Ntau zaus uas koj npau suav koj ntseeg li cas? Ntawm kuv tus kheej kuv ib txwm tsis ntseeg txog npau suav tias yuav yog qhov tseeb. Kuv ntseeg tias npau suav muaj 2 yam rau peb tib neeg npau suav xwb xws li: (1). Kev npau suav yog tim koj lub hlwb los yog lub raum tsis ua hauj lwm zoo. (2). Kev npau suav qee zaus yog tim koj tus ntsuj plig mus yos pom qee yam tshiab.
Tsis ntev dhau los Yim Laj tau ntaus ib tug npau suav txawv kawg cia kuv sim muab piav rau nej seb nej ho xav li cas. Yim Laj thiab Nkauj Ntxoo nkawd yog ib nkawm hluas nkauj hluas nraug tsis sib tau. Nkauj Ntxoo twb mus yuav txiv muaj ib tug me nyuam lawm tab sis Nkauj Ntxoo lub siab tseem tsis qhuav dej plawv tsis qhuav ntshav rau Yim Laj nws thiaj tau noj tshuaj tuag lawm. Xyoo ntawd yog 1985 nyob rau Vib Nais, twb dhau los 30 xyoo txwm nkaus no.
Tsis ntev los no Yim Laj txawm npau suav tias Paj Huab uas yog nws poj niam thiab nws nkawd tab tom taug kev raws ib tug ntug dej, Paj Huab ua ntej dhau plaws lawm cas Yim Laj txawm pom ib lub moo poob nthav ntawm nws xub ntiag hauv cov xuab zeb. Yim Laj xav zoj tias ntshe yog Yim Laj lub moo ntawm tes hlua tu Nws khaws nkaus tau nws muab saib cas tsis muaj hlua, nws xav zoj tias yog leej twg txawb rau kuv los cas ne. Thaum ntawd Yim Laj tig hlo saib tom qab pom ib tug poj niam tawm plaws tim cov hav nroj ntawm ntug dej los, nws xav zoj tias ntshe yog Nkauj Ntxoo pob. Thaum ntawd Paj Huab kuj tig hlos rov qab los thiab hais rau Yim Laj tias tim koj ne thaum i koj tsis ua zoo hais rau nws ne. Yij Laj saib cas Nkauj Ntxoo cia li nyaj qha los txog ntua tsis hais ib lo lus li tsawv nkaus Yim Laj sab tes xis rub rhe ua Yim Laj tig hlo rov qab. Yim Laj thiaj xav zoj txog tias Nkauj Ntxoo twb tuag lawm, nws nco dheev txog nws zaj khawv koob thaiv dab nws ua kiag thiab tshuab kiag rau pom Nkauj Ntxoo ntog 2-3 nrig nphau sawv tsees rov qab los dua. Nws rov tshuab kiag rau rov ntog qaug pes coog thiab ploj ntais lawm. Tab sis nws tseem pom tus duab khiav rau ub rau no li ua movie es tej ntsuj plig dab. Nws rov ua kiag khawv koob tshuab rau ua ploj nntais lawm nws tsim dheev los, nws kuj tsis xav dab tsi nws tsuas xav tias npau suav ces npau suav xwb.
Twb mus ua hauj lwm tau ob hnub tom qab, muaj ib hnub nws mus ntxuav tes mam nco pom cas nws sab tes xis ntawm lub tsawj teg mus rau sab ntawm tus ntiv tes xoo ntoog dub nciab, tab sis ho tsis mob li. Nws muab xab npus ntxuav npaum cas los tsis los, ua rau Yim Laj kuj ntshai tias tsam yog ua yeeg. Hmo ntawd los txog tsev thiaj muab tshuaj yeeg los pleev tas rau los kuj tsis pom ua cas thiab. Nws thiaj qhia rau Paj Huab tas thiab nws txawm xav txog nws zaj npau suav cas ho yog sab tes uas Nkauj Ntxoo muab chua thiab.Tau muaj 3-4 hnub tom qabv nws mam li maj mam ploj zuj zus lawm.
Thaum kawg Yim Laj thiaj tig rov los xav tias tus neeg uas ncaim lub ntiaj teb mus lawm ntshe nws tus ntsuj plig yeej tseem tsis tau mus thawj thiab tiag.
Koj sim muab coj mus xav seb koj ho yuav ntaus nqi li cas thiab no???
