj leej nus-----------------------tsis piv li mog
Thov txim yog-----------------kuv sau tau ntau
Thov txhob npau--------yog koj nkees nyeem
Maj mam peem---------nthuav saib kom xaus
Es lwm zaus--------------wb mam sib ntsib ...
dua mog!