Last edited by Ntsuj_Plig on Thu Mar 31, 2016 11:31 am; edited 3 times in total
Siv sij hawm 7 xyoo Yim Laj thiaj mam coj tau Paj Huab tuaj txog rau teb chaws Meskas raws li nws lub zeem muag tau xav tseg ua ntej thaum Yim Laj thiab Paj Huab nkawd yuav los nyob ua ke. Lub sij hawm tuaj txog Meskas teb zaum no muab xam tau tias yog thawj hnub uas Yim Laj thiab Paj Huab nkawd pib tuaj npaj nkawd lub neej. 7 xyoo uas dhau mus lawm muab suav tias yog txoj kev uas nkawd tho tuaj mus kom txog rau nkawd lub hom phiaj xwb.
Suav txij ntawd los Yim Laj thiab Paj Huab thiaj rau siab ntso sib pab nroos rau lub neej txhawm rau qhov ua kom Paj Huab niam thiab txiv tso siab tau rau nws tus me ntxhais lub neej. Txoj kev uas pib ib lub neej ntawm "0" tuaj mus yeej tsis yooj yim tab sis txawm yog tias nkawd yuav txom nyem rau sab nyiag txiag los tsuav tsis txom nyem rau lub siab lub ntsws xwb nkawd ob leeg yeej txaus siab hlo khwv lawm.
7 xyoo dhau mus lawm uas tau ncaim Paj Huab niam thiab txiv tuaj nws kuj yog lub caij uas muaj hmoo Paj Huab thiab Yim Laj nkawd tau rov tuaj ntsib Paj Huab niam thiab txiv ua lub neej zoo tam li yav thaum ub nyob Roob Cuam Kau. Ib sij huam lub sij huam lub caij nyoog khiav ceev npaum noog muaj tis ya thiaj ua rau Paj Huab niam thiab txiv tau dua nra mus tag lawm los Yim Laj yeej tseem hlub Paj Huab li qub. Ua txhawm rau kom nws niam thiab txiv tus ntsuj plig uas ib txwm muaj txoj kev txhawj txog nws tus me ntxhais tau txais txoj kev kaj siab lug ua ob tug me angel ya yuj yees ua ntxoov tes pov hwm Paj Huab kom nws ua neej nyob tshav ntuj nrig.
Dhau ntawm qhov ncig xyuas lub vaj paj nyob Chieng Mai lawm Yim Laj thiab Paj Huab tseem tau mus saib lub nroog Mae Sai uas yog ciaj teb Phab Mab thiab Thaib ob lub nroog sib npuab. Daim duab uas koj pom ntawm no yog Phab Mab ib lub nroog uas nyob puas rau thaib lub nroog Mae Sai tab sis tsis paub tias Phab Mab lub nroog no hu li cas.
Tom qab ncig xyuas cov nroog thiab tej vaj paj zoo nkauj nyob rau xeev Chieng Mai thiab Chieng Rai tag lawm Yim Laj thiab Paj Huab tseem tau rov mus saib nws niam tij thiab tij laug lub neej txoj kev ua noj ua haus txhawm rau qhov ua kev nco txog 3o xyoo dhau mus lawm uas Yim Laj thiab Paj Huab lub neej ua liaj ua teb nyob Los Tsuas.
Lub sij hawm Yim Laj thiab Paj Huab rov mus nrog nws niam tij thiab tij laug khawb qos zaum no kuj tsis txawv li nkawd lub neej yav thaum hluas uas ib txwm loj hlob nrog lub neej ua liaj ua teb thiab nyob nrog tej suab nas suab noog quaj kho siab zim.
Last edited by Ntsuj_Plig on Fri Apr 01, 2016 10:30 am; edited 1 time in total
Av tsij tuaj sau koj zaj dab neeg mus kom caum cuag lub neej tam sim nov seb Yim Laj thiab Paj Huab nkawv laus li cas lawm thiab nkawv tej me tub kis ne ho nyob li cas ces thaum nov Yij Laj tsuas tuaj piav ib hnub dhau ib hnub seb Yij Laj thiab Paj Huab nkawv ua dab tsi lawm xwb. Yog hais tias nkawv los so noj nyiaj laus lawm ces ntshe nkawv yuav nej hnub zov nkawv tej me xeeb leej xeeb ntxwv lawm xwb lau.